කුඩා ඉඩමට ගැළපෙන සොඳුරු නිවෙස
ඉතා කුඩා නාගරික ඉඩම්වලට ගැළපෙන විවිධ වර්ගයේ නිවාස බොහොමයක් ගැන අප කතා කළා. අද අපි කතා කරන්න බලාපොරොත්තු වෙන්නේ තරමක් වෙනස් නිවෙසක් ගැන. විශාල ඉල්ලුමක් ඇති නාගරික පෙදෙස්වල නිවෙසක් තනා පදිංචි වෙනවා වගේම නිවෙසේ එක් මහලයක් තනා කුලියට දෙන්නත් හිතෙන අය විශාලයි. නමුත් ඒ අවශ්‍යතාවට සරිලන නිසි පෙනුමක්, පහසුකම් ආදිය සපයන්න නොහැකි වීමෙන් ඒ කටයුත්ත නිසි ලෙස කරගන්න ලැබෙන්නේ නැති වෙන්න පුළුවන්. ඒ වගේම පස්සේ කාලෙක වියදමක් නැතිවම මේ ගෙවල් දෙක එකක් කරන්නටත් පුළුවන් වුණොත් ලොකු පහසුවක් නේද? ඉතින් අද අපේ අරමුණ කුඩා ඉඩමක මේ අවශ්‍යතාවට ගැළපෙන සොඳුරු නිවෙසක් ගැන ඔබව දැනුවත් කරන්නයි.
පර්චස් 7ක් පමණ කුඩා ඉඩකට සැලසුම් කර ඇති මේ නිවෙසේ ප්‍රධාන වාහන අංගණ එකක් හා තවත් වාහනයක් සඳහා ඉදිරිපස මිදුලේ ඉඩකඩ සපයා තිබෙනවා. ඉහළ හා පහළ බොහෝ දුරට සමාන නිවාස දෙකක් ලෙස සැලසුම් කර ඇති නිසා වෙන වෙනම නිවාස දෙකක් සඳහා පිවිසුම් ලබාදී තිබෙනවා. ඉන් එකක් ඉදිරිපස වැරැන්ඩාවෙන් හා අනෙක වාහන අංගණයෙන් ඉහළට වන ලෙස නිර්මාණය කර තිබෙනවා. මින් එකිනෙකාගේ පෞද්ගලිකත්වය රැකගනිමින් එදිනෙදා ගමන් සලසා ගත හැකි වීමත් අරමුණු කර තිබෙනවා.
වැරැන්ඩාවෙන් හෝ බැල්කනියෙන් නිවෙසට ඇතුළු වන්නේ සැලකිය යුතු ඉඩක් සහිත ආලින්දයටයි. මෙවන් කුඩා නිවෙසක අවශ්‍යතා සියල්ල සපිරෙන ලෙස නිවෙසේ සියලු අංගෝපාංග සරලව හා පරිපූර්ණ ලෙස සැලසුම් කර තිබෙනවා. සාලය සහ මුළුතැන්ගෙය අතර කෑම සාලය ස්ථානගත කර තිබෙනවා. විශේෂ අවස්ථාවකදී සාලයේ ඉඩකඩ පුළුල් කරගැනීමට හැකි ලෙස මේ පොදු අවකාශයත් බිත්තිවලින් වෙන්කොට නැහැ.
කෑම සාලයෙන් මුළුතැන්ගෙයටත් ඉන් නිවෙසේ පිටුපසටත් පිවිසිය හැකියි. මුළුතැන්ගෙයත් ඉඩකඩ සහිතව සේම මනා සංවිධානාත්මක ලෙස සකසා තිබීමෙන් නවීන මුළුතැන්ගෙයක් බවට පත්කිරීමට වුවත් පහසුවෙන් හැකියි.
නිවෙසේ ප්‍රධාන නිදන කාමරයටත් සැලකිය යුතු ඉඩක් ලබාදී තිබෙන අතර නාන කාමරය ඒ අසලින්ම එහෙත් පිටතින් ඇතුළු විය හැකි ලෙස සැලසුම් කොට තිබෙනවා. අනෙක් නිදන කාමරයත් ඉඩකඩ සහිතව සැලසුම් කර තිබෙනවා. ඉහළ නිදන කාමර හා මුළුතැන්ගෙය සඳහා වෙන වෙනම බැල්කනි යොදා තිබෙනවා.
සමාන සැලසුමකට අනුව ඉහළ හා පහළ මහල් ඉදිකරන්නට හැකි වීම නිසා සේවා පහසුකම්වලදී වගේම ව්‍යුහ ඉදිකිරීමේදී වන පහසුව හා ලාභය විශාලයි.
පර්චස් 7ක් පමණ ඉඩකට සැලසුම් කර ඇති මේ නිවෙසේ බිම් ප්‍රමාණය ව.අඩි 2000ක් පමණ වනවා. රු. මිලියන 7ක් පමණ වැයකර මෙම නිවෙස සාදා නිම කරන්නට හැකියි. අඩු වියදමකින් කුඩා නිවෙසක් තනා පදිංචි වෙනවා වගේම නිවෙස පිළිවෙළකට කුලියට දී ආදායමක් ගන්නත් පස්සේ අවශ්‍ය නම් එක් බිත්තියක් පමණක් ඉවත් කරලා නිවෙස් දෙකම එකක් කරන්නත් පහසුවෙන් පුළුවන්. මේ නිවෙස බොහෝ කාලයක් ඔබ කල්පනා කරමින් සිටි බොහෝ දේ සහිත නිවෙසක් බවට නම් සැකයක් නැහැ.
ශාලිකා රංගනී සමරදිවාකර
උපුටා ගැනීම මවුබිම
