ජන්ම පත්‍රයෙන් පෙන්වන දෙවැනි විවාහය
කාන්තාවක් සහ පිරිමියකු අතර ඇතිවන ආදරය හෝ ප්‍රේමය මෙන්ම වෙනත් දැන හැඳින ගැනීම් මුල්කොට ගෙන ජීවිතාන්තය දක්වා එක්ව සිටීමේ අරමුණින් විවාහයක් සිදුවන බව අප කවුරුත් දන්නා කරුණකි. එහෙත් මෙම විවාහ අතරින් කොපමණ ප්‍රමාණයක් දිගු කලක් පවතීද යන්න පිළිබඳව නිශ්චිත අවබෝධයක් ඇත්තේ ජේ‍යාතිෂවේදීන්ට පමණි. ඊට හේතුව විවාහය දෙදරා යෑම මෙන්ම දික්කසාද වීම සහ දෙවැනි විවාහයක් සිදුවීමට ඇති හැකියාව ජන්ම පත්‍රවල ලියැවී ඇති බැවිනි.
සමාජ සේවා දෙපාර්තමේන්තුව මඟින් ප්‍රකාශයට පත්කර ඇති සංඛ්‍යාත්මක දත්තවලට අනුව දැනට ලංකාවේ දිනකට සිදුවන නීත්‍යනුකූල දික්කසාද ප්‍රමාණය 400ක් වන අතර වාර්ෂිකව එය ක්‍රමයෙන් වැඩි වීමේ ප්‍රවණතාවක් දක්නට ලැබේ. 1946දී විවාහ 1000කට 4.8ක් වූ දික්කසාද ප්‍රමාණය 2012දී විවාහ 1000කට 17.9 වී ඇති අතර එය වර්තමානයේදී විවාහ 1000කට 22 වැනි ඉහළ මට්ටමක පවතී.
ජේ‍යාතිෂවේදීන්ගේ මතය වන්නේ නිවැරැදි පොරොන්දම් බැලීමකින් තොරව නැත්නම් හඳහන් ගැළපීමකින් සහ විධිමත් හඳහන් පරික්ෂාවකින් තොරව සිදුවන විවාහ කෙටි කලෙකින් අවසන් විය හැකි බව හෝ ගැටලු සහිත විය හැකි බවයි. ඉහත දක්වන ලද අයහපත් ප්‍රවණතාවට ඉවහල් වන ජේ‍යාතිෂමය කරුණු සලකා බැලීම මෙම ලිපියේ මූලික අරමුණ වේ.
ජීවිතය සමඟ සම්බන්ධ විවිධ දෛවෝපගත සිදුවීම් කල්තියා හඳුනා ගැනීමට අප කා තුළත් දැඩි කුතුහලයක් පවතී. විශේෂයෙන් විවාහය සාර්ථක වීම හෝ අසාර්ථක වීම, දරු සම්පත් ලැබීම සැපවත් ජීවිතයක් ගත කිරීමට හැකිවීම යනාදිය ඉන් සමහරකි. ජීවිතය සමඟ සම්බන්ධ අනෙකුත් බොහෝ දේවල් මෙන්ම දික්කසාද වීම සහ දෙවැනි විවාහය පිළිබඳවද ජන්ම පත්‍රයේ ලියවී ඇත.
මෙය හඳුනා ගැනීමට උපකාරි වන ජේ‍යාතිෂමය කරුණු සලකා බලමු. සාමාන්‍යයෙන් දෙවැනි විවාහයකට යොමුවන්නේ එක්කෝ පළමු විවාහය අසාර්ථක වී දික්කසාද වූ අය. නැත්නම් කලත්‍රයා මියගිය අයයි. විවාහය පිළිබඳව ප්‍රධාන වශයෙන් නිවේදනය කරන්නේ ජන්ම පත්‍රයේ 7 වැන්න වන අතර විවාහය පිළිබඳව කරුණු දැක්වීමේදී 7 වැන්නට අමතරව 2, 4, 5 සහ 8 යන රාශි ද වැදගත් වේ. විශේෂයෙන් 2 වැන්නෙන් දෙවැනි විවාහයකට ඇති හැකියාව මෙන්ම කලත්‍රයාගේ ආයුෂද නිවේදනය කරයි.
ජේ‍යාතිෂයට අනුව විවාහ කාරක වන්නේ සිකුරු ග්‍රහයා වන අතර ගුරු පුර පක්ෂයේ සඳු සහ බලවත්ව පිහිටි බුධ ග්‍රහයාද විවාහයට සුබවාදීව සහ ධනාත්මකව බලපායි. එහෙත් රවි, කුජ, ශනි, රාහු සහ කේතු යන ග්‍රහයන් විවාහයට අයහපත් හෝ ඍණාත්මක බලපෑම් ඇති කරයි. එසේම මෙම ග්‍රහයන් ඉහත දක්වන ලද සුබ ග්‍රහයන් දැකීම එම ග්‍රහයන් සමඟ සංයෝගවීම යනාදී සම්බන්ධතා තුළින් විවාහයට අයහපත් බලපෑම් ඇතිකරයි.
