රැවුලෙන් ගොඩගිය එකම සංගීත ශිල්පියා මමලූ - හෙක්ටර් ඩයස්

වාදන ශිල්පියෙක් ලෙස කලා ක්ෂේත්‍රයට පය තබන ඔහු කාලය මැවූ වෙනසකට අනුව නිල්වන් මුහුදු තීරේ ගල්මල් පිපුන යාය හරහා යන ගමනෙදි රංගනයට පිවිසෙමින් "දිවිතුරා" හි අගස්ති ලෙස ඇතිකරගත් ආකර්ෂණීය පෙනුම නිසා බොහෝ ආදරණීයයන්ගේ කතාබහට ලක්වෙලා සිටින මොහොතක හෙක්ටර් ඩයස් නම් වූ ඒ සුන්දර සංගීත ශිල්පියා මෙන්ම රංගන ශිල්පියා සෙනෙහසේ නවාතැනට මෙසේ ගොඩවැදුනා.

සැක්සෆෝන් වාදකයෙක් ලෙස සංගීත ක්ෂේත්‍රයට ප්‍රවේශය ලබපු ඔබේ කුඩා අවධියේ මතකයන් සමග මේ කතාව පටන් ගනිමු.
මගේ ලොකු අයියා ගාමිණී ඩයස් දක‍ෂ ඩ්‍රම්ස් වාදකයෙක්. ඔහු නිසා අපේ ගෙදර නිතරම සංගීත කටයුතු සිද්ධ වුණා. ඊට අමතරව ඥාති සහෝදරයකුගේ "ද ස්පයිඩර්ස්" සංගීත කණ්ඩායමේ පුහුණුවීම් ඒ කාලෙ අපේ ගෙදර සිද්ධ වුණා. ඔය පසුබිම නිසා සංගීත උණ කියන එක මගේ ඇඟ ඇතුළේ වර්ධනය වුණා කියලා තමයි මට හිතෙන්නෙ.

මේ නැඹුරුවට අම්ම තාත්තා හරස් කැපුවෙ නැද්ද?
මෙහෙමයි මගේ තාත්තා ෆ්‍රැන්සිස් ඇන්ටනි ඩයස් ජීවිතෙන් සමුඅරගෙන තියෙන්නේ මම මාස දෙකක දරුවෙක් කාලෙදි. ඇත්තටම කිව්වොත් තාත්තා ගැන මට කිසිම මතකයක් නැහැ. අම්මා ඇනී සීටස් ප්‍රනාන්දු. ඇය මගේ සංගීත දිවියට හැම වෙලාවෙම ආශිර්වාදයක් වුණා.

ඒ ආශිර්වාදය මැද ඔබට මේරියන්ස් සංගීත කණ්ඩායමේ සාමාජිකත්වය හිමිවෙනවා.
ඔව්. ඒ සැක්සෆෝන් වාදකයෙක් ලෙස. ඉන්ස්ටෘමන්ට් එකට තියෙන ආසාව නිසාම තමයි මේරියන්ස් නායක නලින් අයියා මට ඒ අවස්ථාව ලබා දෙන්නේ. මොකද මගේ පාසල වූ වෙන්නප්පුව ජෝසප් වාස් විද්‍යාලයේ තූර්යවාදක කණ්ඩායමේ සැක්සෆෝන් වාදකයෙක් ලෙස කටයුතු කරල මට හොඳ පළපුරුද්දක් තිබුණා.

ඒ වාදකයා නොදැනිම ගායකයෙක් වෙනවා.
වාදකයෙක් ලෙස මේරියන්ස් ගෘෘප් එකට බැඳුනට මට ගායනා කිරීමේ හැකියාවක් තිබුණා. මේරියන්ස් එක්ක මම අවුරුදු 14 ක් වාදකයෙක් මෙන්ම ගායකයෙක් ලෙස කටයුතු කළා.

ඔය කාලෙදි ඔබේ ජීවන අත්වැල පාඨලී මුණ ගැහෙනවා.
1998 අවුරුද්දේ මම මේරියන්ස් කණ්ඩායමත් එක්ක ප්‍රසංගයක් සඳහා ප්‍රංශයට ගියා. ඒ ගිය වෙලාවෙ තමයි මුලින්ම පාඨලීව මුණගැහුනේ. එදා අපි දෙන්නට දෙන්නා වචනයක්වත් කතා නොකරට එකට ඉඳලා ෆොටෝ එකක් ගත්තා. නැවත 2003 අවුරුද්දේ ප්‍රංශයට ගිය වෙලාවෙ තමයි කතාබහ කරල අපි යාළුවෝ වුණේ. කාලයත් සමග ඒ යාළුකම ප්‍රේමයක් බවට පෙරළිලා 2004 දී අපි විවාහ වුණා.

