හඳහන පෙන්වන වාසනා මඟ
එහෙත් එවැනි අදෘශ්‍යමාන බලශක්‌තියක්‌ තිබේද යන්න සම්බන්ධයෙන් විවිධ මත පහළ වී තිබේ. කිසියම් අදෘශ්‍යමාන බලයක්‌ විසින් මිනිසා මෙහෙයවන බවට ලෝකවාසීහු වැඩි දෙනෙක්‌ විශ්වාස කරති. එය කර්මය, දෛවය, ඉරණම, දෙවියන්ගේ කැමැත්ත, පෙර වාසනාව ආදී විවිධ නම්වලින් හඳුන්වති. මේ සියල්ලෙන්ම කියෑවෙන්නේ මිනිසාගේ ජීවිතය මෙහෙයවන අද්භූත වූ බලවේගයක්‌ තිබෙන බවය.
ලොව පහළ වූ සියලු ආගම් කතුවරයන් විසින් මේ පිළිබඳව අදහස්‌ දක්‌වා තිබේ. දෙවියන් ලොව මැවූ බවට විශ්වාස කරන ආගම් තුළ ලොව මැවූ දෙවියන්ගේ කැමැත්ත ලෙසට දැක්‌වෙන්නේ මිනිසා තුළ පවතින මේ වාසනා ගුණයයි. එම විශ්වාසයෙන් බැහැර වූ බුqදුදහමින් ප්‍රකාශ වන්නේ මිනිසාට සැප හෝ දුක උරුම වන්නේ ඔහු විසින් එක්‌රැස්‌ කරගෙන තිබෙන කුසලා කුසල කර්මයන්ගේ බලපෑම නිසා බවයි. බුදුරජාණන්වහන්සේ මෙම වාසනා ගුණය හෙවත් කර්ම ශක්‌තිය පිළිබඳව ඉතා නිවැරැදිව හා නිරවුල්ව දේශනා කර තිබේ. චුල්ලකම්ම විභාග සූත්‍රය ඇතුළු සූත්‍ර ධර්ම කිහිපයකම මේ පිළිබඳව තොරතුරු ඉදිරිපත්ව ඇත.
බුදුදහමේ විස්‌තර වන පරිදි එය ජනක කර්මය, උපස්‌ථම්භක කර්මය, උප පීලක කර්මය, උප ඝාතක කර්මය යන කොටස්‌ හතරකට බෙදා ඇත. ජනක කර්මය විසින් මිනිසාගේ උපත සිදු කරනු ලබන අතර මිනිසාගේ පැවැත්ම ගෙන යැමට උපස්‌ථම්භක කර්මය උපකාරී වේ. උපපීලක කර්මය එයට බාධා පමුණුවන අතර උප ඝාතක කර්මය මිනිසා විනාශ කර මරා දමයි. ජ්‍යෙdතිෂයේ හඳහනක පලාපල කථනය නිර්මාණය වී තිබෙන්නේද මෙම පදනම මතම බව පෙනේ. අර්හත් භාවයට පත්වන උතුමෝ රහත් ඵලය ලබන විට කර්මය සතු මෙම වාසනා ගුණය තවදුරටත් පවත්වාගෙන යැමේ හැකියාව මෙම ආත්ම භාවයට පමණක්‌ සීමා කර නසා දමයි. සවාසනා සර්ව ක්‌ලේශයන් නැසූ යන අභිදාන නාමය ලබන්නේ ඒ නිසාය. එසේ නොවන හැම කෙනකුටම සසර පුරා දුක සැප බෙදා දෙමින් කැටුව යන මෙම කර්ම බලවේගය අසිරිමත් අද්භූත වූ ශක්‌තියකි. එහි ස්‌වභාවය සිතා නිමකළ නොහැකි බැවින් බුදුරදුන් කර්ම විෂය අචින්ත්‍ය යෑයි වදාළහ.
