සඳු ගේ අපලය දුරලන්න අම්මා අමතක නොකරන්න
ඔබේ කේන්ද්‍රයේ සඳු හෙවත් චන්ද්‍රයාගේ පිහිටීම අනුව පෙන්වන ශුභ ඵල නැතහොත් අපල සහ එම අපල සඳහා කළ යුතු ප්‍රතිකර්ම හෙවත් වළක්‌වා ගත හැකි ක්‍රමද මෙම ලිපියෙන් සාකච්ඡා කිරීමට බලාපොරොත්තු වෙමු.
පුර පොහොය දිනවල සඳු බලවත් වෙයි. එමෙන්ම මැදියම් රාත්‍රිය උපරිම දීප්තිය විහිදුවයි. ඔබ උපන්නේ එම මැදියම් රාත්‍රියේ නම් ඔබේ කේන්ද්‍රයේ හතරවන කොටුවේ සඳු සටහන් වනු ඇත. එය දිග් බලය නම් බලය ලබයි. එමෙන්ම සඳු වෘෂභ රාශියේ උච්ච බලයද කටක රාශියේ ස්‌වක්‍ෂේත්‍ර නම් බලයද ලබයි. පුර සඳු වෘෂභ හා කටක යන රාශිවල තැන්පත් වන විට බලවත් වන්නේය.
එමෙන්ම වෘශ්චික රාශියේ සිටින විට සඳු නීච නම් දුර්වල තත්ත්වයට පත්වෙයි. අව හෙවත් කළුවර පක්‍ෂයේ සඳුද වෘශ්චික රාශියේ සිටින සඳුද දුර්වලවී ශුභ ඵල අහිමි බව පෙන්වයි. දවාලට වඩා රාත්‍රියට සඳුගේ බලය වැඩි බව අමුතුවෙන් කිව යුතු නොවේ.
සඳු බලවත් අවස්‌ථාවල උපදින්නේ පෙර ආත්ම භාවයන් හිදී ඊට අදාළ බලවත් කුසල කර්ම කළ අය පමණකි. සඳු අධිපති වන මහ රහත් මෙහෙණින් වහන්සේලාද සිල්වත් දසසිල් මාතාවන් ද තමන්ගේ මෑණියන්ද ගුරුතුමිය කිරි අම්මා හෙවත් ආච්චි, සිල්වත් කාන්තාවන් හා පත්තිනි දේව මෑණියන් මේ ගණයට ඇතුළත් වේ. පෙර ආත්මයේදී මව ඇතුළු ඉහත උතුම් කාන්තාවන්ට උදව් උපකාර කළ, වන්දනා කළ, ගරු බුහුමන් කළ අයගේ කේන්ද්‍රවල සඳු බලවත්ය. එවැනි අයට උසස්‌ චින්තන ශක්‌තියක්‌ ඇති වේ. ජ්‍යෙතිෂයේදී සඳු සිතට අධිපති යෑයි කියනු ලබන්නේ එබැවිනි.
වහා වැටහෙන ශක්‌තියක්‌ ඇති මෙවැනි අය කාරුණික වෙයි. මෛත්‍රී සහගතව සිතයි. කලබල නොවේ. නිර්මාණාත්මක කුසලතාවලින් පරිපූර්ණ වෙයි. පිටට පෙනෙනවාට වඩා ඇතුළතින් ක්‍රියාත්මක වෙයි. ගණිතය, ජ්‍යෙතිෂය වැනි විෂයයන්ට දක්‍ෂ මෙන්ම තර්ක කිරීමේ ශක්‌තියද ලබයි. ඉතා ගුණවත් මවක්‌ ලබන එවැනි අය කාන්තා පක්‍ෂයේ උසස්‌ අයගේ ආශිර්වාදයද නිරන්තරව ලබන කෙනෙක්‌ වන්නේය.
ඔබේ කේන්ද්‍රයේ සඳු බලවත් දැයි බලන්න. එසේ බලවත් වූ පූර්ණ චන්ද්‍රයා කේන්ද්‍රයේ පළමුවැන්නේ කාරුණික, බුද්ධිමත් කෙනෙකි. හතරේ නම් මව් පාර්ශ්වයෙන් බොහෝ දේ ලැබේ. තවද ගෙවල් දෙකක උරුමකරු වෙයි. 7 වැන්නේ නම් යහපත් බිරිඳක්‌ හෙවත් “මාතෘ භාර්යාවක්‌” ලබන කෙනෙකි. 10 නම් උසස්‌ තනතුරු ලැබේ.
