අත්ලේ රේඛා බලා රෝග හඳුනා ගනිමු
අත්ල පරීක්‍ෂා කිරීමෙන් හා අත්ලේ පිහිටන රේඛා ලක්‍ෂණ සලකුණු ආදියෙන් කෙනකු තුළ බලපවත්නා රෝග ලක්‍ෂණ කලින් දැනගැනීමට හැකිවීම දේහ ලක්‍ෂණ විද්‍යාව තුළින් ලද හැකි මහඟු කාර්යයකි. එය බොහෝ විට එම රෝග වළක්වා ගැනීමට ද මහත් පිටුවහලක් වෙයි. අත්ලක පිහිටන ප්‍රධාන රේඛා, අප්‍රධාන රේඛාවලින් මෙන්ම අල්ලේ පිහිටන තිත් ලප කැළල් හා සලකුණු මගින් ද කෙනකුට බලපාන ලෙඩ දුක් හදිසි අනතුරු ආදිය ද කලින් දැනගත හැකිය.
අත්ලේ සිනිදු ගතියෙන්ද, ප්‍රධාන රේඛා පැහැදිලිව පිහිටීමෙන් ද සිහින් රේඛා වල අඩුකමින්ද බොහෝ විට පුද්ගලයන්ගේ නිරෝගිකම පැහැදිලි වෙන බව සාමුද්‍රික ශාස්ත්‍රයේ පෙන්වා දී ඇත. නිරෝගී අයකුගේ අත්ල සුදු මිශ්‍ර රෝස පැහැයෙන් යුක්ත වන අතර ඉතා සියුම් උණුසුම් බවක් ද පෙන්වයි. ප්‍රධාන රේඛාවන් පැහැදිලිව පෙන්නුම් කළ යුතු අතර එම රේඛාවන් කැපීම්, බිඳීම් වලින් යුක්ත නොවිය යුතුය. අත්ල හා රේඛා රක්ත වර්ණයෙන් දිස්වීම, අල්ලේ සම වියලි බවක් පෙන්වීම ගැස්ට්‍රයිටිස් වැනි රුධිරය ආශ්‍රිත රෝග වැලදීමට හේතුවේ. අත්ලේ විහිදෙන පළල් වූ සුදුමැලි රේඛාවලින් ශාරීරික දුර්වලකම හා පාණ්ඩු ගතිය ප්‍රකට කරන අතර කිසියම් අයකුගේ අත්ල සම හා රේඛා කහ පැහැයට හුරු නම් එමගින් පෙන්නුම් කරන්නේ පිත් අධික රෝග වැළඳීමේ ප්‍රවනතාවයක් ඇති බවයි. එය සෙංගමාලය වැනි උණ රෝග වැළඳීමට ද හේතුවක් විය හැක. විවිධ වර්ණවලින් අඳුරු පැහැති රේඛාවලින් ආම වාත රෝගවලින් පීඩා විඳීමට හේතුවක් වේ.
කෙනකුගේ ශරීරය තුළ රුධිර සංසරණයේ ක්‍රියාකාරිත්වය පිළිබඳව විශේෂයෙන් සටහන් වන රේඛාව හෘදය රේඛාව වේ. රුධිර ධාවනයේ යම්කිසි අක්‍රමිකතාවයක් ඇතිවූ විට එම මොහොතේම මෙම රේඛාවේ සටහන් වෙන නිසා සෞඛ්‍ය තත්ත්වය පරීක්‍ෂා කිරීමේදී අත් රේඛාවලට වඩා හෘදය රේඛාව වැදගත් වෙයි. පෙනහලු හා ස්වාස නාලයේ ක්‍රියාකාරිත්වය පිළිබඳව ද මෙම රේඛාවේ සටහන් වෙයි. හෘදය රේඛාව කහ පැහැගැන්වී තිබීම හෘදය රෝග හෝ පෙනහලු රෝග ඇති බවට සලකුණකි. අධික දුම් පානය හෝ මත්පැන් පානය කරන අයගේ හෘදය රේඛාව කහ පැහැ ගැන්වී ඇති බව දැකිය හැක. හෘදය රේඛාව ගැඹුරුව අල්ලේ පිහිටා ඇති අය බොහෝ විට රුධිර ධාවන රෝග ස්නායු දුර්වලතා ඇතිවීමෙන් අංශභාගය වැනි රෝග පීඩාවන්ට ගොදුරු වෙයි. හෘද රේඛාවේ කළු පාට තිත් වැටීම හදිසියේම හෘදයාබාධ රෝගයක් වැළඳීමට හේතු වන අතර ඒවා රතු කහ පැහැයකින් යුතු ලප පිත් අධිකවීම නිසා ඇතිවන රෝග තත්ත්වයන් පිළිබඳ සලකුණු ලෙස සැලකේ. එමෙන්ම මෙම පිහිටීම් ඇති බොහෝ පුද්ගලයන් දැඩි ලෙස කෝපසහගත වේ. ජීවන රේඛාවේ පිහිටි ලප හෝ තිත්වලින්ද රෝගාබාධ හෝ කිසියම් ඥාතිවරයකුගේ වෙන්වීමක් පෙන්නුම් කරයි. ශීර්ෂ රේඛාව මත මෙවන් පිහිටීම් වූයේ නම් හදිසි අනතුරක් පිළිබඳව ද හැඟවීමක් කරයි. එහෙත් එලෙස සටහන් කළු පැහැ හෝ කහ පැහැවීනම් රෝගාබාධ ලක්‍ෂණයකි. යම් හෙයකින් නිල් පැහැයට හුරු තිත් හෝ ලපයන් පිහිටියේ නම් රුධිර රෝග හෝ ස්නායු රෝග මතුවීමට පුළුවන. අත්ලේ රේඛාවල පිහිටි දූපත් සටහන් වලින් අසනීපයක් සලකුණු පෙන්නුම් කරන අතර නැති නම් එම සලකුණ මානසික පීඩාවක් ප්‍රකට කරන්නක් වේ. රේඛාවක් පැලීමෙන් අතු දෙකකට බෙදී නැවත එම අතු රේඛා එක්වීමෙන් දූපත් සලකුණ නිර්මාණය වෙයි. කල්ගතවන රෝග පාරම්පරික රෝග වැනි ව්‍යාධීන් පිළිබඳව දූපත් සටහනකින් හඳුනා ගත හැක. මේ අනුව ශීර්ෂ රේඛාවේ දූපත් සලකුනින් මානසික රෝග බාධා ද ජීවන රේඛාවේ වී නම් ශාරීරික දුබලතාද, දෛව රේඛාවේ වී නම් දෛවය වෙනස් කරන තරමේ බලවත් රෝග ද රවි රේඛාවේ වී නම් චර්ම රෝග මානසික රෝග, අපකීර්තිය, රාජ්‍ය දඬුවම් තනතුරුවලින් පහවීම් ආදී අසුභ සිදුවීම්ද, සුඛ රේඛාවේ වී නම් අනිවාර්යයෙන්ම රෝග පීඩා ද හෙළි කරයි.
ජීවන රේඛාව චන්‍ද්‍ර මණ්ඩලයෙන් කෙලවර වන්නේ නම් ගර්භාෂගත රෝග හා මුත්‍රා රෝග ආදිය ප්‍රකට කරයි. එමෙන්ම චන්‍ද්‍ර මණ්ඩලයේ කවාකාර සලකුණ ජලයෙන් සිදුවන අනතුරු ප්‍රකට කරයි. එම රේඛාව දම්වැල් ආකාර ලක්‍ෂණයෙන් යුතුවීම ස්නායු දුර්වලතාවයන් හෝ මානසික පීඩාවන් පෙන්නුම් කෙරේ. ජීවන රේඛාව තරු ලක්‍ෂණයකින් අවසන් වීම සිරුරේ දුබලතා හා ඌෂ්ණ රෝග පිළිබඳව දැනුවත් කරයි.
අත්ලේ රේඛාවන් අතරින් විශේෂයෙන් සෞඛ්‍ය පිළිබඳව සටහන් වෙන රේඛාව සුඛ රේඛාව නමින් හඳුන්වනු ලබයි. මේ රේඛාව ප්‍රධාන වශයෙන් චන්‍ද්‍ර මණ්ඩලයෙන් ආරම්භ වී බුධ මණ්ඩලයෙන් අවසන් වෙයි. මෙය බොහෝ දෙනකුගේ නොපිහිටයි. එම රේඛාව තිබෙනවානම් පැහැදිලිවම තිබිය යුතුය. රේඛාව පිහිටා නැතිවුවද ප්‍රශ්නයක් නොවේ. එම රේඛාව විකෘතිවීම්, කැඩීම්, බිඳීම්, දඟරාකාර වීම් වැනි සලකුණු වලින් අයහපත් සෞඛ්‍ය තත්ත්වයක් පැහැදිලිව ප්‍රකට වේ. එම අසුභ ලකුණුවලින් තොර සුඛ රේඛාවන් යහපත් සෞඛ්‍ය තත්ත්වයක් මෙන්ම කෙනකුගේ ආර්ථික දියුණුවද පෙන්නුම් කරයි. මෙම රේඛාව කහ පැහැ ගැන්වීමෙන් අක්‍ෂි රෝග ද එය කැබලි ආකාරයෙන් පිහිටා ඇතිනම් ජීර්ණාබාධ, උදරාබාධා ද, දූපත් සටහන් ආදිය පිහිටීමෙන් මුත්‍රා රෝග හා වකුගඩු රෝග ද ඇතිවන බව පෙන්නුම් කෙරේ. මෙම රේඛාව පටුව සිහින්ව ගැඹුරුව විහිද යෑම ශරීර සනීපයට යහපත් වන අතර එය පලල්ව විෂමව විහිදීම හුදෙක්ම රෝග පීඩාවන්ට හේතු වේ. සුඛ රේඛාව කෙටිව ගැඹුරුව පිහිටීම මහලු වයසේදී ජඨරාග්නිය හීනවීමට ද, මළ බද්ධය හා හිස රුදාව ඇතිවීමට ද හේතුවේ. දූෂිතභාවයෙන් තොරව සුඛ රේඛාව ගැඹුරට විහිද ගොස් උඩුකුරුව අතු විහිදී යෑම නිරෝගභාවයට හා ධන ලාභවලට ද හේතුවේ.
හිඹුටානේ පියතිලක ද අල්විස්
අංක 158, හිඹුටාන, මුල්ලේරියාව නව නගරය
