මඟුල් කරඳ-බිං කරල් හැබ අරළු පොතුවලින් ලේ පිටවන අර්ශස් රෝගයට කසාය වට්ටෝරුවක්
අප අවට සමාජය තුළ බහුලව පවතින රෝග තත්ත්වයකි අර්ශස්. එය ගුද මාර්ගය
ආශි්‍රතව පවතින්නා වූ රෝගී තත්ත්වයක් වන අතර ආයුර්වේද ශාස්ත්‍රය තුළදී
අර්ශස් යනු සතුරකු මෙන් පණ පෙළන මහා රෝගවලින් එකක් ලෙස හඳුන්වා දෙනු ලබයි.
අර්ශස් රෝගියකු ප්‍රධාන වශයෙන් වෛද්‍යවරයකු හමුවට පැමිණෙනුයේ ගුද මාර්ගයෙන් ලේ වහනය වීම හෝ ගෙඩියක් පිටතට පැමිණීම පිළිබඳ සඳහන් කරමිනුයි.
මහා අන්ත්‍රයේ අවසාන කොටස වන ගුදයේ ප්‍රවාහර්ණී, විසර්ජර්ණී, සංචරර්ණී නමින් හඳුන්වන ගුදවලි තුනක් පිහිටන අතර මෙම ගුදවලිවල බිත්තිවල තිබෙන ශිරා ඇතැම් විට ධමනිකා (කේශිකා)ද පිම්බීම නිසා ගුදකීල නැතහොත් අර්ශස් පැන නඟිනවා.
මෙය පිරිමි පාර්ශ්වයට වැලඳීමට වැඩි ප්‍රවණතාවක් පවතී. ප්‍රධානතම හේතුව දීර්ඝ කාලීන මලබද්ධය වුවත් තවත් හේතු රැසක් බලපානවා. බඩවැල්වල සිට අක්මාව කරා රුධිර සංසරණය සිදුවන ප්‍රතිහාරර්ණී මහ ශිරාව උදරගත අර්බුදවලින් ඇහිරීම නිසා අධෝගතව පීඩනයක් ඇතිවීම මෙන්ම ප්‍රමාණයට වඩා මත්පැන් පානය නිසා මෙම ශිරාව අවහිර වීම සිදුවීමට පුළුවන්. දවසේ වැඩි වේලාවක් කය වෙහෙසීමෙන් තොරව වාඩිවී සිටීම, දරු ප්‍රසූතියේදී අධික වශයෙන් තැටමීම නිසා පසු කාලීනව අර්ශස් වැනි තත්ත්ව පැන නැඟීමටද ඉඩ පවතී. මෙම රෝගී තත්ත්වයට ආහාර පුරුදුද ඍජුවම බලපෑම් සිදු කරනවා.
කාලයත් සමඟ මෙම රෝග තත්ත්වය වර්ධනය වීමක් සිදුවන අතර දිගින් දිගටම රුධිරය වහනය වීමක් සිදු වුවහොත් හිමොග්ලොබින් ප්‍රමාණය අඩුවී විවිධ සංකූලතා මතුවීමට ඉඩ පවතින අතර රෝගයේ මූලික අවධියේදීම ප්‍රතිකාර ලබාගැනීම නුවණට හුරු කරුණකි.
ඊට අමතරව මහබඩවැල් ආශි්‍රතව පවතින වෙනත් රෝග තත්ත්වයන් නිසාද අර්ශස් මතුවීමට ඉඩ පවතිනවා. එවැනි අවස්ථාවකදී අර්ශස් ලෙස වරදවා ප්‍රතිකාර ලබාගතහොත්, බඩවැල් ආශි්‍රතව පවතින ප්‍රධාන රෝග තත්ත්වය අපට මඟහැරීමට පුළුවන්. එම නිසා පළපුරුදු වෛද්‍යවරයකු හමුවී ඔබගේ රෝග තත්ත්වය නිවැරැදිව හඳුනා ගන්න.
ගුද මාර්ගය පරීක්‍ෂා කිරීමට Proctoscopy හෝ ගුද මාර්ගය හරහා කැමරාවක් යවා ගෙඩි පවතිනවාද නැද්ද යන්න අපට නිරීක්‍ෂණය කරගත හැකියි.
