This site has features that require javascript. Follow these simple instructions to enable JavaScript in your web browser.
විස්තර ලුහුඩු දැන්වීම්
නිවෙසට වාසනාව ගෙනෙන කළු ඉබ්බා
මේ ලෝකයේ ජීවත්වන හැම කෙනකුටම අවශ්‍ය තමන්ගෙ ජීවිතය සතුටින්, සාමයෙන් සහ සෞභාග්‍යයෙන් යුතුව පවත්වාගෙන යන්නට. අන්න ඒ කැමැත්තට ගැළපෙන සහ ඊට අවශ්‍ය විදියට තමන්ගෙ පරිසරය හසුරුවා ගනිමින් පුද්ගල පෞරුෂය සහ ධනයද වර්ධනය කරගන්නා ආකාරය පෙන්වා දෙන සරල ක්‍රම සහ විධි පැහැදිලි කරන බොහොම පැරැණි ශාස්ත්‍රයක් තමයි මේ ෆෙන්ෂුයි කලාව. මේ ෆෙන්ෂුයි කලාවට අවුරුදු හාරදහසක විතර අෑත අතීතයක් තිබෙන්නෙ. මේ කලාව උපන්නෙ චීනයේ. පැරැණි චීනයේ විසූ මහා අධිරාජ්‍යවරු එයාලගෙ ධනය සහ බලය අඩු නොවන්නට වගබලා ගත්තෙත්, ඒවා දිනෙන් දින තවත් වර්ධනය කරගත්තෙත් මේ ෆෙන්ෂුයි කලාව උපයෝගි කරගෙන. ෆෙන්ෂුයි කලාවට කිසිම ආගමික සම්බන්ධතාවක් නැති වුණත් තමන්ගේ කර්ම ශක්තියත් එක්ක ඉතාම දැඩි බැඳීමක් තිබෙනවා. ෆෙංෂුයි ශාස්ත්‍රය, ගුප්ත විද්‍යාවක් හෝ මැජික් කලාවක් නොවේ. එය ගෞරවයෙන් ප්‍රගුණ කළ යුතු ඉතාම සංවේදී ශාස්ත්‍රයක්. මේ කලාව භාවිතයේදී යොදාගන්නා සමහර සුබවාදී සංකේත වන චීන කාසි, පළිඟු, ජලය කුරුල්ලන්ගේ ඡායාරූප නිසා සමහරු මෙය මැජික් කලාවක් විදියට හඳුන්වනවා. නමුත් ෆෙංෂුයිවලට මූලික පදනම වී තිබෙන්නේ ලෝකය පුරාම විසිරී පැතිරී තිබෙන විශ්ව ශක්තිය එක් එක් පුද්ගලයාට සහ අවට පරිසරය තුළ ඔහුට එය කෙසේ බලපානවාද කියන දෙයයි. ෆෙංෂුයි ශාස්ත්‍රයෙන් සිදුකරන්නේ ඒ විශ්ව ශක්තිය ගමන් කරන මාර්ගය නිසි ආකාරයට හසුරුවා ගැනීම. ඔබේ නිවෙස තුළට මේ විශ්ව ශක්තිය පිරිසුදුව නිදහසේ ගලා ඒමට නම් ඔබේ නිවෙසේ වටපිටා පරිසරය ගැනත් සැලකිලිමත් විය යුතුයි. ෆෙංෂුයිවලදී සත්ත්ව සංකේත භාවිත කරන බව ඔබ දන්නවනේ. ඔබේ නිවෙසේ ආරක්‍ෂිත බව ස්වභාව ධර්මය තුළින් සංකේතවත් කරන සතුන් හතර දෙනෙක් ඉන්නවා. 