දිල්කි රට හැර ගියේ ඇයි ?
‘සත්තයි මට ඔබ වාගේ’ ගීතයට පෙම්බැඳි සියලු දෙනාම ඒ ආදරණීය හඬෙහි උරුමක්කාරියටත් අඩුවක් නැතිව ආදරය කරනවා කියලා අපි දන්නවා. නව පරපුරේ ජනප්‍රිය ගායන ශිල්පිනියක් වන දිල්කි උරේෂා තමයි ඒ හඬෙහි උරුමක්කාරිය.
හඳපානේ, ඇහැළිය මල, මගෙන් දුර වැනි ගීතවලට ලයාන්විතව පණ පොවන දිල්කි ප්‍රසංග වේදිකාවටත් නැතිවම බැරි චරිතයක්. ඇගේ හඬ ආදරණීයයි. තවත් අවස්ථාවක සංවේදියි. ඒ වගේම ලයාන්විතයි. ඒ නිසාම එදා වගේම අදත් බොහෝ දෙනෙක් ඇයට ආදරය කරනවා. ඇය ගැන වගේම ඇගේ හඬ ගැන කතා වෙනවා.
පහුගිය දවසක දිල්කි ඇගේ පෙම්වතාත් එක්ක පැරීසියේ සවාරියක් ගිහින් අයිෆල් කුලුන ඉදිරිපිටදී ගත්ත ආදරණීය ඡායාරූපයක් මුහුණු පොතට එකතු කරලා තිබුණා. ඒ ඡායාරූපය පළවීමත් සමග ඇය ගැන වන කතාබහ අලුත්වෙමින් නැවතත් කරළියට පැමිනුණා. දිල්කි ලංකාව හැර ගිහින් කියලාත් කතාවක් සමාජ මාධ්‍යවල පළ වුණා. දිල්කි උරේෂා කියන්නේ සමාජ මාධ්‍ය තුළත් අතිශයින් ජනප්‍රියත්වයට පත් චරිතයක්.
ඉතින් ලංකාව හැර ගියා කියන කතාව ගැන වගේම පැරිස් ගමන ගැනත්, ඉදිරි සංගීත වැඩ කටයුතු ගැනත් දැනගන්න පිනිපලස අපි දිල්කි උරේෂාට කතා කළා.
“ඇත්තටම මම ලංකාව අතහැරලා ගියේ නෑ. රටේ තියෙන වාතාවරණයත් එක්ක පුංචි වෙනසක් කළා නම් හොඳයි කියලා හිතුණා. ඒ නිසා පිටරටකට ගිහින් එන්න තීරණය කළා. පැරිසිය තමයි තෝරාගත්තේ. ඇත්තටම ඒ ගමන ගියේ අපේ රට ගැන කලකිරිලා නෙවෙයි. මානසික නිදහස වෙනුවෙන් තමයි පැරීසියට ගිහින් ආවේ. ඒ ගමන හරිම විනෝදජනකයි. අලුත් අත්දැකීම් රාශියක් ලබා ගන්න හැකි වුණා. ඒ වගේම උපරිමයෙන් සතුටු වුණා. නැවතත් සංගීත කටයුතු කරන්න පැරිස් ගමන අලුත් බලාපොරොත්තුවක් එකතු කළා.”
පැරීසියේ ගමනේ අත්දැකීම් විස්තර කරමින්ම දිල්කි කතාව පටන් ගත්තා. රට තුළ පවතින තත්ත්වයත් සමග මේ දිනවල සංගීත ප්‍රසංග සඳහාත් ආරාධනා ලැබෙන්නේ අඩුවෙන් කියන එක රහසක් නෙවෙයි. ඒ නිසාම පැරිස් ගමනින් පස්සේ කාර්ය බහුලත්වයෙන් මිදිලා නිදහසේ ගෙදරට වෙලා ඉන්නවා කියලාත් දිල්කි අපිට කිව්වා. මේ දවස්වල නිදහසේ ගෙදරට වෙලා කාලය ගත කළත්, දිල්කිගේ අලුත්ම ගීත නිර්මාණය ලස්සන රූප රචනාවකුත් එක්ක එළිදක්වන්න සියලුම කටයුතු සූදානම් කරලා තියෙනවා කියලා තමයි අපිට ආරංචිය ලැබුණේ. ඒ ගැනත් දිල්කිගෙන් අහන්න අපි අමතක කළේ නැහැ.
“අලුත් ගීත කිහිපයක්ම දැනට කරලා තියෙනවා. ඒ අතරින් එක නිර්මාණයක් ළඟදීම මගේ ආදරණීය රසිකයන්ට තිළිණ කරන්න සූදානම් වෙනවා. ‘හදවතට එකඟව’ තමයි මගේ අලුත්ම නිර්මාණයේ නම. අනෙක් ගීතවලට වඩා වෙනස් විදිහේ ලස්සන හොඳ අත්දැකීමක් වේවි කියල මම හිතනවා. මම මොන ගීතය ගායනා කළත් ඒ හැම ගීතයක්ම අතිශය ආදරයට පාත්‍ර වුණා. ඒක මට දෙවියෝ දුන්න ආශිර්වාදය නිසා වගේම මගේ රසිකයන්ගේ ආශිර්වාදය සහ ආදරය නිසා මට ලැබුණ දෙයක්. ඉතින් මේ අලුත් අත්දැකීම බෙදා ගන්නත් මාත් එක්ක එකතු වෙන්න කියලා මම ආදරණීය රසිකයන්ට ආරාධනා කරනවා.”
