පාරෙදි හම්බෙන්න එපා වෙඩි තියලා මරලා දානවා කියලා කෝල් කරනවා

චණ්ඩියෙක් තමයි! නමුත් ඔහු ගමේ කොල්ලෙක්. මේ දවස්වල කැකුලන්දරට (කැකුලට) බනින් නැති කෙනෙක් සොයා ගන්නටත් අමාරුයි. ටෙලිවිෂන් රසිකයන් සියලු දෙනා අතර මේ දිනවල ජනප්‍රියතම දුෂ්ටයා, පරම සතුරා ඔහුයි. ඔහු නමින් රුවන් පෙරේරා. ප්‍රේක්ෂකයන්ගෙන් මේ දිනවල නොසෑහෙන්න බැනුම් අහන රුවන් සියලු දුෂ්ටයන් අතර සුන්දර දුෂ්ටයකු ලෙසද හැඳින්විය හැකියි. මේ සුන්දර කලාකරුවා හදගැස්ම වෙනුවෙන් කාලය වෙන් කළේ මේ අයුරින්. 

මේ දවස්වල රුවන්ව නිර්මාණ කිහිපයක් හරහාම අපට දකින්න ලැබෙනවා නේද?
ඔව්. සුදත්ත තිලකසිරි මහතා අධ්‍යක්ෂණය කරන ටීචර් අම්මා ස්වර්ණවාහිනි නාළිකාවේ රාත්‍රි 7.30ට විකාශය වෙනවා. එහි චරිතය "මහේෂ්". ඒ වගේම "කැකුලන්දර" තමයි නාඩගම්කාරයෝහි මගේ චරිතය. සද්ධාමංගල සූරිය බණ්ඩාර මහතා ලියන ජයප්‍රකාශ් ශිවගුරුනාදන් මහතා අධ්‍යක්ෂණය කරන නාඩගම්කාරයෝ ටෙලි නාට්‍යය චාමර සමරවික්‍රම මහතාගේ සහ සද්ධාමංගල සූරිය බණ්ඩාර මහතාගේ නිෂ්පාදනයක්. එය ස්වර්ණවාහිනි නාළිකාවේ රාත්‍රි 9.30ට විකාශනය වෙනවා. ඒ වගේම සියත TV තුළ විකාශය වන එන්කවුන්ටර් චාමර පෙරේරාගේ ටෙලි සිත්තමක්. ඒකේ මගේ චරිතය හැටේ වත්තේ රෙහාන්.  ITN නාළිකාවේ විකාශය වන තාදි ටෙලි නිර්මාණයත් විකාශය වනවා. එය චරිත් අබේසිංහගේ අධ්‍යක්ෂණයක්. එහි චරිතය මහේෂ්, 

රුවන් ක්‍ෂේත්‍රයට ආවේ කොහොමද?
ක්‍ෂේත්‍රයට ඇවිත් දැන් අවුරුදු 15කට වැඩියි. ඒ තුළ ක්‍ෂේත්‍රයට එන්න විඳින්න ඕන උපරිම දුක සහ කන්න ඕන උපරිම කට්ට කෑවා. මම ඉතින් පෙර පාසල් යන අවධියේ ඉඳන්ම රංගනයට හරිම ආසයි. රංගනය වෙනුවෙන්ම උපන් කෙනෙක් හැටියට තමයි මම මාව දකින්නේ. ඒ වගේම ගමේ, පන්සලේ, සමිති සමාගම්වල, පාසල් වේදිකාව වැනි සියලුම තැන්වලදි රංගනයෙන් සම්බන්ධ වුණා. සුරේෂ් අබේසේකර මහතාගේ අසුරාවේශය කියන ටෙලි නාට්‍යය හරහා තමයි මුලින්ම රංගනයට ආවේ. සිනමාව කියන විෂයේදී මගේ ගුරුවරයා වන්නේ ජැක්සන් ඇන්තනි ගුරුපියාණන්. එතුමාගේ අබා චිත්‍රපටයට සම්බන්ධ වෙන්න ලැබීම මා ලද සුවිසල්ම අවස්ථාවක්. ඉන් අනතුරුව අනෝජා වීරසිංහ මහත්මියගේ අභිත රංගන පාසලෙන්ද රංගනය පිළිබඳ හැදෑරුවා.