මෙම කර්ම බලය ගැන සැක පහළ කරන අය සිටින නමුත් මෙය අසත්‍යයක්‌ බව ඔප්පු කර පෙන්විය හැකි කිසිවකු මේ දක්‌වා පහළ වී නැත. මෙයට එරෙහිව කරුණු දක්‌වන අය කියන්නේ මිනිසාගේ ජීවිතයේ ලබන සියලු හොඳ නරක ප්‍රතිවිපාකයන් ලැබෙන්නේ මෙලොව ඔහුගේ ක්‍රියාකාරකම් අනුවම බවයි. කිසිදු නොපෙනෙන බලයකට එහි වගකීමක්‌ නොමැති බව ඔවුහු පවසති. උත්සාහවන්තයා සියල්ල ජය ගන්නා බැවින් යමකුට යමක්‌ අවශ්‍ය නම් එයට ඔහුට උත්සාහ කර ලබාගත හැකි බව ඔවුහු පවසති. එසේනම් හැම දෙනාම උත්සාහ කර තම තමන්ගේ අරමුණු අපේක්‌ෂා ඉටුකර නොගෙන එකිනෙකාට දොස්‌ පවරමින් බලා සිටින්නේ ඇයිද යන ප්‍රශ්නයට පිළිතුරක්‌ නොදෙන ඔවුන් සමාජය මේ ගැන දැනුවත් කර වඩා යහපත් කාර්යක්‍ෂම දියුණු ධනවත් සමාජයක්‌ ගොඩනැඟීමට තම දැනුම යොදවන්නේද නැත. අප දන්නා පරිදි කිසිවකු තමාගේ ඕනෑකමින් පරාජිතයකු වී අසරණ බවට වැටී ජීවත්වීමට කැමැති නැත. නමුත් සමාජයේ බහුතරයක්‌ දුක දිනා සැප ලැබීමට අසමත්ව සිටිති. එයට හේතුව කුමක්‌දැයි දිය හැකි නිශ්චිත පිළිතුර කුමක්‌ද? සමාජයේ පහළ තලයේ සිට ඉහළට ගමන් කළ හැම කෙනෙක් පිටුපසම උත්සාහයට අමතරව වාසනා ගුණයක්‌ද ගමන් කර තිබෙන බව ඔවුන්ගේ චරිතාපදාන කියවන විට පසක්‌ වේ. කවුරු නොකීවත් සත්‍යය එයයි.
ලොව තුළ සැඟවුණ ජීවිතයේ රහස්‌ සොයා වනගතව බවුන් වැඩූ හින්දු මුනිවරු විසින් මේ වාසනා මහිමය අනාවරණය කර ගැනීමේ මාර්ගයක්‌ ලොවට හෙළිකර ඇත. එය ජ්‍යෙdතිෂයයි. ඒ තුළින් නිර්මාණය කරගන්නා හඳහනක්‌ තුළින් තමාගේ වාසනා ගුණය කෙබඳු වූවක්‌ දැයි සොයා ගැනීමේ ක්‍රමවේදයක්‌ සකසා තිබේ. යමකු සතු වාසනාව තමා සතු කුසල ශක්‌තියට සරිලන පරිදි සකස්‌ව ඇත. දුගියකු බවට පත්වීමට උපන් අයකුට කිසි දිනක රජවිය නොහැක. එහෙත් රජවීමට උපන් අයකු දුගියකු වුවත් නියත වශයෙන්ම රජ වේ. ලොව විවිධ ගණයේ වාසනාවන්තයෝ පහළ වෙති. අතීතයේ රජ බමුණු, වෙළෙඳ, කුලවල උපන්නේ ඉහළ තලයේ වාසනාවන්තයෝය. මධ්‍යම වාසනාවන්තයෝ ගොවි කුලයේද වාසනාවෙන් අඩු අය ශුද්‍රයන් ලෙසද උපන්හ. වර්තමානයේ උපතින් වාසනාව තීරණය වන්නේ නැත. ඒ නිසා සැඟවුණ වාසනාව සොයා යා යුතුය.
රටක රාජ්‍යත්වයට පත්වීම ඉහළම වාසනාවකි. ඒ සඳහා වූ පුණ්‍ය මහිමය හඳහනක රාජ යෝග ලෙස සටහන්ව තිබේ. ත්‍රිලෝචන, රාජපද, දේව, ගරුඬ, රසාතල, භූප, මකුට, ගුරු හංස, සිංහාසන, කප්රුක්‌, අඛණ්‌ඩද්වීප චක්‍රවර්ති වැනි යෝග එබඳු රාජ යෝග වෙති. මෙයට අමතරව වෙනත් රාජ්‍යත්වය හිමිවන ග්‍රහයෝග රාශියක්‌ ජ්‍යෙdතිෂයේ විස්‌තර කර තිබේ. එවැනි බලයක්‌ නොමැතිව කිසිවකුට ජන නායකත්වයට පත්විය නොහැක.
