සැමියාගේ අවධානය පතා තම සීයා අවේශ කරගත් චාරුනී.....
චාරුනීගෙ විවාහය සිද්ධ වුණේ දෙමාපියන් ගෙනාපු යෝජනාවකට අනුවයි. විවාහයට පෙර ඇය පෙම්වතකු ඇසුරු කළා. ඔවුන් දෙදෙනා බොහෝ ආදරයෙන් බැඳී සිටියත් චාරුනීගේ දෙමාපියන් මේ සම්බන්ධයට දැඩිව විරුද්ධ වුණේ තරුණයා පහත් යැයි සම්මත කුලයක අයකු වීම නිසයි. මේ විරෝධතා නිසා අන්තිමේ චාරුනීට තම පෙම්වතාගෙන් සමුගන්න සිදුවුණා. ඉන් ටික කලකට පසුවයි චාරුනි දෙමාපියන් ගෙනා විවාහ යෝජනාවක් මත හමුවූ දිනේෂ් සමග විවාහ වුණේ.
දිනේෂ් ගොඩ මඩ ඉඩම් සෑහෙන ප්‍රමාණයක හිමිකරුවෙක්. ඒවායේ බොහෝ වෙහෙස මහන්සි වී වගා කටයුතු කරමින් දිනේෂ් සෑහෙන ආදායමක් ලැබුවා. ඔහුගේ දිවා කාලය මුළුමනින්ම වගේ වැය වුණේ වත්තෙ පිටියේ වැඩවලට.
දිනේෂ්ගේ තිබුණු විශේෂත්වය වුණේ ඔහු ඉතාමත් නිහඬ පුද්ගලයකු වීමයි. බිරිඳ සමගවත් ඔහු වැඩි කතා බහක් කළ කෙනෙක් නොවෙයි. ඔහු කල දවස ගෙව්වේ ගහකොළ සහ මහ‍පොළව සමග. අනිත් හැම කෙනෙකුටම වඩා දිනේෂ්ට සමීප වෙලා තිබුණෙ තමා නිතර ඇසුරු කළ තමන්ගේ ඉඩකඩම් ඇතුළු ගහකොළයි. නමුත් චාරුනීට දිනේෂ්ගේ මේ වැඩපිළිවෙළ ඇල්ලුවෙ නෑ. ඇයට වුවමනා වුණේ නිතර තමන් සමග කතා බහ කරමින් සමීපව සිටිය හැකි සැමියෙක්. ඇය කලින් ඇසුරු කළ පෙම්වතා එවැනි කෙනෙකු වූ නිසා දිනේෂ්ගේ මේ අඩුපාඩුව චාරුනීට ඉතා හොඳින් දැනී තිබුණා. නිතරම වගේ තම පරණ පෙම්වතාත් සැමියාත් සංසන්දනය කරන්නට ඇය පෙළඹුණේ ඉබේම වගේ. ඒ හැම වෙලාවකම ඇයට සිතුණේ තමන්ගේ පෙම්වතා සමග විවාහ වන්නට ලැබුණේ නම් මොන තරම් සතුටින් ඉන්න ලැබෙයිද කියලයි.
කොහොම වුණත් දිනේෂ් නිහඬ පුද්ගලයකු වීම ඔහුගේ පෞරුෂයේ ස්වභාවය මිසක් ඔහු නරක අයෙක් නොවෙයි. චාරුනී ගැන ඔහු සොයා බැලුවා. ඇගේ අවශ්‍යතා කිසිම මැසිවිල්ලකින්ම තොරව ඉටු කර දුන්නා. නමුත් චාරුනී අපේක්ෂා කළ විදිහෙ ගති ස්වභාවයන් දිනේෂ් තුළ තිබුණේ නෑ. මේ නිසා චාරුනීගේ සිතට තදබල පාළුවක් දැනෙන්නට වුණා. ඒ වන විට චාරුනී එක් දරුවෙකුගේ මවක්. තමන්ගේ සිතට දැනුණු පාළුව මකා ගන්න චාරුනී කළේ දරුවාට තව තවත් සමීප වීමයි. දිනේෂ්ව තමන්ගේ රුචිකත්වයට අනුව වෙනස් කරන්න චාරුනී කාලයක් තිස්සේම උත්සාහ කළා. නමුත් ඔහුට ආවේණික වූ ඒ ගති ස්වභාවයන් වෙනස් කළ හැකි වුණේ නෑ. මේ විදිහට ටික කාලයක් ගත වෙන කොට චාරුනීට සුළු දෙයකට පවා තදින් තරහ යන්න පටන් ගත්තා. ඒ තරහ බොහෝ විටම පිට වුණේ දරුවා වෙතින්. දිනේෂ් ගෙදර සිටින වෙලාවට ඇය දිනේෂ් සමගත් දබරවලට පැටලුණා. තවත් ටික කලක් ගත වන විට චාරුනීට නින්ද යාම අඩු වුණා. මේ නිසා ඇය වේලාසනින් නින්දට යාමට පටන් ගත්තේ රාත්‍රියට නින්ද නොයාම නිසා දිවා කල තදබල නිදිමතක් දැනුණු බැවිනුයි. නමුත් රාත්‍රියට චාරුනී සිහිනෙන් බියවී කෑගසා අවදි වුණා. බිරිඳ මෙසේ දිනපතාම රාත්‍රියට සිහිනෙන් බියවී කෑගැසීම තමන්ගේ නින්දට බාධාවක් වුණු නිසා දිනේෂ් ඒ අවස්ථාවට වෙනත් කාමරයකට ගොස් නිදා ගත්තා. ඔහු දිනපතා බොහෝ රෑ බෝවෙන තුරු