සංගීතය සමඟ කරන ව්‍යායාම
ව්‍යායාම ඔබේ නිරෝගී දිවියට අත්‍යවශ්‍යම සාධකයක්. මේ ක්‍රියාකාරකම් රිද්මයානුකූලව කිරීමෙන් වැඩි ප්‍රබෝධයක් ලබා ගන්න පුළුවන්.
රිද්මයානුකූල ව්‍යායාම්
ඇරොබික්ස් සුම්බා වැනි ව්‍යායාම ක්‍රම 1960 දශකයේ පමණ යුරෝපයේ ජනප්‍රියම ව්‍යායාම වුණා. විවිධ උපදේශකවරු යටතේ රිද්මයකට අනුව විනාඩි 20ත් 45ත් අතර කාලයක් නොනවත්වා කරන මෙම ව්‍යායාම ස්වායු ව්‍යායාම් ක්‍රම ලෙස හඳුන්වනවා. මෙය පෙරදිග අපරදිග නර්තනවලට වඩා විශේෂිත වූ හදවතේ ස්පන්දන වේගයට සමාන සංගීත රටාවකින් යුක්තයි. මෙම රිද්මයට අනුව කාය වර්ධන මධ්‍යස්ථානවල ව්‍යායාම් අද සිදු කිරීම දැක ගන්න හැකියි.
සංගීතය සමඟ ව්‍යායාම
ඇරොබික්ස් හා සුම්බා යන නම්වලින් අද ජනප්‍රිය වන මෙම ව්‍යායාම් ක්‍රම පමණක් නොව යෝගා ව්‍යායාමද සිදු කරනුයේ යම් සංගීත රටාවකට අනුවය. මනස සන්සුන් කරන භාවනා ක්‍රමවලටත් අද සරල සංගීත භාවිත වෙයි. බොහෝ විට ඇවිදින මංතීරුවල සිටින කාන්තාවන් පවා head phone මඟින් සංගීතයට සවන් දෙමින් ව්‍යායාමවල නිරත වන්නේ එය මනසටද ප්‍රබෝධවත් බවක් ගෙන දෙන නිසයි.
කාලය
ඔබ තනිව ව්‍යායාම් කිරීමේදී කැමැති සංගීතයකට සවන් දෙමින් එම ක්‍රියාකාරකම්වල නිරත විය හැකියි. නමුත් එය අවම විනාඩි 20කට හා උපරිම පැයක කාලයකට සැලසුම් කරගන්න.
වෙහෙස අඩුවීම
ව්‍යායාම්වල ටික වේලාවක් නිරත වන විට ඇතිවන වෙහෙස සංගීතයකට සවන් දෙන විට පහව යයි. ඉන් මනසේ ඇතිවන පීඩනයද අඩුවෙයි. සිරුර රත්වීමෙන් මාංස පේශිවල රත්වීම පීඩනය ස්නායුවලට දැනෙන්නේ අඩුවෙනි.
වේගවත් සංගීතය
හෘද ස්පන්දන වේගය අඩු අවස්ථාවක හෝ ශරීරයේ උණුසුම අඩුවන විට ශරීරයට යම් උත්තේජනයක් ලබාදීමට වේගවත් සංගීත ඛණ්ඩයකට සවන් දෙන අතරම ව්‍යයාමවලත් නිරත විය හැකියි.
වැඩි උනන්දුව
වෙහෙස අඩුවෙන් දැනීම නිසා තමා කැමැති සංගීතයකට සවන් දෙන අතර වැඩි කාලයක් කාඩියෝ ව්‍යායාමවල නිතර වීමේ උනන්දුවද ඇතිවෙයි.
වෛද්‍ය උපදෙස්
නමුත් හෘද ස්පන්දන වේගයට වඩා වැඩි සංගීත ඛණ්ඩයකට සවන්දීමෙන් අධික රුධිර පීඩන රෝගීන්ට අහිතකර තත්ත්ව ඇතිවිය හැකි නිසා එවැනි හෘද රෝගීන් වහා වෛද්‍ය උපදෙස් පිළිපදිමින් ව්‍යායාමවල නිරත වන්න.
එක්සත් රාජධානියේ රාජකීය වෛද්‍ය සභාවේ විශේෂඥ වෙද්‍ය අසංග විජයරත්න
ශාලිකා රංගනි සමරදිවාකර
මව්බිම