එමෙන්ම එම ග්‍රහයන් 3, 6, 8 සහ 12 යන රාශි සමඟ සම්බන්ධ වීමද අයහපත් බලපෑම් ඇතිවීමට හේතුවේ. නිදසුනක් ගත්විට 7 වැන්න හෝ 7 වැන්නාධිපති 8 වැන්න හෝ 12 වැන්න සමඟ සම්බන්ධ වූ විට සහ අහයපත් ග්‍රහ දෘෂ්ටි ගතවූ විට විවාහයේ ගැටලු ඇතිවන අතර බොහෝවිට අනියම් හෝ අසම්මත ප්‍රේම සහ ලිංගික සබඳතා ඇතිවිය හැකිය.
විශේෂයෙන් සතුරු ග්‍රහයන් වන කුජ සහ ශනිගේ බලපෑමට ලක්වූ විට විවාහය මෙන්ම ආදර සබඳතා දෙදරා යෑම සිදුවේ. මෙයින් පෙනීයන්නේ කුජ, රවි, ශනි සහ රාහු යන ග්‍රහයන් 7 වැන්න සමඟ සම්බන්ධ නොවූවිට විවාහ ජීවිතය යහපත් වන බවයි. 7 වැනි රාශියේ සිට 2 වැන්න වන 8 වැන්න මාරක ස්ථානය වන අතර 8 වැන්න සහ එහි අධිපති දුර්විපාක දෙන තත්ත්වයක පිහිටි විට විවාහය දෙදරා යෑම සිදුවේ.
මෙහිදී රාහු, කුජ සහ ශනි යන ග්‍රහයන් දික්කසාද වීම කෙරෙහි බලපාන අතර ශනි ග්‍රහයාගේ බලපෑම් සොයා බලන විට පෙනී යන්නේ ශනි 1 හා 7 වැන්නේ පිහිටි විට අඹු-සැමියන් අතර නිතර අවිශ්වාසය හා අනේ‍යාන්‍ය සැක කිරීම් ඇති විය හැකි බවයි. මේ අනුව ඉතා සුළු සිද්ධියකින් පවා අඹු- සැමියන් අතර බලවත් ගැටලු ඇති විය හැකිය. ශනිගේ අයහපත් බලපෑම නිසා අඹු - සැමියන් හට ලිංගික වශයෙන් ද සතුටක් ලැබීමට නොහැකි වේ. එසේම යුවළක් එකිනෙකාගෙන් දිගු කලක් වෙන් කර තැබීමටද ශනිගේ අයහපත් බලපෑම මූලික වේ.
කුජ, රාහු, ශනි සහ රවි යන ග්‍රහයන් ජන්ම පත්‍රයේ 8 වැන්නේ සිටීම යුවළක් වෙන්වීම පෙන්වන ප්රබල ඉඟියකි. විශේෂයෙන් රාහු සහ රවි යන ග්‍රහයන්ගේ අයහපත් බලපෑම නිසා විවාහ ජීවිතය තුළ අනපේක්ෂිත කරදර සහ ගැටුම් ඇතිවීමෙන් විවාහය දෙදරා යෑම සිදුවිය හැකිය. නොඑසේ නම් දරුවන් නිසා විවාහය එලෙසම තිබියදී අඹු - සැමියන් කායික වශයෙන් වෙන්ව ප්‍රතිවිරුද්ධව වාසය කරයි. මෙය දැනට බොහෝවිට ජන සමාජය තුළ දක්නට ලැබෙන අතර සැමියා මෙන්ම බිරියද මෙය සමාජයෙන් වසන් කිරීමට උත්සාහ ගන්නා බව පෙනේ. කෙසේ වෙතත් මෙවන් අයට මෙම අසුබ ග්‍රහ බලපෑම්වලට සුදුසු පිළියම් ලබාගෙන නැවතත් සතුටින් ජීවත්විය හැකි බව මෙහිලා විශේෂයෙන් සඳහන් කරමි.
විවාහ කාරක සිකුරු ග්‍රහයාගේ පිහිටීම අනුව 2 වැනි විවාහයක් සිදුවීමට ඇති සම්භාවිතාව හඳුනාගත හැකිය. අදාළ විස්තර පහත දැක්වේ.
- සිකුරු සහ 7 අධිපති ග්‍රහයන් ජන්ම පත්‍රයේ හෝ නවාංශකයේ උභය රාශියක (මිථුන, කන්‍යා, ධනු, මීන) පිහිටා ඇත්නම් ප්‍රකාශ වන්නේ බිරියන් දෙදෙනකු සිටින බවකි.
- සිකුරු ග්‍රහයා ජන්ම පත්‍රයේ හෝ නවාංශකයේ චර රාශියක (මේෂ, කටක, තුලා, මකර) පිහිටා ඇත්නම් දෙවැනි විවාහයක් සිදුවීමට ඉඩ ඇත.