ගීතය වගේම රූප රචනාවත් අලුත් අත්දැකීමක් වේවි කියලා අපිට හිතුණා. ජනප්‍රිය රංගන ශිල්පී යශ් වීරසිංහ සහ රංගන ශිල්පිනී සචින්තනී කෞෂල්‍යා තමයි දිල්කිගේ අලුත්ම ගීතයේ රූප රචනාවට රංගනයෙන් සම්බන්ධ වෙලා තියෙන්නේ. ගීතයේ රූපරචනය අතරතුර ගත්ත වීඩියෝ එකකුත් පහුගිය දවසක දිල්කි මුහුණුපොතට එකතු කරලා තිබුණා. ‘එක කම්මුල් පාරක් වෙනුවෙන් කම්මුල් පාරවල් අටක්’ ඒ විදියට තමයි ඒ වීඩියෝ එක ගැන කියලා තිබුණේ.
ඉතින් ඒ කම්මුල් පාර ගැන හරියටම දැනගන්න නම් ප්‍රේක්ෂකයන්ට දිල්කිගේ අලුත් ගීතය එළිදක්වනකම් බලන් ඉන්නම වෙනවා. කොහොම වුණත් ‘සත්තයි මට ඔබ වාගේ’ තරමටම දිල්කිගේ අලුත් ගීතයත් රසිකයන් ආදරයෙන් වැලඳ ගනීවි.
“මම පුංචි කාලයේ ඉඳලම සංගීතයට කැමතියි. අම්මලා කියන විදියට මම බහතෝරන කාලේ ඉඳලා වචන අහුලගෙන සින්දු කියලා තියෙනවා. මගේ හැකියාවන් දියුණු කර ගන්න ගෙදරින් මාව ඒ පැත්තටම උනන්දු කළා. එහෙම තමයි ගායිකාවක් වුණ ගමනේ පටන්ගැන්ම. මුලින්ම මම තේමා ගීත ගායනා කළා. ඊට පස්සේ මගේම ගීත කිහිපයකුත් කළා. ඒ විදිහට තමයි දිල්කි උරේෂා ගායිකාවක් බවට පත් වුණේ.”
‘දිල්කි ඉපදිලා තියෙන්නේම සින්දු කියන්න’ දිල්කිගේ හඬට ආදරය කරන බොහෝ දෙනෙක් එහෙම කියනවා. සංගීතයට දැඩි සේ ඇලුම් කළ නිසාම කොයිතරම් බාධක ආවත් ගායිකාවක් වීමේ අරමුණ අතහැරියෙ නෑ කියලා තමයි දිල්කි නම් කියන්නේ.
“මගේම උත්සාහයෙන් මහන්සියෙන් තමයි මේ ගමන ආරම්භ කළේ. මම ක්ෂේත්‍රයට ඇවිත් අවුරුදු පහක් වගේ කාලයක් ගතවෙලා. මගේ ගමන නවත්තන්න ගොඩක් අය ගොඩක් දේවල් කිව්වා. මේ අවුරුදු පහක ගමන ඇතුළේ බාධක සෑහෙන්න තිබුණා. අදටත් ඒවගේ අඩුවක් නෑ. නමුත් මගේ උත්සාහය අත් හරින්න මම කොතැනකදීවත් තීරණයක් ගත්තේ නෑ. අදටත් එන හැම අභියෝගයකටම මුහුණ දෙමින් මගේ ගමන මම හෙමීට යනවා. කවුරුවත් පරද්දන්නවත්, ඉක්මනින් ජනප්‍රිය වෙන්නවත්, කාගෙවත් අවස්ථාවක් නැති කරන්නවත් මට වුවමනාවක් නැහැ.”
බොහෝ ජනප්‍රිය චරිත ගැන වගේම දිල්කි උරේෂා ගැනත් සමාජ මාධ්‍යවල නිතර නිතර තොරතුරු හුවමාරු වෙනවා. ඇය ගැන අගය කරන පිරිසක් වගේම ඇයව ප්‍රතික්ෂේප කරන පිරිසකුත් ඉන්නවා. මුල් කාලයේදී එවැනි ප්‍රතිචාරවලට හිත රිදුණත් දැන් ඒ දේවල් ගණන් ගන්නේ නෑ කියලත් දිල්කි අපිට කිව්වා.
“ආදරය කියන්නේ සුන්දර අත්දැකීමක්. මේ ලෝකයේ හැම කෙනෙක්ටම ආදරය අවශ්‍යයි. මටත් ඒ ආදරය වගේම රසිකයන්ගේ ආදරය අඩුවක් නැතිව ලැබෙනවා. ඒ නිසා සමහරු කියන හිත් රිදෙන කතා මම දැන් ගණන් ගන්නේ නෑ. කාටවත් වැරැද්දක් නොකර මගේ පාඩුවේ හෙමීට මම මගේ ගමන යනවා.”
නිරෝශා වාසල
උපුටා ගැනීම අරුණ
