සම මත Moisturizer ආලේප කරන්න සුදුසුම වෙලාවන් ගැන දන්නවද?

Moisturizer එහෙමත් නැත්තම් සම මත තෙතමනය රඳා පවත්වාගෙන සම ආරක්ෂා කරල දෙන ආලේපන ගැන නිතර කතාබහට ලක්වෙනව. හැබැයි ඒ moisturizer වල ගුණ අගුණ, විවිධ moisturizer වර්ග සහ අලේප කරන්න ඕන ක්‍රමය වගේ කාරණා. තමන්ගේ හම ගැන සැලකිල්ලක් දක්වන කෙනෙකුට මේ හැම කාරණයක්ම හරිම වැදගත් තමයි. මොකද නිරෝගී සමක් කියන්නෙ ශරීරයට ලොකු ආභරණයක් වගේ. හැබැයි ඉතින් moisturizer ගැන ඔය තරම්ම දේවල් කතාබහ වෙන එකේ මේ moisturizer වල හොඳම ප්‍රතිඵල ගන්නනම් මේවා හරියටම ආලේප කරන්න ඕන වේලාවන් ගැනත් දැනගෙන ඉන්න එක වටිනවා. ඉතින් මේ හමට ආදරේ කරන අයට බොහොම වැදගත් වෙන විස්තරයක්. Moisturizer ආලේප කරන්න සුදුසුම වෙලාවන් මොනවද කියල බලමුකෝ.

උදේ දවස පටන් ගන්න කලින් :
දවසේ වැඩ රාජකාරී වලට අපි වගේම අපේ හමත් සූදානම් කරන්න ඕන. ඒකට තමයි උදේ ගෙදරින් එළියට බහින්න කලින්, මේකප් කරනවනම් ඒ මේකප් ආලේප කරන්න කලින් හොඳ moisturizer එකක් ආලේප කරන්නම ඕන. මොකද දවසේ අපි යෙදෙන එක එක වැඩකටයුතු වලදි නොයෙක් විදිහේ පරිසරයන්ට හම නිරාවරණය වෙන්න පුළුවන්. ඒ හැම දේකින්ම හම ආරක්ෂා කරගන්න මේ moisturizer එක හරිම වැදගත්. ඒ නිසා මතක ඇතුව උදේට ගෙදරින් එළියට බහින්න කලින් හොඳ moisturizer එකක් ආලේප කරන්න.

රෑ නින්දට යන්න කලින් :

ඔන්න උදේට moisturizer ආලේප කරන්න කිව්වෙ එළියට බහින්න කලින් පරිසරයේ එක එක තත්ත්වයන්ගෙන් හමට වෙන හානි වලට ආරක්ෂාවක් ලැබෙන්නනෙ. එතකොට මොකටද මේ රෑ නිදියන ටිකට moisturizer? මොකෝ නින්දෙන් ඇවිදිනකොට හම ආරක්ෂා වෙන්නද? හරි, ඒ මේන්න මේකයි.. දවල් වරුවේ හම ආරක්ෂා කරන එක වගේම රෑ කාලයේ හම repair කරන එකත් moisturizer වල කාර්යභාරයක්. අපි නිදාගත්තට රෑට තමයි හුඟක් වෙලාවට අපේ හම වැඩ පටන් ගන්නෙ. ඒ එයා විසින්ම දවල් කාලයේ වුණු හානි හරිගස්සගන්න. ඉතින් රාත්‍රී කාලයට සුදුසු moisturizer එකක් ආලේප කරල නින්දට යන එකෙන් මේ repair කරන වැඩේට ලොකු උදව්වක් වෙනවා.

මුහුණ සෝදපු ගමන්ම හෝ නාපු ගමන්:
මුහුණ සෝදපු හෝ නාපු ගමන් තමයි ඊළඟට අපේ දින චර්යාවේ moisturizer ආලේප කරන්න සුදුසුම, එහෙමත් නැත්තම් හරියටම කිව්වොත් moisturizer අලේප කරන්න ඕනම වෙලාව. ඒ මෙන්න මේ නිසයි. මුහුණ සේදීම හෝ නෑම කියන මේ ඕනම විදිහකට ශරීරයේ මොන කොටසක් හරි වතුරෙන් හේදුවට පස්සෙ ඒ මත තියෙන හම වාතයට නිරාවරණය වුන ගමන් හමේ තියෙන ස්වභාවික තෙතමනය පවා ඉක්මනින් එළියට යනවා. ඒකයි නාලා වියළුණ ගමන් හම වෙන වෙලාවල් වලටත් වඩා වියළි ගතියක් පෙන්නන්නෙ. ඒ නිසා නාලා හෝ මුහුණ සෝදලා තෙත ගතිය ඉවත් වෙන්න කලින් පුළුවන් තරම් ඉක්මනට ටවල් එකකින් යන්තමට හම තෙත මාත්තු කරලා හොඳ moisturizer එකක් ආලේප කරන්නම ඕන. එතකොට මේ moisturizer එකට පුළුවන් හමට අවශ්‍ය තෙතමනය හම මතම ලොක් කරලා රඳවා ගන්න.

