කටහඬට ක්රි යාත්මක ජල කරාමයක් හැදූ සුපිරි වැඩ්ඩා
කොවිඩ් - 19 වසංගතය පැතිරයෑමත් සමඟ බොහෝ අය එම වයිරසයෙන් ආරක්ෂා වීමට අලුත් මෙවලම් නිර්මාණය කළහ. ඒ අතර අලුතින් බිහි වූ දේශීය නිර්මාණද තිබිණි. මෙම නිර්මාණ නිසා කොවිඩ්-19 වසංගතයට ගොදුරු වූ අයට ප්‍රතිකාර කරන වෛද්‍යවරු, හෙදියන් මෙන්ම සෞඛ්‍ය අංශවල බොහෝ දෙනාගේ ආරක්ෂාව සැලසිණි. මෙහි ඇති වැදගත්ම දේ වන්නේ පවතින තත්ත්වය හමුවේ අලුත් අලුත් නිර්මාණ බිහිවීමය.
මේ ආකාරයට එක් එක් නිර්මාණ බිහි වූ අතර සමහර අයට එම නිර්මාණ වැඩිදියුණු කර ගැනීමට නොහැකි වූයේ ආර්ථික වශයෙන් ඔවුනට ශක්තියක් නොමැති හෙයිනි. ආර්ථික වශයෙන් ශක්තිමත් බොහෝ දෙනකු මේ අයට අතහිත දුන්නේද එහෙයිනි.
මේ ආකාරයට කළ සෑම නිර්මාණයක්ම බොහෝ සේ වටින්නේය. ඒ මේ රටේ පුරවැසියකුගේ අලුත් නිර්මාණයක් වෙන හෙයිනි.
මේ ආකාරයට ස්වයංක්‍රියව ක්‍රියාත්මක වන ජල කරාමයක් මෙන්ම කටහඬට ක්‍රියාත්මක වන ජල කරාමයක් නිර්මාණය කිරීමට ලංකාවේ තරුණයකු සමත් වී තිබේ. ඔහු නමින් යූ.ආර්. සම්පත්ය. පදිංචි වී සිටින්නේ කහතුඩුව ප්‍රදේශයේය. ස්වයංක්‍රියව ක්‍රියාත්මක වෙන ජල කරාමය එයට සමගාමීව සබන් ස්වයංක්‍රියව එන විධියටද මෙම ජල කරාමය නිර්මාණය කර තිබේ. මෙම ජල කරාමය ක්‍රියාත්මක වෙන්නේ වවුලා සංඥා නිකුත් කරන ක්‍රමවේදය උපයෝගි කරගනිමිනි. සාමාන්‍යයෙන් ජල කරාමයක් ක්‍රියාත්මක කිරීමේදී සෑම අයකුම එය ඇල්ලීමට යෑමෙන් කොරෝනා වයිරසය ව්‍යාප්ත වීමේ ඉඩකඩ වැඩිය. විශේෂයෙන්ම රෝහල්වල මෙන්ම පොදු ස්ථානවල, කාර්යාලවල සෑම දෙනාම ජල කරාම අතින් ඇල්ලීමට යෑමෙන් කොවිඩ්-19 වයිරසය පැතිරීමේ අවදානම වැඩි විය.
මේ සඳහා පිළියමක් ලෙස ස්වයංක්‍රියව ක්‍රියාත්මක වන ජල කරාමය නිර්මාණය කිරීමට සම්පත්ට හැකි වී තිබේ. මෙම ස්වයංක්‍රිය ජල කරාමයට අමතරව විසබීජ නසන කුටියක්ද නිර්මාණය කිරීමට සම්පත්ට හැකි වී තිබේ. සම්පත් නිපදවා ඇති ස්වයංක්‍රිය ජල කරාමය අනුව ජල අවශ්‍යතාවට එන පුද්ගලයා ජල කරාමයට අඩි එකහමාරක් දුරින් ඇති විට ක්‍රියාත්මක වේ. එසේම මෙම ජල කරාමය රාත්‍රි කාලයේදී වඩා හොඳින් ක්‍රියාත්මක වෙයි. ඒ වවුලාගේ සංඥා නිකුත්වීම රාත්‍රි කාලයට සිදුවෙන හෙයිනි.
මෙම ජල කරාමයට අමතරව සම්පත් විසින් නිපදවා ඇති නවතම ජල කරාමය වන්නේ කටහඬට ක්‍රියාත්මක වෙන ජල කරාමයයි. මෙහි ඇති සුවිශේෂීත්වය වන්නේ බචන ධද කියා කියූවිට ජල කරාමය ක්‍රියාත්මක විමය. නැවැත බචන ධටට කියු විට එය ක්‍රියා විරහිත වෙයි. කොවිඩ්-19 වසංගතය පාලනය කිරීමේ අටියෙන් නිර්මාණය කළ මෙම ජල කරාම දෙකම මේ වෙන විට බොහෝ ආයතනවල ස්ථාපිත් කිරීමට එය නිර්මාණය කළ සම්පත්ට හැකි වී තිබේ.
