ජේසුස් ක්‍රිස්තුන් වහන්සේගේ ජන්ම පත්‍රය
උඳුවප් මස පුර අටවක තිථිය ලත් සඳුදා දිනක මධ්‍යම රාත්‍රි 12.00ට පමණ බෙත්ලෙහෙමේ ගව මඩුවකදී ලොවටම අසිරිමත් වූ සුවිශේෂී උපතක් සිදුවිය. ඒ සාමය සමාදානය ලොවට බෙදා දුන් සාමයේ කුමාරයා ලෙස විරුදාවලි ලත් ජේසුස් ක්‍රිස්තුස් වහන්සේගේ උපතයි. ලෝක ජනතාවගේ ජීවිත හිත සුව පිණිසත් ජනතා මෙහෙවරටත් තම ජීවිතය කැප කළ ලෝකයේ උපන් ශේ්‍රෂ්ඨ උත්තමයන් බොහෝ දෙනෙක් මෙලොව ජනිත වූයේ බුධ හිමි කන්‍යා ලග්නයෙනි. එවන් වූ පොදු ජන හිත සුව පිණිස ජීවිතය කැප කළ ලොව විරුවන්ගේ උප්පත්ති ලග්නය වන කන්‍යාවෙන් හා මේෂ නවාංශකයෙන් උපන් මෙතුමාගේ ජන්ම පත්‍රය තුළ අති විශේෂ ග්‍රහ පිහිටීම් රැසක්ම විය. උන්වහන්සේට පමණක්ම පිහිටන එම සුවිශේෂ ග්‍රහ පිහිටීම් නිසා ජේසුස් වහන්සේ එදා ජීවත් වූ මිනිසුන්ගේ ගැලවුම්කරු බවට පත්විය. වයස 33 පමණක් වූ ඉතා කෙටි කාලයකදී ජීවමාන වූ දර්ශනයක් වන කිතු දහම මෙලොවට හඳුන්වා දීමට උන්වහන්සේ සමත් විය.
මෙතුමාගේ ජන්ම පත්‍රය දෙස අවධානය යොමු කිරීමේදී කන්‍යා ලග්න ජන්ම පතේ ගුරු, සඳු හා සෙනසුරු යන ග්‍රහයන් 7 වැන්න වූ මීන රාශියේ තැන්පත්ව ඇත. එම ත්‍රි ග්‍රහ යෝගය මඟින් එතුමාගේ මුළු ජීවිතයම අපට මැනවින් අවබෝධ කරගත හැකිය. ගුරු හා චන්ද්‍රයාගෙන් යෙදෙන හංස හා ගජ කේශර යන අති ප්‍රබල සුබ යෝග මඟින් උන්වහන්සේ මේ ලෝකයට ශේ්‍රෂ්ඨ උත්තමයකු බවට පත්විය. ග්‍රහ ලොව සුරගුරු ලෙස හඳුන්වන දෙවියන්ගේත් ගුරු වන බ්‍රහස්පතිගේ බලය ලග්න කේන්දරයේ මෙන්ම නවාංශක කේන්දරයේද මැනවින් පිළිබිඹු විය. එය උන්වහන්සේට දේව දර්ශනය ලොවට කියා දෙන්න මහත් වූ රුකුලක් විය. රවි බුධගේ බලය ලග්න හා නවාංශක කේන්ද්‍ර වන වර්ගෝත්තමව පිහිටීම උන්වහන්සේ ලෝ වැසියාගේ ගෞරවයට පාත්‍රවීමටත් නායකත්වයටත් මහත් වූ රුකුලක් විය. කේතු 9 වැන්නේ පිහිටීමද ඉතා වැදගත් වූ ග්‍රහ පිහිටීමකි. අසල්වැසියාට ප්‍රේම කිරීම තුළින් මේ ලෝකයට මෛත්‍රිය, දයාව, කරුණාව, පරිත්‍යාගය යන උතුම් දේව ගති ලොවට කියා පෑමට උන්වහන්සේගේ සිතට අධිපති සඳුගේ බලය මහඟු පිටිවහලක්ම වූයේය.