1. කොළ මකරා 2. සුදු කොටියා 3. රතු ෆීනික්ස් 4. කළු ඉබ්බා පිටතින් ඇවිත් ප්‍රධාන ‍ෙදාරටුවෙන් නිවෙස තුළට ඇතුළු වෙද්දී ඔබේ දකුණෙන් සුදු කොටියාද, වමෙන් කොළ මකරාද, නිවෙස ඉදිරියෙන් රතු ෆීනික්ස් නම් පක්‍ෂියාද, නිවෙසට පිටුපසින් කළු ඉබ්බාද නියෝජනය කරනවා. දකුණේ කිසියම් ගොඩනැඟිල්ලක් තිබෙනවා නම් එය වමේ තිබෙන ගොඩනැඟිල්ලකට වඩා පහත මට්ටමකින් තිබිය යුතුයි. ඒ ගොඩනැඟිල්ල සුදුපාට නම් වඩාත් හොඳයි. වමට වඩා උස් වන්නේ නැති සුදු පාට බැම්මක් හෝ තාප්පයක් තිබෙනව නම් මේවා සංකේතවත් කරන්නේ සුදුපාට කොටියා හැටියට. ඊළඟට දකුණු පැත්තට වඩා උස් වූ ගස් පෙළක්, බැම්මක් නැත්නම් කොළ හෝ නිල් පාටින් යුක්ත ගොඩනැඟිල්ලක් නිවෙසේ වම් පැත්තේ තියෙනව නම් එය නියෝජනය කරන්නේ කොළ මකරා හැටියට. නිවෙස ඉදිරිපස එහි පසුපසට වැඩිය පහත මට්ටමින් හෝ බෑවුම් ස්වරූපයකින් තිබිය යුතුයි. නිවෙස ඉදිරිපස නියෝජනය කරන්නේ රතු ෆීනික්ස් පක්‍ෂියා විසින්. වඩා උස් වන්නේ නැති රතු පාට මල් පඳුරක් හෝ රතු පාට කොළ සහිත කුඩා ගස් පෙළක් වවා ගැනීමෙන්ද නිවෙසේ ආරක්‍ෂාව සඳහා අවශ්‍ය වන රතු ෆීනික්ස් පක්‍ෂියා සංකේතවත් කරගන්න ඔබට පුළුවන්. ආරක්‍ෂා සංකේත හතර තුළින් වඩාත්ම ප්‍රබල වන්නේ නිවෙසේ පසු පැත්ත. අනිකුත් ආරක්‍ෂිත සතුන් සංකේතවත් කරන ගොඩනැඟිලි, තාප්ප හෝ කඳු වැනි දෑ ඔබේ නිවෙස අවට ගැනත්, නිවෙසේ පසුපස ආරක්‍ෂා කරන කළු ඉබ්බාගේ සංකේතය නම් තිබිය යුතුම දෙයක් හැටියට ෆෙංෂුයි විද්‍යාවේ සඳහන් වෙනවා. මේ කළු ඉබ්බාගේ සංකේතය ඕනෑම නිවෙසක තිබිය යුතු ආරක්‍ෂිතම ස්ථානයයි. ආරක්‍ෂිත සංකේත කිසිවක්ම නැති පරිසරයක ඔබ ජීවත් වෙනවා නම් අඩු තරමින් ඔබේ නිවෙසේ පිටුපස බිත්තියේ (නිවෙස තුළට පෙනෙන විදියට) ඉබ්බෙකුගේ රූපයක් තබා හෝ ඒ ආරක්‍ෂිත සත්ත්වයා සංකේතවත් කරන්න. පණ ඇති ඉබ්බෙක් ඔබේ ගෙවත්තේ උතුරු දිශාවෙ ඇති කරන්නට පුළුවන් නම් වඩාත් හොඳයි. නිවෙසේ උතුරු දිශාවේ ඉබ්බෙක් ඇති කිරීමෙන් නිවෙසේ ප්‍රධානියා අවුරුදු 80ක් දීර්ඝායුෂ ලබන බවත්, නිවෙසට සෞභාග්‍ය සහ වාසනාව උදාවන බවත් ෆෙංෂුයි විද්‍යාඥයෝ තරයේම විශ්වාස කරනවා. ඒ නිසා ඔබටත් හැකිනම් ඔබේ නිවෙසට සෞභාග්‍ය හා වාසනාව උදාවී යහපත් හෙට දවසක් ළඟා කරගන්නට මේ ඉබ්බාගේ සංකේතයක් භාවිත කරන්න. ෆෙන්ෂුයි උපදේශිකා තිලංගනී හේරත් 0716000668 උපුටා ගැනීම මව්බිම