හර්ෂ පොරක් නෙවෙයිලු
හර්ෂ තෙන්නකෝන් පුංචි තිරය තුළ සාර්ථක වුණ රංගන ශිල්පියෙක්. වේදිකාවෙන් ලබාගත් ආභාසයත් ඔහුගේ රංගන පරාසය පෙන්වමින් විවිධ නිර්මාණ තුළ සාර්ථක වන්නට බලපෑම්කාරි වුණ බව නිසැකයි. රංගනයේ විවිධ කඩඉම් ස්පර්ශ කරන හර්ෂ කෙළින් කතා කරන තිතට වැඩ කරන කෙනෙක් විදිහටත් කතාබහට ලක්වෙනවා. ඒ නිසාම ඔහුට බොහෝ දේවල් මගහැරෙන්නටත් ඇති. ඒත් ඔහු තාමත් තමන්ගේ ස්ථාවරයේ ඉඳන් තමන්ට අනන්‍ය ගමනක යන කෙනෙක්.
ඔබ වැඩත් එක්ක කාර්යබහුල වෙලාද?
සංජය නිර්මාල්ගේ අලුත් වැඩක් කරලා ඉවර වුණා. දෙසැම්බර් මාසේ නිර්මාණ හතරක වැඩ පටන් ගන්න තියෙනවා. ඒ නිර්මාණ වෙනුවෙන් සූදානමක ඉන්නවා.
ඔබ පිටපත් නැති වැඩ භාර ගන්නේ නෑ කියන්නෙ ඇත්තද?
පහුගිය කාලෙම පිටපත් නැතුව කතා කරපු වැඩ මම භාර ගත්තේ නෑ. එහෙම වැඩ මම ආයේ භාර ගන්නේ නෑ කියන තීරණයේ මම ඉන්නේ.
නිශ්චිත පිටපතකට කෙරෙන නිර්මාණ දැන් සීමිතයි. එහෙම තත්ත්වයක ඔබ ගත්ත තීරණය අභියෝගයක් වෙයි?
කොරෝනා ආවත් එක්ක අපි ඕන තරම් අවදානම්වලට, අභියෝගවලට මුහුණ දුන්නා.
එච්චර අවදානමක් ගත්ත අපිට නාට්‍ය සම්බන්ධව අවදානම්වලට අභියෝගවලට මුහුණ
දෙන්න බැරි නැහැ. කොහොම වුණත් මගේ තීරණයේ ඉඳන් වැඩ කරන්න පුළුවන් හොඳ
නිර්මාණ මට ලැබිලා තියෙනවා. මම දැන් චැනල්වලින් කරන නාට්‍ය භාර ගන්නේ නෑ.
සකර්ම, ඔබේ නිර්ණායක ඇතුළේ තෘප්තිමත්ව කරන්න ලැබුණ වැඩක්ද?
සකර්ම නිෂ්පාදනය කරන්නේ චන්දන ලියන ගුණවර්ධන. මම ඔහු කලින් නිෂ්පාදනය කළ
නාට්‍යයකත් වැඩ කරලා තියෙනවා. ඔහු මම වැඩ කරන විදිහ දන්නවා. කොරෝනා දෙවැනි
රැල්ල ඉවර වෙද්දි තමයි නාට්‍යයේ වැඩ පටන් ගත්තේ. ඒ කාලේ අපි වැඩ නැතුව
ගෙදරට වෙලා හිටපු කාලේ. මම වෙන වැඩක් භාර ගන්නේ නැතුව ඒ නිර්මාණය වෙනුවෙන්
කැපවුණා.
දැන් බොහෝ නළු නිළියෝ කියන කාරණයක් තමයි අධ්‍යක්ෂවරු නළු නිළියන්ව මෙහෙයවන්නේ නෑ කියන කාරණය?
සකර්ම නාට්‍ය අධ්‍යක්ෂණය කරන ප්‍රියන්ත ප්‍රනාන්දු නළුවන්ව හොඳට මෙහෙයවන
හොඳ අධ්‍යක්ෂවරයෙක්. ඒ නිර්මාණය තුළ කාලයකට පස්සේ අපිව අධ්‍යක්ෂණය වුණා
කියලා දැනෙනවා. ගොඩක් වෙලාවට සමහර අධ්‍යක්ෂවරු අපි ගිහින් රඟපෑවම වාව්, මරු
කියලා කියනවා මිසක් නළුවා හෝ නිළියගේ රංගනය හදනවා අඩුයි.
මම මාර පොරක් නෙමෙයි. හැබැයි මම දන්නවා මම කවුද කියලා. මේ ක්ෂේත්‍රයේ ගොඩක් ජ්‍යෙෂ්ඨ අය මාත් එක්ක වැඩ කරන්න බෑ කියලා මාව කපපු අවස්ථා තිබ්බා. පස්සේ කාලේ මට ඒවා ආරංචි වුණා. මොන දේවල් වුණත් තවම මම ඉන්නවා. ඒ ඇති. මම කා එක්කවත් සාධාරණ හේතුවක් නැතුව ප්‍රශ්න දාගන්න යන්නේ නෑ.
