ඉසුරු – චුලක්ෂි අනුරාගයෙන් මත්වෙයි
උදයකාන්ත වර්ණසූරිය අධ්‍යක්ෂණය කරන ‘ගිනි මල් පොකුරු’ චිත්‍රපටය දෙසැම්බර් 3 වැනිදා සිනමාශාලා තුළ තිරගත වුණේ වාර්තා රැසක් පිහිටුවමින්. එහි ප්‍රධානම කාරණාව තමයි ලංකා ඉතිහාසයේ ප්‍රථම වතාවට සිනමා මණ්ඩල දෙකක් එකතු වෙලා මෙම චිත්‍රපටය තිරගත කිරීම. LFD මණ්ඩලය හා CEL මණ්ඩලය එකතු වෙලා සිනමාශාලා රැසක මෙම චිත්‍රපටය සාර්ථක ලෙස තිරගත කෙරුණා.
ගිනිමල් පොකුරු සිනමාව අර්බුදයකට ලක්ව ඇති මොහොතක තිරගත කරන අභියෝගාත්මක චිත්‍රපටයක්. මෙය උදයකාන්තගේ 25 වැනි චිත්‍රපටය ලෙස හඳුන්වන්න පුළුවන්.
අවුරුදු විස්සකට ප්‍රථම ලංකාවේ සිදුවූ සත්‍ය සිදුවීමක් මෙම චිත්‍රපටය සඳහා පාදක වෙලා තියෙනවා. රැඟුම් පාලක මණ්ඩලය විසින් මෙම චිත්‍රපටය වැඩිහිටියන්ට පමණක් සුදුසු චිත්‍රපටයක් ලෙස නම්කර තිබෙනවා. සිනමා ශාලාවලට ප්‍රේක්ෂකයන් නොයන මොහොතක අඩුම ගානේ වැඩිහිටියන්වත් සිනමාශාලා වෙත ආකර්ෂණය කරගන්න තමයි උදයකාන්ත මේ ආකාරයට වැඩිහිටියන්ට පමණයි චිත්‍රපටයක් නිර්මාණය කරලා තියෙන්නේ. තාත්වික ආකාරයට රූපගත කළ ලිංගික දර්ශන කිහිපයක් මෙම චිත්‍රපටයේ අන්තර්ගත වෙලා තියෙනවා.
ගිනිමල් පොකුරු චිත්‍රපටයේ ප්‍රධාන චරිතය නිරූපණය කරන්නේ චුලක්ෂි රණතුංග සහ ඉසුරු ලොකුහෙට්ටිආරච්චි. මෙම චිත්‍රපටයේ ඔවුන් දෙදෙනා ඉතා සාර්ථක ලෙස මෙම චරිත නිරූපණය කරනවා. මෙම චිත්‍රපටය රූපගත කරලා තියෙන්නේ අදියර දෙකක් යටතේ. ප්‍රථම අදියර කොරෝනා ප්‍රශ්නයට කලින් ඉවර කළා. දෙවැනි අදියර කොරෝනා ප්‍රශ්නයත් එක්ක තමයි රූපගත කරලා තිබෙන්නේ. මේ නිසා ප්‍රථම අදියරේ තිබුණු සමහර දර්ශන තල දෙවැනි අදියරේදී අරගන්න බැරිවෙලා තියෙනවා. ඒ හින්දා මුල්ම දර්ශනවලට ගැළපෙන ආකාරයට දර්ශන තල පවා අලුතෙන් නිර්මාණය කරන්න සිදුවෙලා තියෙනවා. මේ නිසාම චිත්‍රපටය සඳහා ඉතා විශාල පිරිවැයක් දරන්නත් නිෂ්පාදක කණ්ඩායමට සිදුවෙලා තිබෙනවා.
