ජල බැස්මද වාස්තු දෝෂ ඇති කරයි

වාස්තු ශිල්පීය ක්‍රම වේදයන්ට අනුව ඔබගේ ඉඩමේ ජල බැස්ම සහ වහලයේ ජල බැස්ම නිසි පරිදි තීරණය කිරීම ඉතාමත් වැදගත් අවස්ථාවක් ලෙස පෙන්වා දිය හැකියි. වාස්තු ශිල්පීය ක්‍රම වේදයන්ට අනුව අපෝධාතුවේ ප්‍රභල බලපෑම ගෘහයට නිතැතින්ම ලැබෙන බව කිව යුතුයි. විශේෂයෙන්ම ස්වභාවික පාරිසරික පද්ධතීන්ගේ සමබරතාවය රැක ගැනීම නිසි ලෙස ජල ධාතුවේ ගමන් මග තීරණය කිරීම වැදගත් වාස්තු මුලධර්මයක් වන අතර ප්‍රයෝගිකවද එය ප්‍රබලව අපට බලපානු ලබන තත්වයකි. විශේෂයෙන් නුතනයේ ස්වභාවික විපත් වල සීග්‍ර වර්ධනයක් දක්නට ලැබෙනවා. ඊට මුලිකවම බලපානු ලබන්නේ , මානව ක්‍රියාකාරකම් බව පර්යේෂණ වලින් තහවුරු වී තිබෙනවා. ස්වභාවික පරිසර පද්ධතිය තුල ජල බැස්ම විධිමත් රටාවකට අනුව සිදුවන අතර මානව ක්‍රියාකාරකම් හේතුවෙන් එම වී ස්වභාවික උපද්‍රව බහුල වීම සිදු වී තිබෙනවා. විශේෂයෙන් නිවාස ඉදිකිරීමේදී භුමියේ සහ ගෘහයේ ජල බැස්ම විධිමත් ලෙස සකස් කර ගැනීමට අවශ්‍ය මුලික සිද්ධාන්ත රාශියක් වාස්තු ශිල්පය තුල පෙන්වා දී තිබෙනවා. මෙම ශිල්ප ක්‍රම යොදා ගැනීම තුලින් ඔබගේ ගෘහයේ ආපෝ ධාතුවේ සිදුවන දෝෂ මග හරවා ගෙන වාසනාවන්ත ගෘහයක ජීවත් වීමේ වාසනාව උදා කරගත හැකි වෙනවා. විශේෂයෙන් නිසි ලෙස ජල බැස්ම සකස් නොකළ විට ගෘහ වාසීන්ට දැනෙන වාස්තු බලපෑම් එල්ල වන බවද කිව යුතුයි. මෙහිදී නිවසේ ජීව කාලය වෙනස් වීම, ලෙඩ දුක් බහුල වීම, මුල්‍ය විනාශය මෙන්ම දේපල හානි සහ පරම්පරාව යාවත්කාලින නොවීම මෙන්ම කීර්ති නාමයට හානි වීම ආදී බලපෑම් ප්‍රබල  කිරීමට ගෘහයේ සහ භුමියේ ජල බැස්මේ සිදු වන දෝෂයක් නිසා සිදුවිය හැකි අයහපත් ප්‍රතිඵල ලෙස පෙන්වා දිය හැකිය. වාස්තු දෝෂයන්ට මෙන්ම ප්‍රයෝගිකව ඔබගේ නිවස සහ භුමිය රැක ගැනීමට උපකාර වන ජල බැස්මේ වාස්තු සිද්ධාන්තයන් පිලිබදව ඔබ වඩාත් උනන්දු විය යුතුයි. ඉඩමේ බෑවුම සහ හැඩය අනුව ජල බැස්මේ රටාව සහ දිශාව තීරණය කිරීම සිදුකල හැකියි. එහිදී ඔබත් ඉඩමේ පිහිටීම පරිදි ජල බැස්ම තීරණය කිරීම සිදු කල යුතු වෙනවා. මෙහිදී ස්වභාවික තත්වයන් අනුව දැනටමත් ඉඩමේ ජල බැස්මේ රටාවන් නිර්මාණය වී ඇත්තේ එයට හානි නොවන ලෙස කටයුතු සිදු කල යුතුයි. උදාහරණයක් ලෙස උතුරු සිට දකුණට බැවුම් සහිත ඉඩමක ජල බැස්ම නිතැතින්ම තිබීම දකුණු දිශාවට සිදු වීම ස්වභාවික තත්වයක් එහිදී එම බැවුම වෙනස් කිරීම කිසිසේත් කල නොහැකි දෙයක් මෙහිදී ඔබ කල යුතු වන්නේ ඔබගේ ගෘහයේ ජල බැස්මේ රටාව වාස්තු සිද්ධාන්ත වලට ගැලපෙන ලෙස ස්වභාවික රටාවට එක් කිරීමයි. එනම් උතුරේ සිට දකුණට බෑවුම් වන ඔබගේ ඉඩමේ ජල බැස්ම හැකිතාක් ගිනිකොන මුල්ලට හැරවීමට වග බලා ගත යුතුයි. නිරිත මුල්ලට වතුර එකතු නොකිරීමට වගබලා ගත යුතුයි. ඒ අනුව ඔබගේ ඉඩමේ බෑවුම අනුව පහත පරිදි ඉඩමේ ජලය බැස්විය යුතු දිශා කෝණය හැකිතාක් සකස් කර ගැනීමට උනන්දු වන්න. 