වැඩ්ඩන්ටත් හැඳුනුම්කම් ඕනෙද ක්ෂේත්‍රයේ ඉස්සරහට යන්න?
හැඳුනුම්කම්වලට වැඩ ලබා ගන්න වෙනවා නම් අපි කාලයක් තිස්සේ විෂය ඉගෙන
ගෙන, වේදිකාවේ වැඩ කරලා, මහන්සි වෙලා වැඩේට අවංකව කරපු කැපකිරීම් වැඩක්
නැති වෙනවා. මගේ වැඩවලට ආදරේ උන් මට වැඩවලට කතා කරනවා. මාත් එක්ක වැඩ කළ
කෙනෙක් ආයෙත් මාත් එක්ක වැඩ කරන්නේ නෑ කියන තීරණය ගන්නේ නෑ. හැබැයි මගේ
කොන්දේසි ටිකක් තියෙනවා. මම ඒ ටික තියාගෙන තමයි වැඩ කරන්නෙ.
මොනවද වැඩක් භාර ගනිද්දි ඔබේ තියෙන කොන්දේසි?
මහ ලොකු කොන්දේසි නෑ. වෘත්තීයමය කොන්දේසි ටිකක් මගේ තියෙන්නේ. මම
රඟපාන්න යද්දි මගේ ඇඳුම් අරන් යන්නේ නෑ. මොකද මට තිරයෙදිත් මගේම ඇඳුම් ඇඳලා
හර්ෂව ආයේ පෙන්නන්න ඕනේ නෑ. බජට් එකත් මට වැදගත්. අසාධාරණ නැති මුදලක් මම
අය කරනවා. මම ගන්න ගාණටත් වඩා වැඩ කරන කෙනෙක්. රූගත කිරීම්වලට දවසක්
දුන්නොත් මම ඒ දවසේ වෙන වැඩ දාගන්නෙ නෑ. අඩු ගාණේ සෙට් එකේදි මම ෆෝන්
එකවත් පාවිච්චි කරන්නේ නෑ. මම වෙලාවට වැඩ කරන කෙනෙක්.
ඔබට දැන් වේදිකාව අතහැරිලම ගිහින්ද?
වේදිකාවෙන් පුංචි තිරයට ආවට පස්සේ මම ගොඩක් කාර්යබහුල වුණා. ඒකත් එක්ක
මට වේදිකාව මගහැරුණා. පවුල් ජීවිතය එක්කත් මට වේදිකාවේ වැඩ වෙනුවෙන් වෙන්
කරන්න කාලය මදිවුණා. මොකද පවුල් ජීවිතය ඇතුළේ බිරියයි මමයි හරි අමාරුවෙන්
දේවල් හදාගත්තේ. අපේ පවුල්වලින් අපිට ලොකු සහයක් ලැබුණේ නෑ. ඒ නිසා අපි
දෙන්නටම ලොකු කැපකිරීම් කරන්න වුණා. ඒත් එක්ක වේදිකාවත් මට මගහැරුණා. ආපහු
වේදිකාව එක්ක වැඩ කරන්න ආසයි.
ඔබේ වෘත්තීයමය තත්ත්වයන් එක්ක ඔබට පවුලේ වගකීම් මගහැරිල නැද්ද?
ඕන තරම් මගහැරිලා ඇති. කොරෝනා කාලේ මාස අටක් විතර එක දිගට මම ගෙදර
හිටියේ. එතකොට බිරියට දෙවැනි පුතා ලැබෙන්න හිටපු නිසා ලොකු පුතා බලාගන්න
එක, උයන එක පවා මම කළා. මම පුළුවන් වෙලාවට එයාලා වෙනුවෙන් කාලය වෙන් කළා.
මේ දවස්වල නම් මම එළියේ වැඩ කරන නිසා කොරෝනා තත්ත්වයන් එක්ක වෙනම ඉන්නේ. මම
ගෙදර යන්නේ ඇන්ටිජන් එකක් කරගෙන. දැන් මගේ ලොකු පුතාට අවුරුදු තුනහමාරයි.
පොඩි පුතාට අවුරුද්දයි. බිරියත් දැන් ගුරුවරියක්. අපි ෂේප් එකේ වැඩ කරගෙන
යනවා.
ජනප්‍රිය වෙද්දි නළු නිළියන්ගේ පවුල් ජීවිතත් ජනප්‍රිය වෙනවා. ඔබට පවුල ජනප්‍රිය කරන්න ඕනේ නැද්ද?
මට පවුල් ජීවිතය විකුණන්න ඕනේ නෑ. මගේ වයිෆ් ඩාන්සර් කෙනෙක්. ඕනෙ නම්
අපි දෙන්නට රියැලිටි ෂෝවල නටන්න තිබ්බා. මම ඒ දේවල්වලට කැමැති වුණේ නෑ.
බිරිය කැමති දෙයක් කරන්න මම ඉඩදුන්නා. අපි දෙන්නටම අපි කැමැති දේවල් කරන්න
නිදහස තියෙනවා. ඒ හැරෙන්න පවුල් ජීවිතවලින් ජනප්‍රිය වෙන්න ඕනේ නෑ.
තිළිණි කෞශල්‍යා විජේසිංහ
උපුටා ගැනීම අරුණ
