දුකට අධිපති සෙනසුරු ගේ ගෝචර ගමනේ ඵල විපාක
ශනි ලග්නයේ,
ගෝචර ගමනින් ශනි ලග්නයේ ගමන් කරන කාලය සැලකෙන්නේ අපලදායක කාලයක්‌ වශයෙනි. ඒ කාලය තුළ සිතට කරදර ඇතිවේ. විභාග වලින් නඩුහබ වලින් පරාජය අත්වේ.
පවුලේ අයටද අගුණය. ශරීර සනීපය බිඳ වැටෙයි. කකුල්වල ආබාධ ධන හානි ඇතිවේ.
ආත්ම ශක්‌තිය පිරිහෙයි. අඹු සැමි භේද ඇති වෙයි. එසේ හෙයින් ගෝචරයෙන් ශනි ලග්නයේ ගමන් කරන කාලයේදී ලද දෙයින් සතුටු වෙමින්, ඉවසීමෙන් කටයුතු කළ යුතුය.
ශනි දෙවැන්නේ,
ගෝචර ගමනින් සෙනසුරු 02 වැන්නේ ගමන් කරන කාලයේදී සැප පහසුකම් නැති වෙයි.
ශරීරය දුර්වර්ණ වෙයි. ධනහානි හා අනතුරු විපත් ඇතිවේ. අඹුදරුවන්ට
විපත්තිදායකය. රැවටිලිවලට හසුවේ. ඥතීන්ට මාරක විපත් ඇතිවේ. ශනිට අශුභ
දෘෂ්ඨි වැටීමෙන් අපල වැඩිවේ. දෙවැන්න ශනිට ශුභ රාශියක්‌ වුවහොත් තදබල අපල වැලකේ.
ශනි තුන් වැන්නේ,
තුන්වැන්න ශනිට ශුභ රාශියක්‌ වී ශුබ දෘෂ්ඨිද වැටුනහොත් දියුණුව ඇති වේ. අසනීප වලින් සුවය ලැබේ. රැකීරක්‍ෂාවලද දියුණුව ඇතිවේ.
ශනි සතර වැන්නේ,
ශනි 04 වැන්නේ ගමන් කරන කාලයේදී වාත රෝග හිරිවාත අමාරු හටගනියි.
වැඩිහිටියකුට මාරක ඇතිකළ හැකිය. විභාග වලින් අසමත් වේ. සිතේ සතුට නැතිවේ.
අසල්වාසීන් සමග අමණාපකම් ඇතිවේ.
ශනි පස්‌වැන්නේ,
අවුල් වියවුල් වැඩිවේ. ඉක්‌මන්කම නිසා කරදර ඇතිවේ. බඩේ අමාරු ඇතිවේ.
දරුවකු ලැබුණ හොත් ඔහුද අවාසනාවන්තයකු වේ. අර්ශස්‌ රෝග හටගත හැකිය. දරුවන්ට
අගුණය.
ශනි සය වැන්නේ,
ගමන් කරන විට සිතේ සතුට ඇතිවේ. ලෙඩ රෝග වලින් සහනයක්‌ ඇතිවේ. නිතර සිතවතුන්ගේ ඇසුර ලැබේ. ශරීරයේ බර වැඩිවේ. සමාජ ආශ්‍රය වෙත යොමුවේ.
ශනි සත්වැන්නේ,
අඹුදරුවන්ට දුක්‌ කරදර පීඩා ඇතිවේ. තමාට වාත ආබාධ, හිරිවාත අමාරු, අජීර්ණ රෝග හටගනියි. තද ලෙස සිත් වේදනා
ඇතිවේ. රැකියාව හෝ ආදායම් මාර්ගවලට කරදර බාධා ඇතිවේ. ගෙදර එපාවේ.
ශනි අටවැන්නේ,
ශනි 08 වැන්නේ, ගමන් කරන කාලයේදී ලේ විෂවීම් – ලේ කෝප දෝෂ රෝග නිතර අසනීප ඇති කළ හැකිය. මලප්‍රේත දෝෂ, තනිකම් දෝෂ වලින් කරදර ඇති වේ. ශනි ගෝචර ගමනේදී තදබල ලෙස 08 වැන්නේ පීඩා වුවහොත් මාරක හා සමාන දුක්‌
ඇතිවේ. පවුලේ වැඩිහිටියන්ටද දුක්‌ කරදර හා මාරක විපත් ඇති කළ හැකිය.
ශනි නවවැන්නේ,
ගෝචරයෙන් ශනි නවවැන්නේ ගමන් කරන කාලයේදී ස්‌ථාන වෙනස්‌වීම් ඇති කළ
හැකිය. ධනය ලැබුණත් ඉක්‌මණින් විනාශ වේ. රාජ දඬුවම් ලැබෙන්නට පවා හැකිය. පපුවේ අමාරුවක්‌ හටගනියි. කටයුතු සියල්ල බිඳ වැටේ. සතුරු කරදර ඇතිවේ. ඔත්පල වන තරමට අසණීපයක්‌ හටගත හැකිය. පිනට දහමට අකමැති වේ. අවාසනාවන්ත ලෙස කාලය ගෙවී යයි.