ඩී මේජර් නමින් ඔබේම සංගීත කණ්ඩායම බිහිවෙනවා.
ඒ 2012 අවුරුද්දෙ. මම 2011 දී මේරියන්ස් කණ්ඩායමෙන් සමුඅරගෙන ප්‍රංශයේ පදිංචියට යනවා. පාඨලී එහේ හැදුන වැඩුන නිසා දරුවොත් එහේ අධ්‍යාපනයට යොමු කරමු කියන අදහස තමයි අපිට තිබුණේ. ඒත් ප්‍රංශයට ගිහින් මම මොනවද කරන්නේ කියන එක ගැන කිසිම අදහසක් තිබුණේ නෑ. කොටින්ම මේරියන්ස් වගේ ජනපි්‍රය කණ්ඩායමක ඉඳලා තනි පුද්ගලයෙක් විදිහට සංගීත ක්ෂේත්‍රයේ ඉදිරියට යන එක සිහිනයක් වෙලා තිබුණා. එතනදී පාඨලිත් මමත් තේරුම් ගත්තා මට එහේ ඉඳලා කරන්න දෙයක් නෑ සංගීත ශිල්පියෙක් විදියට මාව අයිිති ලංකාවට කියලා. ප්‍රංශයේ ඉඳගෙනම ඩී මේජර් කණ්ඩායම සැලසුම් සහගතව මෙහේ පටන් අරගෙන අවුරුද්දකට විතර පස්සේ මම ලංකාවට ආවා සංගීත කටයුතුවලට.

"ඩී මේජර්" ලෙස කණ්ඩායමට නම තියන්න විශේෂ හේතුවක් තියෙන්න ඇති නේද?
හේතු දෙක තුනක්ම තියෙනවා. ඩී මේජර් කියල සංගීත ස්වර අතර එන කී එකක් අපි සම්බන්ධ කර ගත්තා. අනික ඩයස් කිව්වම ඩී අකුර යෙදෙනවා. ඊළඟට මගේ දරුවෝ තුන් දෙනාගෙම නම් ඩියෝනා, ඩෙලෝන්, ඩෙවින් පටන් ගන්නෙ "ඩී" අකුරෙන්. ඊළඟට මේජර් කියන්නේ නායකයා කියන අර්ථය. ඔය හැමදේම නිසා එදා ඒ නම හැදුනා.

කොහොම වුණත් සංගීත ක්ෂේත්‍රයේ තරුවක් වුණ ඔබට වැඩි ජනප්‍රියත්වයක් හිමිවුණේ වෙනත් ගායකයකුගේ ගීතයක් එහෙමත් නැත්නම් රී මේක් එකක් හරහා.
මෙහෙමයි කවර් සෝන්ග් කියන ඒවා ලෝකයේ බොහෝ රටවල කෙරෙන සාමාන්‍ය දේවල්. අපේ රටේ තමයි ඒ ගැන ප්‍රශ්න මතුකරන්නේ. මම ඇල්බම් දෙකක් කරපු ගායන ශිල්පියෙක් වුණත් වෙනත් ශිල්පීන්ගේ ගීත මගේ හඬින් ගයන්න මම ආසයි. ඒ වගේම ඒවා රසවිඳින්න ආදරණීය රසිකයෝ කැමතියි. ඒ තුළ අදාළ ගීතයේ මුල් ගායකයා අකමැත්තක් නැතිනම් කෙනෙක් කවර් සෝන්ග් එකක් කරන එකේ කිසිම වැරැද්දක් නෑ. ඒ අනුව තමයි මම ඩෙස්මන් ද සිල්වා මහත්මයාගෙ අවසරය මත නිල්වන් මුහුදු තීරේ ගීතය රී මේක් එකක් විදියට ගායනා කළේ. අනික ඕනෑම කෙනෙක්ට ෆීල්ඩ් එකට එන්න වෙන්නෙ කවර් සෝන්ග් එකක් හරහනේ.

