දෙවැනි පාර ආයේ උ.පෙ විභාගේ කරනවද? නැත්නම් හොඳ කෝස් එකක් කරනවද?

මේ පිරිස අතරේ විභාගය අසමත් වූවන් මෙන්ම විශ්වවිද්‍යාලවලට ඇතුළත් විය නොහැකි දරුවන්ද බහුතරයක් සිටිනවා. පාසල් අධ්‍යාපනය හමාර කර උසස් අධ්‍යාපනයට මෙන්ම වැඩ ලෝකයට ප්‍රවිශ්ට වන ඔබට යම් මඟපෙන්වීමක් කිරීමට අප අදහස් කළා.

පසුබට නොවී දෙවැනි වරටත් විභාගයට පෙනී සිටීමට අද සිටම වැඩ ඇරැඹීමයි. පසුගියවර විභාගයේදී ඔබට මඟහැරුණු කරුණු, ඔබට සිදුවූ අපහසුතා පිළිබඳව ඔබට මනා අවබෝධයක් තිබෙන බැවින් එවැනි අඩුපාඩු මඟහරවා මෙම වර්ෂයේ නැවත විභාගයට පෙනී සිටිය හැකියි.

නිතර පුනරීක්ෂණ අභ්‍යාසවල නිරත වන්න. ප්‍රශ්න පත්‍රවලට පිළිතුරු ලියා නැවත හොඳින් විෂය කරුණු පෙළගස්වා ගන්න. ඉන්ජිනේරුවෙක්, වෛද්‍යවරයෙක්, කළමනාකරුවෙක් ආදී වශයෙන් ඔබේ සිහින වෘත්තියට පිවිසීමේ මාවත විවර කර ගැනුමට නැවත උත්සාහයෙන් අධිෂ්ඨානයෙන් විභාගයට මුහුණ දෙන්න. පසුතැවෙමින් නිකරුණේ කාලය කා නොදමන්න.

එසේ නොමැති නම් ඔබට යොමුවිය හැකි විවිධ පාඨමාලා තිබෙනවා. මෙම පාඨමාලා සඳහා අවම සුදුසුකම ලෙස සැලකෙන්නේ අ.පො.ස. සාමාන්‍ය පෙළ හෝ උසස් පෙළ විභාග සමත්වීම පමණයි. එනිසා ඔබේ අධ්‍යාපන සුදුසුකම් අනුව යොමුවිය හැකි පාඨමාලා පිළිබඳ දැනුවත් විය හැකියි. මේ සඳහා වෘත්තීය මාර්ගෝපදේශකවරු වෙත යොමු විය හැකි නම් එය ඉතා වැදගත්. මීට අමතරව අන්තර්ජාලය හරහා ඔබට තෝරාගත හැකි පාඨමාලා පිළිබඳව දැනුවත් විය හැකියි.

ඔබ විභාගය සමත් වූ විෂය ධාරාව තුළම ඉදිරියට යෑමට ඒ ඒ විෂයන්ට අදාළව විවිධ පාඨමාලා හරහා ජීවිතය ජයගන්නට බොහෝ අවස්ථා තිබෙනවා. බොහෝ දෙනකුට විශ්වවිද්‍යාලයකට අනුබද්ධව බාහිර උපාධි පාඨමාලා වෙත යොමුවිය හැකියි. කලා උපාධියක්, වාණිජවේදී උපාධියක් ලබා ගැනීමට එමඟින් හැකියාව තිබෙනවා. 

තාක්ෂණික විෂය ධාරාවෙන් උසස් පෙළ විභාගය සමත් ඔබට University of Vocational Technology (UNIVOTEC) ආයතනය හරහා විවිධ පාඨමාලා හැදෑරීම මඟින් අනාගතය ජය ගැනීමේ මහඟු අවස්ථා උදාකර ගත හැකියි. මෙම ආයතනය මඟින් රජය විසින් නොමිලයේ මෙහෙයවන පාඨමාලා හැදෑරීමට ඔබට අවස්ථාව තිබෙනවා.

ගාල්ල, මාතර, අනුරාධපුරය, රත්මලාන යන නගරවල පිහිටුවා ඇති University Collages මඟින් තාක්ෂණික ඩිප්ලෝමා ලබා ගැනීමේ අවස්ථාව තිබෙනවා.

ගණිත විෂ ධාරාවෙන් උසස් පෙළ විභාගය සමත් වූ ඔබට NDT ආයතනයේ පාඨමාලාවට යොමු විය හැකියි. ජාතික ආධුනිකත්ව හා කාර්මික ආයතනය (කටුනායක) මඟින් Engineering Science Diploma හැදෑරීමේ අවස්ථාව තිබෙනවා.

වාණිජ විෂය ධාරාව හැදෑරූ දරුවන්ට ව්‍යාපාර කළමනාකරණය, මානව සම්පත් කළමනාකරණය (HR Management), Sales Marketing, Marketing Management වැනි පාඨමාලාවල යොමුවිය හැකියි.

විද්‍යා අංශයෙන් විභාගයට මුහුණ දුන් දරුවනට Pharmacy, Nursing, Radiology, Physiotherapy, Physiatric වැනි පාඨමාලාවලට යොමුවිය හැකියි.

ඔබ දැනට ලබා තිබෙන උසස් පෙළ සමත් යන සුදුසුකම මත විවිධ පාඨමාලා තෝරාගැනීමට ඔබට ඕනෑ තරම් මාර්ග තිබෙන බව අමතක කරන්නට එපා.

ශ්‍රී  ලංකාවේ විවිධ විශ්වවිද්‍යාලවලින් මෙහෙයවන විවිධ පාඨමාලාවන්ද තිබෙනවා. එමෙන්ම වෘත්තීය පුහුණු ආයතන හරහා වෘත්තීය නිපුණත්වයක් ලබා ගැනීමේ අවස්ථාවක් ඔබට තිබෙනවා.

උසස් පෙළින් පසු ඉහළ වැටුපක් සහිත රැකියාවකට ප්‍රවිශ්ට වීම ඔබේ සිහින ගොන්නේ තිබෙන එක් සිහිනයක් බව නිසැකය. ඒ සඳහා මෙවැනි පාඨමාලා හැදෑරීම ඔබට වැදගත් වේවි. ඔබට සුදුසු පාඨමාලා තෝරා ගැනුමට ගුරුවර වැඩිහිටියන්ගේ උපදෙස් ලබාගන්න. අන්තර්ජාලය භාවිත කරමින් ඒ පිළිබඳ තොරතුරු පිරික්සන්න.