සඳු බලවත්ව 2 හෝ 11 නම් සෑහෙන ධනයක්‌ ලබන එමෙන්ම පින් රැස්‌කරන රට පුරාම මිතුරන් ඇති කෙනෙක්‌ වෙයි. 9 නම් විදේශවලින් භාග්‍යය උදාවන්නේය. 5 නම් උසස්‌ ඉගෙනීමක්‌ ද දරුවන් දෙදෙනෙක්‌ද ලබන අතර 6, 8, 12 යන තැනක නම් සතුරු රෝග, මාරක බාධක, ව්‍යාධි, පාඩුවලින් බරපතල පීඩා ඇති කරන්නේ නැත.
සඳු නීච හා දුර්වලව උපන් අයගේ මෙම තත්ත්වය සම්පූර්ණයෙන් වෙනස්‌ව අකුශල කර්ම විපාක දෙනවා ඇත. එසේ වන්නේ අම්මා ඇතුළු උසස්‌ කාන්තාවකට කරන ලද අකටයුතු කම් හා නොසලකා හැරීම් හේතුවෙනි. පෙර ආත්මවල මත්පැන් භාවිතා කළ අයටද එහි අහිතකර බව පෙන්වන්නේ දුබල වූ සඳුගෙනි.
එවැනි සඳු දුර්වල වී කේන්ද්‍රයේ පළමුවැන්නේ තැන්පත් වූ විට මන්දබුද්ධික හෙවත් බුද්ධි හීන කෙනෙක්‌ වනවා ඇත. දෙවන හෝ එකොළොස්‌වන භාවවල නම් ධනය අහිමි වන්නේ අමාවක සඳ මෙනි. 3 වැන්නේ නම් කම්මැලි අලස කෙනෙකි. 4 නම් උපතේ දීම මව්ගේ සැප අහිමි වෙයි. සෙම් රෝගයෙකි. මුල් දේපළවල අවුල් ඇති වේ. 5 නම් ඉගෙනීම දුර්වලය. 6 නම් සතුරු හා රෝග පීඩාද 7 වැන්නේ නම් විවාහය අසාර්ථක වීමද පෙන්වයි. පළමු විවාහය බිඳ වැටීමට ඉඩ තිබේ. 8 නම් ජලයෙන් විපත් ද 9 නම් අවාසනාව ද උදා වේ. 10 නම් කිසිදු උසස්‌ තනතුරක්‌ ලැබෙන්නේ නැත. 12 නම් අපේක්‍ෂා බලාපොරොත්තු අන්තිම මොහොතේ කඩවන බව පෙනේ.
උපතේ දී සඳුගේ බල දුබලකම මත ඉහත ශුභා ශුභ ඇති කරයි. එසේ වන්නේ සඳුගේ දශා කාලයක්‌ ලබන විටය. සඳු දුර්වල අයගේ සඳු පිහිටි රාශිය හරහා සෙනසුරු ග්‍රහයා ගමන් කරන විට ඒරාෂ්ඨක අපලය උදාවන්නේය. ඒ කාලය තුළ ජන්මියාට බොහෝ කරදර, මාරක බාධක, සිත් තැවුල් බහුල කරයි. සමහර විට ජීවිතයෙන් තොර කරවයි හෙවත් මරණයට පමුණුවයි.
එපමණක්‌ නොව සඳුගේ බලය මුළු පරිසරයටම බලපාන බව පෙනේ. එහෙත් එය පෙර කර්ම හෙවත් “කම්ම නියාම” මත වන බලපෑමක්‌ නොව “සෘතු නියාමය”ක්‌ වශයෙනි. සඳු පුර පක්‍ෂයේ බලවත් වන විට බොහෝ විපර්යාස ඇති වේ. ඇදුම, උමතු බව ආදී රෝග උත්සන්න වීම, නිර්මාණාත්මක සිතිවිලි පහළ වීම, සිත ප්‍රබෝධමත් වීම මෙන්ම ගස්‌වල තෙත ගතිය ඉහළ යැමද එවැනි සිදුවීම්ය. පෝය දිනවල ගස්‌ කපන්නේ නැත. එම ගස්‌වල ලී ඉක්‌මනින් ගුල්ලන් ගසන බැවිනි. කළුවර හෙවත් අවපක්‍ෂයට ගස්‌ කැපීමෙන් එහි කෘමි උවදුරු නැති වෙයි.