ඩිංකා කියන්නේ රුවන්ගේ රංගන ජීවිතයේ සුවිශේෂිතම ස්ථානයක් නේ. අපි ඒ ගැනත් මතක් කරමු?
ඔව්. ඇත්තටම ජයප්‍රකාශ් ශිවගුරුනාදන් මහතා තමයි ඩිංකාව නිර්මාණය කළේ. මෑත කාලයේ ප්‍රේක්ෂක හදවත්වල මතකයේ රැඳෙන චරිතයක් බවට පත් වීමට ඩිංකාට අවස්ථාව ලැබුණා. ඒ තුළ 2017 වසරේ රයිගම් ටෙලි සම්මාන උළෙලේ ජනප්‍රියතම රංගන  ශිල්පියා වීමටත් අවස්ථාව ලැබුණා.

හාරකෝටියේ “ඩිංකාගේ” චරිතය හරහා රසික ආදරය ලද රුවන් පෙරේරා, මේ දවස්වල “කැකුලන්දරගේ” චරිතය නිසා මිනිසුන්් නොසෑහෙන්න බනිනවාලු නේද?
ඔව්. නාට්‍යයේ 100 වැනි කොටසේදී තමයි කැකුලා නොහොත් කැකුලන්දර කියන චරිතය කරළියට ආවේ. නාඩගම්කාරයෝහි කැකුලාගේ චරිතය විකාශය වීමට පටන් අරගෙන තවම සීමිත දින ගණනක් වුවත් එම චරිතයට ඉතාම හොඳ ප්‍රතිචාර ලැබෙනවා.  දිනකට දුරකථන ඇමැතුම් සහ කෙටි පණිවුඩ හිතාගන්න බැරි තරම් ප්‍රමාණයක් ලැබෙනවා. සමහර අය ඇත්තටම මගේ තරහාකාරයෝ වගේ. "පාරෙදිවත් අපට හමුවෙන්න නම් එපා. ගලකින් හරි ගහනවා. වෙඩි තියලා දානවා, තමුසෙට ගහලා කියලා ආරංචි වුණු දවසට තමයි අපි නැවත ටෙලි නාට්‍යය බලන්නේ" කියලාත් මට කියනවා. ඒ වගේ ගොඩක් අය සෑහෙන්න කැකුලට දොස් කියනවා සහ කැකුලට සාප කරන අය පවා සිටිනවා. ඇත්තටම මෙවැනි සෑම දෝෂාරෝපණයක්ම මම හරිම ආදරෙන් භාර ගන්නවා. ඒ සියලුම රසිකයන්ට මම හරිම ආදරෙයි. ඒ නිසා තමයි කැකුලන්දර කියන චරිතය විදේශයන්හි පවා මේ තරම් ජනප්‍රිය වෙලා තිබෙන්නේ. ඉතින් මේ බැනුම්වලට, තර්ජනවලට මම හරිම ආදරෙයි. 

රුවන් මේ වනවිට ටෙලි නාට්‍ය කීයකට පමණ දායක වෙලා තිබෙනවාද?
අමුතු රසිකයා, උතුවන්කන්දේ සරදියල්, රෝසකටු, අපි අපේ, ජීවිතය ලස්සනයි, සඳතරුමල්, මුතුලෙන්‍ෙදාර වගේම හාර කෝටිය, කෝටිපතියෝ ආදී ටෙලි නාට්‍ය රාශියකටම රංගනයෙන් දායක වෙන්න මට අවස්ථාව උදා වුණා. 

