අලුතින් ගත්ත ඉඩමේ පරණ ගොඩනැඟිල්ලක් තියෙනවාද? එහෙනම් මෙන්න විසඳුම
පවතින ඉඩමේ අලුතින් නිවෙසක් හදන්න හිතුවත් ඉඩමේ කුඩා කොටසක් නිසි සැලසුමකින් තොරව හදලා තියෙන අවස්ථා තිබෙනවා. සමහර අවස්ථාවල ඉඩමක් මිලදී ගනිද්දීත් එවැනි කොටස් සහිත ඉඩම් ලැබෙනවා. එවැනි විටෙක එය කඩා ඉවත් කිරීමට වඩා අලුතින් හදන නිවෙසට පෙනුමට හානි නොවී එකතු කර ගන්න හැකි නම් සැලසෙන්නේ වාසියක්. අද අපි කතා කරන නිවෙසත් එවැනි කොටසක් හා සම්බන්ධ වන ලෙස සැලසුම් කෙරුණු අපූරු හැඩකාර නිවෙසක්.
පර්චස් 10ක් පමණ වන ඉදිරිපසින් පටු පසුපසට යන විට පුළුල් වන ඉඩමක කුඩා කොටසක් (Bed Room 3 සහ Bath room කොටස) නිමවා ඇති බැවින් එය කඩා ඉවත් නොකොට නිවෙසක් තැනීමයි මෙහි අභියෝගය.
ඉඩමේ හැඩයත්, පවතින කොටසත් සලකා එක් මායිමක් අන්ධ බිත්තියක් ලෙස යොදාගෙන නිවෙස ඉඩමේ ස්ථානගත කර ඇති අතර වාහන නැවතුමක් එයට සමීපවම සැලසුම් කර තිබෙනවා. නිවෙසට නවීන පෙනුමක් එක් කිරීමට එහි ආවරණය සඳහා සාම්ප්‍රදායික වහලයක් වෙනුවට කොන්ක්‍රිට් පර්ගොලා යොදාගෙන තිබෙනවා. ඉඩම පසුපසට යන විට පුළුල් වන සේම නිසා වාතාශ්‍රය ලැබෙන සීමාවන් පවත්වා ගනිමින් නිවෙස පසුපසට යන විට පුළුල් වන අන්දමටයි සැලසුම් කර තිබෙන්නේ.
වැරන්ඩාවකින් ඉදිරිපස ප්‍රධාන ද්වාරය ආවරණය කෙරෙන අතර නිවෙසේ ප්‍රධාන අවකාශය වන සාලය විශාල ඉඩක් පෙනෙන පරිදි සැලසුම් කර තිබෙනවා. එකම අවකාශයක කෑම සාලයත් සැලසුම් කර තිබෙන නිසා විශේෂ අවස්ථාවකදී මෙම මුළු ශාලාවම එකම අවකාශයක් සේ භාවිත කළ හැකියි. එසේම මෙම අවකාශය එක් අර්ධයකින් මැද මිදුලකට විවර වන නිසා නිවෙස තුළ පරිසරයට ගෙනෙන අලංකාරය විශාලයි.
අවශ්‍ය නම් කාර්යාල කාමරයක් ලෙස වුවද යොදා ගත හැකි ඉදිරිපස කාමරයක් එක් පසෙකින් තිබෙන අතර නිවෙසේ කෑම සාලය අනෙක් පසින් විශාල ඉඩකඩින් යුක්ත මුළුතැන්ගෙයක් සැලසුම් වී තිබෙනවා. එය පිහිටීම අනුව නවීන පෙනුමැති විවෘත මාදිලියේ එකක් ලෙසින් වුවත් පහසුවෙන්ම වැඩ නිම කළ හැකියි.
කලින් ඉඩමේ පැවතුණ කොටස නිදන කාමරයක් ලෙසිනුත් එයට සමීපවම තවත් කාමරයකුත් සැලසුම් කර තිබෙන අතර නාන කාමරය මෙම කාමර දෙකටම පහසුවෙන් අනෙක් පොදු අවකාශයන් හා සම්බන්ධ නොවී භාවිත කළ හැකි ලෙස සැලසුම් කර තිබෙනවා. ප්‍රධාන නිදන කාමරය සමඟම ඇඳුම් කාමරයක්ද සැලසුම් කර තිබීමත් විශේෂත්වයක්.
නිවෙසේ පෙර ඉදිකර තිබූ කොටසේ ස්ලැබ් කොටස පලදායී ලෙස යොදා ගැනීමට තවත් නිදන කාමරයක් හා කුඩා අවකාශයක් ඉහළ මහලක් ලෙස සැලසුම් කර තිබෙනවා.
කොටසක් නිමවා ඇති නිවෙසක එය යොදාගෙන නිවෙසක් සැලසුම් කිරීම දුෂ්කර වුණත් නිවෙසේ පෙනුම ඉතාම නවීන ලෙස පවත්වා ගැනීමට හැංගුණ වහල හා වෙනස් බිත්ති යොදාගෙන තිබෙනවා. ඉන් අඩු වියදමකින් වැඩි පෙනුමක් හා නවීනත්වයක් නිවෙසට එක් කර තිබෙනවා.
පර්චස් 10ක පමණ ඉඩමකට සැලසුම් කෙරුණු මේ නිවෙස ඉදිකිරීමට වැය වෙන මුදල රු.මි. 5.5ක්. වර්ග අඩි 1700ක් පමණ වෙන මේ නිවෙස ඉඩමේ දැනට පවතින කොටස් කඩා ඉවත් නොකොට මුදල් ඉතිරි කරගෙන නිවෙසක් නවීන පෙනුමට හදන්න හිතන ඕනෙම අයකුට යහපත් බලාපොරොත්තුවක් වේවි.
උපුටා ගැනීම මවුබිම
