ජනප්‍රිය වූ පමණින් හොඳ නළුවෙක් වෙන්න බෑ
නලින් ලුසේනා වේදිකා රංගන ශිල්පියෙක්, රචකයෙක් සේම අධ්‍යක්ෂවරයෙක්. වේදිකාවෙන් ලැබූ පන්නරයත් එක්ක ඔහු ටෙලි නාට්‍යය රංගනයටත් සිනමාවටත් ප්‍රවේශ වුණා. වේදිකාවෙන් ඇරැඹි ඔහුගේ ගමනේ ලද අත්දැකීම් සමඟ නව නිර්මාණ ප්‍රවේශය ගැන කතා කරන්න පසුගිය දවසක නලීන් අප හා එක් වුණා.
නිර්මාණකරණයේ දී මොන වගේ වැඩ එක්කද මේ දිනවල සම්බන්ධ වෙන්නේ ?
මේ දවස්වල මා එකතු වෙලා ඉන්න 'ස්නැප්' ටෙලි නාට්‍යයේ දර්ශන රූගත
කෙරෙනවා. මේ වෙලාවේ අනෙක් ක්ෂේත්‍ර මුහුණ පාන ගැටලුවලටම කලා ක්ෂේත්‍රයටත්
මුහුණ දෙන්න සිදු වෙලා. කෙරෙන්න තිබුණු වැඩ කිහිපයක්ම කල් ගියා. නමුත්
කලාකරුවකුට විවේකය හරි වැදගත්. ඊළඟ මොහොතේ කරන කාර්යයට සූදානම් වෙන්න,
අභ්‍යාස කරන්න මේ ලැබුණු කාලය මං යොදා ගෙන අලුත් නිර්මාණයක් ලියමින්
ඉන්නවා. ඒ අතර ' stage theatre group'සමඟ එකතු වෙලා පසුගිය දවස්වල
රුවන්ඩාවේ උබුමුන්තු ජාත්‍යන්තර නාට්‍ය උලෙළට නිර්මාණයක් එකතු කළා. එය ජූලි
මාසේ 17 වැනිදා පැවැත්වෙනවා.
මේ දවස්වල ලියැවෙන්නේ මොන වගේ නිර්මාණයක් ද?
දැන් වෙබ් මාධ්‍ය සඳහා නිර්මාණ කිරීමේ ලොකු ප්‍රවණතාවක් හැදිලා තිබෙනවා.
ටෙලි නාට්‍ය කරන්න අපහසු පසුබිමක සිනමා ශාලා වැහිලා තියෙන පසුබිමක වෙබ්
මාධ්‍යට නිර්මාණ කිහිපයක් කරන ව්‍යාපෘතියකටයි රචනයන් කරමින් ඉන්නේ.
ඔබ වේදිකාවෙන් පන්නරය ලැබූවෙක්. ඒ අත්දැකීම ඔබේ නව නිර්මාණ දායකත්වයට උපකාරයක් ද?
වේදිකාව, පුංචි තිරය, සිනමාව මාධ්‍ය තුනක් වුණාට රංගනයට තියෙන්නේ එක
පදනමක්. අපි කුමන මාධ්‍යයක වැඩ කළත් නිරන්තර අභ්‍යාසයෙහි යෙදෙන්න ඕනේ.
වේදිකා නාට්‍යයක් කරද්දි මාස හය හතක් පුහුණු වෙනවා. ඒ හරහා රංගන ශිල්පීන්
ශිල්පිනියන් මුවහත් වෙනවා. ඒ පුහුණුව වෙන මාධ්‍යයක නිර්මාණයක් කරද්දි
ප්‍රයෝජනවත්. පුංචි තිරයේ හෝ සිනමාවේ ලොකු කාලයක් චරිතයක් එක්ක රැඳෙන්න
නැති වුණත් අපි කරන වැඩේ වෙනුවෙන් අභ්‍යාස කිරීම වැදගත්.
දැන් ප්‍රසිද්ධ මාධ්‍ය ඔස්සේ කෙරෙන නිර්මාණවල එවන් අභ්‍යාසයකට ඉඩ තිබෙනවද?
