කේන්ද්‍රයෙන් කියෑවෙන මනුෂ්‍යත්වය - පියසේන රතුවිතානගේ විග්‍රහය
මනසින් උසස්‌ නිසා මනුෂ්‍ය යන නම අපට ලැබී තිබේ. තවත් ලෙසකින් කියනවා නම් උසස්‌ ලෙස සිතන්න පුළුවන් ශක්‌තිය තියෙන අය පමණක්‌ මනුෂ්‍ය ගණයට අයත්වෙයි. එයට පටහැනි ලෙස එනම් පහත් ලෙස සිතන අයට මනුෂ්‍ය නම නොගැළපේ. දෙපයින් ගමන් කරතත්. වචන භාවිතා කරතත් නරි වැනි මිනිසුන් අප අතර සිටිති. නරින්ටත් වඩා පහත් ලෙස සිතන අයත් කොතෙකුත් සිටිති. ඇඳුමකින් ශරීරය ආවරණය කරගෙන සිටියත් ක්‍රියාවෙන් බලු, නරි, කොටි, වලස්‌, බූරු පිළිවෙත් තියෙන අය බොහොමයි. අද ඇතිවී තිබෙන සමාජ අරගලයට හේතුවද එයයි. අඹු සැමියන් අතර ඇතිවූ අරගලයක්‌ නිසා කෝප වූ එක්‌ සැමියෙක්‌ සිය නිවසට ගිනි තැබූ බවත් ඒ නිසා එකම පවුලේ හතර දෙනකු දැවී මිය ගිය බවත් එක්‌ පුවතකි. පුතා පහරදී මව මරා දමයි යනු අනෙක්‌ පුවතයි. මෙබඳු ළය කම්පා කරවන පුවත් කොපමණවත් පත්තරවල පළවෙයි. එවැනි පහත් නින්දිත හැසිරීම් තියෙන මිනිසුන් මතුපිටින් හඳුනාගැනීම අමාරුයි. යම් යම් අවස්‌ථාවලදී ඔවුන්ට මුහුණ පෑමට සිදුවන සිදුවීම්වලදී තමා තුළ සැඟවී ඇති නරි ගති, බලුගති, බූරු ගති ඉස්‌මතු වීමට පුළුවනි. එවැනි පහත් ක්‍රියාවන් කරන ඔවුන් හිතන්නේ තමා මහා වීර ක්‍රියාවක්‌ කළ බවයි. මිනිසුන්ගේ ජඩ ගති පියවි ඇසට පෙනෙන්නේ නැත. එය හඳුනාගත හැකි උපැස්‌ යුවළක්‌ තවම විද්‍යාව විසින් නිපදවා නැත. එහෙත් පුරාණාචාර්යවරුන් විසින් ලෝකයාගේ ප්‍රයෝජනය සඳහා ප්‍රදානය කරන ලද උතුම් ජ්‍යොතිෂ තුළින් පමණක්‌ මිනිහා නොමිනිහා හඳුනාගත හැකි බව කිව හැකියි. කෙනකු උපදින විට විශ්වයේ පැවැති ඇතැම් විෂම අවස්‌ථාවන් උපත ලබන්නාගේ ශරීරයට හෝ මනසට ඇතුළු වෙයි. ග්‍රහ යුද්ධයක්‌ පවතින අවස්‌ථාවකදී හෝ ග්‍රහයකු නීචව ගමන් කරන අවස්‌ථාවේදී එසේ නැත්නම් ග්‍රහණයක්‌ පවතින නරක අවස්‌ථාවකදී උපත ලබා හෝ මවුකුස පිළිසිඳ ගන්නා අවස්‌ථාවකදී උපදින්නා තුළ යට සඳහන් කළ අමනුෂ්‍ය ගති විද්‍යමාන වීමට පුලුවනි. එපමණක්‌ නොව ලග්නාධිපති හෝ අට අධිපති ග්‍රහයා නීච වීම, සඳු නීචව සිටියදී තවත් පාප ග්‍රහයකුගේ දෘෂ්ටියට ගොදුරුවීම, ලග්නාධිපති හෝ මනස්‌කාරක සඳු පාප ග්‍රහයන් දෙදෙනකුට මැදිවීම, දුෂ්ට රාශි අධිපති ග්‍රහයන් තිදෙනාම ලග්න රාශියේ පතිත විම වැනි අවස්‌ථාවකදී උපත ලද පුද්ගලයා තුළ යට සඳහන් කරන ලද ජඩගති තැන්පත්ව තිබී කුමන හෝ අවස්‌ථාවකදී මතුවීමට පුළුවනි. එවැන්නන් සමාජයට ජනිත කරන ලද මවුපියන්ගේ වරද නිසාත් ජඩ පිළිවෙත් ඇති කාලකණ්‌aණි මිනිසුන් උපදිති. වඩාත් නින්දිත පුද්ගලයන්ගේ උපතට මාපියන්ගේ වැරදි හැසිරීම් හේතුවෙයි.