ශනි දසවැන්නේ,
ශනි දසවැන්නේ ගෝචරයෙන් ගමන් කරන විට, හෘදයාබාධ, දණහිස්‌වල ආබාධ ඇතිවේ.
සිත් තැවුල් නිතර ඇතිවේ. ඉගෙනීමට හානි සිදුවේ. රැකීරක්‍ෂා බිඳවැටෙන්නට
හැකිය. ශනිට ශුභ දෘෂ්ඨි වැටුනහොත් පමණක්‌ තරමක සහනයක්‌ ලද හැකිය.
ශනි එකොළොස්‌ වැන්නේ,
ගෝචරයෙන් ශනි 11 වැන්නේ ගමන් කරන කාලයේදී ආදායම් තත්වය හොඳ වේ. ශනිට ශුභ රාශියක්‌ වුවහොත් දියුණුව ඇතිවේ. රැකීරක්‍ෂා දියුණු වෙයි. මේ කාලයේදී තමාගේ වාසිය පිණිස නරක ක්‍රියාවලටද පෙලඹිය හැකිය. මේ කාලයේදී හොඳ හා නරක යන දෙකටම සිත ඇදී යයි.
ශනි දොළොස්‌ වැන්නේ,
ගෝචරයෙන් ශනි 12 වැන්නේ ගමන් කරන, කාලයේදී රෝගාබාධ හා ධන හානි වලින්
කරදර ඇතිවේ. ශරීරයේ තුවාල හටගනියි. බලාපොරොත්තු කඩවී යයි. හිරිහැර තර්ජනවලට
පවා ලක්‌වේ. පවුල් ජීවිතයට හානි ඇතිවේ. ජීවත්වීම පවා වධයක්‌ වේ.
අවාසනාවන්ත ලෙස ස්‌ථාන වෙනස්‌වීමට කරුණු යෙදේ. උත්පත්තියේදී ශනි ග්‍රහයා 03,06,10,11,12 යන රාශියක සිටිවිටද 12 වැන්න
මකර හෝ කුම්භ රාශි වූ අයටද ශනි 12 වැන්නේ ගමන් කරන කාලයේදී දුර්විපාක
වැඩියෙන් ලැබෙන නමුත්, ධනය හා අලුත් හිතවතුන් ලැබෙන්නටද හැකිය.
22 වන දෙර්කාණාධිපතියා
ශනි ග්‍රහයා 22 වන දෙර්කාණාධිපතියා බවට පත්වන
1. මිථුන ලග්නයේ 01 වන දෙර්කාණයට අයත් – තුලා, වෘශ්චික, ධනු යන නවාංශකයකින් උපන් අයටද
2. කටක ලග්නයේ 01 වන දෙර්කාණයට අයත් වන කටක – සිංහ, කන්‍යා යන නවාංශකයකින් උපන් අයටද
3. තුලා ලග්නයේ 03 වන දෙර්කාණයට අයත් – මේෂ, වෘෂභ, මිථුන යන නවාංශකයකින් උපන් අයටද
4. වෘශ්චික ලග්නයේ 03 වන දෙර්කාණයට අයත් මකර – කුම්භ, මීන, යන නවාංශකයකින් උපන් අයටද
5. කුම්භ ලග්නයේ 02 වන දෙර්කාණයට අයත් – මකර, කුම්භ, මීන යන නවාංශකයකින් උපන් අයටද, ශනිගෙන් ලැබෙන්නේ ඉතා අශුභ පලමය.
රාශි භේදයකින් තොරව, තිර, චර, උභය යන රාශි භේදයකින් තොරව
1. පළමු වන දෙර්කාණයට 08 අධිපතියාත්
2. දෙවන දෙර්කාණයට 12 අධිපතියාත්
3. තුන්වන දෙර්කාණයට 04 වැන්න අධිපතියාත්
කේන්ද්‍රයක 22 වන දෙර්කාණාධිපතියා බවට පත් වන බව ජ්‍යෙතිෂ නියමය වේ.
ජීවිතයේ නිස්‌සාර බව :
සෙනසුරු 22 වන දෙර්කාණාධිපතියා වී උපදින අයට ඉක්‌මණින් ජීවිතයේ නිස්‌සාර බව වැටහේ. එයට හේතුව ලෝකයේ පවතින දුක ඔවුන්ට උරුමවීමය.
අපල සමනයට : සෙනසුරු 22 වන දෙර්කාණාධිපතියා වී උපදින අය, තෙරුවන්ට මල් පහන් සුවඳ දුම් පුදා “දසදිසා පිරිත” හා “කරණිය මෙත්ත සූත්‍රය” කියා විෂ්ණු දෙවියන්ට පිං දීමෙන් අපල දුරුකර ගත හැකිය. නමුත් නිතර එසේ කළ යුතුය.
යෝගකාරක ශනි : ශනි යෝගකාරකයා වී උපන් අයට ශනිගෙන් ශුභපල ලැබේ. එසේ නමුත් ශනි දුර්වලව අශුභ දෘෂ්ඨි ලබන කාලවලදී ජීවිතයේ නිස්‌සාර බව දැනේ. දුක ඇතිවේ.
උපුටා ගැනීම දිවයින
