පෙම්වතාගේ මවුපියො හමුවීමට යෑමට පෙර
ඔබ ඔබේ පෙම්වතාගේ මවුපියන් හමුවන පළමු දිනය ගැන සිතුවාද? ඔබේ පළමු දැක්මෙන්ම ඔවුන්ට ඔබ ගැන අවතක්සේරුවට හිතන්න ඉඩ තියන්න එපා. පළමු දැක්මෙන්ම ඔබ ඔවුන්ගේ මිනුම්දඬුවලට ලක්වන බව හොඳින් මතක තියාගන්න. සාර්ථක පෙම් සම්බන්ධතාවක් දිගටම පවත්වාගෙන යන්න නම් ඔහුගේ මවුපියන් හමුවීමට ඔබ යන පළමු දවස අතිශය වැදගත්.
සිපගන්න එපා : පෙම්වතාගේ මවුපියන් හමුවන පළමුවැනි දවසේ ඔවුන් ඉදිරියේ කිසිම වෙලාවක ඔහු සිප වැලඳගන්න නම් එපා.
ඔබේ පෙනුම : ඔවුන් හමුවට යන පළමුවැනි දවසේ ඔබේ කදිම පෙනුමත්, ආචාරශීලීත්වයත් අතිශයින් තීරණාත්මකයි. ඔහුගේ පවුලේ දේවල් ගැන ඔබ උනන්දු බව හඟවන්න. නිතරම සිනහවෙන් ඉන්න උත්සාහ කරන්න. ආචාරශීලීව කතාබහ කරන්න. ඔබ සහ ඔවුන් අතර ඇතිවන කතාබහේදී ඒ සඳහා සුදුසුම මාතෘකාවක් තෝරගන්න කල්පනාකාරී වෙන්න. සමහර විට ඔහුගේ අම්මා කෑමට යමක් සකසනවානම් ඒ ගැන වුණත් කතාබහ කරන්න. එවිට ඇයට ඔබ ගැන ආදරය හිතේවි.
අවංක වෙන්න : ඔහුගේ පවුලේ අයට අවංක වෙන්න. ඔබේ ජීවිතේ වැදගත්ම දේ ගැන ඔවුන්ට බොරු කියන්න එපා. ඔබටම පසුතැවිලි වෙන්න වේවි. ඔයාගේ පවුලේ අය ගැන, වයස, ඔයාගේ පවුල් පසුබිම වගේ දේවල් ගැන බොරු කියනකොට කල්පනාකාරී වෙන්න. මතක ඇතිව ඔබේ රැකියාව, ඔබ ඇසුරු කරන යහළු මිත්‍රයෝ, ඔබ සහභාගි වන උත්සව අවස්ථාවන් ගැන සැබෑ තොරතුරු ඔවුන්ට සඟවන්න එපා.
විලාසිතා අඩු කරන්න : ඔවුන් හමුවන විට පුළුවන් තරම් සරලව ඔබේ ආලේපන වර්ග භාවිත කරන්න මතක තියාගන්න. තද පැහැති තොල් ආලේපන, දීප්තිමත් ඇස් ආලේපන. ආදිය ගැන අමතක කරලා ස්වාභාවිකත්වය ඉස්මතු වන විදියට ආලේපන ගල්වන්න පුළුවන්නම් ගොඩක් හොඳයි.
ඇඳුම ඉතා වැදගත් : ඔබට ඔබ අඳින ඇඳුම් පැලඳුම් ගැන එතරම් තැකීමක් නැතිවෙන්න පුළුවන්. ඒත් මතක තියා ගන්න ඔබ යන්නේ ඔබ ඔබේ යාළුවෝ සමඟ රාත්‍රි සාදයකටවත් පෙම්වතා සමඟ ප්‍රේමණීය හෝරාවක් ගතකරන්නවත් නෙවේ. ඔබ යන්නේ ඔබේ ආදරණීයයා, වඩාත් ආදරය කරන පිරිස මුණගැහෙන්න. ඒ නිසා ඔබේ ලාලිත්‍ය වගේම ඔබේ පෞරුෂත්වයත් කැපිලා පේන විදියේ ඇඳුමක් තෝරගන්න.
ප්‍රසන්න සුවඳ විලවුන් වර්ගයක් : සුවඳ විලවුන් ගල්වද්දී වුණත් තියෙන තරම් සුවඳ ගල්වන්න එපා. මෘදු, ප්‍රසන්න සුවඳක් සහිත විලවුන් වර්ගයක් තෝරගන්න. ඔබේ සුවඳ විලවුන් වර්ග ඔවුන්ව අපහසුතාවට පත් කරන්න පුළුවන්. ඒ කොහොම වුණත් එතරම් සැර නැති, ප්‍රසන්න සුවඳ විලවුන් වර්ගයකින් සුළු ප්‍රමාණයක් පමණක් භාවිත කරන්න.
ඔබේ රැකියාව විවේචනය කරන්න එපා : ඔබේ රැකියාවේ ස්වභාවය කෙතරම් අප්‍රසන්න වුවත්, ඒ ගැන ඔවුන් ඉදිරියේ විවේචනය කරන්න එපා. ඔබ රැකියාවෙන් ඉවත් වෙලා වෙනත් රැකියාවක නියැළෙන්න බලාපොරොත්තු වෙනවා නම් ඒ ගැන ඔවුන් දැනුම්වත් කරන්න.
මතක තියාගන්න : ඔබේ ක්‍රියාකාරකම් සියල්ලක්ම ප්‍රමාණය ඉක්මවා නොකිරීමට මතක තියාගන්න. එහෙම නොවුණොත් ඔබේ සහකරු වගේම ඔවුන්ගේ මවුපියන් පවා ඔබව මෝඩයකු විදියට දකින්න පුළුවන්.
සවනි ශේශාධි
උපුටා ගැනීම මව්බිම