කාලයත් සමඟ ක්‍රම ක්‍රමයෙන් වර්ධනය වන අර්ශස් රෝග තත්ත්වය කාලයාගේ ඇවෑමෙන් පිටතට පැමිණෙන අර්ශස් ගෙඩි නැවත ඇතුළට නොයා සිටීමට ඉඩ පවතිනවා. එවැනි අවස්ථාවලදී ගුද මාර්ගය වටා ඉදිමීම, ඒ වටා අසාත්මිකතා ඇතිවීම වැනි සංකූලතා ඇතිවීම නිසා රෝගියකුට ඇතිවන අපහසුතා ඉතාම අධිකයි.
එසේම ගුද ප්‍රදේශයේ දැවිල්ල ගති, ඉදිකටුවලින් අනින්නාක් බඳු වේදනාව, මලපහ කරන විටත් කිරීමට පෙරත් ඇතිවන වේදනාව, කෑම අරුචිය, බඩ පුරවා දැමීම, හිස කැක්කුම, ගුද විවරය අවට කැසීම ආදී සෑම අර්ශස් රෝගියකුටම පොදු ලක්‍ෂණ වන අතර මල සමඟ ලේ පිටවන අර්ශස් රෝග තත්ත්වය ඉතා වේදනාකාරී උවදුරු බහුල රෝගී තත්ත්වයක් නිසා මූලික අවධියේදීම ප්‍රතිකාර ලබා ගැනීම ඉතා අවශ්‍යයි.
මෙම රෝග තත්ත්වයේදී අභ්‍යන්තරව යොදන කසාය වර්ග මෙන්ම බාහිර ප්‍රතිකාරවලටද රෝගියා අනිවාර්යයෙන්ම යොමුවිය යුතුයි.
මඟුල් කරඳ, බිං කරල් හැබ, සාරණ, ඇහැළ පොතු, අරළු, තිප්පිලි, රසකිඳ, නෙල්ලි, ඇත්දෙමට, රත්නෙටොල්, සෙනෙහෙ කොළ, කලාඳුරු, දියමින්න වැනි බෙහෙත් ද්‍රව්‍ය එකතුකර සකස් කරන ලද කසාය වර්ග, කල්ක චූර්ණ හා ගුළි වර්ග භාවිතය මෙන්ම බාහිර වශයෙන් ඔෟෂධ වර්ග යොදා රත්කර ඉන් නැඟෙන දුම් ඇල්ලීම, තැවීම්, ඔෟෂධ වර්ග තම්බාගත් වතුරෙන් සේදීම හා එම වතුරේ මඳ වේලාවක් හිඳගෙන සිට තෙතමාත්තු කර ආලේප වර්ගයක් භාවිතය මඟින් එම ගෙඩි හකුළුවා ප්‍රමාණය කුඩා කළ හැකියි.
අර්ශස්වලින් පීඩා විඳින ඔබට භාවිත කළ හැකි පුරාණ ඔෟෂධීය සංයෝගයක් පහතින් දක්වමි.
මාදං කොළ හා පොතු, දුම්මැල්ල කොළ හා පොතු, අට්ටික්කා පොතු, බෝ පොතු, නුග පොතු, දිඹුල් පොතු
නමුත් මෙම රෝගී තත්ත්වය දිනෙන් දින වර්ධනය වන්නාක් සේම ශරීර දුර්වලතාවට මෙන්ම දිගු කලක් පැවතීමෙන් හන්දි ආශි්‍රත අපහසුතාවලටද ඍජුවම හේතු වේ.
නිසි පළපුරුද්දක් ලත් වෛද්‍යවරයකු හමුවී ප්‍රතිකාර ලබා ගැනීමටත් සුදුසු බාහිර ප්‍රතිකාරවලට යොමු වීමටත් රෝගී ඔබ මතක තබා ගත යුතුයි. අර්ශස් යනු අභ්‍යන්තර ප්‍රතිකාර මෙන්ම බාහිර ප්‍රතිකාරත් එනම් ස්ථානික ප්‍රතිකාරත් එක සේ යෙදීමෙන් සුවකළ යුතු රෝගයකි.
වෛද්‍ය එන්. දිල්හාරා ඩයස් D.A.S.N. (Hons) M.Ac.F (SL) I.F.A.S.Sc Chandigarh (India)Q.C.O.P (India)
ස්වර්ණහංස ආයුර්වේදය (0778075452)
උපුටා ගැනීම මව්බිම
