තරුණ කාලෙට ගැළපෙන පෝෂණය පිරුණු Smart කෑම
නිවෙසේ සැදූ ආහාර
මේ වියේ පසුවන විශේෂයෙන් තරුණයන් පිටතින් (වෙළෙඳසල්, ආපනශාලා, හෝටල් වැනි) ආහාර ගැනීමට වඩාත් ප්‍රිය බවක් දක්වනවා. නිවෙසේ ආහාර පිළියෙල කර තිබුණත් මිතුරන් කණ්ඩායම් සමඟ පිටතින් ආහාර ගන්නේ විනෝදය පිණිසයි. නිවෙසේ සකස් නොකරන ලද ආහාර ගැනීමේදී මේ ගැනත් සිතන්න.
- ඔබ ආහාර සකස් කරන ක්‍රියාවලිය නොදන්නා නිසා එහි විශ්වසනීයත්වය පිළිබඳ ගැටලු මතු වෙනවා.
- ඒවා කොතරම් දුරට සෞඛ්‍යානුකූලද පෝෂණ ගුණයෙන් හෙබිද යන්න ඉදිරියේ ප්‍රශ්නාර්ථයක්.
- දැනට සොයාගෙන ඇති ආකාරයට පිටතින් ගන්නා කෑම පාර්සලයක තමන්ට අවශ්‍ය කරන ප්‍රමාණයට වඩා ආහාර අඩංගු වෙනවා. එවිට ඔබ වරකට ගන්නා ආහාර ප්‍රමාණය වැඩි නිසා එය ස්ථුලතාවට හේතුවක්.
- පිටතින් ආහාර ගැනීමේදී මස්, ගැඹුරු තෙලෙන් බදින ලද ආහාර ඔබට අනිවාර්යයෙන්ම ලැඛෙනවා. මෙවැනි ආහාරවලින් ඔබේ දිව පිනාගියත් පෝෂණ ගුණය අතින් ඉතා අවමයි. මෙවැනි ආහාර හැකි තරම් සීමා කිරීම සෞඛ්‍යානුකූලයි.
- තරුණ වියේ පසුවන්නන් ක්‍ෂණික ආහාර වලට ප්‍රධාන තැනක් ලබාදෙනවා. නිරෝගීකම ගැන වගේම ශරීරයේ හැඩය, කුරුලෑවලින් තොර පැහැදිලි සමක් හිමිකර ගැනීමට නම් තෙල් සහිත ආහාර හා ක්‍ෂණික ආහාර සීමා කළ යුතුමයි.
- පිටතින් ආහාර ගැනීමට ඔබට සිදුවෙනවා නම් හැකි තරම් කුඩා ප්‍රමාණවලින් ආහාර ගැනීමට වගබලා ගන්න. ආහාර පාලනය ශරීරයේ මනා හැඩය සහ ප්‍රියමනාප බව රැකගැනීමට ආහාර පාලනය වැදගත්. එහෙත් සාමාන්‍ය බර සහිත තරුණ පිරිස් අනවශ්‍ය ලෙස ආහාර පාලනය කරනවා. මෙහිදී සෞඛ්‍ය ගැටලුවලට මුහුණදීමට සිදුවන බව මතක තබාගත යුතුය. විශේෂයෙන් ඔවුන්,
- හිතාමතා කෑම අඩු කිරීම
- ඇතැම් ආහාර වේල් මගහැරීම
- ඇතැම් ආහාර වර්ග මගහැරීම
- බඩගින්න විඳ දරාගෙන සිටීම වැනි ක්‍රියාමාර්ගවලට පෙලැඹෙන්නේ ශරීරයේ හැඩය මනාව පවත්වා ගැනීමට විසඳුමක් වශයෙන්.
ඒත් සාමාන්‍ය නියමිත බර සහිත තරුණ පිරිසට මේ සියලුම ක්‍රම සෞඛ්‍යානුකූල නැහැ. එක් වේලකදී ඉහත කුමන ක්‍රමයකට ආහාර පාලනය කළත් ඊළග වේලේදී දෙගුණයකින් ආහාර ගැනීමට නිතැතින්ම පෙලඹෙනවා. ඒ වගේම මෙයාකාරව ආහාර පාලනය කරන තරුණ තරුණියන් බඩගිනි වූ අවස්ථාවල පෝෂණ ගුණයෙන් අඩු බිස්කට් වර්ග, පැණිරස ආහාර ආදිය ගැනීමට උත්සාහ කරනවා. මෙවැනි වැරැදි ආහාර පුරුදු සෞඛ්‍ය ගැටලු රැසකට මුල වන අතරම ඔබේ කඩවසම් පෙනුම හා ශරීරයේ හැඩය නියම පරිදි පවත්වා ගැනීමට බාධාවක් වෙනවා.