මිනිසුන්ගේ ගති මහා පුදුමයි. තමාගේ කාර්ය සිද්ධ කරගන්නා තෙක්‌ ප්‍රසිද්ධියේ කෙනකුගේ ගුණ වර්ණනා කරනවා. කාර්ය ඉටුකරගත් පසු ඒ කටින්ම අපවාද කරනවා. බොරු කියනවා. නිර්නාමික ලියුම් යවනවා. බොරු ආරංචි පතුරුවනවා. එතැනදී ඔහු නරින්ටන් වඩා බල්ලන්ටත් වඩා පහත් තත්ත්වයට පත්වෙනවා.මෙබඳු චරිතයක්‌ නිදසුන් මගින් විග්‍රහ කරන්න පුළුවනි. වෘශ්චික ලග්නයෙන් තුලා නවාංශකයෙන් උපන් අමනුෂ්‍ය ගති ඇති මිනිහෙක්‌ අංගොඩ පැත්තේ හිටියා. ඔහු ඉපදී තිබුණේ රාත්‍රි වේලාවක. රෑ උපත ලබන අයගේ පියකාරක ග්‍රහයා සෙනසුරු බවත් දිවාකල්හි උපත ලබන අයගේ පියා රවි බවත්, ජ්‍යොතිෂයේ සඳහන් වෙනවා. මේ කේන්ද්‍රයේ අට අධිපති බුධ නීචව, යට සඳහන් කළ (8 වැන්නේ සිටි) පියකාරක ශනිට දෘෂ්ටි හෙළනවා. එහි අදහස අනියම් සබඳතා මත ලද උපතක්‌ බවයි. සෙනසුරා පියකාරකයා වී 8 වැන්නේ සිටින නිසාත් එම ශනි හෙවත් සෙනසුරු රාහු සමඟ යෝග වූ නිසාත් ජන්මියාගේ පියා තහනම් ගහක ගෙඩි කඩා ඇති බවත් පැහැදිලි වෙනවා. මවුකාරක සඳුට 8 අධිපති බුධගේත් පාපී කුජගේත් දෘෂ්ටිය ලැබී ඇති නිසාත් මෙම තත්ත්වය පැහැදිලි වෙනවා. ඒ උපත නීච උපතක්‌. ඔහුගේ ආධ්‍යාත්මය දෘෂ්ට ගතිගුණවලින් පිරී ගිය එකක්. හෙතෙම සමාජයට මොන තරම් පිළිකුලක්‌ වූයේදැයි කියතොත් ඔහුගේ පියාගේ මළ ගෙදරට අසල්වැසි කිසිවෙක්‌ ගියේ නැහැ. නීචව උපන් නිසා මාපියන් පවා නිගරුවට ලක්‌වන බවට එය හොඳම නිදසුනක්‌. ශ්‍රේෂ්ඨ දරුවන් හතර දෙනකු ගැන ජ්‍යොතිෂයේ සඳහන් වෙනවා. ඒ උගත් දරුවා, ධනවත් දරුවා, බුද්ධිමත් දරුවා සහ වංශය බබළවන දරුවා කියන හතර දෙනයි.එහෙම දරුවන් උපන්නට උපත ලබන විට හෙවත් පිළිසිඳ ගන්නා විට තක්‌කාල කේන්ද්‍රය පිරිසිදු එකක් විය යුතුයි. ඒ අවස්‌ථාව දන්නේ ජ්‍යොතිෂවේදියා පමණයි. මංගල නැකත හදන දිනය හා නැකත නියම කරන අවස්‌ථාවේදී ජ්‍යොතිෂවේදියා ඒ තත්ත්වය ගැන විමසිලිමත් විය යුතුයි.බියගම පළාතේ එක්‌ ජ්‍යොතිෂවේදියෙක්‌ සිටියා. ඔහුගෙන් මංගල නැකතක්‌ ලබාගත් විට හෙතම රහස්‍ය කවරයක "මෙය විවෘත කිරීමේ අවසරය ඇත්තේ මනාල යුවළට පමණි." කියා යුවළට සමාගමයේ යෙදිය යුතු ශුභ අවස්‌ථාවන් සඳහන් කර දෙනවා. එවිට නීචයන් උපදින්නේ නැහැ. හැම ජ්‍යොතිෂවේදියාම ඒ ක්‍රමය අනුගමනය කරන්නේ නැහැ. ලිතේ දක්‌වා ඇති ශුභ දිනයක්‌ තෝරා යහපත් හෝරාවක්‌ පමණක්‌ ලබා දෙනවා. එදින පුත්‍රකාරක ගුරුගේ ගමන කෙබඳුද? පුත්‍රස්‌ථානය පාප ග්‍රහයන්ගෙන් කිළිටි වී ඇද්ද? යනාදී වශයෙන්. එයින් ඔබ්බට කිසිවක්‌ හිතන්නේ නැහැ. ඒ නිසා සිවුපා සතුන් උපදින වේලාවල් තුළදීත් දරු පිළිසිඳ ගැනීම් සිදුවෙනවා. පිළිසිඳ ගනු ලබන ලග්නයට නිෂේක ලග්නය යන නම දී තිබෙනවා.එම නිෂේක ලග්නය දුර්වල වුවත් උපත ලබන තක්‌කාල ලග්නය යහපත්ව යොදා ගන්නේ නම් සමාජයට බරක්‌ නැති හොඳ දරුවන්ගේ උපත් නිසා සමාජය සුන්දර වෙයි. එහෙත් දරු ප්‍රසූතිය සැත්කම්වලට පමණක්‌ සීමාකර ඇති ඇතැම් වෛද්‍යවරයෙක්‌ දරු ප්‍රසූතිය කරන්නේ ගොම්මන් වෙලාවක හෝ තක්‌කාල කේන්ද්‍රය අන්තිම නරක වෙලාවකයි. එසේ උපදින අය සමාජයට හිරිහැරයක්‌. උසාවි තුළ නඩු හබ වැඩි වන්නේත්, හිරගෙවල් පිරී ඉතරී යන්නේත් අපරාධකාරයන් මේ සමාජයේ බහුලවීම නිසා නම් එසේ වන්නේ කුමන වරදක්‌ නිසාදැයි සිතා බැලීමේ යුතුකමක්‌ වගකිවයුත්තන්ට වෙයි.