රූපවාහිනිය නරඹා නිදා ගන්නට එන විට චාරුනී සිටියේ නින්දේයි. චාරුනී රාත්‍රියට නින්දෙන් බයවී කෑගැසීම තමන්ට කරදරයක් නිසාත් තමා නින්දට එන වෙලාවක් චාරුනී නොදන්නා නිසාත් දිනේෂ් කළේ ඉන්පසු දිනපතාම වෙනත් කාමරයකට ගොස් නිදා ගැනීමයි. මේ ආකාරයට දෙදෙනා වෙන වෙනම කාමර දෙකක නිදාගන්නා තත්ත්වයට ඉබේම වගේ පත් වුණා. මේ නිසා චාරුනීගේ සිතේ තිබූ පීඩනය තවත් කිහිප ගුණයකින් වැඩි වුණේ ඉබේමයි. දැන් චාරුනීට විවිධ කායික අපහසුතාත් දැනෙන්නට පටන් අරන්. ඒ අතර පපුව රිදීම, හුස්ම ගැනීමේ අපහසුව බහුලවම දැකිය හැකි රෝග ලක්ෂණ වුණා. ඉන්පසු වෛද්‍යවරයකු වෙත ගිය විට ඊ.සී.ජී. පරීක්ෂණ ඇතුළු, තවත් පරීක්ෂණ කිහිපයක්ම කළත් චාරුනීගේ රෝගය ඒ එකම පරීක්ෂණයකින්වත් අනාවරණය කරගත හැකි වුණේ් නැහැ. මෙසේ තවත් ටික කාලයක් ගත වන විට මියගිය ඇගේ සීයා චාරුනීට නිතර සිහිනෙන් පෙනෙන්න පටන් ගත්තා.
වෛද්‍යවරුන් චාරුනීට රෝගයක් නැති බව පැවැසූ නිසාත්, ඇයට නිතරම මියගිය සීයා සිහිනෙන් පෙනෙන්නට වූ නිසාත් සැමියා ඇයව සාස්තර කියන ස්ථානයකට එක්කරගෙන ගියේ මේ සියලු ගැටලුවලට විසඳුමක් සොයා ගන්නටයි. එහෙත් එම ස්ථානයට ගිය පසු, අනපේක්ෂිත ලෙස චාරුනීට මියගිය සීයා ආවේශ වුණා. එහිදී ඇයට මතුරා නූලක් බැන්දත් ඉන්පසු ගෙදරදී ඇයට වරින් වර සීයා ආවේශ වුණේ චාරුනීගේ පවු‍ලේ අය අන්දමන්ද කරමිනුයි. මේ තත්ත්වය මත චාරුනීගේ සැමියාට චාරුනීවත් දරුවාවත් දෙදෙනාම බලා ගන්න සිද්ධ වුණා. ඒ නිසා ඔහුගේ ගොවිතැන් කටයුතු පවා අඩාල වෙන්නට පටන් ගත්තා. මෙසේ ටික කලක් ගත වෙන විට හදිසියේම චාරුනීට පපුවේ කැක්කුමක් හැදුනා. ඒ හේතුව මත ඇය රෝහල් ගත කරනු ලැබුවා. එහිදීද චාරුනීට වෛද්‍ය පරීක්ෂණ ගණනාවක් කළත් ඇයට කිසිදු කායික රෝගයක් නැති බවයි හෙළි වුණේ. ඉන්පසු වෛද්‍ය වරුන් ඇය මානසික රෝග වාට්ටුවට යොමුකළා. චාරුනීට සැමියාගෙන් අපේක්ෂා කළ විදිහේ ආදරයක් සෙනෙහසක් ලැබුණේ නෑ. එහිදී ඇය තුළ ඇතිවූ මානසික ගැටුමපිටතට විදාරණය වුණේ සීයා ආවේශ වීමක් ලෙසින්. එවැනි විටෙකදී සැමියාගේ ආදරයත් අවධානයත් නිතැතින්ම යොමු වෙනවා. සැමියාට මෙහිදී දොස් නගන්න බෑ. ඔහු නරක කෙනෙක් නොවෙයි. මහන්සියෙන් මුදල් උපයා ඔහු බිරිඳවත් දරුවාවත් පෝෂණය කළා. එසේ වුවත් ඔහු තම බිරිඳව අවබෝධ කරගත්තේ නෑ. බිරිඳත් සැමියාට තමන්ගේ අවශ්‍යතාවයන් හෙළි කිරීමට උත්සාහ නොකර සිටියා. අවසානයේ ඔහු බිරිඳ රාත්‍රියට සිහිනෙන් බියවී කෑගැසීම මත වෙනත් කාමරයක නින්දට යාම නිසා බිරිඳගේ මානසික ගැටුම තවත් උග්‍ර අතට හැරුණා. ඔහු එසේ වෙනම නිදා ගැනීම තුළින් ඇයට කායික අවශ්‍යතා සපුරා ගැනීමේ අවකාශයත් අහිමි වී ගියා. මේ අනුව සීයා ආවේශ වීම ඇයට ආදරය හා අවධානය ලබා ගැනීම සඳහා ඇගේම යටිසිත විසින් යොදන ලද උපක්‍රමයක්. ඉන්පසු ඇයටත් සැමියාටත් මේ තත්ත්වයන් පහදා දී මනෝ චිකිත්සක ප්‍රතිකාර ලබා දුන්නා. එමගින් සැමියාට බිරිඳගේ මානසික තත්ත්වය අවබෝධ කර දීමට හැකිවුණා.
උපුටා ගැනීම ලක්බිම