ප්‍රේක්ෂක මතකයේ රැඳෙන නිර්මාණ රාශියකට දායක වීමට ලැබීම රුවන්ට දැනෙන්නේ කොයි විදිහටද?
අමුතු රසිකයා, හාර කෝටිය, කෝටිපතියෝ සහ නාඩගම්කාරයෝ කියන නිර්මාණ තුළ ශිවගුරුනාදන් මහතා සමඟ වැඩ කරලා තිබෙනවා. මගේ ජීවිතය තුළදී මට ලැබුණු මනුස්සකමින් පිරුණු, නිහතමානී, සුන්දර නිර්මාණවේදියෙක් තමයි ජයප්‍රකාශ් ශිවගුරුනාදන් මහතා. ඒ බව මම ඕන තැනක බය නැතිව කියනවා. ඒ ගෞරවය ඔහුට ලබා දෙනවා. කලාව තුළදි එතුමා සියලු දෙනාටම ඔවුනට හිමිවිය යුතු නිසි වෘත්තීය ගෞරවය ලබාදෙනවා. සද්ධාමංගල සූරියබණ්ඩාර මහතා පිටපතේ ලියන ඩිංකාව, හැදුවේ - වැඩුවේ, බිහිකළේ, ජීවත් කළේ ශිවා අයියා. කැකුලන්දරත් එහෙමයි. ඉතින් එතුමා වගේ කෙනෙක් සමඟ වැඩ කරන්න ලැබෙනවා කියන්නේ මාර වාසනාවක් සහ  එය ජීවිතයේදී කලාකාරයකුට ලැබෙන ලොකු අවස්ථාවක්. 

සැබෑ ජීවිතයේදී රුවන් කොයිවගේ කෙනෙක්ද?
සැබෑ ජීවිතයේ රුවන් කියන්නේ හරිම සරල, නිහතමානී, මොළේ කල්පනා කොට කටයුතු කරන තමන්ගේ පාඩුවේ ගමන යන කෙනෙක්. 

මෙතෙක් දුර ආ ගමන්මඟ තුළ ඔබ තෘප්තිමත්ද?
රංගනය කියනදේ තුළ අපි කොතරම් උපරිමයෙන් රංගන කටයුතු කළත් ඒ දෙස නැවත හැරී බැලුවොත් “ඊට වඩා හොඳට මට මේක කරන්න තිබුණා කියන දේ තිබෙනවා.” ඒ තුළ රංගනය ගැන සෑහීමට පත්විය හැකි ප්‍රමාණය මෙපමණයි කියලා තැනක් කියන්න බැහැ. නමුත් රංගන ශිල්පියෙක් වශයෙන් මම ආපු ගමන් මඟ තුළ මා ලබා ගන්න උත්සාහ කළ සියලුම දේ මේ වන විට මට ලැබී තිබෙනවා. තව ඉදිරියේදී හොඳම නළුවා කියන සිහිනයට යන්න තිබෙනවා. හොඳ වැඩක් තුළින් එම ඉලක්කයටත් යන්න බලාපොරොත්තු වෙනවා. ඒ වගේම රංගන ශිල්පියකු වශයෙන් මේතාක් මට සියලුම ගණයේ චරිතයන් ලැබී තිබෙනවා. ඒ සියල්ල මම ඉතාම සාර්ථක අන්දමින් කළා කියලත් හිතනවා. ඇත්තටම ඉතින් කැකුලාගේ චරිතය මේ තරම් ජනප්‍රිය වෙන්න ශිවගුරුනාදන් අධ්‍යක්ෂතුමාගෙනුත් පිටපත් රචනා කරන සද්ධාමංගල මහතාගෙන් සහ නාට්‍යයට සම්බන්ධ වෙන සියලුම රංගන ශිල්පීන්ගෙනුත් විශාල සහයෝගයක් ලැබුණා. 

