ධනය, බලය,සටන්කාමීබව හෙළිකරන කුජ රේඛාව
අද ඔබට හඳුන්වාදීමට යන්නේ අත්ලක පිහිටන තවත් අප්‍රධාන රේඛාවක්‌ වන කුජ රේඛාව පිළිබඳවයි. දිබරගිල්ලටත්, මහපට ඇඟිල්ලටත් අතර පහළ කුජ මණ්‌ඩලයෙන් ආරම්භ වී ජීවන රේඛාවට සමාන්තරව ජීවන රේඛාව හා නොගැටී මැණික්‌ කටුව දෙසට විහිද යන මෙම රේඛාවට දෙවෙනි ජීවන රේඛාව කියාද සමහරු හඳුන්වයි. ජීවන රේඛාවට ප්‍රබල ශක්‌තියක්‌ ලබාදෙන කුජ රේඛාවෙන් නිර්භීතබව, ධෛර්යය, සටන් කාමීබව, කෝපසහගතබව ආදී ගුණාංග ප්‍රකට කරයි.
කුජ රේඛාවක්‌ ඇති අයගේ සෞඛ්‍ය තත්ත්වයද ඉතා යහපත් වන අතර ඔවුනට ජීවිතයේ දුක්‌ කරදර බාධා මැඩගෙන ඉදිරියට යැමේ ප්‍රබල ආත්ම ශක්‌තියක්‌ ඇත. ජීවන රේඛාවේ යම් අඩුපාඩුවක්‌ හෙවත් ජීවන රේඛාව දුර්වල වූ අවස්‌ථාවකදී කුජ රේඛාව බලවත්ව පිහිටා තිබේ නම් ජීවිත රේඛාවෙන් සිදුවීමට තිබුන යම් කිසි අනතුරු තත්ත්වයන් වළක්‌වා ගැනීමේ ශක්‌තියක්‌ කුජ රේඛාවට ඇත. ජීවන රේඛාවේ අඩුපාඩුකම් මඟහරවා එයට ජීව ශක්‌තියක්‌ ලබාදීම තමයි මෙම රේඛාවෙන් කෙරෙන ලොකුම කාර්යය. කුජ රේඛාව ජීවන රේඛාවට ඉතා සමීපයෙන් වැටී තිබේනම් තම මෑණියන් කෙරෙහිත්, ඊට ටිකක්‌ ඈත්වෙලා තිබේනම් පියාණන් කෙරෙහිත්, තවත් දුරස්‌තරව පිහිටා තිබේනම් සහෝදර සහෝදරියන් කෙරෙහිත් මෙම රේඛාව බලපෑම් කරයි. දෙමාපියන්ගෙන් සහකරුගෙන් හෝ සහකාරියගෙන් තමන්ට බොහෝ උදව් උපකාර බලාපොරොත්තුවෙන් ඉන්න අයගේ අත්වල මෙම කුජ රේඛාව පිහිටන බව හස්‌ත රේඛා පරීක්‍ෂණ වලින් ඔප්පු වී ඇත.
කුජ රේඛාවක්‌ සටහන් වී ඇති අය බොහෝ විට ඉතාමත් විශ්වාස වන්තය. ඔවුන් ගන්නා තීරණ වෙනස්‌ නොවේ. ඔවුන් යම්කිසි අරමුණක්‌ කෙරෙහි සිත යොමු කළහොත් එය කෙසේ හෝ මුදුන්පත් කර ගැනීමට වෙහෙසෙයි. බලවත් ලෙස රේඛා පිහිටි අත් හිමියන්ගේ අත්වල මනාව පිහිටන කුජ රේඛාවෙන් ලැබෙන ජීව ශක්‌තිය අසීමිත වෙයි. කිසියම් කාන්තාවකගේ අතක එවැනි සුභ පිහිටීමක්‌ තිබේනම් ඇය පතිවත රකින සැබෑ කුල කාන්තාවක්‌ විය යුතුය. අනිකුත් රේඛාවල කැඩීම්, බිඳීම් ආදිය වේනම් එයින් ඇතිවන අසුබඵල, අනේක විධ බාධක, මාරක මගහරවා ජීවිතය ආරක්‍ෂා කරදීමටත් මෙම රේඛාව මගින් දෙන ලබන රුකුල් අතිමහත්ය. අස්‌වාභාවිකව පිහිටා ඇති කුජ රේඛාව අශුභ තත්ත්වයක්‌ පෙන්නුම් කරයි. එවැනි අයට අන් අයගෙන් කොපමණ ආධාර, උපකාර ලැබුනත් එයින් කිසිදු ප්‍රයෝජනයක්‌ ලබාගත නොහැක. අන්‍යයන්ගේ බලපෑම නිසා සිදුවන ජීවන රටාවේ නොයෙකුත් හැලහැප්පීම් ඒ මගින් අනාවරණය කරගත හැක. ජීවන රේඛාවත් කුජ රේඛාවත් අතර නොපැහැදිලි රේඛාවක්‌ තිබීමද අසුභ දායක විවාහ ජීවිතයේ කඩාවැටීමක්‌ එයට හේතු වේ. කුජ රේඛාවෙන් විහිදෙන ආරෝහ ජීවන රේඛාවට සම්බන්ධවීම සුබ පිහිටීමක්‌ වේ.
