නිවෙසින් පිටත පහන් දැල්වීම අසුබයි
නිවෙසක් ඉදිකිරීමේ නිවැරැදි ක‍්‍රම ශිල්ප කියා දීම වාස්තු ශිල්පයේ එක් කොටසක්. එය භෞතිකව අප විසින් ඉදිකරනු ලබන නිවෙස සම්බන්ධයෙන් යෙදිය යුතු පොදු මූලධර්ම පෙන්වා දීමක්. මීට අමතරව ඇසට නොපෙනෙන යම් යම් දෑ නිසියාකාරයෙන් හඳුනා ගැනීම සහ ඒවා නිසියාකාරයෙන් භාවිත කරන පිළිවෙළත් වාස්තු ශිල්පය තුළ අඩංගු වෙනවා. අද ඔබට කියා දීමට උත්සාහ ගන්නේ ඔබ විසින් නිවෙසින් පිට දෙවියන් උදෙසා පහන් දල්වා සිදුකරනු ලබන ආලෝක පූජාවේ ප‍්‍රායෝගික ක‍්‍රියා පිළිවෙළ ඔබ වෙත බලපානු ලබන ආකාරය පිළිබඳයි.
ඔබේ නිවෙසේත් මේ ආකාරයට පහන් සාදා නිවෙසින් පිටත දෙවියන් උදෙසා පහන් දැල්වීම දිනපතා සිදුකරනවා විය හැකියි. එසේ නැතිනම් එසේ සිදුකරනවා ඔබ දැක තිබෙන්නට පුළුවන්. මේ කුමන ආකාරයට වුවද අපේ රටේ විශාල පිරිසක් නිවෙසින් පිට පහන් දැල්වීම සුලබ කරුණක්. මෙසේ පහන් දල්වන පිරිසෙන් ඒ ගැන විමසූ විට විශාල පිරිසක් එම පහන දල්වන්නේ සූනියම් දෙවියන්ට හෝ ගම්බාර දෙවියන්ට බව පෙනී යයි. එසේම මෙසේ පහන් දල්වන්නේ ඇයිද කියා ඇසූ විට පොදු පිළිතුරු දෙකක් ලබා දෙනවා. එකක් තමන්ගේ පරම්පරාවෙන් එය සිදුකළ නිසා එය සිදුකරන බව හා තමන්ගේ නිවෙසට ඇතිවී තිබෙන කරදර නිසා භූමිය සහ නිවාස දෝෂ මගහරවා ගැනීමට ලබාදුන් උපදෙස් පරිදි එසේ සිදුකරන බවයි.
එසේම එවැනි පහන් දල්වන නිශ්චිත කාල රාමුවක් හෝ දිශාවක් නොමැති අතර ඔවුන්ට හුරු වූ කාල හා දිශාවල එම පහන් පත්තු කිරීම සිදුකරනවා.
නිවෙසින් පිටත පහන් දැල්වීම පිළිබඳ වාස්තු ශිල්පයේ අවස්ථා ගණනාවක සඳහන් වී තිබෙනවා. භූමියේ දෝෂ ඉවත් කර විශේෂ අවස්ථාවල මෙන්ම ගෘහයේ දෝෂ ඉවත්කොට ගෘහය සීහුම් කිරීමේ විශේෂ අවස්ථාවල එවැනි පහන් දැල්වීම සිදුකරනු ලබන අතර එය පුරුද්දක් ලෙස සිදුකිරීමට කිසිම විටෙක උපදෙස් ලබාදී නොමැති බව කිව යුතුයි. වාස්තු ශිල්පයේදී තමන්ගේ ආගමට දහමට අනුකූල වන ලෙස ශාස්තෲන් වහන්සේට දල්වනු ලබන ආලෝක පූජාව ගෘහයේ වහලය ගැසූ කොටස තුළ සිදුකිරීම සුදුසු බව පෙන්වා දී තිබෙනවා. එසේ වුවද කිසිම විටෙක විශේෂ අවස්ථාවක හැරුණු විට නිවෙසින් පිටත පහන් දැල්වීම නොකළ යුතු බවද පෙන්වා දී තිබෙනවා. දෙවියන් උදෙසා පහන් දැල්වීම තුළින් අප විසින් බලාපොරොත්තු වන ප‍්‍රාර්ථනාවන් ඉටුනොවන අතර ඒ සඳහා කළ යුතු වන්නේ බුදුරජාණන් වහන්සේට ආගමික වතාවත් ඉටුකොට එම පින් දෙවියන්ට නම් ගොත් කියා අනුමෝදන් කිරීම බව මතක තබාගත යුතුයි. එසේම විශේෂ අවස්ථාවල දෙවියන්ගේ ඇල්ම බැල්ම ලබා ගැනීමට කරනු ලබන පහන් දැල්වීමකට නිශ්චිත වේලාවක් හා දිනයක් මෙන්ම දිශාවක් තිබෙන බව මතක තබාගන්න. එසේ නැතිව දල්වනු ලබන පහන් ආලෝකයට එන්නේ ආලෝකයට සංවේදී වෙනත් සියුම් ශරීර කොටස් සහිත සත්ත්ව කොට්ඨාස බව කිව යුතුයි. ඒ නිසා තමයි ඔබ විසින් එළියේ පහන් දැල්වීම නතර කළ විට ඔබට යම් යම් කරදර හා අපහසුතා ඇතිවන්නේ. එළියේ පහන නිදහස් කරන ආකාරය ඔබ විසින් එසේ දල්වනු ලබන පහන ඉවත්කර ගැනීමේ හැකියාවක් ඇති අතර එසේ නිදහස් කරන්නේ නම් එම පහන දල්වනු ලබන දේවාලයට ගොස් දින 7ක් ඇතුළත පහනෙන් නිදහස් වන බව දිවුරා පඬුරක් අස්කළ යුතු අතර ඉන් පසුව දින 21කින් පසුව අදාළ භාරය ඔප්පු කොට නිදහස් වීම සිදුකළ යුතු අතර ඒ තුළින් ඔබට යහපත්කම සිදුවන බව මතක තබා ගන්න. දෙවියන්ගේ ඇල්ම බැල්ම මෙන්ම පිහිට උපකාරය ලබාගැනීමට අවශ්‍ය නම් සිදුකළ යුත්තේ පින්කම් සිදුකොට දෙවියන්ට නම් කියා පින් ලබාදීම බව වාස්තුවේ මනාව පෙන්වාදී තිබෙන්නේ ඔබගේ යහපත සඳහාමයි.
වාස්තු විද්‍යා විශාරද
ශාස්ත‍්‍රවේදී පේරාදෙණියේ
ඞී.යූ. සෙනරත්
උපුටා ගැනීම මව්බිම පුවත් පත
