මංගල ආභරණ සෑදීමේදී පිළිපැදිය යුතු කරුණු
රත්තරන් පිළිබඳව කතා බහ කිරීමේදී මංගල ආභරණ පිළිබඳව අමතක කොට රත්තරන් පිළිබඳව කතා කිරීමට බැරි තරම්. ජීවිතයේ එක් අවස්ථාවකදී උදාවන සුන්දර මංගල දිනයේදී රන් භාණ්ඩ සඳහා හිමිවන සුවිශේෂී ස්ථානය මේ කරුණු සඳහා හේතු සාධක වී තිඛෙනවා. ‘මුදු මාරු කිරීම’ කරමාල පැළඳවීම සිංහල විවාහ මංගල්‍යයක ප‍්‍රධාන චාරිත‍්‍රයක් ලෙස පැවත එන්නක්. කුමන ආගමෙහි, ජාතියෙහි, සමාජ පන්තියෙහි සහ ප‍්‍රදේශයෙහි වුවත් තමන්ගේ මංගල උත්සවය සඳහා නාමික වශයෙන් හෝ රන් භාණ්ඩ යොදාගැනීමට පුරාණයේ සිට ශ‍්‍රී ලාංකිකයන් අමතක කළේ නැහැ.සිංහලයන් පෝරුවේදී ‘කරමාලය’ පැළඳවීම කරනු ලබන අතර ‘දමිල’ ජාතිකයන් ‘තැල්ල’ ලෙස හඳුන්වනු ලබන ආභරණය සඳහා මංගල දිනයේදී විශේෂිත ස්ථානයක් ලබාදෙනවා. මුස්ලිම් ජාතිකයන් කරමාලය වෙනුවෙන් පළඳිනු ලබන්නේ ‘සවඩි’ නම් වූ ආභරණයක්. කතෝලිකයන් පල්ලියේ දී කරමාල පළඳිනුුලබනවා.මෙම කරුණු පිළිබඳව සළකා බැලීමේදී රන් භාණ්ඩ සහ මංගල උත්සව අතර තිඛෙන බැඳියාව ඉතා පැහැදිලියි. මංගල මුදුවද කරමාලය තරමටම ජනප‍්‍රිය වූ මංගල ආභභරණ විශේෂයක්. ලෝකය නවීකරණය වීම සමගම නොයෙක් උත්සව අංග අභාවයට ගියද මංගල ආභරණ පැළඳවීම සෑම විවාහ මංගල උත්සවයකදීම අපට දකින්නට ලැඛෙනවා.විවාහ මංගල උත්සවය සඳහා ආභරණ සෑදීමේදී ඔබ විශේෂයෙන් සැලකිලිමත් විය යුතුයි. දෙපාර්ශවයේම ගෞරවය සහ විශ්වසනීයත්වය රැකෙන පරිද්දෙන් විශ්වාසදායී නියම බර දරන ආභරණ සාදවා ගැනීම ඔබගේ වගකීමක්.
ජීවිතයට එක්වරක් මුහුණ දෙන විවාහ මංගල්‍ය දිනයේ සතුටින්ම සිටින ඔබ දෙපෙළ විසින් භාණ්ඩ තෝරා ගැනීමේදී නවීන මෝස්තර සහ කල් පැවැත්ම පිළිබඳව නිතර සිතිය යුතුයි. මංගල මුදුව නිරන්තරයෙන් අතෙහි රඳවා තබාගන්නා භාණ්ඩයක් වීම නිසාම එය කල් පැවැත්මට මෙන්ම රළු පාවිච්චියට ඔරොත්තු දෙන ආකාරයෙන් නිමවා ගැනීම ඔබගේ වගකීමක්.ඔබගේ මංගල උත්සවය සඳහා භාණ්ඩ තෝරා ගැනීමේදී ඔබගේ සිතෙහි උපදින මෝස්තරයට අනුව භාණ්ඩ නිපදවා ගැනීම ඔබගේ සන්තෝෂය තව තවත් වර්ධනය කරනු ඇති. මංගල දිනයේදී වැඩි අවධානයක් යොමුවන මනමාලිය පිළිබඳව විවිධ කතාන්දර මංගල දිනයේදී තැනින් තැන අපි අසා තිඛෙනවා.ලස්සන නෙක්ලස් එක නේ... හරිම පෙනුමයි...මෙවැනි වචන වලින් ඔබේ තේරීම පිළිබඳව කරුණු අනාවරණය වෙනවා.මංගල ආභරණ කට්ටලයක ප‍්‍රධාන අංගයන් අතරෙහි මංගල කරමාලය (Wedding Necklace) මංගල මුදුව (Wedding Ring) වළලු සහ කරාබු වලට හිමිවන්නේ සුවිශේෂී වූ ස්ථානයක්. මෙම භාණ්ඩ මිලදී ගැනීමේදී මංගල චාරිත‍්‍රයක් ලෙස මනමාලියගේ සහෝදරියට පා සේදීම වෙනුවෙන් ලබාදෙන මුදුව ගැනීමටද අමතක කරන්නට එපා.බොහෝ විටදී එම මුදුව ලබාගැනීමට කාර්ය බහුලවන ඔබට අතපසුවන්නට පුළුවන්. මේ අතපසුවීම ජීවිතය පුරාවට මානසිකව ලතැවීමට පවා ඔබට හේතුවේවි.මංගල ආභරණ මිල දී ගැනීමට පෙර ඔබ දෙපෙළම එක්වී ආභරණ මෝස්තර පිළිබඳව සාකච්ඡා කරන්න. අතෙහි ඇති මිලට, දිනයට සුදුසුවන පරිදි ආභරණ මිලදී ගැනීමට පෙර සූදානම් වීම ඉතාමත් වැදගත්.බොහෝ විටදී ඔබ දෙපළගේම කාර්ය බහුලත්වය හමුවෙහි ‘රන් භාණ්ඩ මිලදී ගැනීම’ යන මාතෘකාව ඔබගේ ලැයිස්තුවෙන් තරමක් පිටුපසට යාමට පුළුවන්. රත්තරන් බඩු ඕන වෙලාවක ගන්න පුළුවන්නෙ. සමහර කඩ ඉරිදත් ඇරලනෙ තියෙන්නෙ. එසේ සිතුවානම් ඔබ වැරැදියි. අවම වශයෙන් මංගල දිනයට මාසයකට කළින් හෝ ඔබ රන්භාණ්ඩ තෝරා ගැනීමට ප‍්‍රවේශම් විය යුතුයි. රන් භාණ්ඩ වෙළෙඳපොළෙහි ඔබට සරිලන මිමි අනුව භාණ්ඩ නිපදවා නොතිබිය හැකියි. මංගල දිනයට දින දෙකකට හෝ තුනකට කළින් ආභරණ මිලදී ගැනීමට ඔබ යොමු වුවහොත් විශාල ගැටලු සහගත තත්ත්වයකට මුහුණ දීමට ඔබට සිදුවේවි. ඔබගේ සිතැගි පරිදි භාණ්ඩයක් නිපදවා ගැනීමට කල් වේලා ඇතිව පිළිගත්, ඔබේ විශ්වසනීයත්වය තහවුරු කරගත් ස්වර්ණාභරණ වෙළෙඳ මහතෙක් හමුවන්න. ඉන් පසුව ඔබ සැරසීමට බලාපොරොත්තුවන සාරි විලාසිතාව, වර්ණය සහ ඔබගේ ශරීරයේ ප‍්‍රමාණය අනුව මංගල ආභරණ නිපදවා ගැනීමට ඔබට පුළුවන්.