සිනමාවේ යම් වෘත්තීයභාවයකින් කටයුතු සිද්ධ වෙනවා. නමුත් රූපවාහිනි
මාධ්‍යයේ තරගකාරිත්වය වැඩියි. ඒ තරගය තුළ අල කුණු වෙලාද තැළිලද බලන්නේ
නැතිව අල ගෝනි බානවා වගේ නිර්මාණ කෙරෙන අවස්ථාත් තිබෙනවා. ගුණාත්මකභාවයේ
අඩුව පේන්නේ ඒවගේ නිර්මාණවල. තව පැත්තකින් කිසිම කෙනෙක් කැමැත්තෙන් බාල නිර්මාණ කරන්නෙත් නෑ. ඒකට
බලපාන ආර්ථිකමය ප්‍රශ්න තිබෙනවා. නිර්මාණවලට ලැබෙන මුදල එක්ක මාරම නිර්මාණ
බලාපොරොත්තු වෙන්නත් බෑ . නමුත් ඔය තත්ත්ව යටතේ වුණත් 'සහෝදරයා', 'කුඹියෝ',
'තණමල්විල කොල්ලෙක්' වගේ නිර්මාණත් බිහි වුණා. තමන්ගෙන් තමන් කරන කාර්යයට
වගකීමක් ඉෂ්ට වෙනවද බලලා වැඩ කරනවා නම් යහපත් නිර්මාණයක් කරන්න පුළුවන්.
ප්‍රසිද්ධ මාධ්‍යවල වැඩ කරද්දි තෝරාගැනීම් නැද්ද?
ලංකාවේ රංගන ශිල්පියකුට තෝරාගැනීම් කිරීම ලේසිනෑ. අපි උපරිමයෙන් උත්සාහ
කරනවා තෝරා ගැනීම් එක්ක වැඩ කරන්න. නමුත් මේ තිබෙන පසුබිම ඇතුළේ බොහෝ
දෙනකුට එය ප්‍රායෝගික නෑ. රංගන ශිල්පියාත් ජීවත් වෙන්න ඕන. කුමන ආකාරයේ
නිර්මාණයකට එකතු වුණත් ඒ නිර්මාණයට සාධාරණයක් කරනවා නම් සමස්තය යම් කිසි
සතුටු දායක තැනකට ගන්න පුළුවන්.
ප්‍රසිද්ධ මාධ්‍යයේ පවතින්න දක්ෂකම අත්‍යවශ්‍ය සාධකයක් නොවෙයි යන අදහසක් සමාජගත වෙලා තිබෙනවා?
වේදිකාවේ නම් දක්ෂතාව නැති කෙනකුට පැවැත්මක් නෑ. ඒත් ලාංකේය සිනමාව හෝ
ටෙලි නාට්‍ය ඇතුළේ දක්ෂ නොවන අයටත් රැඳී සිටින්න පුළුවන්. ප්‍රසිද්ධ
මාධ්‍යට වේදිකාවෙන් ආ ශිල්පීන්ට වෙනම ගෞරවයක් ලැබෙනවා. වේදිකාවෙන් ඇවිත්
ජනප්‍රිය මාධ්‍යවලත් නමක් තියාගත් ශිල්පීනුත් අපි දකිනවා. රන්දික, කනිෂ්ක,
බියංක, අකලංක වැනි අය මෑත කාලයේ උදාහරණ. ඒත් ලංකාවේ දක්ෂයන්ගෙන් කීයෙන් කී
දෙනාද මිනිස්සු හඳුනන්නේ. ප්‍රසිද්ධියෙන් නම් දක්ෂකම මනින්නම බෑ. ජනප්‍රිය
හැමෝටම හොඳම නළුවා වෙන්නත් බෑ.
ඔබට මේ තාක් ලැබුණු චරිත ගැන තෘප්තිමත් ද?