තීක්‍ෂණ බුද්ධියක්‌ ඇති බවද එයින් පැහැදිලි වෙයි. සමහර අයගේ මෙම රේඛාව දබරගිල්ලටත් මහපටගිල්ලටත් අතරින් පටන්ගෙන ටිකදුරක්‌ විහිද ගොස්‌ ජීවන රේඛාව කැපී යන ලෙසටද පිහිටා ඇත. එවිට පිරිමියෙක්‌ නම් ස්‌ත්‍රීන් නිසාත් ගැහැනියක්‌ නම් පිරිමින් නිසාත් චිත්ත පීඩා ඇතිවීමට පුළුවන.
ආරෝහණ රේඛාවක්‌ (ඉහළට යන) ගුරු මණ්‌ඩලයට හෙවත් දබරගිල්ලේ මුල ප්‍රදේශයට විහිද යැම උසස්‌ විවාහයක සිදුවීමට හේතුවක්‌ වනු ඇත. කුජ රේඛාවෙන් විහිදුන රේඛාවක්‌ චන්ද්‍ර මණ්‌ඩලයෙන් කෙලවර වූයේ නම් හේ අශෝභන ක්‍රියාවන්හි යෙදෙන අයෙක්‌ වන අතර සමාජයේ අගෞරවයට ලක්‌වෙන තැනැත්තෙකුද වේ. යම් හෙයකින් කුජ රේඛාව ජීවන රේඛාව ඡේදනය කරමින් චන්ද්‍ර මණ්‌ඩලයට ගියේ නම් සීමාව ඉක්‌මවා කාමාධික ක්‍රියාවන්ට යොමුවීමෙන් අකල් මරණයට පවා ගොදුරු විය හැක. මෙම රේඛාව රත් පැහැයෙන් යුතුනම් එම අත්හිමියා අධික රාගාධිකයෙකු බව පෙන්නුම් කරයි. කුජ රේඛාවෙන් බෙදීයන රේඛාවක්‌ දෛව රේඛාවට ඇතුළුවීම් යම් කෙනෙකුගේ ජීවිතය උසස්‌ තත්ත්වයකට පැමිණීමේ සුබ ලකුණකි. යම් විදියකින් කුජ රේඛාවෙන් පැන නගින රේඛාවකින් රවි රේඛාව ඡේදනය වේනම් එම අයගේ විවාහ ජීවිතය අසාර්ථක වනුයේ ඔවුන් තුළ ඇති වංචනිකභාවය නිසාය. කුජ රේඛාව තරුවකින් අවසන් වීමද අසුභය. සාහසික දරුණු අපරාධ යන්ට මුල්වන අය තුළ මෙම සලකුණ දැකිය හැක. කුජ රේඛාව සීමාව ඉක්‌මවා පළල් වීම පුද්ගලයා හිතුවක්‌කාරී කලහකාරී පුද්ගලයකු කරයි. ඇතැම් අයගේ කුජ රේඛා දෙකක්‌ හෝ තුනක්‌ වැටෙන අවස්‌ථාද ඇත. ඒ අයුරින් පිහිටා තිබෙන අය උඩඟු බවක්‌ පෙන්නුම් කරන අතර තමා කරන කියන කටයුතු හැමවිටම නිවැරදි යෑයි සිතයි. කිසිලෙසකින් තම අදහස්‌ වෙනස්‌ නොකරයි. කුජ රේඛාව ඉතා පැහැදිලිව රක්‌ත වර්ණයෙන් යුතුවීම ඡන්මියා නිරෝගී අයෙකු කරන අතර ධනවත් වන අයෙකි. ඕනෑම අමාරු කටයුත්තක්‌ ඉතා සාර්ථකව ඉටුකරන අතර රහස් හෙළිනොකරන එඩිතර අයෙකු වෙයි. මෙය කුජ තලාව තුළින් (අත්ලේ මැදින්) එන රේඛාවන්ගෙන් කැපීමද අශුභපල ගෙනදීමට හේතුවෙයි. එනම් සතුරු කරදර නීතිමය ගැටලු රැකියා අහිමිවීම් වැනි දේ ඇති කරයි. රේඛාව කෙලවර දූපත් ලකුණකින් අවසන්වීම හදිසි අනතුරු මෙන්ම මාරක විපත් ඇතිවීමට හේතුවනු ඇත.
හිඹුටානේ - පියතිලක ද අල්විස්‌
උපුටා ගැන්ම දිවයින
