බිත්තරවල පෝෂණය
පරිපූර්ණ පෝෂණ ගුණයෙන් යුක්‌ත ආහාර වේලක්‌ ලබා ගැනීම වර්තමාන සමාජ ක්‍රමය තුළ සියලු මානව කණ්‌ඩායම් වලට සමානව ළඟා විය නොහැකි ඉලක්‌කයකි. ආදායම් බෙදී යැමේ විෂමතාවය නිසා විවිධ ආර්ථික මට්‌ටම් වල දිවි ගෙවන මෙරට ජන කණ්‌ඩායම් සඳහා පෝෂණීය සමබල ආහාර වේලක්‌ සකසා ගැනීමේදී දැරිය යුතු වැය පක්‍ෂය ඉහළ අගයක්‌ ගනී. එලෙස ඉහළ ක්‍රය ශක්‌තියක්‌ නොමැති ජනතාවගේ පෝෂණ තත්ත්වය වර්ධනය කර ගැනීම සඳහා අඩු වියදමකින් ලබා ගත හැකි ස්‌වාභාවික ආහාරයක්‌ ලෙස කිකිළි බිත්තරය හඳුන්වා දිය හැකිය. පෝෂ්‍යදායි බිත්තරය මානව පැවැත්ම හා වර්ධනයට අවශ්‍ය සියලු පෝෂණාංගයන්ගෙන් පරිපූර්ණය. මිනිස්‌ ශරීරයේ ජෛව විද්‍යාත්මක පැවැත්මේ අඛණ්‌ඩතාවය රඳවා ගැනීමට අත්‍යවශ්‍ය වන ඇමයිනෝ අම්ල සියල්ල අඩංගු බිත්තරය අගනා ප්‍රොaටීන ප්‍රභවයකි. සම්පූර්ණ බිත්තරය හොඳ මාංශ ජනක ආහාරයකි.
තරමක ඝනකමකින් යුතු කටුවකින් ආවරණය වී ඇති බිත්තරයේ සුදු මදයෙහි ඇති ඇල්බියුමින් යන ප්‍රොaටීනයෙහි ශරීරයට අවශ්‍ය අත්‍යවශ්‍ය ඇමයිනෝ අම්ල අටක්‌ අන්තර්ගතය. මෙම සුදු මදය දියර බවකින් යුතුය. එහි මාංශල කොටස ග්‍රෑම් 11.9 කි. මේදය 12.3 කි. බිත්තර කහ මදය තද කහ පැහැයකින් යුතු අතර තරමක්‌ ඝනකමකින් යුක්‌තය. එහි පෝෂණ තත්ත්වය විමසීමේදී මාංශල කොටස ග්‍රෑම් 16.2 හා මේදය ග්‍රෑම් 30.5 කි. කහ මදයෙහි පෝෂණ ගුණය වැඩිය. එසේම කැල්සියම්, ඛණිජ ලවණ, යකඩ, විටමින් අන්තර්ගතය.ආහාරය සඳහා බිත්තර සකසා ගැනීම ඉතා පහසුය. බිත්තර තම්බා මෙන්ම ඔම්ලට්‌ දමා ආහාරයට ගැනීම මෙන්ම විවිධ ක්‍රම අනුව රසවත් ආහාර වර්ග පිළියෙල කොටගත හැකිය, එනම් පළාකොළ සමඟ බිත්තර, බිත්තර බත්, අල සමඟ බිත්තර, බිත්තර රොටී, බිත්තර පුඩිං, බිත්තර සුප්, බිත්තර සහිත පාන් ටෝස්‌ට්‌, බිත්තර කට්ලට් වැනි එකිනෙකට වෙනස්‌ රසයෙන් යුත් බිත්තර සහිත ආහාර වර්ගයි. වර්තමානයේ කුකුල් කර්මාන්තය දිවයින පුරා පැතිරී ඇති බැවින් හිඟයකින් තොරව බිත්තර ලබා ගැනීමට හැකිය. එසේම බිත්තර මිලද අධික නොවේ. ස්‌වභාවිකව ඝන කටුවකින් ආවරණය වී ඇති බැවින් බිත්තරය ආරක්‍ෂිතය. එබැවින් පවතින ගුණාත්මක ආකාරයෙන්ම ආහාරයට ගත හැකිය, බිත්තරවල තත්ත්වය බාල කිරීමට හෝ කල්තබා ගැනීමට විෂ ද්‍රව්‍ය භාවිත කළ නොහැක. බිත්තර පරිභෝජනයේදී අප සැලකිලිමත් විය යුතු කාරණයක්‌ වන්නේ අප ආහාර සඳහා තෝරා ගන්නා බිත්තරය අලුත් තත්ත්වයේ පවතීද යන්න නිවැරදි ලෙස දැන ගැනීමයි. බිත්තරය වතුර බඳුනකට දැමූ විට බිත්තරය වතුර යටට ගොස්‌ පැත්තකට හැරී තිබේ නම් එය අලුත් බිත්තරයකි. වතුරෙහි පා වෙමින් තිබේ නම් පරණ බිත්තරයකි. සෑම විටම ආහාරය සඳහා තෝරාගත යුත්තේ අලුත් බිත්තරයි. ආයුර්වේදයේ දී විවිධ ඖෂධ සැකසීම සඳහා බිත්තර භාවිතයට ගනී. ඉදිමුම් සඳහා බිත්තර සාරු ආධාරයෙන් ඖෂධ සකසන අතර පිලිස්‌සුම් සඳහාද පත්තු සැකසීමට ඒවා යොදා ගනී. රූපලාවන්‍ය ක්‍ෂේත්‍රයේ දී බිත්තර සාරු කන්ඩිෂනරයක්‌ ලෙස භාවිත කරයි. අවම වියදමිකින් ඉහළ පෝෂණයක්‌ ලබා ගැනීමේ පහසුම මඟ කිකිළි බිත්තර පරිභෝජනයට ගැනීමයි. ඔබේ ආහාරයට කිකිළි බිත්තර එකතු කර ගැනීමට හුරුවීමෙන් අඩු වියදමකින්, මිල කළ නොහැකි පෝෂණයක්‌, ඔබ හා ඔබේ පවුලේ සාමාජිකයන්ට ලබාගත හැකිවනු ඇත.
යූ. කේ. ආරියරත්න වැඩසටහන් සහකාර (සන්නිවේදන) සත්ත්ව නිෂ්පාදන හා සෞඛ්‍ය දෙපාර්තමේන්තුව
උපුටා ගැනීම දිවයින