වේදිකා නාට්‍ය රංගන ශිල්පියෙක් විදිහට මම තෘප්තියක් ලබනවා. ලංකාවේ
වේදිකා නාට්‍ය රංගන ශිල්පියෙක් වෙන්න ගන්න තීරණය හරි බරපතළයි. වේදිකා
නාට්‍ය ක්ෂේත්‍රය කර්මාන්තයක් ලෙස ස්ථාපිත වූවක් නෙමෙයි. අපිව කවුරුවත්
බලෙන් මේ ක්ෂේත්‍රයට ඇදලා දැම්මේ නෑ. ආසාවෙන් කැමැත්තෙනුයි මේ තුළ වැඩ
කරන්නේ. සමහර අතෘප්තිමත් අත්දැකීම් තිබුණත් කලකිරීමක් නෑ. කලකිරුණොත් කරන්න
තියෙන දේ ගැන සතුටු වෙන්න බැරිවෙනවා.
ජනප්‍රිය මාධ්‍යවල ඔබට කරන්න ලැබෙන වැඩ කොටස ගැන තෘප්තියක් විඳින්න බැරිද?
ජනප්‍රිය මාධ්‍ය තුළ මම තවම ගොඩක් සක්‍රීය නෑ. එනිසාම මම සිනමා හා ටෙලි
නාට්‍ය ශිල්පියෙක් ලෙස හඳුන්වන්න එතරම් කැමැත්තක් නෑ. මොකද ඒ තුළ මට තව
ඉගෙන ගන්න දේවල් තිබෙනවා.සාරංග මෙන්ඩිස් එක්ක ටෙලි නාට්‍යයක් කරලා තිබෙනවා.
පසිදු එක්ක 'ස්නැප්' නාට්‍යයට සම්බන්ධ වුණා. 'සහෝදරයා', 'සී රජ' වගේ
නාට්‍යවලටත් එකතු වුණා. චන්න දේශප්‍රියගේ 'යූටර්න්' සහ චත්‍ර වීරමන්ගේ 'ආයු
චිත්‍රපටයට සම්බන්ධ වුණා. වෘත්තීමයභාවයක් තිබෙන ඔවුන් එක්ක වැඩ කරන්න
ලැබීම සතුටක්.
අනාගත සැලසුම් මොනවා ද?
ඉදිරියේදි ටෙලි නාට්‍ය රචනයට සහ සිනමා රචනයටත් ඒ මාධ්‍ය තුළ
අධ්‍යක්ෂවරයෙක් වීමේ අරමුණකුත් තිබෙනවා. ඒ වෙනුවෙන් මේ මොහොතේ වැඩ කරමින්
ඉන්නවා.
මොනවාද අලුත් වැඩ?
ඉන්දික ධර්මරත්නගේ 'රැහැයියෙක්' කියන නිර්මාණයේ එක ෂෙඩුල් එකක් ඉවර කළා.
ජගත් මනුවර්ණගේ 'කොඩි ගහයට' නිර්මාණයටත් ඉදිරියේදී සම්බන්ධ වෙන්න සූදානම්.
රාජිත දිසානායකගේ '2019 ජූලි මාසේ එක දවසක්' වේදිකා නාට්‍යයට සම්බන්ධ වෙලා
ඉන්නවා. 'කැඩිච්ච සිංහල' කියලා කෙටි නාට්‍යයක් මම රචනා කළා. එය යෞවන
සම්මාන උලෙළ නියෝජනය කළා. රට ඇරපු ගමන් මේ නාට්‍ය නිර්මාණ ප්‍රේක්ෂකයන්
අතරට ගේන්න බලාගෙන ඉන්නවා.
මෙතෙක් ආ ගමන ඇතුළේ මතක් කරන්නත් පිරිසක් ඇති?
මගේ අම්මා තාත්තා සහෝදරයෝ දෙන්නා සහ මගේ ගමේ සහ මා එකට වැඩ කරන මට
වැරැදි කරන්න ඉඩ නොදුන්න මිත්‍රයන් මතක් කරන්න ඕනේ. ඒ වගේම රාජිත දිසානායක ,
නාමල් ජයසිංහ, තුමිදු දොඩන්තැන්න, ශ්‍යාම් ප්‍රනාන්දු වගේ ප්‍රවීණයනුත්
මතක් කරන්න ඕනේ. ඔවුන් නිසා මට හරි අවබෝධයක් තියාගෙන වැඩකරන්න පන්නරය
ලැබුණා.
උපුටා ගැනීම සිළුමිණ