Shave කළාට පස්සෙ :
Shave කරන එකෙනුත් හම තෙතමනයට ලක්වෙලා කලින් කියපු කාරණාවම වෙනවා. ඊට අමතරව shave කරද්දි හම මත මතුපිටින් තියෙන සියුම් ස්ථරයනුත් ගැලවිලා යන්න පුළුවන්. මේ හේතු දෙකම නිසා shave කරපු ගමන් හම අධික ලෙස වියලෙන්න පුළුවන්. ඒකයි shave කරපු ගමන්ම moisturizer එකක් ආලේප කරන්නම ඕන. අනිත් වාසිය තමයි අර කලින් කිව්ව වගේ shave කරද්දි මතුපිට සියුම් හම ඉවත්වෙන නිසා moisturizer ඉක්මනින් සහ හොඳින් ශරීරයට උරාගෙන වැඩි ප්‍රතිඵලයක් ලබාදෙන්න පුළුවන් වෙන එක.

ගුවන් ගමනකට කලින් සහ පස්සෙ :
මේක ටිකක් අමුතු, අපි නොහිතන කාරණාවක්. ගුවන් යානයක් ඇතුළත රැඳෙන වාතයේ වැඩිවෙලාවක් ඉන්න එකෙන් හම වියළෙන්න තියෙන අවස්ථාව හුඟාක් වැඩියි. ඉතින් ඒ නිසා ගුවන් ගමනක් පටන් ගන්න කලිනුත් ගුවන් ගමන අවසන් උන ගමන්මත් හම පිරිසිඳු කරල අලුතෙන් moisturizer ආලේප කරන්නම ඕන.

Jogging යන්න කලින් :
මේ ගැනනම් ඉතින් අමුතුවෙන් කියන්නත් දෙයක් නැති තරම්. Jogging යනව කියන්නෙ අවට පරිසරයෙන් හමට එල්ලවෙන හුළඟ සහ එක එක කිරණ වර්ග වගේ හුඟක් දේවල් නිසා හමට අතිරේක තෙතමනයක් ලබාදෙන්න අවශ්‍යම වෙලාවක්. ඉතින් හොඳ moisturizer එකකට පුළුවන් මේ වැඩේ කරන්න.

නිතර අත් සෝදන වෙලාවල් වල :
මේකනම් කවදාටත් වඩා වැදගත් වෙන්නෙ මේ කාලෙට. මොකද දැන් මේ කොරෝනා එක්ක අත් හෝදලා හෝදලාම ගෙවෙන කාලයක්නෙ අපිට ඇවිල්ල තියෙන්නෙ. අත් හෝදන්න පාවිච්චි කරන වතුරෙන් වගේම සබන්වල අඩංගු වෙන රසායනික ද්‍රව්‍ය නිසාත් හම වියලෙන්න පුළුවන්. ඒ වගේම දැන් භාවිතා කෙරෙන hand sanitizer වල අඩංගු මධ්‍යසාර නිසාත් හම වියළීමකට ලක්වෙන්න පුළුවන්. ඉතින් මේ හැමදේකින්ම වෙන්නෙ ශරීරයේ අත් කියන අංගය වියළි, නිතර කැසීම් ඇතිවෙන තැනක්කරන එකයි. ඒක වළක්වන්න පුළුවන් හොඳ moisturizer එකකට. ගෙදරනම් නිතරම අත් සෝදන තැනම moisturizer එකක් තියාගන්න. දැන් නිතර ගමන් යන තැන් වලදිත් අත් සෝදන්න වෙන නිසා බෑග් එකෙත් sanitizer එකත් එක්කම moisturizer එකකුත් අනිවාර්යයෙන්ම තියාගන්න.

උපුටා ගැනීම දිවයින