එක්‌තරා ජ්‍යොතිෂඥයෙක්‌ ඒ ගමේ විවාහයක්‌ සඳහා නැකැත් හදා ගැනීමට තමා වෙත නොපැමිණ වෙනත් ජ්‍යොතිෂවේදියකු වෙත ගිය බවක්‌ දැනගත්තොත් එම මඟුල කෙරෙන්නට ඉඩ දෙන්නේ නැත. මනාලියගේ හෝ මනාලයාගේ චරිතය විනාශ කරමින් මඟුල කඩා දමයි. මේ නින්දිත ක්‍රියාව නිසා ඒ ගමේ කාන්තාවන් වැඩි දෙනකුට විවාහය අහිමි විය. ඔවුන්ගේ විවාහ බිඳ දැමීමට තමාට හැකිවීම ගැන ඔහු ආඩම්බර වෙයි.අහිංසක ප්‍රීතිය නිසා පුද්ගලයා සුවපත් වෙයි. තිරශ්චීන ප්‍රීතියෙන් හිනැහෙන්නා කුෂ්ට රෝගියකු බවට පත්වෙයි. පොතු කබර රෝගීන් වැඩි දෙනකුගේ කේන්ද්‍ර පරීක්‍ෂා කර බලන විට ඒ තත්ත්වය පැහැදිලි වේ.භාරතයට තරුවක්‌ බඳු වූ නේරු තුමාගේ ලග්නාධිපති ලග්නයේම ස්‌ව ක්‍ෂත්‍රව සිටියේය. 71 විප්ලවය මෙහෙයවූ ශ්‍රී ලංකා පුත්‍රයකුගේ ලග්නයේම සඳු නීචව සිටියේය. ශ්‍රී ලංකාවට ඉටුදෙවියකු බඳු වූ අනගාරික ධර්මපාල තුමාගේ ලග්නාධිපති උච්චව කේන්ද්‍රස්‌ථානයක විය. ඩී. එස්‌.සේනානායක මහතාගේත් එසේය. වලිසිංහ හරිශ්චන්ද්‍රතුමාගේ ලග්නාධිපති බුධ ලග්නයේම එම ස්‌ව ක්‍ෂේත්‍රව සිටියේය. ඒ නිදසුන් කිහිපය දැක්‌වූයේ ශ්‍රේෂ්ඨ පුද්ගලයන්ගේ ලග්නාධිපති පවිත්‍රව බලවත්ව සිටීම නිසා සිය උපත සමාජයට වැඩදායක බව පෙන්වීමය. නරුමයන්ගේ ජන්ම කේන්ද්‍ර තූළින් ඔවුන්ගේ පහත් ලක්‌ෂණ හෙළිදරව් වේ. නිසිලෙස උපත සිදුනොවන දරුවනට මනුෂ්‍යත්වය පිළිබඳ හැඟීම් නැතැයි සහේතුකව කරුණු ඉදිරිපත් කළ හැකිය. රටේ පහත් රුචිය උපත් වන්නේ උපතේ වරදින් යෑයි සිතේ. කුඩු භාවිතයට නැඹුරු තරුණ පරපුර වැඩි වෙමින් පවතී, කාමරාග්නියෙන් දැවෙන මානසිකත්වය නිසා කාම අපරාධ වැඩිවෙයි. ගුරුවරයා විවේචනය කරන ගුරුවරයාට පහර දෙන සිසුන් ගැනත් සිසුවියන් කෙළෙසන ගුරුන් ගැනත් නිතර නිතර වාර්තා වෙයි. මේ සියල්ලට හේතුව වැරදි අවස්‌ථාවන්හි උපත ලබන දරුවන් නිසාය.ලග්නාධිපති නීච වීම, ලග්නාධිපති 8 වැන්නේ වීම සිකුරු පාප පීඩා වීම හෝ පාප කර්තරීවීම වැනි හේතුවක්‌ නිසා පහත් හැඟීම් ඇති චරිත නිර්මාණය වේ.
සැකසුම - දීප්ති ප්‍රමිතා අධිකාරි
උපුටා ගැනීම දිවයින
