ලග්නයට හිමි රැකියාව - තුලා ලග්නය
- තුලා ලග්නය වන ඔබ රැකියාව පිළිබඳ කියැවෙන දහවැන්න අධිපතියා සඳු ග්‍රහයාය. ඔබගේ උපන් කේන්දරය තුළ සඳු බලවත්ව පිහිටා ඇත්නම් ඔබ හොඳ රැකියාවකට හිමිකම් දරයි. සඳු ග්‍රහයා දහවැනි කොටුව තුළම සිටීනම් ඔබ ස්ථිර රැකියාවක් ලබයි. වැඩිය වෙහෙස මහන්සි නොවී, නිල නිවාස, ප්‍රවාහන පහසුකම් සමඟ රැකියාවකට භාග්‍ය ලද අයෙකි. බොහෝ දුරට රෙදිපිළි ආශ්‍රිතව හෝ ජලය ආශ්‍රිතව කරන රැකියාවකටද යොමුවිය හැකිය. වතුර ආශ්‍රිතව කරන ව්‍යාපාර, හෝටල් කර්මාන්ත, කාන්තා පක්ෂය පරිහරණය කරන භාණ්ඩ, විසිතුරු භාණ්ඩ හා රෙදිපිළි ආශි්‍රත කර්මාන්තවලට යොමුවිය හැකිය.
- අඟහරු දහවැන්න තුළ නම් ධනස්ථාන අධිපති කර්මස්ථාන ගතවීම ප්‍රබල යෝගයකි. නමුත් කටක රාශියට අඟහරු නීච නිසා රැකියා කටයුතුවලට කරදර ඇතිවිය හැකිය. ඔබ ස්ත්‍රියක් නම් විවාහ වී ටික කලකින් පසුව රැකියාව නතර කිරීමට සිදුවන්න පුළුවනි. අඟහරු සමඟ ගුරු හෝ සඳු සිටී නම් ප්‍රබල යෝගයකි. ඉතා උසස් ඉහළ තනතුරු සමඟ රැකියාවක් ලබයි.
- බුධ දහවැන්න තුළ නම් විදේශ රැකියාවන්වලට භාග්‍ය ලබයි. උනන්දුව, උත්සාහය ලැබීම රැකියා දියුණු කරයි. තමන් අපේක්ෂා කළ රැකියාව ලැබීමට ඉඩකඩ පවතී. ලිපි ලේඛන පොත්පත් ආශි්‍රතව රැකියාවක් ලැබිය හැකිය. කුඩා ආයතනවල ප්‍රධානියකු වනු ඇත.
- ගුරු දහවැන්න තුළ නම් කටක රාශියට ගුරු උච්චයි. ගුරු හංස යෝගය ලබයි. රජයේ ඉහළ තනතුරක් ලබන රැකියාවක් ලබයි. මුදල් පරිහරණය හා මූල්‍ය ආයතනවල කළමනාකාර වෘත්තියක නිරත වීමට ඉඩකඩ පවතී. රජයේ මැති ඇමැතිවරුන්ගෙන් රැකියාවලට භාග්‍ය ඇත. ව්‍යාපාර අංශවලට යොමු වූවොත් මහා පරිමාණයේ ව්‍යාපාර ලාභියකු වෙයි.
- සිකුරු දහවැන්න තුළ නම් ඔබගේ උත්සාහයේ තරමට ප්‍රතිඵල ලබයි. රැකියා කටයුතුවලට ඥාතීන්ගෙන් උදව් උපකාර ලබයි. නිතර යානවාහනවල ගමනේ යෙදෙන වෘත්තියක නියැළී සිටින්න පුළුවනි. උනන්දුවෙන් හා උත්සාහයෙන් යුක්තව රැකියා කටයුතුවල නිරත වන නිසා තනතුරු වරප්‍රසාද ලැබීමට භාග්‍ය ඇත.
- ශනි නොහොත් සෙනසුරු දහවැන්න තුළ නම් කටක රාශිය සෙනසුරුට තදබලව සතුරු රාශියකි. තමන් බලාපොරොත්තු වූ රැකියා නොලබා වෙනත් රැකියාවක් ලබයි. වෙහෙස මහන්සි වී කරන රැකියාවක් ලබයි. කය වෙහෙසවා වැඩ කිරීමට සිදුවෙයි. මහාමාර්ග හා ජන සමූහයක් ගැවසෙන ස්ථානවල රැකියාවක නිරත වෙයි. රැකියාව තුළ ඒකාකාරී ස්වභාවයක් නොලබන්න පුළුවන.
- රාහු දහවැන්න තුළ නම් එකම තැනක එක දිගට රැකියාවක් කිරීම අසීරුයි. වරින්වර වෙනස්වීම් ඇති කරයි. යාන වාහන ආශ්‍රිතව ගමන් බිමන් ඇතිකරන වෘත්තියක නිරත වෙයි.
- කේතු දහවැන්න තුළ නම් ප්‍රසිද්ධ ස්ථානවලින් තොරව රැකියාවක නිරත වෙයි. රැකියාව තුළ දියුණුවක් ලැබීමද අසීරු විය හැකිය. ගුප්ත ශාස්ත්‍රය ආශ්‍රිතව අංශවලට යොමු වූවොත් සාර්ථක ප්‍රතිඵල ලබයි. පතල් කර්මාන්ත පිහිටයි.
- රවි ග්‍රහයා දහවැන්න තුළ නම් ස්ථිරවම රජයේ රැකියාවක් ලබන පිහිටීමකි. ප්‍රමාණවත් වැටුපක්ද ලබයි. ඉහළ තනතුරු ලැබීමටද භාග්‍ය ඇත. රැකියාවෙන් පසුව විශ්‍රාම වැටුපක් හෝ අර්ථසාධක මුදලක් ලබයි.
ප්‍රවීණ ජේ‍යාතිර්වේදී
සරත්චන්ද්‍ර බෝතලාගේ
උපුටා ගැනීම මව්බිම පුවත්පත
.jpg "මනාලිය විලාසිතා කුඩුවක් නොවේ")
