ඇන්තූරියම් සල්ලි හොයන්න හොඳ ම මඟක්

සොඳුරු ඇන්තුරියම් මලක සුන්දරත්වයට ඇත්තේ ඉහළම වටිනාකමක්. ඇන්තුරියම් නිවෙසට අපූරු එළියක්, ලස්සනක් ලබා දීම මේ ඉහළම වටිනාකම ලැබීමේ රස රහසයි. ඇන්තුරියම් වර්ග ද රාශියකි. ඒ අතරින් එකවර සොඳුරු අලංකාර මල් රාශියක් විකසිත වන විදේශීය ඇන්තුරියම් පැළයට දැන් දැන් අපේ කතුන් අතර වැඩි වටිනාකමක් ලැබී තිබෙනවා. අප දන්නා හඳුනන සාමාන්‍ය ඇන්තුරියම් පඳුරකට වඩා විසිතුරු දසුන් මවන විදේශීය ඇන්තූරියම් වර්ග කීපයක් මෙහිදී වඩාත් ජනපි‍්‍රයයි.

ලේඩ් ජේන්
පිග් ටේල්
පින්ක් ෂැම්පේන්,
රෙඩි නොට්
වොලාරි
ඇම්බිෂන් යන ඇන්තූරියම් වර්ගයි.

වැඩි වටිනාකමක් හිමි මේ කොයි මල් පැළයත් හදා වඩා ගැනීමට නම් ඔබේ උනන්දුව වගේම හොඳ අවබෝධයක් අත්‍යාවශ්‍යයි. තවමත් ඔබේ නිවහනට ආගන්තුක විදේශීය ඇන්තුරියම් බෝ කර ගත යුත්තේ වෙළෙඳ පොළෙන් මිලදී ගන්නා පැළයකින්. මේ පැළ අලෙවි සැල්වලින් ලබා ගැනීමේ අවස්ථාව ඔබට උදාවී තිබෙනවා. විදේශිය ඇන්තූරියම් කොහොමටත් වැඩි වටිනාකමකින් යුතුයි. එනිසාම සුළු වාසියක් ගැන සිතා අඩු මිලට දුර්වල පැළ මිල දී ගැනීමට උත්සාහ කරන්න එපා. මන්ද එවැනි පැළයකින් මවු ශාකයක් ලෙස මතු ප‍්‍රයෝජන ලැබිය හැකි නිරෝගී ශාකයක් බලාපොරොත්තු වන්න බැහැ. මේ අතරම පරිණත වූ ශාකයකට වඩා ඔබේ ගෙවත්තේ පරිසරයට ගැළපෙන පරිදි පහසුවෙන් හැඩ ගැසෙන කුඩා පැළයක් මිලදී ගැනීම වඩා වැදගත් බව සිතට ගන්න. මිලට ගත් පැළය නිවෙසට ගෙනා සැනින්ම සිටුවීමට හදිසි වන්න එපා. පළමුව පැළය දින 2 - 3 ක් සෙවණ සහිත ස්ථානයක තබන්න. එම කාල සීමාවේ දී පැළයට හොඳින් ජලය සැපයීම ද වැදගත්. දැන් විදේශීය ඇන්තූරියම් පැළය ප‍්‍රාණවත් නම් අලුත් සිටුවිමකට සුදුසු අවස්ථාව වේ. පැළය සිටුවීම සඳහා පහත කොටස් මිශ‍්‍ර කර පස සකසා ගන්න.

කොළ පොහොර කොටස් 2 යි
ගොම කොටස් 2 යි
වැලි කොටස් 1/2 යි
අඟල්1 අඟල්2 ගඩොල් කැබැලි 1/4 යි
අඟල්1 අඟල්2 අඟුරු කොටස් 1 /4 යි