තරුණ ජවය, ශක්තිය මේ වියේ පසුවන්නන්ට ආභරණයක්. ක්‍රියාශීලී බව පවත්වා ගැනීමට මෙන්ම සෙසු අය අතරින් කැපී පෙනෙන්නට මේ තරුණ ජවය ඉවහල් වෙනවා. මෙහිදී වැදගත් වන කරුණක් වන්නේ ශක්තිය සමතුලිත විය යුතු වීමයි. එනම් ශරීරයට ලැඛෙන ශක්තිය හා වැය වන ශක්තිය සමතුලිත විය යුතුය.
ශක්තිය අවශ්‍ය ඇයි
තරුණ වියේ පසුවන්නන්ට ශක්තිය අවශ්‍ය කරන සාධක කිහිපයක් තිඛෙනවා.
• ස්ත්‍රී, පුරුෂ බව
• වයස
• ක්‍රියාකාරීත්වය
කායවර්ධන ඛෙහෙත්
එපමණක් නොව තරුණයන් මේ වියේදී කාය වර්ධනය පිළිබඳ වැඩි අවධානයක් යොමුකරනවා. මේවාද තරුණ මනසට එකතු කර තිඛෙන්නේ වෙළෙඳ දැන්වීම්වලින්.
කායවර්ධනය සඳහා අතිරේක ප්‍රෝටීන් පානය කිරීම මඟින් කිසිදු ආකාරයකින් මාංසපේශි වර්ධනය වෙන්නේ නැහැ. අප ගන්නා ආහාරවලින් අවශ්‍ය ප්‍රෝටීන ප්‍රමාණය ලැඛෙනවා. ශරීරයට ප්‍රෝටීන වැඩිපුර ලැබීමෙන් ශරීරය මහත් වෙනවා. වැඩි ප්‍රෝටීන මේදය ලෙස ශරීරයේ තැන්පත් වෙනවා. මේවා වකුගඩු ඔස්සේ බහිස්‍රාවීය වීම නිසා අනාගතයේ වකුගඩු රෝගියකු වීමේ අවදානමත් වැඩිය. ප්‍රෝටීන අතිරේක වෙනුවට ප්‍රෝටීන සහිත ආහාර ගැනීමෙන් කිසිදු හානියක් නැහැ.
ව්‍යායාම කරන්න
ඔබට කාය වර්ධනය කර ගැනීමට සාර්ථක ක්‍රමය වන්නේ ව්‍යායාම්වල නිරත වීමයි. ඒ වගේම ක්‍රීඩා මධ්‍යස්ථානවල ඒ සඳහා උචිත ව්‍යායාම් යන්ත්‍ර, උපකරණ භාවිතයට ගත හැකිය. මේ මඟින් මාංසපේශි වර්ධනය කර ගැනීමට ඔබට හැකියාව පවතිනවා. ව්‍යායාම්වල නිරත වන ඔබට ප්‍රෝටීන ආහාර ලබාගැනීමට අවශ්‍ය නම් පෝෂණවේදියකුගේ උපදෙස් ලබා ගැනීම ඔබේ සෞඛ්‍යයට හිතකරයි. මෙවැනි ප්‍රායෝගික ක්‍රමයක් භාවිතයට ගන්නා ඔබට නියම ප්‍රතිඵල ලබාගත හැකිය.
ආචාර්ය රේණුක සිල්වා
පෝෂණය පිළිබඳ ජ්‍යෙෂ්ඨ කථිකාචාර්ය
ව්‍යවහාරික පෝෂණ අධ්‍යයන අංශය
ශ්‍රී ලංකා වයඹ විශ්වවිද්‍යාලය
ලයනි රසිකා නිරෝෂි”
උපුටා ගැනීම මව්බිම පුවත් පතඇසුරෙන
