තලගොයෙක් නිසා පොහොසත් වෙන්නත් පුළුවන්

තලගොයා, කබරයාට සමාන සතකු වුවද කබරයා තරම් තද කළු නොවෙයි. තලගොයා මිනිසාට සුබ පල ගෙන දෙන සතකු වන අතර කබරයා අසුබ සතෙකි. මිනිසාගේ හිතවතා ලෙස හඳුන්වන තලගොයා තලබරා ලෙසද හඳුන්වනු ලබයි. කුඹුරේ වගා කරන ගොයම් පැළපත කාලයට තලගොයා දිය බීමට කුඹුරට නොබසින සතකු බැවින් ගොවියාගේ හිතවතා කොට සලකන අතර ගොයම පොඩි නොවන සේ ජලය පානය කරන සතෙකි. වන කෘමීන්, කුඩා ශාක ආහාරයට ගන්නා සර්ව භක්ෂක සතෙකි. මිනිසාට කිසිදු හිරිහැරයක් නොකරන සතෙකි. පෙරකල රජවරු ගල් පර්වතවල සඟවන ලද නිදන් වස්තු ආරක්ෂා කිරීමට සුබ සංකේතය ලෙස තලගොයාගේ රුව කොටා තිබේ.

• තලගොයා දිය බොන දිය රඳන තැනකින් දිය ගෙන තෙල් එඬරු, බැබිල, ආඩතෝඩා කොළ, අමු කහ, සියඹලා දලු සමඟ මිශ්‍රකර මැටි මුට්ටියක තම්බා නෑමෙන් බුධ, කුජ ග්‍රහයන්ගේ අපල දුරු වෙයි. ඥානය වර්ධනය වෙයි. (සබන් ආලේප නොකරන්න).
• තලගොයාගේ මල පහ ගෙන කාක් පිහාටුවක ගා කුඹුරක, ගොවිපොළ මායිමක එල්ලීමෙන් වන සතුන්ගේ පීඩා දුරු වෙයි.
• ගමනක් යනවිට තලගොයකු මුණගැසුණේ නම් රාජ ගෞරව ලබයි. රස ආහාර ලැබෙන අතර ගමන ජය වේ.
• තලගොයකු මරා මස් කෑම, උගුල් අටවා වධදීම, දෙවි දෝෂ වීමට හේතු වෙයි. එමෙන්ම පවුලේ කෙනකුට අකල් මරණ වන අතර පවුල් ජීවිතය අසාර්ථක වෙයි.
• කළුකුමාර දෝෂය ඇති අයකුටද තලගොයන් වාසය කරන ලද තුඹසකින් සහ වෙනත් හුඹස් 4කින් මැටි ගෙන කළුකුමාර බලිය තනා ශාන්තිකර්ම කරවීමෙන් කළු කුමාර දෝශය භංග වෙයි.
• තලගොයකු නිවෙසේ වාසය කරයි නම් එම නිවෙසට කෑම බීම නොඅඩුව ලැබේ. අමනුෂ්‍ය දෝෂ මඟ හැරෙයි.
• අලුතින් නිවෙසක් ඉදිකරන බිමක තලගොයකු වාසය කරයි නම් ධන හානි අඩුවෙයි. ඉක්මනින් නිවෙස ඉදිකරගත හැකියි.
• නිදන් වස්තුවලට විශාල රැකවරණයක් සලසන තලගොයා මරා මස් කා මැණික් ගැරීමෙන්ද පලක් නොලැබේ.
• තලගොයන්ට තම භූමියේදී කෑම බීම දෙන්නේ නම් නිවෙසට භූමියට සුබපල උදාවෙයි.
• තලගොයාගේ රූපය කෙසෙල් කොළයේ හෝ කෙසෙල් කඳේ (ගස නොකපා, කොළය වෙන් නොකර ගසේ තිබියදීම) එහි මැද තමන්ගේ නම ලිවීමෙන් කේතු, කුජ අපල සියලු ආරක්ෂාව ලැබෙනු ඇත. භාවිත කරන නම පමණක් සුදුසුය.

හංසි ආටිගල
මව්බිම