උතුරේ සිට දකුණට            –       ගිනිකොන

දකුණේ සිට උතුරට            –       වයඹ

නැගෙනහිර සිට බටහිරට    –       වයඹ

බටහිර සිට නැගෙනහිරට    –       ගිනිකොන

ඉහත සිද්ධාන්තයන්ට අනුකුලව ඔබගේ ඉඩමේ ජල බැස්ම පවත්වා ගැනීමට උනන්දු වන්න. සමහර ඉඩම් වල බැවුම දිශා කිහිපයකට  පුළුවන් එවිට ඔබට කල හැක්කේ හැකිතාක් නිරිත දිශාවට ජල බැස්ම නොතබා වෙනත් ඕනෑම දිශාවකට ජල බැස්ම පවත්වා ගැනීමයි. මෙම සිද්ධාන්තය ඔබ දැඩිව අනුගමනය කිරීම ඉතාමත් වැදගත් වෙනවා. ප්‍රයෝගික තත්වය තුල ඔබගේ ඉඩමේ වතුර බැස්ම කුමන දිශාවට තිබුනද කිසිම විටෙක නිරිත දිශාවට වතුර බැස්ම නොතිබීමට වග බලා ගත යුතුයි. ප්‍රධාන දිශාවන් වන උතුරු, දකුණු, නැගෙනහිර හා බටහිර දිශාවන්ට වතුර බැස්ම කිසිම විටෙක දෝෂ සහගත නොවන බවද පෙන්වා දෙමි.

ඉඩමේ ජල බැස්ම අප හැකිතාක් නිවැරදි කර ගැනීමට උත්සහ කල යුතු අතර ප්‍රයෝගිකව අපට සීමා ඇති බැවින් එම ප්‍රයෝගික සීමා වල පවතින දෝෂ ඉවත් කර ගැනීම සදහා ගෘහයේ ජල බැස්ම සකස් කර ගැනීම තුලින් හැකියාව ලැබෙනවා. මෙහිදී ගෘහයේ වහලයේ ජල බැස්ම ඉතාමත් වැදගත් බව පෙන්වා දෙමි. ඔබගේ ගෘහයේ වහලයේ ජල බැස්ම නිසියාකාරයෙන් පවත්වා ගත හොත් ඉඩමේ පවතින දෝෂ පවා මගහරවා ගත හැකි වේ. වහලයේ වතුර බැස්ම තැබීම සදහා සෑම  විටෙකම එම ගෘහයේ මුදුන් යට ලීය යොදා ඇති දිශාව අනුව තීරණය කිරීම සිදු කරනු ලබයි. ඔබගේ ගෘහයේ මුදුන් යට ලීය විහිදී ඇති දිශා දෙක අනුව ඔබගේ වහලයේ ජල බැස්ම පවත්වා ගත යුතු පිළිවෙල පහත දක්වා තිබේ.

මුදුන් යට ලීය                              ජල බැස්මේ දිශාව

උතුරු                         —>         දකුණට         –   උතුරට

නැගෙනහිර                —>          බටහිර          –   නැගෙනහිරට

නිරිත                         —>          ඊසාන           –   ඊසානට

වයඹ                          —>         ගිනිකොන     –   වයඹට

ඉහත වාස්තු ශිල්පීය ක්‍රමය උපයෝගී කොට ගෙන ගෘහයේ වහලයේ වතුර බැස්ම තීරණය කරන්න. ඔබගේ වහලය දෙපල වහලක් නම් ඉහත සිද්ධාන්තයන් නිසියාකාරයෙන් අනුගමනය කල හැකි වුවද පල දෙකකට වඩා වැඩි වූ විට ජල බැස්ම තැබිය යුතු පිළිවෙල පිලිබදව ගැටළු සහගත තත්වයක් මතු විය හැකියි. එහිදී ඔබ විසින් සෑම විටම මුදුන් වහලයේ ජල බැස්ම පෙන්වා දී ඇති ආකාරයට සකස් කරගත යුතු අතර අනෙකුත් පල වල වතුරද එම පලයන්ගේ දිශා බැවුම අනුව තීරණය කල යුතු වේ. මෙහිදී ඔබ විසින් කිසිම විටෙක නිරිත දිශාවට ජල බැස්මක් වහලයේ නොතැබීමට වග බලා ගත යුතුයි.