ගුරු හා සඳු අතරට ලෝකෝත්තර සුවයට අධිපති ශනි හෙවත් සෙනසුරුගේ පැමිණීමෙන් හා 7 වැන්නේ මෙම යෝගය පිහිටීමෙන් මෙලොව පව්කාර මිනිසා එම පව්වලින් මුදා ගැනීමත් සාමයේ ආලෝකය තුළින් මුළු ලොවම බැබළවීමටත් උන්වහන්සේට හැකිවිය. කිතුනු ලබ්ධිකයන් වන ඔබට සෙනසුරු ඇතුළු සියලු ග්‍රහ අපල උපද්‍රවයන් සඳහා පහත සඳහන් ග්‍රහ ශාන්ති කර්ම ඔබගේ ආගම අනුව අනුගමනය කළ හැකිය. කිතුනු ඔබට සෙනසුරු අපල ඇත්නම් ඔබ පළමුව ජේසුස් ක්‍රිස්තුන්වහන්සේට හා දෙව්මවුන්ට බාරයක් වන්න. අපල කාලය අවසන් වනතුරු වසරින් වසර එය අලුත් කළ යුතුය. සෙනසුරාදා දිනයන්හි ඔබේ නිවෙසේ ඇති දෙව් මැඳුරේ පූජාසනය නිල් මලින් සරසන්න. (සෙනසුරු ග්‍රහයාගේ වර්ණය නිල් පැහැය වෙයි) දිව්‍යමය පූජා යාගය මැද සිදුකරනු ලබන පඬුරු පූජාවට නිල් මල් පූජා කිරීම ඉතාම යහපත් වන අතර එමඟින් ශනි ග්‍රහයා සතුටට පත්ව එම අපල අවම කරගත හැකිය. ඔබ දෙවිඳුන් සඳහා දල්වන පහනට එළඟි තෙල් බින්දුවක් එක් කරන්න.
ජේසුතුමන් උපත ලද්දේ ගවලෙනක නිසා ඔබත් ගවයකු මරණයෙන් නිදහස් කරන්න අවස්ථාවකට හැකි පමණින් ආධාර උපකාර කිරීම මෙම සෙනසුරු අපලයට ඉතා සුබදායක වනු ඇත. මෙම සෙනසුරු අපල පවතින කාලසීමාවෙදී තද නිල් හෝ කළු ඇඳුමින් සැරැසී ගමන් බිමන්වල යෙදීම තුළින් සෙනසුරුගෙන් නිකුත් වන අසුබ කිරණ එම වර්ණ මඟින් පරාවර්තනය වීමෙන් ඔබේ ජීවිතයට යහපත උදාවනු ඇත. සෙනසුරාදා (ශනිදා) දිනවල උදේ 6/7ත් අතර එළඟි තෙල් මිශ්‍ර කිරි බත් ගුළි 9ක් තම හිස වටා කරකවා කපුටන්ට කෑමට දෙන්න. (වතුර බේසමක්ද තබන්න). ඔබ වෙත උදවු ඉල්ලා ගෙන පැමිණෙන අවංක කෙනකු කිසි විටෙක හිස් අතින් නොයවන්න. ඔහුට උදවු උපකාර කරන්න. (සෙනසුරු යනු මහලු හිඟන පුද්ගලයකුට සමාන කොට ඇත.) ගව-සූකර ඇතුළු මාංස කෑමෙන් හා මත්පැන්, දුම් වැටි පානයෙන් මිදී ධාර්මික දිවි පෙවෙතක් ගත කිරීම ඉතාම සුබදායක වනු ඇත. මෙම අපල පවතින කාලය පුරාම නිර්මාංසව සිටීම ඉතාම වැදගත් වන අතර ඔබ නිර්මාංස වීමෙන් එකතු කර ගන්නා පින ජේසුට හා දේව මෑණියන්ට අනුමෝදන් කරන්න. එය ඔබේ අපල ටිකෙන් ටික අඩු වීමට හේතුවක් වනු ඇත.
සෑම සෙනසුරාදා දිනකම උදේ වරුවේ අපලය පවතින පුද්ගලයා නිරාහාරව සිටිමින් එම ආහාර වේල අංගවිකල හෝ වම් පාදයේ ආබාධායක් සහිත අසරණ දුගී අයකුට දන් දෙන්න. එදින ඔබ නිර්මාංස ආහාර වේලක් ලෙස තම ආහාරය ගත යුත්තේ දහවල් 12.00 පසුව වන අතර, රාත්‍රි ආහාරය පලතුරු හෝ කිරි ආහාර වේලක් විය යුතුය. විශේෂයෙන් සෙනසුරාදා හා ඉරිදා දිනවල දෙව් මැඳුරට ගොස් දිව්‍ය පූජාවට සහභාගි වන්න. එය සෙනසුරු අපලයට මහඟු පිළියමකි. ඊට අමතරව බදාදා, සිකුරාදා හා සෙනසුරාදා දිනවල හැකි පමණ පුණ්‍ය කටයුතුවල යෙදෙන්න. අළු බදාදා සිට පාස්කු ඉරිදා දක්වා වූ කාලය තුළ නිර්මාංස ආහාර පමණක් ගෙන එම පාස්කු කාලය තුළ පුරාවට එක් වරුව බැගින් උපවාස ශීලය රැකීම කළ යුතුය.
ප්‍රවීණ ජේ‍යාතිෂවේදී බණ්ඩාරගම සම්පත් එස්. කල්පගේ
මව්බිම