රුවන් පෙරේරා කියන්නේ සම්මානනීය රංගන ශිල්පියෙක්. ඒ අතීතය ගැන මතක් කළොත්?
2015 වසරේදී ජැක්සන් ඇන්තනි මහතා අධ්‍යක්ෂණය කළ දස්කොන් ටෙලි නිර්මාණයට වසරේ නැඟී එන නළුවාට හිමි සම්මානය ලබා ගත්තා. ඉන් අනතුරුව 2016, 2017 වසරවල නැඟී එන නළුවා, හොඳම සහාය නළුවා සහ ජනප්‍රියතම නළුවා කියන කාණ්ඩයන් යටතේ රයිගම්, සුමති සහ සිග්නීස් ආදී සම්මාන උළෙලවලදී සම්මාන කිහිපයක්ම මට ලබන්න හැකියාව ලැබුණා. 

පාසල සහ පවුලේ විස්තරත් මතක් කරමු?
මගේ ගම රත්නපුර - ගිලීමලේ. සාමාන්‍ය පෙළ දක්වා ගිලීමලේ විද්‍යාලයෙන් තමයි හැදෑරුවේ. උසස් පෙළ කළේ රත්නපුර ධර්මපාල විද්‍යාලයෙන්. මගේ පවුලේ ඉන්නේ අම්මයි, තාත්තායි, අයියයි, මල්ලියි, මමයි, ආච්චි අම්මයි. 

රංගනයෙන් ඔබ්බට ගොස් රුවන්ගේ අනාගත බලාපොරොත්තු මතක් කළොත්?
අධ්‍යක්ෂණය පැත්තට යොමු වෙන්න තරම් තවමත් මා හට රංගනය පිළිබඳ පුළුල් දැනුමක් නැහැ කියලා මම හිතනවා. නමුත් නිෂ්පාදනය පැත්තට ඉදිරියේදී යොමු වෙන්න පුංචි බලාපොරොත්තුවක් තිබෙනවා. 

ඉදිරියට එන්න තිබෙන නිර්මාණ ගැන මතක් කළොත්?
ප්‍රසන්න ප්‍රදීප් මහතාගේ ටිකිරා ටෙලි සිත්තම තුළ ජිනාගේ චරිතයට දායක වුණා. රෝහණ සමරදිවාකර මහතාගේ අක්කරගල ටෙලි නාට්‍ය, ඒ වගේම ජැක්සන් ඇන්තනි මහතාගේ එකගෙයි සොකරි සිනමා සිත්තම සහ ක්ෂීර සාගරය, එය මහාචාර්ය සුනිල් ආරියරත්න මහතාගේ නිර්මාණයක්. 

තිරය තුළ ප්‍රේමවන්තයා වූ රුවන්ට සැබෑ ජීවිතයේදී පෙම්වතියක් ඉන්නවාද? සහ විවාහ වීමට සූදානමක් නැද්ද?
විවාහ වෙන්න නම් සූදානම්. නමුත් විවාහ වෙන්න කෙනෙක් තවම නැහැ. මම හොයන කෙනා මට තවම මුණගැසුණේ නැහැ. ඉදිරියේදී බලමු ඉතින්. 

ස්තුතිවන්ත වන්න පිරිසකුත් ඇති?
ඔව්. ජැක්සන් ඇන්තනි ගුරුපියාණන්ට වගේම මේ දිනවල විකාශය වන තාදිහි චරිත් අබේසිංහ මහතාට, එන්කවුන්ටර් චාමර පෙරේරා මහතාට, ටීචර් අම්මා සුදත්ත තිලකසිරි මහතාට, නාඩගම්කාරයෝ සද්ධාමංගල සූරියබණ්ඩාර මහතාට, ජයප්‍රකාශ් ශිවගුරුනාදන් මහතාට, චාමර සමරවික්‍රම මහතාට, වගේම මේතාක් මා රංගනයෙන් දායක වුණු සියලුම නිර්මාණයන්හිදී මා හට වචනයකින් හරි උදවු උපකාර කළ සියලුම දෙනාට බෙහෙවින්ම ස්තුතියි.

උපුටා ගැනීම මව්බිම