ඉහත සඳහන් කළේ සඳ හෙවත් චන්ද්‍රයාගේ විවිධ වෙනස්‌ වීම් මනුෂ්‍යයාට වෙන් වශයෙන්ද පොදුවේ පරිසරයටද බලපාන ආකාරයයි. තම හඳහනේ සඳු උපතින් දුර්වල නම් ද දුර්වලව ගමන් කරන අතර දශාවක්‌ ද ලබා ඇත්නම් ඔබටද සඳුගේ අපල ඇතිවීම ස්‌වභාවයකි.
අකුසල කර්ම ශක්‌තීන් ගේ ප්‍රතිඵලයක්‌ වශයෙන් සඳුගේ අපලය හඳුනාගත් විට එය සඳහා කළ යුතු ප්‍රතිකර්ම කිරීමෙන් අපල යටපත් කර ශුභ ඵල උදාකරගත හැකි වන්නේය. “හේතුව” ඉවත් කළවිට “ඵලය” ඉවත්වන බැවිනි. අකුශල කර්ම නමැති “හේතුව” පව් සේදීම, ගල් පැළඳීම, රටහැර යැම වැනි ක්‍රියාවලින් පමණක්‌ ඉවත්කළ හැකි නොවේ. ඊට කළ යුතු වන්නේ අදාළ කුසල කර්ම නිතර නිතර කිරීමයි. උණු වතුරට සිසිල් ජලය එක්‌කරන විට නිවී යන්නාක්‌ මෙන් මෙම ශාන්ති කර්මවල යෙදීමෙන් අපල දුරුවන්නේය.
සඳුගේ අපලය මග හරවාගෙන ශුභ ඵල උදාකරගත හැකි ඉතා විශ්වාසවන්ත ක්‍රමයක්‌ වන්නේ ස්‌වකීය මවට ගරු සත්කාර කිරීමයි. ගෙදර බුදුන් යන උතුම් ගෞරව නාමයකින් පිදුම් ලබන අම්මා වූ කලී සෙත් පැතීමෙන් දරුවන්ට ශක්‌තිය දිය හැකි දිව්‍යමය බලයක්‌ ඇති කාන්තාවයි. තවද මෙහෙණින් වහන්සේලවහන්සේලා, දසසිල් මාතාවන් ඇතුළු සිල්වත් ගුණවත් කාන්තාවන්ට උපස්‌ථාන කිරීම හා බුද්ධ පූජා බෝධි පූජා තබා පත්තිනි දේවියට පිං පැමිණවීමත් සඳු අපල දුරු කර ගැනීමට හේතුවනවා ඇත.
මෙහිදී සඳු හිමි අංක, සඳු දින, සඳු හෝරා සහ සඳු හිමි ද්‍රව්‍ය පූජා තැබීමට පුරාණ සෘෂිවරුන් නියම කර තිබේ. සමන්පිච්ච මල්, දියේ පිපෙන මල්, සුදුමල් සුදු කොඩි, මුතු දිවුල් බීම, දිවුල් කැඳ හා කිරි ආහාර පූජාවට සුදුසුය. දියේ සිටින මාළුන්ට ආහාර දීමද සුදුසුය. පූජා තබන විට බෝධිමළුවේ උතුර බලා වාඩිවීම මගින් ඉක්‌මනින් සිත එකඟ වන්නේය.
පිරුවානා පොත් වහන්සේ හෙවත් මහ පිරිත් පොතේ ඇති “චන්ද පිරිත” භාවිතයට සුදුසුය. පැන් කලයට මෙම පිරිත 1100 වරක්‌ පිරිත් කර බෝධිය නහවා කොටසක්‌ බීම විශේෂ ශාන්ති කර්මයකි. පූජාව අවසානයේ මෛත්‍රි භාවනාව කර සෙත්පතා දෙවියන්ට පින් දෙන්න.
සඳු අපලය ඇතිනම් ඔබ විසින් වතුරෙන් ප්‍රවේශම් වීමට මතක තබා ගැනීම ඉතා වැදගත්ය. සවසට හා රාත්‍රියට නෑම, පිණිබෑම, පිහිණීම, මුහුදේ රැල්ල පෑගීම වැනි ජල ක්‍රීඩා කිරීම සුදුසු නැත. නවගුණ, රතන, අභිසම්භිධාන, යන්ත්‍රයක්‌ පැළඳ ගැනීම විශේෂ ශාන්ති කර්මයකි.
උපුටා ගැනීම දිවයින