ඒ හරහා හෙක්ටර් ඩයස් නමැති සංගීතවේදියා රංගන ශිල්පියෙක් බවට පත්වෙනවා.
ඇත්තටම ඒක නොහිතපු වෙලාවක මට ලැබුණ පුදුම සහගත අවස්ථාවක්. වාදන ශිල්පියෙක් වගේම ගායන ශිල්පියෙක් ලෙස විෂුවල් හරහා කෙරෙන මගේ රංගන ප්‍රතිරූපය මෙවැනි චරිතයක් ලැබීමට ඉවහල් වෙන්න ඇති කියල තමයි මට හිතෙන්නේ. ඒ අනුව තමයි හිරු නාළිකාවේ විකාශය වන දිවිතුරා ටෙලි සිත්තමට එහි අධ්‍යක‍ෂ චාමර ජයවීරගෙන් මට අගස්තිගේ චරිතයට ආරාධනා ලැඛෙන්න ඇත්තෙ.
චරිතයට සාධාරණයක් කරන්න පුළුවන් වෙයි කියල ඔබට එදා හිතුණද?
නිකමටවත් පාසල් වේදිකාවට ගොඩවෙලා අත්දැකීමක් නැති මට හිතුනෙම නෑ චරිතය ග්‍රහණය කරගන්න පුළුවන් වෙයි කියලා. ඒත් මම අවස්ථාව ප්‍රතිෙක‍ෂ්ප කළේ නෑ. මොකද අවස්ථාව කියන එක අපි කාටත් බොහොම වටිනවා. අද වෙනකොට දිවිතුරා කණ්ඩායමේ ප්‍රතිචාර නිසා මට හිතෙනවා මම චරිතයට සාධාරණය ඉටුකරල කියලා. ඇත්තටම ගායකයෙක් විදියට නළුකම හසුරවන්න තිබුණ නිසා චරිතය ගොඩනඟා ගන්න මට පහසු වුණා.

ඔය කියන්නේ දිවිතුරාහි අගස්තිගේ චරිතය සැබෑ දිවියේ හෙක්ටර්ට සමානයි කියලද ?
කොහෙත්ම නෑ. අගස්ති කියන්නේ හැමදේටම කේන්ති යන කෙනෙක්. ඒත් මම සම්පූර්ණයෙන් ඒකෙ අනිත් පැත්ත. අනිත් හැම තැනකදීමත් මගේ ගතිගුණවලට වඩා අගස්ති ගොඩක් වෙනස්.

හෙක්ටර් අගස්ති විදියට රංගනයට පිවිසෙන කොට පාඨලී දක්වපු ප්‍රතිචාර මොනවගේද?
මම දකින විදියට කිසිම බිරිඳක් රංගනයටවත් තමන්ගේ සැමියා වෙනත් කාන්තාවක් සමග ප්‍රේම ජවනිකා තුළ හැසිරෙනවා දකින්න දශමයක්වත් කැමති නෑ. ඉතින් පාඨලී ඉන්නෙත් එතන. ආරාධනාව ලැබුණ ගමන් මම ඇයට මේ ගැන කිව්වා. එතෙන්දි ඇය පිටපත බලලා මට කිව්වා සීමාවන් තියෙනවා ඒ තුළ ඔයා හරිදේ කරන්න කියලා.

දිගින් දිගටම ඔබට රංගන ශිල්පියෙක් ලෙස ඉදිරියට යන්න බිරිඳගෙන් අවසර නොලැඛෙන හැඩයි...
කොහොමටත් මගේ එහෙම බලාපොරොත්තුවක් නැහැ. මොකද මේ හැම දේකටම ඩවා මට වටින්නේ බිරිඳ සහ දරුවන් තිදෙනා සමග ගෙවන මගේ පවුල් ජීවිතේ.

දුවටත් පුතාලා දෙන්නටත් තාත්තගේ සංගීත හැකියාව කොයිතරම් දුරට පිහිටලා තියෙනවද?
තුන් දෙනාටම හොඳ සංගීත හැකියාවක් තියෙනවා. ප්‍රංශයේ තමයි ඉගෙනුම ලබන්නේ. ඒ අතරතුර ගායනය වගේම වාදනයත් ප්‍රගුණ කරනවා. තුන් දෙනාම ලෝකෙ කොහේ හරි රටක සංගීත අංශයෙන් යමක් කරයි කියල මට හිතෙනවා.

ඔබේ ශක්තිය බිරිඳ බව ඔබ නිතර කියන දෙයක්. අපි ඇය ගැනත් කතා කරමු නේද?
ඇත්තම කිව්වොත් බිරිඳ "පාටි" නොහිටින්න මට මේ කිසිම දෙයක් කරගන්න බැරි වෙනවා. ඒ තරමටම ඇය මම වෙනුවෙන් වෙහෙසෙනවා. දරුවො තුන්දෙනා බලාගෙන ඔවුන්ගේ හැම දේම කරන අතරේ ප්‍රංශයේ ඉඳලා මගේ කෑම බීම ටික ගැන පවා ඇය හොයල බලනවා. සංගීත කටයුතු පැත්තෙන් ගත්තත් ෂෝ එකක් භාර ගන්න තැන ඉඳලා සියලූම දේ සිද්ධ වෙන්නේ ඇගේ අතින්.