ඔබගේ වහලයේ වතුර බැස්ම පවත්වා ගැනීමේදී විශාල දෝෂයක් මතු වන අවස්ථාවක් ලෙස නිවසේ පල දෙකක වතුර එකට එකතු වීම සහ නිවාස මැදට වතුර එකතු වීම පෙන්වා දිය හැකිය. මෙවැනි තත්වයක් ඉතාමත් භයානක ප්‍රතිඵල ගෙන දෙන වාස්තු දෝෂයක් බවට පත්වන බව නොකියාම බැරිය. ඔබගේ වහලයේ පල දෙකක වතුර කිසිමවිටක එකට එකතු වීමට ඉඩ නොදිය යුතු අතර නිවාස මැදට ජලය එක වී ගලාගෙන යාමට මෙවැනි ලක්ෂණයක් දැනටමත් ඇත්නම් ඔබ එය ඉතා ඉක්මනින් නිවැරදි කර ගැනීමට සිතිය යුතුයි.

පල දෙකක ජලය එකට එකතු වීමට ඉඩ නොදී පිහිලි යොදා එම ජලය වෙන වෙනම විරුද්ධ දිශාවන්ට බැස්සවීම කල යුතුයි. එවිට ඔබගේ වහලයේ ජල බැස්ම දෝෂ රහිත වේ. වහලයේ ජල බැස්ම නිසියාකාරයෙන් පවත්වා ගැනීමෙන් ඔබගේ නිවසට විශ්ව ශක්තිය කාන්දු වීම ඉතා බලවත් වීම තුල නිවසේ පිහිටි ශක්තීන් ප්‍රබල වී වාසනාව උදා වනු ඇත.

මීලගට ජල බැස්ම සම්බන්ධයෙන් ඔබගේ නිවාස දෝෂ තත්වයන්ට ලක්වන අවස්ථාවක් ලෙස නිවාස මැදින් අප ජල බට යෙදීම, මෙන්ම වැසි ජල බට යෙදීම පෙන්වා දිය හැකිය. ඔබ කිසිම විටෙක නිවසේ බ්‍රහ්ම හසු වන ලෙස වැසි ජල බට සහ අප ජල බට දැමීම නොකළ යුතුයි.එසේම මංගල ද්වාරය  හසු වන ලෙසද අභ්‍යන්තර බට දැමීම නොකළ යුතු වේ. ඔබගේ නිවසේ මුල්‍ය ශක්තිය හීන වීමට මෙය දැඩි ලෙස බලපාන බව කිව යුතුයි. එසේම ඔබගේ නිවසේ මද මිදුල් යොදා තිබේනම් වැසි ජලය නිවාස මැදට එකතු වීමට නිතර නිරන්තරයෙන් සිදු වනු ලැබේ. මෙය දිශා සහගත තත්වයකි. විශ්ෂයෙන් මහනුවර යුගයේ තනි මැද මිදුල සහිත නිවාස ඉතාමත් අසාර්ථක බව කිව යුතුයි. වස්තුවට අනුව අනුරාධපුර යුගයේ බ්‍රහ්ම පාදය හසු නොවන ලෙස නිවාස හා ප්‍රසාද සදහා මැද මිදුල් දෙකක් හෝ හතරක් යොදා තිබුනේ මෙම දෝෂය ඉවත් කරගැනීම සදහායි. ඔබගේ වහලයේ වතුර නිවාස මැදට එකතු වන්නේ නම් නිරිත දිශාව හැර වෙනත් ඕනෑම දිශාවකින් එම ජලය පිට කිරීම සදහා බට යොදා ගැනීම කල හැකි අතර ප්‍රධාන උළුවස්ස ඇති බිත්තියෙන් එලියට බට යෙදීම නොකිරීමටද වග බලා ගත යුතුයි.

ඔබගේ ඉඩමේ හා නිවසේ ශක්තීන් නිසි ලෙස රදවා ගැනීම සදහා ඉඩමේ සහ ගෘහයේ ජල බැස්ම නිසි ආකාරයට පවත්වා ගැනීමට උනන්දු වන්න. සාම විටම ස්වභාවික ජල රටාවන්ට අනුකුලව ජල බැස්ම යෙදීමට උනන්දු විය යුතුයි. වැසි ජලය නිසි දිශාවෙන් බැස  යාම තුල ඔබගේ ගෘහයේ සහ ඉඩමේ ජීව ගුණය නිසි ලෙස රැකෙනු ඇත. එබැවින් ඉපැරණි ඍෂි උතුමන් විසින් අපහට කියා දී ඇති වාස්තු ශිල්පීය උපක්‍රම නිසි ලෙස අවබෝධ කරගෙන ඒවායේ පිහිට ලබා ගැනීමට ඔබ සෑම විටම උනන්දු වන්න. ඔබගේ ඉඩමේ ජල බසමේ දෝෂයක් ඇත්නම් එම දෝෂය අවම කිරීමට ගෘහයේ වහලයේ ජාල බැස්ම නිසියාකාරයෙන් පවත්වා ගැනීම තුලින් හැකියාව ලැබෙනු ඇත. ඒ සදහා ඔබට අවැසි වාස්තු ශිල්ප ඥානය ලබා දීමට මා ගත උත්සාහයෙන් ඔබ ප්‍රයෝජන ගනු ඇති සිතමි.

පේරාදෙණියේ ඩී. යූ. සෙනරත්
උපුටා ගැනීම දිවයින පුවත් පත