- සිකුරු ඉරට්ටේ රාශියක පිහිටීම සහ එම රාශියේ අධිපති යම් උච්ච රාශියක පිහිටීමද දෙවැනි විවාහයකට හේතුවේ.
- සිකුරු ග්‍රහයා කටකයේ සිටීම සහ සඳු ග්‍රහයා 7 වැන්නේ සිටීමද දෙවැනි විවාහයකට හේතුවිය හැකිය.
- 11 වැන්නේ ග්‍රහයන් 2කුට වඩා සිටීමද දෙවැනි විවාහයකට හේතුවිය හැකිය.
- සිකුරු ග්‍රහයා ජන්ම පත්‍රයේ මෙන්ම නවාංශකයේදී දුර්විපාක දෙන ග්‍රහ බලපෑම් මත පීඩාවට පත්වී ඇත්නම් බොහෝවිට 2 වැනි විවාහයක් සිදුවිය හැකිය.
මීට අමතරව පහත සඳහන් ග්‍රහයෝගයන්ද 2 වැනි විවාහයක් ඇතිවීම කෙරෙහි බලපායි.
- යම් ජන්ම පත්‍රයක කුජ සහ රාහු යන ග්‍රහයන් 1 හෝ 7හි පිහිටීම නිසා අඹු-සැමියන් අතර අඬදබර හා පහරදීම් සිදුවිය හැකිය. යම් ස්ත්‍රී ජන්ම පත්‍රයක 3 වැන්න 11 වැන්න හා එහි අධිපතීන්ද මෙම පිහිටීම කෙරෙහි අයහපත් දෘෂ්ටියක් දක්වන්නේ නම් ඇයට සැමියාගේ මවුපියන් සහෝදර හා ඥාතීන්ගෙන්ද හිරිහැර විඳීමට සිදුවේ.
- ශනි 1 හා 7 වැන්නේ පිහිටි විට අඹු-සැමියන් අතර නිතර අවිශ්වාසය හා අනේ‍යාන්‍ය සැක කිරීම් ඇති විය හැකි අතර ඉතා සුළු සිද්ධියකින් පවා අඹු - සැමියන් අතර බලවත් ගැටලු උද්ගත විය හැකිය.
- විශේෂයෙන් රාහු 7 වැන්න හා සම්බන්ධ වූ විට බිරිය හෝ සැමියා බහුවිධ ලිංගික සම්බන්ධතා කෙරෙහි යොමු වන බැවින් පවුල් ඒකකය තුළ විවිධ ගැටලු ඇතිවන බව පෙනේ. පුරුෂ කේන්දරයක ශනි පීඩාවට පත්වීමෙන් ඇති වන ලිංගික බෙලහීනතාවන් නිසා පවුල් ජීවිතය අතෘප්ති කරවීම දික්කසාදයට හේතු විය හැකිය.
- එසේම විවාහය හා සම්බන්ධ රාශීන් සමඟ කේතු සම්බන්ධ වූ විට ජන්මියා විවාහ ජීවිතය පිළිබඳ සැලකිලිමත් නොවීම බිරියගේ හෝ ස්වාමියාගේ අවශ්‍යතා පිළිබද සැලකිලිමත් නොවීම පවුල් ජීවිතයට වඩා ව්‍යාපාරික හෝ ධනෝපායන මාර්ග කරා යොමුවීම වැනි දෑ සිදුවිය හැකි බැවින් පවුල් ඒකකය තුළ විවිධ ගැටුම් ඇතිවේ. බොහෝ විට මෙවැනි පිරිමි හෝ කාන්තාවන් හට අනියම් සම්බන්ධතා කිහිපයක් ඇති බව ජේ‍යාතිෂ පර්යේෂණවලින් හෙළි වී ඇත.
- රවි ග්‍රහයා 2,4,7 හෝ 9 යන රාශිවල සිකුරු සමඟ අංශක 7.30 යටතේ පිහිටා ඇත්නම් දික්කසාද වීම අනිවාර්යයෙන්ම සිදුවන බව ස්ත්‍රී ජාතකයේ සඳහන් වේ. මෙය වඩාත් තහවුරු කර ගැනීම සඳහා ජන්මියාගේ නවාංශකය කෙරෙහිද අවධානය යොමු කළ යුතුය.
- ලග්නාධිපති 8 වැන්නේ සිටීම සහ ශනි 12 වැන්නේ සිටීමද බහු විවාහයකට හේතුවේ.
- ලග්නය සිංහ රාශිය වී එහි 7 වැන්නාධිපති 9 සිටීමද විවාහයන් 1කට වැඩි ගණනක් සිදුවීම හඟවයි.
- ලග්නාධිපති 8 වැන්නේ සිටීමත් 2 වැන්නේ සහ 7 වැන්නේ අධිපති ග්‍රහයන් පීඩාවට පත්වීමද දෙවැනි විවාහයකට හේතුවේ.
