ඔබ රජ පුටුවේ හිඳුවන සිංහාසන යෝගය
ජ්‍යොතිෂය පිළිබඳ තරමක් හෝ උනන්දු පිරිස බොහෝ විට විමසන්නේ සිංහාසන යෝගය ගැනයි. සිංහාසන යන නමද බොහෝ අයට කුතුහලය ගෙන දෙන්නකි. මන්ද සිංහාසනය යනු රජ ආසනයක් වීමයි. එහි අසුන්ගත හැක්කේ රජුන්ට පමණකි. එසේ නම් සිංහාසන යෝගය හිමි හැමෝම රජ වෙනවද යන්න තව කෙනෙකුගේ ප්‍රශ්නයකි. එහෙත් අද සිංහාසන තියෙන්නේ කෞතුකාගාරයේ විතරක් යැයි තව කෙනෙකු තර්ක කරන්නට පුළුවන.
මේ සිංහාසන යෝගය ගැන කෙරෙන්නා වූ සංක්ෂිප්ත විස්තරයකි.
බොහෝ යෝග සම්බන්ධයෙන් මෙන්ම සිංහාසන යෝගය පිළිබඳවද විවිධ මත තිබේ. එහෙත් ඒ පිළිබඳ පොදු මතයක් ඇත. එනම් සිංහාසන යෝගය යෙදෙනුයේ 2,6,8,12, යන රාශීන් සම්බන්ධව පමණක් යන කාරණයයි. සිංහාසන යෝගය යෙදිය හැකි ක්‍රම කීපයක් තිබුණත් ප්‍රබලතම සිංහාසන යෝගය ලෙස ගැනෙනුයේ සියලුම ග්‍රහයින් 2,6,8,12 යන රාශීවල යෙදීමෙන් උදාවන යෝගයයි. නමුත් මෙයාකාර කේන්ද්‍රයක් සොයා ගැනීම ඉතාම දුෂ්කර වේ. තවද එය ප්‍රබල ලෙසම ඵල දෙන්නේ මේෂ, කටක, තුලා, මකර යන කේන්ද්‍ර හිමියන්ගේ යෙදී තිබුණොත් බව තවත් මතයකි. කෙසේ වුවද ග්‍රහයින් 07 දෙනාට ඉහත ලග්න රාශියකින් උපත ලැබූවකුගේ 2,6,8,12 ස්ථානවල යෙදී තිබෙන කේන්ද්‍ර ඉතාම විරල බව කිව යුතුයි.
එසේ නම් සිංහාසන යෝගය ව්‍යාජ මවාපෑමක්ද යන සැකයක් පැන නැගේ. නමුත් සැබවින්ම සිංහාසන යෝගය යෙදෙන තවත් අවස්ථා කීපයක් ජ්‍යොතිෂයේ විග්‍රහ වෙයි.
එහිදී සියලු ග්‍රහයින් නොව ඕනෑම ග්‍රහයින් හතර දෙනෙකු හෝ වැඩි ප්‍රමාණයක් 2,6,8,12 රාශිවල යෙදීමෙන් සිංහාසන යෝගය යෙදෙන බව පැවසේ. මෙවැනි කේන්දර අපට කේන්ද්‍ර පරීක්ෂාවේදී හමුවේ. එකී කරුණේදී නැවතත් ප්‍රශ්නයක් පැන නගිනුයේ රාහු, කේතු යන දෙදෙනාත් මීට අයත් ද යන්නයි. සැබවින්ම ඉපැරණි ජ්‍යොතිෂ්‍යයේ රාහු, කේතු යන ග්‍රහයින් නොසිටි අතර රාහු, කේතු පසුකාලීනව එක්වූ ඡායා ග්‍රහයින් දෙදෙනෙකි. ඒ අනුව බැලීමේදී රාහු, කේතු යන දෙදෙනා එක්ව සිංහාසන යෝගය යෙදේද යන්න විමසිය යුත්තකි. මන්ද රාහු, කේතු සැමවිටම සම්මුඛව පිහිටන හෙයින් සිංහාසන යෝගයක්් සඳහා අවශ්‍ය වනුයේ තවත් ග්‍රහයින් දෙදෙනෙකු පමණක් වීමය. එහෙයින් එය විමසිය යුතු තැනකි. ඇත්තෙන්ම සිංහාසන යෝගයෙන් ලබා දෙන්නේ මොනවාද? සිංහාසන යෝගය ජන්මියාව බොහෝ විට උසස් ස්ථානයකට ගෙන එන යෝගයකි. සිංහාසන යෝගය යෙදෙනුයේ කේන්ද්‍රයේ අසුභ ස්ථාන හතරක වුවත් ඉන් ලැබෙන ඵල ඉතා ඉහළ වේ.
අද වන විට සිංහාසනය යන සංකල්පය යල් පැන ගියත් මෙකී යෝගය හිමි තැනැත්තා හෝ තැනැත්තිය බොහෝ විට සමාජයේ කැපී පෙනෙන චරිතයක් නිරූපණය කරයි. ප්‍රබල පවුල් පසුබිමක් සහිත සිංහාසන යෝගය හිමියෙකුට දේශපාලනමය වශයෙන් ඉහළට නැගීමට හැකි වන අතර සාමාන්‍ය පවුලක උපත ලැබූවකුට වුවද සමාජයේ ඉහළ තනතුරක් හිමි කර ගැනීමට හැකි වීම මෙහි විශේෂත්වයකි. ප්‍රාදේශීය නායකත්වය සමාගමක ඉහළ පුටුවක් හෝ වෙනත් පරිපාලනමය වශයෙන් ඉහළට යා හැකි වීම ශක්තියක් යෝගය තුළ ගැබ්ව තිබේ.
සිංහාසන යෝගයත් සමග බොහෝ විට හතර කේන්දරය පාළු වීමද දක්නට ලැබේ. මුලින් සඳහන් කළ ආකාරයේ
නියමාකාර සිංහාසන යෝගයක් යෙදීම අනිවාර්යයෙන්ම හතර කේන්දරය පාළුවීමකි. හතර කේන්දරය පාළු වූ අයකු රජ වෙන්නේ කෙසේදැයි කෙනෙකු තර්ක කළ හැකිය. එහෙත් හතර කේන්දරය පාළු වූ පමණින් කෙනෙකුගේ ජීවිතය බිඳ නොවැටෙන බව අත්දැකීමෙන් දන්නා කරුණකි. සිංහාසන යෝගය යනු අතිප්‍රබල යෝගයකි. ජීවිතයේ කුමන හෝ අංශයකින් ඔවුනට ඉදිරියට යා හැකි බව පර්යේෂණ තුළින් ඔප්පු වී ඇත. ප්‍රබල ලෙස සිංහාසන යෝගය යෙදීම නිසා කුඩා කාලයේදීම මියයන බව තවත් මතයකින් කියවෙන මුත් එයද සාවද්‍ය බව කිව යුතුයි. සිංහාසන යෝගයද පෙර පින් බලය නිසාම ලැබෙන්නකි. නමුත් අදාළ යෝගයේ නියම ඵල ලැබිමට උත්සාහවත් වීම අනිවාර්යයෙන්ම සිදුවිය යුත්තකි. එසේ නොමැති වුවහොත් සිංහාසන යෝගයද නිසි සාත්තුවක් නොමැතිකමින් මියයන්නා වූ ගසකට සමාන වනු ඇත.
ඩී.ඩී. චමින්ද වික්‍රමරත්න
උපුටා ගැනීම ලක්බිම පුවත්පත