ඇය ප්‍රංශයේ ජීවත් වුණත් මේ ගෙදර දොර බොහොම පිළිවෙලයි. ඒ දේවල් සිදුවෙන්නේ ඔබේ අතින්ද?
අනේ නැහැ. ඒත් මම පුංචි කාලෙ ඉඳලා ගෙදර දොර ලස්සනට පිළිවෙලට තියෙනවට බොහොම කැමතියි. ඒක දන්න නිසා මම ආස විදියට මේ හැමදේම සිදුකරන්නේ පාඨලී. අපි දෙන්න අවුරුද්දකට පස් හය වතාවක් මම ප්‍රංශයටත් ඇය ලංකාවටත් යනවා එනවා. ඒ අතර තුර පාඨලී මේ හැමදේම පිළිවෙලට සකස් කරනවා.

දිවිතුරා හි අගස්ති ලෙස රංගනයට පය තැබූ ඔබ අඟනක්දෝ මියුසික් වීඩියෝව හරහා බිරිඳ පාඨලීවත් රංගනයට එකතුකර ගත්තා නේද?
මම හොඳින්ම දන්නවා පාටිටත් ඒ සඳහා හොඳ හැකියාවක් තියෙන බව. මුලින් බෑ බෑ කිය කිය ඉඳලා පස්සෙ එයා විෂුවල් එකට කැමති වුණා. කොහොමහරි ඉතින් නිර්මාණය සාර්ථක වුණා.

මේ හැම දේම අතරෙ අද දවසෙ හෙක්ටර් ඩයස් කියන සංගීත, රංගන ශිල්පියා, නිරූපන ශිල්පියෙක් ලෙස සලකා ලොකු කතාබහක් ඇතිවෙලා.
එහෙම තත්ත්වෙකට පත්වෙනවා නම් ඒක වෙන්න තිබුණෙ මීට වඩා කලින්. ඔය කතාබහට හේතුව වෙන්නෙ මම පුංචි කාලෙ ඉඳලම විලාසිතාවලට ප්‍රිය චරිතයක් නිසා වෙන්න ඇති. කොහොමටත් මට කන්න නැතත් ලස්සනට පිළිවෙළට ඒ වගේම පිරිසිදුව අඳින්න ඕන.

අද ඔබේ පෙනුම විශේෂයෙන්ම රැවුල කාන්තාවන් අතර වැඩි වශයෙන් කතාබහට ලක්වෙන අතරෙ තමන්ගෙ සැමියත් ඉදිරියේදී මේ විදියට රැවුල වවනවානම් තමන් කැමති බවට ඔවුන් මුහුණු පොතේ පෝස්ට් පවා ශෙයා කරනවා.
මම එෆ්බී එකේ පෝස්ට් කියවනවා අඩුයි. ඒත් හිතවත් බොහෝ දෙනෙක් ඔය තත්ත්වය මට කියල විහිළුත් කරනවා රැවුලෙන් ගොඩගිය එකම සංගීත ශිල්පියා මම කියල. කොහොම වුණත් මාව අනුගමනය කරල බිරිඳක් තමන්ගෙ සැමියව කඩවසම්ව තියාගන්න එහෙමත් නැත්නම් තමන්ගෙ බිරිඳගෙ සතුට වෙනුවෙන් මාව අනුකරණය කරනවනම් ඒ ගැන මම සතුටුයි. මොකද රැවුලක් වවල ලස්සනට ඉන්න එක වරදක් නෙමෙයිනෙ.

පැසුණු රැවුලක් හරහා ඔබව මේ තරම් කතාබහට ලක්වෙයි කියල හිතුනද?
අනේ නැහැ. මුලින්ම කොරෝනා ආපු කාලෙ ගෙදරටම වෙලා ඉන්න වුණ නිසා රැවුල නොකප හිටියා. ඔය අතරෙ පාඨලී කිව්ව රැවුල නොකප ඔය විදියට තියාගමු කියල. ඇගේ ඉල්ලීම නිසයි මම රැවුල වැව්වෙ.

විලාසිතා වගේම රංගනය නිසා ලැඛෙන ප්‍රතිචාර වගේම ජනප්‍රිය බව හරහා ඉදිරි දවසක හෙක්ටර් ඩයස් කියන ආදරණීය සංගීතවේදියා අපට අහිමි වෙයිද?
කවදාවත්ම නෑ. එදා වගේම අදත් අද වගේම හෙටත් මට ආදරය කරන හැම කෙනෙක්ම ඉදිරියේ මම පෙනී සිටින්නෙ සංගීත ශිල්පියෙක් විදිහට. අනික් හැමදේම දෙවැනි තැනට.