මෙයට අමතරව ජනතාවගේ ගෞරවයට බුහුමනට හා වන්දනාවට ලක්‌වන උතුමන්ගේ කේන්ද්‍ර සටහන් තුළද එයට නිසි යෝග හා ග්‍රහ පිහිටීම් නිසි ලෙස පිහිටා ඇත. කුමන හෝ අංශයකින් සමාජයේ ඉහළට නැගී ධනය බලය ප්‍රසිද්ධිය ලැබිය හැකි නම් එය වාසනාවකි. ධනය ලැබීම වාසනාවක්‌ ලෙස සලකන නිසා ස්‌වීප් දිනුම් ලැබීම වාසනාව උරගා බැලීමක්‌ යයි කියති. මේ එවැනි ධනය ලබන ග්‍රහ යෝගයකි.
අඹරපති ධනපති ද කෙඳුරෙහි ත්‍රිකෝණ හෝ දනපතිය සතරේ
යෙදුනහොත් වේ කුවෙර යෝගය මහරුතෙද බල සපිරි නිතරේ
අතුරු නැති තුරු හඬිනි ගී ඇත් අසුන් රියදන රුවිනි පතරේ
සොඳුරු ගති යුතු බිරියො ඇති වෙති බලෙනි පෙර කළ පිනෙනි පවරේ
එසේම ධනයෙන් බලයෙන් උගත්කමින් විශිෂ්ට ස්‌ථානයකට කේන්ද්‍ර හිමියා රැගෙන යන ඉතා බලවත් ලක්‍ෂමි යෝගය ජ්‍යෙතිෂයේ මෙසේ දක්‌වා තිබේ.
රජයපති සුරගුරුද මෙදෙදෙන සිටිද පාරාවතංසේ තුළ
ගොපුර අන්සේ සිටිද සිකුරා මහා ලක්‍ෂමී යෝගෙ නම් දුල
සිටිද හිරු පාරාවතංසේ දසයපති දැක යුතුව සිටි කල
එලෙද සිව් තැන සුබගහන්විද මෙයත් ලක්‍ෂමි යෝගෙ සුපතල
පවිටු නොපෙලුන කලා පිරිසිදු උස්‌ව සත්වන බුදහු සිටිනා
එවිට කුජ සැනි තුනෙද ඉරු සිටි ලග්නෙ ගුරුවිද එයොගෙ සැදෙනා
විපුල සිප්සත උගත් දන කිතු කළඹ පිරිපින් තෙදිනි දිලෙනා
එසෙට බුවිසුරුතුමකු වෙයි සොඳ යුක්‌ති ගරු රූ සිරිය රඳනා
අධ්‍යාපනයේ ඉහළම පෙත්තට ගොස්‌ ලෝක පූජිත විද්වතකු බවට පත්වීමේ යමකුගේ සිහිනයක්‌ වෙතොත් එය සැබෑ වන්නේ ඒ සඳහා අවැසි වාසනා ගුණය ඔහු සතු නම් පමණි. එවැනි වාසනාව උදා කරදෙන බලවත් සරසවි යෝගයක්‌ මෙසේය.
කෙඳුරෙක තිකොනෙක නැත හෝ දෙවනේ
බුධ ගුරු කිවි යන ගහයින් තිදෙනේ
සිය කෙත උස්‌ රුස මිතුරුස යෙදුනේ
සරසවි යෝගය යෑයි රුසි කියනේ
සූසැට කලා සිප් බස්‌ සත නෙක සේ
නිපුනව කිසිවකුහට නොදෙවෙනි සේ
කිත් පැසසුම් නෙසිසුරු ලැබ සතොසේ
ගැදි පැදි බැඳුමෙහි සුරුවෙයි ගුරු සේ
යමකුගේ වාසනාව හඳහන තුළ සැඟවී තිබෙන බව ඉහත දැක්‌වූ කරුණුවලින් පෙනී යනවා ඇත. එය විමසා දැනගෙන උත්සාහයෙන් වැඩකර තමාට හිමි තැන උදාකර ගැනීම අපගේ ගැටලුවලට විසඳුමක්‌ නොවන්නේ දැයි සිතා බැලිය යුතුය.
උපුටා ගැනීම දිවයින
