සෑම පුද්ගලයකුටම මෙලොව ඇති ආරක්ෂිතම ස්ථානය වන්නේ නිවෙසයි. නමුත් එම
ආරක්ෂිතභාවය නැතිකොට ඔබගේ නිවෙස තුළම ඔබව අනාරක්ෂිත කිරීමට ගෘහස්ථ විස
වායූන්ට හැකියාව තිබෙන බව ඔබ දන්නවාද? ගෘහස්ථ විස වායූන් පිළිබඳ ලොව පුරා
බොහෝ දෙනාගේ අවධානය යොමු වන්නේ එහි ඇති බරපතළ තත්ත්වය හේතු කොටගෙනයි. මෙම
අභ්‍යන්තර වායු දූෂණය සමඟ පෙණහලු පිළිකා, ඇදුම, සමේ රෝග ඇතුළු තවත් ලෙඩ රෝග
රැසකට මුහුණ දීමේ අවදානම සහිතව ජීවත් වීමට ඔබට සිදුවනවා.
බොහෝ
විට ගෘහස්ථ විස වායූන් නිෂ්පාදනය වන්නේ දුර්වල වාතාශ්‍රයක් සහිතව නිර්මාණය
කෙරෙන නව ඉදිකිරීම් තුළයි. දුර්වල වාතාශ්‍රයක් සහිත ඉදිකිරීම්වල ජීවත්වන
පුද්ගලයන් සික් බිල්ඩින් සින්ඩේ‍රා්ම් (Sick Building Syndrome) නමැති
තත්ත්වයෙන් පීඩා විඳින බව ලෝක සෞඛ්‍ය සංවිධානය මඟින් පෙන්වා දෙනවා.
වාතාශ්‍රය අඩුවීම සමඟ ගෘහස්ථව නිපදවෙන විස වායූන්ගෙන් සිදුවන හානියද ඉහළ
යනවා. බොහෝ විට විස වායුන් නිර්මාණය වීමට හේතු වන්නේ අප එදිනෙදා භාවිත කරන
ගෘහස්ථ පාරිභෝගික නිශ්පාදනවල අන්තර්ගත විස හේතුකොටගෙනයි. ගෘහස්ථ වායු
දූෂණයට හේතුවන අහිතකර රසායනික සංයෝගයන් කිහිපයක් පිළිබඳ අප සොයා බලමු.
ෆෝමැල්ඩිහයිඩ් (Formaldehyde)
බොහෝ
අසාත්මිකතාවන්ට සහ පිළිකාවලට හේතුකාරක වන ෆෝමැල්ඩිහයිඩ් බහුලව අඩංගු වන්නේ
තීන්ත තුළයි. තීන්ත ආලේප කළ පසුවද කලක් යනතුරු මෙම විස එහි රැඳි තිබෙන
බවයි පර්යේෂණ මඟින් පෙන්වා දෙන්නේ. තීන්තවලට අමතරව ගම් වර්ග, වාර්නිෂ්,
මදුරු දඟර, විසබීජ නාශක, ගෘහස්ථ කෘමිනාශක, ෂැම්පු වර්ග, නිය ආලේපන, ඉවත්
කිරීමට යොදා ගන්නා ආලේපන, බොඩි ලෝෂන්, සුවඳ විලවුන්, හෙයාස්ප්‍රේ,
ඩියෝඩ්‍රන්ඩ්, එයාෆෙරෙෂ්නර්, ක්ලීනින්ග් ස්ප්‍රේ වැනි නිෂ්පාදන රැසකදි
ෆෝමැල්ඩ්හයිඩ් අන්තර්ගතයි.
බෙන්ඩීන්, ටොලුවින්, එතිල් බෙන්සීන්
සහ සයිලීන් (Benzene, Toluene, Ethyl Benzene, Xylene) මෙම රසායනික
ද්‍රව්‍යයන් දීර්ඝකාලීනව ශරීරගත වීමෙන් මදසරුභාවය, කළල වර්ධනය හීන වීම,
ස්නායු ආබාධ, හෘදයාබාධ, ඇදුම, හතිය වැනි රෝග ඇති වීමට ඉඩ තිබෙනවා. එසේම මෙම
රසායනික ද්‍රව්‍යයන් සංයෝගයෙන් සෑදෙන විස වායුන් ආඝ්‍රාණය වීම හේතුවෙන්
නින්ද නොයෑම වැනි තත්ත්වයන්ද මතු වෙනවා. එනැමල් තීන්ත, වාර්නිෂ්, පොලිස්
වර්ග, ගම්, රෙදි සෝදන කුඩු, ටයිල් පිරිසිදුකාරක, වැසිකිළි පවිත්‍රකාරක ඩයි
වර්ග, පළිබෝධනාශක වැනි නිෂ්පාදන තුළ අන්තර්ගත මෙම විස ක්‍රීඩා භාණ්ඩවල සහ
කුඩා දරුවන්ගේ සෙල්ලම් භාණ්ඩ තුළ පවා අන්තර්ගත වීමට ඉඩ තිබෙනවා.
මදුරුකොයිල් සහ හඳුන්කූරු
රාත්‍රියේදී
නින්දට යෑමේදී මදුරුකොයිල් එකක් තමා අසලම තබා ගැනීමට බොහෝ දෙනා හුරුව
තිබෙනවා. මදුරු කොයිල් සහ අධික සුගන්ධයකින් යුක්ත හඳුන්කූරු දැල්වීමේදී
එයින් ශරීරයට සහ පරිසරයට අහිතකර විස වායූන් රැසක්ම පරිසරයට මුදා හැරෙන බව
පෙන්වාදී තිබෙනවා. මෙම වායුන් හේතුවෙන් හිසේ කැක්කුම, ඔක්කාරය, හුස්ම
ගැනීමේ අපහසුතා, වමනය යෑම වැනි තත්ත්වයන් ඇති වීමට ඉඩ තිබෙනවා.
ගෘහස්ථ
විස වායුන්ගේ වැඩිම අවදානමට ලක් වන්නේ බොහෝ වේලාවක් නිවාස තුළ රැඳෙන
පිරිසටයි. විශේෂයෙන් කුඩා දරුවන් මෙම වායුන්ගේ බලපෑමට පහසුවෙන්ම ගොදුරු
වීමේ අවදානමක් දක්නට ලැබෙනුයේ ඔවුන්ගේ ප්‍රතිශක්තීකරණ පද්ධතිය වැඩෙමින්
පැවැතීමත් සමඟයි. එයට අමතරව ගැබිනි මවුවරුන්ට, ශ්වසන රෝගීන්ට සහ මානසික
ආතතියෙන් පෙළෙන පුද්ගලයන්ට මෙම වායුන්ගෙන් හානි වීමට වැඩි අවදානමක්
පවතිනවා.
උපුටා ගැනීම මව්බිම