විදේශිය ඇන්තූරියම් සිටුවීමට තෝරා ගත යුත්තේ මැටි පෝචිචියකි. මේ බඳුනේ අඩියේ ජලය බැසයාමට ප‍්‍රමාණවත් සිදුරක් තැබිය යුතුයි. ඉන්පසු බඳුනේ අඩියේ කුඩා ගඩොල් කැට කැබලි,හා උළු කැට කැබලි තට්ටුවක් අඟල් 1 - 2 ක් උසකට අතුරන්න. කොම්පෝස්ට් කොහුබත් හා පස් මිශ‍්‍රණයෙන් පෝච්චියේ කටේ සිට අඟල් 1 1/2 - 2 පමණ පහළ මට්ටමක් දක්වා පුරවා ගන්න. ඊළඟ පියවර වන්නේ මෙලෙස සැකසූ පස් පිරවූ බඳුනේ පැළය සිටුවා ගැනීමයි. මුල් ඇල්ලු පස් තට්ටුවක් සමඟම පැළය බඳුනේ හරි මැදින් සිටුවන්න. ඉන් පසුව පෝච්චියේ පස් සෙමින් අතින් තද කරන්න.මෙහිදී පැළයට ආධාරකයක් අවශ්‍ය නම් එය ද සිටුවා ගන්න. මේ පෝච්චියේ මතුපිට පස් තට්ටුව ආවරණය වන සේ කොහු, ගඩොල් කැබලි කුඩා තට්ටුවක් අතුරන්න. ඉන් පසට සපයන ජලය වාෂ්පීකරණය වීමත්. උඩට මුල් මතු වීමත් වැළකේ. ඇන්තූරියම් ශාකයකක් නීරෝගීව හැදී වැඩි හොඳින් මල් හටගැනිමට නම් 60% - 75 % දක්වා සෙවණක් අවශ්‍ය වේ. මේ සඳහා බොහෝ විට දැල් මගින් සපයන කෘති‍්‍රම සෙවණ හෝ අතු පැතිරී ගිය ගසක සෙවණ උපයෝගී කර ගැනේ. කළු දැල් යොදා සෙවණ සැපයීමේදී පාත්තියේ සිට අවම උස අඩි 10 -12 ක වත් පරතරයක් තැබීම වැදගත් වේ. ඒ හැරුණු විට සෙවණ ලබා දීමට සිදුරු සහිතව වියන ලද පොල් අතු සෙවිලි කළ මඩුවක් තැනීම ද වියදම් අතින් වාසිදායකය. විදේශය ඇන්තූරියම් ශාකවලට ප‍්‍රමාණවත් සෙවණක් ලබාදෙනවා සේම ජලය සහ පොහොර ද ක‍්‍රමාණුකූලව යෙදිය යුතුවේ. මෙහි දී පෝච්චියේ තෙතමනය රැදෙන පරිදි දවසකට වරක් වතුර දැමීම සෑහේ. පැළය කුඩා කල කාබනික දියර පොහොරක් සතියකට වරක් යෙදීමත් ජලයේ දිය කළ හැකි N.P.K 20 : 20 : 20 රසායනික පොහොර භාවිතා කිරීමත් මගින් සරුසාර වර්ධනයක් සිදුවේ. මල් ලබා ගැනීම සදහා N.P.K 14 : 27: 27 හෝ වෙළෙඳ පොළෙහි ඇති නවතම විශේෂ රසායනික පොහොරක් ලබා ගත හැකියි. සාමාන්‍ය ඇන්තූරියම් පඳුරක වගේම විදේශීීය ඇන්තූරියම් පඳුරකත් සාරවත් බවත් ආයුකාලයත් තීරණය වන්නේ හොඳ නඩත්තු මතයි. හදිසි අවස්ථාවක ශාකයේ රෝගී තත්ත්වයක් ඇති වුවත් අවශ්‍ය ප‍්‍රතිකාර සඳහා නවතම කෘෂි රසායනික ද්‍රව්‍ය අද වෙළෙඳ පොළෙන් පහසුවෙන්ම ලබා ගත හැකියි. නිර්ලෝභී ලෙසින් මල්හටගන්නා විදේශීීය ඇන්තුරියම් සැබැවින්ම දර්ශනීය ශාකයක්. එමෙන්ම මල් හා පැළ ලෙස ඕනෑ තරම් අලෙවි කළ හැකි මේ ශාකය ඔබේ නිවහනට සෞභාග්‍ය කැඳවන්නකි.

උපුටා ගැනීම අන්තර්ජාලයෙනි