චිත්‍රපටයේ රූපගත කිරීම් සඳහා ලොකු බල්ලෙක් ඕන වෙලා තියෙනවා. පුහුණු කරන බල්ලන් අරගන්න තැනකින් උදයකාන්ත බල්ලෙක්ව ඉල්ලලා තියෙනවා. නමුත් රූපගත කිරීම් කරන දිනයේ ඔවුන්ට ඒ බල්ලා දෙන්න ලැබිලා නැහැ. මේ නිසා වෙනත් තැනකින් බල්ලෙක් අරගෙන පුහුණු කරලා ගන්න නිෂ්පාදක කණ්ඩායමට සිදුවෙලා. අවසානයේ ගෙනාපු බල්ලව සෑහෙන කට්ටක්කාලා තමයි රංගනයට සූදානම් කරලා තියෙන්නේ. නමුත් දර්ශනය රූපගත කරනකොට මේ බල්ලා චරිත් අබේසිංහගේ අත ඇත්තටම හපා කාලා තියෙනවා. මේ නිසා රූපගත කිරීම් නතර කරලා චරිත්ව ප්‍රතිකාර සඳහා යොමු කරන්නත් සිදුවෙලා තියෙනවා.
මන්ද බුද්ධික තරුණියකගේ ප්‍රධාන චරිතයක් මේ චිත්‍රපටය පුරාවටම තියෙනවා. උදයකාන්තට මේ චරිතයට ගැළපෙන මුහුණ තියෙන මන්ද බුද්ධික තරුණියව සොයාගන්න එක ලොකු අභියෝගයක් වෙලා තියෙනවා. ඒ සඳහා ගැළපෙන මුහුණ නැතිව උදයකාන්ත කල්පනා කර කර ඉන්නකොට තමයි චුලක්ෂි රණතුංග චිත්‍රපටයේ වැඩකට උදයකාන්තව මුණ ගැහෙන්න ඇවිත් තියෙන්නේ. ඇය ඇවිත් තියෙන්නේ යෙහෙළියකුත් එක්ක. චුලක්ෂිගේ යෙහෙළිය දැක්ක ගමන් උදයකාන්තට ඒ මුහුණ සෙට් වෙලා තියෙනවා. ඔහු මේ අභියෝගාත්මක චරිතය ගැන ඇයට කියලා තියෙනවා. ඇයට රඟපාන්න පුළුවන්ද කියන දෙගිඩියාවෙන් චරිතය ලබාදුන්නත් උදයකාන්තව පුදුම කරමින් ඇය මේ චරිතය නිරුපණය කරලා තියෙනවා. මේ චරිතය නිරූපණය කළ මුස්ලිම් රංගන ශිල්පිනිය දිල්රුෆා ෂනාෂ් අනාගතයේ හොඳ චරිතාංග නිළියක් වෙයි කියලා උදයකාන්ත අනාවැකි පළ කරලා තියෙනවා.
ඉසුරු ලොකුහෙට්ටිආරච්චි මෙහි නිරූපණය කරන්නේ පොලිස් ස්ථානාධිපතිවරයකුගේ චරිතයක්. මේ චරිතය සඳහා ගැළපෙන ආකාරයට ඇඟ වෙනස් කරගන්න ඉසුරු ලොකු කැපකිරීමක් කළ බව තමයි උදයකාන්ත ප්‍රකාශ කරන්නේ.
ඉතා සාර්ථක සත්‍ය කතා තේමාවක් ඔස්සේ දිගහැරෙන ගිනිමල් පොකුරු කැමරා කරලා තියෙන්නේ අයේෂ්මන්ත හෙට්ටිආරච්චි. ඇහැලියගොඩ සෝමතිලකගේ කලා අධ්‍යක්ෂණයෙන්, සරත් ද අල්විස්ගේ සංගීතයෙන් හැඩවන ගිනිමල් පොකුරු චිත්‍රපටයේ සහාය අධ්‍යක්ෂ ලෙස ඩොනල්ඩ් ජයන්ත කටයුතු කරනවා. චුලක්ෂි රණතුංග, ඉසුරු ලොකුහෙට්ටිආරච්චි, චරිත් අබේසිංහ සහ දිල්රුෆා ෂානාෂ් චිත්‍රපටයේ රංගනය සඳහා පණ පොවනවා. අභියෝගාත්මක කාල සීමාවක ප්‍රේක්ෂකයා සිනමාශාලා වෙත රැගෙන ඒමට වෙර දරන ගිනිමල් පොකුරු වැඩිහිටියන්ට පමණයි ලේබලය යටතේ සිංහල සිනමාවේ නව ඇරඹුමක් සටහන් කරාවි කියලා බොහෝ චිත්‍රපට විචාරකයන් අනාවැකි පළ කරලා තියෙනවා.
ජයරත්න ගලගෙදර
උපුටා ගැනීම අරුණ
