රැකියාවටම කැප වූ කෙනෙකු සමඟ කටයුතු කරන්නේ කොහොමද?
ඔබගේ
පවුලේ සාමාජිකයෙකු හෝ ඔබගේ සහකරු හෝ සහකාරිය තම රාජකාරී වැඩකටයුතු වෙනුවෙන් ම
කැපවී සිටී ද? රාජකාරිය පමණක්‌ ම තම ජීවිතය ලෙස සලකා වැඩ කටයුතු කරන්නේ ද?
එවැනි පුද්ගලයෙකු ඔබ සමීපයේ සිටීනම් ඔබට ඔහු හෝ ඇය සමග කටයුතු කිරීම තරමක්‌
අපහසු විය හැකිය. එලෙස රාජකාරිය සඳහා පමණක්‌ කැපවී සිටින පුද්ගලයන් තම විවේක
කාලයේදී පවා තම කාර්යාලයීය වැඩ කටයුතු ගැන ම සිතමින් කල්පනා කරයි. ඔබේ දිවියේ
මෙවැනි සහකරුවෙකු හෝ සහකාරියක හෝ පවුලේ සාමාජිකයෙකු සිටීනම් ඔබ ඉතා ඉවසීමෙන් හා
අධිෂ්ඨාන ශක්‌තියකින් යුතුව වැඩ කටයුතු සිදුකළ යුතු වේ. එවැනි අවස්‌ථාවන්හි දී
පෞරුෂ සම්පන්නව ජීවිතයට මුහුණ දීම සඳහා උපකාරී වන කරුණු කීපයක්‌ පහත පරිදි වේ.
රාජකාරී කටයුතු සඳහා පමණක්‌ ම කැපවී සිටින සහකරුවකු හෝ සහකාරියක හෝ පවුලේ
සාමාජිකයෙකු ඔබ සමඟ සිටීනම් ප්‍රථමයෙන් හා මූලික වශයෙන් සිදුවිය යුත්තේ ඔහු හෝ
ඇය සිටින තත්ත්වය තේරුම් ගැනීම යි. මෙලෙස නොනවත්වා වැඩ කිරීමට ඔවුන්ට සිදුවී
ඇත්තේ මන්ද යන කරුණ ඔබ සොයා බැලිය යුතුවේ. එලෙස ම මෙම කාර්ය බහුලත්වය කෙටි
කාලීන හෝ දිගු කාලීන වශයෙන් ද නිර්ණය කරගත යුතුය. ඇතැම් විට ඔවුන් තම රාජකාරී
උසස්‌වීම් වෙනුවෙන්, අතිරේක මුදලක්‌ උපයාගැනීම වෙනුවෙන් හෝ සුවිශාල
ව්‍යාපෘතියක්‌ අවසන් කරගැනීම වෙනුවෙන් වෙහෙසෙනවා විය හැකිය. එසේත් නොමැතිනම් ඔවුන්ගේ වෘත්තිය අනුව අවුරුද්දේ ඇතැම් මාස කාර්ය බහුල වනවා විය
හැකිය. උදාහරණයක්‌ වශයෙන් ගිණුම් වර්ෂය අවසානයේදී බැංකු හා විගණන රාජකාරීවල
යෙදෙන්නන් ඉතා කාර්යබහුල වේ. එලෙස ම නැකැත් මාස වලදී රූපලාවන්‍ය ශිල්පී
ශිල්පිණියන් අතිශය කාර්යබහුල වේ. මෙවැනි අවස්‌ථාවලදී ඔබ ඉතා ඉවසීමෙන් යුතුව
ඔවුන්ගේ කටයුතුවලට සහය දීම ඉතා වැදගත් වේ. එසේ නොමැතිව ඔවුන් සැමදා එකසේ කාර්යබහුලව දවසේ පැය 24 පුරා ඔවුන්ගේ රාජකාරී
කටයුතු වෙනුවෙන් ම කැපවී සිටීනම් ඔබ, ඔහු හෝ ඇය සමග සාකච්ඡා කර ඔබ හා ඔබේ පවුලේ
සාමාජිකයින් වෙනුවෙන් කාලයක්‌ වෙන්කර ගත යුතු වේ.
ඔවුන්ගේ කාර්ය බහුලත්වයෙන් මිදීම සඳහා විනෝද චාරිකාවක්‌ ආදිය සූදානම් කරගත හැකිය. එලෙස ම එදිනෙදා ජීවිතයේදී ව්‍යායාම සඳහා කාලයක්‌ වෙන්කරගැනීම හෝ ඔබ හා ඔවුන් ප්‍රිය කරන ක්‍රීඩාවක නිරතවීම තුළින් ද ඔවුන්ගේ කාර්ය බහුලත්වය මඳක්‌ මඟහැර ගැනීමට හැකිවනු ඇත. ඉන් ඔබගේ හා ඔවුන්ගේ සිතට මෙන් ම ගතටද සුවයක්‌ ලැබෙනු ඇත. එලෙස ම ඔබ ඔවුන්ගේ රාජකාරී කටයුතුවලට බාධා නොවන අයුරින් දුරකථන ඇමතුම් ලබාදීම අන්තර් ජාලය හරහා පණිවුඩ යෑවීම මඟින් ඔබ කෙරෙහි ඔවුන්ගේ අවධානය යොමුකරගත හැකිය. කෙසේ නමුදු ඔබ ඔවුන්ගේ රාජකාරී මට්‌ටම හඳුනාගෙන ඔවුන්ට උපකාරී කිරීමෙන් ඔවුන්ගේ ආදරය හා අවධානය ඔබ වෙත හරවා ගත හැකිය. එසේ ම ඔබ කිසිදු විටෙක ඔවුන්ගේ අත්‍යවශ්‍ය රාජකාරී කටයුතු වලට බාධාවක්‌ නොවීමටද වගබලා ගත යුතුය.