හඬ විධානයට ක්‍රියාත්මක මෙම ජල කරාමය ක්‍රියාත්මක කරන්නේ සැකසූ පරිපථයක් මඟිනි. ලංකාවේ පළමු වරට නිපදවා ඇති මෙම ජල කරාමය කොවිඩ්-19 වසංගතයෙන් ආරක්ෂා වීමට හොඳ මාර්ගයකි.
මෙම නිර්මාණවලට අමතරව සම්පත් තවත් නිර්මාණ දෙකක් හඳුන්වාදී තිබේ. ඉන් එකක් වන්නේ ස්වයංක්‍රියව වැඩ කරන නිරෝධායන කුටියකි. මෙම කුටියට යම් අයකු ගිය විට ඉහළින් සහ දෙපසින් විසබීජහරණය සිදු වෙයි. එය සිදු වෙන්නේ ස්වයංක්‍රියවය. ඉන් සම්පූර්ණ වශයෙන්ම විසබීජහරණයට ලක් වන බව සම්පත් කියයි. මීට අමතරව ස්වයංක්‍රියව වැඩකරන රොබෝ යන්ත්‍රයක් නිර්මාණය කිරීමටද සම්පත්ට හැකි වී තිබේ. එම රොබෝ යන්ත්‍රය වැඩිදියුණු කිරීමට සම්පත්ට තවම හැකි වී නැත. ඊට හේතුව වී තිබෙන්නේ ඒ සඳහා යන වියදම දරා ගැනීමට සම්පත්ට හැකියාවක් නොමැති වීමයි. රුපියල් 80,000කට ආසන්න මුදලක් මෙහි මුල් අදියර සම්පූර්ණ කිරීමට වියදම් වන බව සම්පත් පවසයි. නමුත් තවත් වැඩිදියුණු කිරීමට හැකියාවක් ඇති බවද සම්පත් කියයි. එහෙත් තමන්ට ඒ සඳහා ආර්ථික වත්කමක් නොමැති අතර මූල්‍ය ආධාර දිය හැකි අයකු සිටී නම් රොබෝ යන්ත්‍රයද තව තවත් වැඩිදියුණු කිරීමට හැකි බව සම්පත් පවසයි.
සම්පත්ට මෙම නිර්මාණ කිරීමට හැකියාව හොඳින්ම පවතියි. ඔහුට මෙවැනි නිර්මාණ කිරීමට හේතු වී ඇත්තේ සිය බිරිය බවද කියයි. ඇය හෙදියකි. දිනක් ඇය සේවය කරන ස්ථානයට ගිය විට එහි සේවය කරන අය වරින් වර අත සේදීමට ජල කරාම අරින අතර එහිදී ජල කරාම අරින අරින පාරක් පාරක් පාසා ජලය අපතේ යන බව සම්පත්ට පෙනුණි. එනිසා බිරිය සමඟ නිවෙසට ආවිට ඔහු කළේ ස්වයංක්‍රියව වැඩ කරන ජල කරාමයක් හැදීම ගැනය. මුලදී වැඩේ සාර්ථක නොවුණත් ඒ වෙනුවෙන් කැප වීම මත ස්වයංක්‍රියව වැඩ කරන ජල කරාමය නිපදවීමට සම්පත්ට හැකි වී තිබේ. ඉන් පසු කටහඬට ක්‍රියාත්මක ජල කරාමයක් නිපදවීම දක්වා මෙම නිර්මාණය වැඩිදියුණු වී තිබේ.
මෙම කාර්යයේදී සම්පත්ට බොහෝ දෙනකුගෙන් උදවු උපකාර ලැබී තිබේ. ඒ අතර විදුර වික්‍රමනායක, ජයන්ත සමරවීර වැනි පාර්ලිමේන්තුවේ හිටපු මැති ඇමැතිවරු මෙන්ම සම්පත්ගේ හිතවත් පිරිස් බොහොමයක්ද මේ කර්තව්‍යයේදී උපකාර කර තිබේ.
කොවිඩ්-19 වසංගතය හමුවේ එය පරාජය කිරීමට රජය ගන්නා මෙහෙවරේදී සම්පත් වැනි අයකුගේ නිර්මාණද අගය කළ යුතුය.
ප්‍රගීත් සම්පත් කරුණාතිලක
මව්බිම
