ගෘහමූලිකයාගේ ජීවිතයට තීරණාත්මක නිවසේ වහලය හරියටම හදමු

- ලී පුරුද්දන විට යකඩ ඇණ ගහන්න එපා

- මුදුන් යට ලීය නිවසේ හරි මැදට හසු නොවිය යුතුයි

- වහලේ යට ලීයේ දෝෂ නම් එය කෙළින්ම බලපාන්නේ ගෘහමූලිකයාට

නිවසක් තනන්නේ ජීවිත කාලයටම ජීවත් වීමටය. එම නිසා එය වාස්තු දෝෂවලින් තොරව ඉදිකර ගත යුතුය. නිවසක් තැනීමේදී දෝෂ තිබුණොත් එය නිවැසියන්ගේ ජීවිතවලට බොහෝ සේ බලපායි. නිවසේ වහලය ඉදිකිරීමේදී මේ ගැන වඩාත් සැලකිලිමත් විය යුතුමය. නිවසක වහලය දෝෂ සහිත වීම නිවැසියන් ලෙඩ රෝගවලින් පීඩා විඳීමට හේතුවක් වේ.

නිවසක වහලේ මුදුන් යට ලීය ඉතාම වැදගත් වේ. එහි ඇති දෝෂ ඍජුවම බලපාන්නේ ගෘහ මූලිකයාටයි. මුදුන් යට ලීය සඳහා තනි ලීයක් යොදාගත හැකි නම් වඩාත් හොඳය. පුරුද්දා ගන්නවා නම් ලී කැබලි ඔත්තේ සංඛ්‍යාවක් විය යුතුය. එක ලී කැබැල්ලක්වත් ගෘහ මූලිකයාගේ උසට වඩා උස අඩු නොවිය යුතුය.
ලී පුරුද්දන විට කිසි විටෙක යකඩ ඇණ නොගැසිය යුතුය. වඩාත් සුදුසු වන්නේ ‘කිඹුල් කට්ට‘ මූට්ටු ක්‍රමයයි. මුදුන් යට ලීයේ දෝෂ නිසා ගෙදර සාමය සතුට නැති වී යා හැකිය. එසේම ගෘහ මූලිකයාට ලෙඩ රෝග, රැකියා, ව්‍යාපාර ප්‍රශ්න ආදිය ඇතිවිය හැකිය. මුදුන් යට ලීය සඳහා පිහිඹියා හෝ මාදන් ලී කැබැල්ලක් යොදා සක්කයක් ගැසීමෙන් නිවසට ධන ලාභ, සෞභාග්‍යය ලැබෙන බව විශ්වාස කෙරේ.
නිවසේ හරි මැදට හසුවන ලෙස මුදුන් යට ලීය තැබීමද සුදුසු නොවේ. අඩුම වශයෙන් අඟල් 3 - 4 ක්වත් එක් පැත්තකට ගත යුතුය. එසේ නොවීමෙන් ඉහළ විශ්ව ශක්ති රේඛා හා තරංග මඟින් මධ්‍ය ලක්ෂ්‍ය පීඩා වී නිවැසියන්ට මානසික ආතතිය ඇති වීමට පුළුවන. කුරුපා නිවසේ හරි මැදින් නොතැබිය යුතුය.
කුරුපාව ලීවල මූට්ටුවේ මැද්දටම නොගසා කෙළවරකට ගත යුතුය. එම ස්ථානවල යකඩ ඇණ නොගැසිය යුතුය. කුරුපා සඳහා පළල ලීයක් ගෙන කට්ට කපා මුදුන් ලීය එයට බැස්සවිය යුතුය. මුදුන් ලී හා යට ලීවල දෝෂ නිසා නිවැසියන්ට හිසේ අමාරු, මානසික පීඩා, වාත රෝග, හන්දි රෝග, කොන්දේ ආබාධ ආදිය ඇති වේ. වහලයේ හරි මැදට පරාල වැටීමෙන්ද ගෘහ මූලිකයාට නඩුහබ, නීති ප්‍රශ්න ආදිය ඇතිවිය හැකිය.
මුදුන් ලීය හෝ යට ලීයක මූට්ටුවක හරි මැදින් පරාලයක් ගැසීම ගෘහ මූලිකයාට මාරක තරම් විපත් ගෙන දීමට හේතු වේ. ජනෙල් උළුවහුවල හරි මැදට ද පරාල නොයෙදිය යුතු අතර ප්‍රධාන දොරේ හරි මැදට හෝ උළුවහු කඳන්වලට පරාල එල්ල වීමෙන් ගෘහ මූලිකයාට ලෙඩ රෝග සෑදිය හැකිය.
නිවසක වහලයක් ගැසීමේදී මුදුන් යට ලීය සහ පරාල ගැසීමට ගන්නා ඇණ ගණන 108 කි. එය ද සම්මතයකි. රීප්පවලට ගහන ඇණ ප්‍රමාණය ගණනය කිරීමක් නොකරයි. වහලයක් ගසන්නේ නිවසේ වර්ගඵලය අනුවය. ප්‍රධාන වහලය මඟින් නිවස ආවරණය කර ගැනීමට නොහැකි විට වහලයේ පල කීපයක් ගසයි. එවිට ප්‍රධාන වහලයට අඟල් නවයක් පහළින් ගැසිය යුතු වෙයි. එය ශාස්ත්‍රීය ක්‍රමයකි. නිවසක වහලය ගැසීමේදී පල ගණන වැඩි වන තරමට නිවසට වාසනාව ගෙන දෙන බවට මතයක් තිබුණද එය සෑම විටම නිවැරදි නොවේ. නිවසක් අලංකාර කිරීමට වහලේ පල ගණන වැඩි කළද එහි දෝෂ ඇත්නම් එය ගෘහ මූලිකයාට හා නිවැසියන්ට බලපායි.
වහලයක් ගැසීමේදී පල ගණනද ඉතා වැදගත්ය. නිවසකට පල දෙකේ වහලයත්, පල හතරේ වහලයත් සුබ පල ගෙන දෙයි. නිවසක පල හතරක වහලයක් ගහන්නේ හතර පැත්තට බෙදීමෙනි. නමුත් එසේ කළ නොහැකි අවස්ථාවක තවත් පලයක් ගැනීමට සිදු වෙයි. එය දෝෂ නැතිව කර ගත යුතුය. නිවසක වහලයේ පල වැඩි වන විට ඒ අතරින් ප්‍රධාන වහලය වාස්තු විද්‍යාවට අනුවම ගැසීමෙන් ගෘහ මූලිකයාට බලපාන දෝෂ අවම කර ගත හැකිය.
නිවසක වහලය අඩි 30ක් දිග නම් එය කොටස් තුනකට බෙදා වෙන්කර ගත යුතුය. ඉන් පසු මැද අඩි 10 කොටසේ මුදුන් යට ලීය තැබිය යුතුය. එවිට දෝෂ අඩු වෙයි. වහලයක දෝෂ ඇත්නම් මුළු වහලයම ගලවා ඉවත් කළ යුතු නැත. දෝෂය ඇති තැන සොයා එය පමණක් නිවැරදි කර ගත හැකිය.

උපුටා ගැනීම සිළුමිණ