දියවැඩියාව පාලනය කරන යෝග අභ්‍යාස
අද බොහෝ කාන්තාවන් පීඩාවට පත්ව ඇති ප්‍රධානතම රෝග තත්ත්ව වනුයේ දියවැඩියාව, හෘදයාබාධ හා අධි රුධිර පීඩනයයි. බොහෝ විට මෙම රෝගවලට ප්‍රධාන වශයෙන් ගොදුරු වනුයේ නාගරික සමාජයේ කාන්තාවන්ය. කාන්තාවන් ලෙස හැඳින් වුවත් පුරුෂ පාර්ශ්වයටද මෙම රෝගයන් මාරාන්තික ලෙස පීඩා ගෙන දෙයි. බෝ නොවන රෝග ගණයට වැටෙන දියවැඩියාව ඇති වීමෙහිලා ප්‍රබල ලෙස බලපානුයේ අපගේ කට පරිස්සම් කර නොගැනීමය. දියවැඩියාව ප්‍රධාන ලෙසම කාණ්ඩ දෙකකට ඛෙදේ. පළමුවැන්න වනුයේ මුත්‍රාවල සීනි එකතු වීමෙන් සෑදෙන දියවැඩියාවයි. අනෙක් කාණ්ඩය වනුයේ ලේවල සීනි එකතු වීමෙන් ඇතිවන තත්ත්වයයි. මෙය ආයුර්වේදයෙහි මධුමේහය ලෙස හැඳින්වෙන අතර දියවැඩියාව වැලඳීමෙන් පසු බොහෝ දෙනා ඒ පිළිබඳ සැලකිලිමත් නොවීමෙන් බොහෝ අතුරු ආබාධ වැලඬෙයි. විශේෂයෙන්ම කාන්තා ලාලිත්‍ය රූප ස්වභාවය ගැන අවධානය යොමුකරන අය, යෝග හා ඒ පිළිබඳ අවධානය යොමුකරන අය රෝග පිළිබඳ දැනගත යුතුමය.
යම් කිසි කෙනකුට දියවැඩියාව වැලඳුණහොත් එය සුව කරගත හැකි ඖෂධයක් ලෝකයේ නොවන අතර කළ හැක්කේ රෝගය පාලනය කිරීම පමණක්මය. දැනටමත් ඔබ දියවැඩියාවට අතවනන යම් යම් ක්‍රියාකාරකම්වල නිරත වන බව ඔබ දන්නවාද? ඔබ යෙදෙන රැකියාව මානසික ආතතියකින් පීඩනයකින් යුතුව නිරත වන්නක් නම්, නිතර නිතර මානසික වේදනාවන්ට ලක්වනවා නම් එයද දියවැඩියාවට අතවැනීමක් විය හැකියි. ඔබ අධික තරබාරුවෙන් පෙළෙන අයෙක්නම්, කිසිදු ව්‍යායාමයකින් තොරව දිවි ගෙවන්නේ නම් ඔබද ආසන්නයේදීම දියවැඩියාවේ ගොදුරක් විය හැකිය. ආහාර රටාව පිළිබඳ සැලකිලිමත් නොවන විටද දියවැඩියාව වැලඳීමේ ප්‍රවණතා ඉහළ යයි. සමහර විටක ජානමය හේතුද දියවැඩියාව ඇතිවීමෙහිලා බලපෑම් ඇති කරයි. බටහිර ඖෂධ මගින් බොහෝ කොට කෙරෙනුයේ රෝගය පාලනය කිරීමක්ය. නමුත් දිගින් දිගටම මෙම ඖෂධයන්ට ඇබ්බැහි වුවහොත් ඒවායේ අහිතකර ප්‍රතිඵලයන්ද ඇති වී අතුරු ආබාධයන්ට ගොදුරු වේ. දියවැඩියාව වැලැඳුණු කළ ඉතා පරිස්සමෙන් ජීවත් විය යුතුය. දියවැඩියාව උත්සන්න වූ අවස්ථාවක ඉතා කුඩා විෂබීජයකින් පවා ඔබේ පාද, ඇස්, වකුගඩු අක්‍රිය වීමට ඉඩ ඇත. දියවැඩියා රෝගයට ගොදුරු වූවත් නැතත් යෝග ආහාර විහරණ රටාවට පුරුදු පුහුණු වුවහොත් රෝග නොමැතිව චිරාත් කාලයක් ජීවත් විය හැකිය.
- පැණිරස ආහාර අවම කිරීම.
- පාන් පිටිවලින් සැදුම් ලත් ආහාර හා ක්ෂණික ආහාර ඔබේ ආහාර වේලෙන් ඉවත් කිරීම.
- ආහාර ගැනීමෙන් පසු අඩි 150ක් පමණ සක්මන් කිරීම.
- ආහාර ගත් විගස අතුරු පස නොගැනීම.
- අතුරු පස අවශ්‍ය නම් ආහාර ගැනීමෙන් පසු විනාඩි 40ක් ගිය පසු අතුරු පස ගැනීම.
- හැකිතරම් මානසිකව සතුටින් හා සැහැල්ලුවෙන් සිටිය යුතුය.
- පරම්පරාවේ දියවැඩියා රෝගීන් සිටී නම් තම සෞඛ්‍ය පිළිබඳ වඩාත් සැලකිලිමත් වන්න.
- හැකි සෑම විටම උසට සරිලන බරක් පවත්වා ගැනීම සඳහා උත්සාහ ගන්න.
- සියලුම ආකාරයේ කෘත්‍රිම පැණි බීම වර්ග අත්හළ යුතු අතර ජලය පානයට පමණක් හුරු වීම.
- දෛනිකව ව්‍යායාම් කළ යුතු අතර නිවෙසේදී යෝග වැනි අභ්‍යාසයක් හැදෑරීම.
- අඩුතරමේ දිනකට කිලෝ මීටර් 3ක්වත් පයින් ඇවිදීම.
මෙමගින් හොඳින් දියවැඩියාව පාලනය කරගත හැකි අතර කායික හා මානසික සැනසීම ළගාකරගත හැකිය.
යෝගාසන බල වැඩි වැඩියෙන් යෙදිය යුතු අතර උදය කාලයේ විනාඩි 30ක්ද සවස් කාලයේ විනාඩි 30ක්ද වශයෙන් කළ හැකි නම් ඔබට ලැඛෙන ප්‍රතිඵල දෙගුණ කරගත හැකිය. අද ලංකාවේ ළමයි 35%ක් පමණ දියවැඩියා රෝගයෙන් පෙළේ. මේ අතර 12%ක් පමණ ජාත්‍යන්තර පාසල්වල ළමයිද දියවැඩියාවට ගොදුරු වී ඇත. බොහෝ විට මෙම රෝග තත්ත්වය මාරාන්තික වනවිට ඉන්සියුලින් මගින් පාලනය කළද එමගින් අතුරු ආබාධ ඇතිවිය හැකිය. නමුත් ඉතා සරල යෝග ආසන. බන්ධන අභ්‍යාස ආදියෙන් දියවැඩියාව පාලනය වන අතර ඒ සඳහා උපයෝගී කරගන්නා නිල ප්‍රතිකාරද භාවිත කළ යුතුය. මීට පෙර අප හඳුන්වා දුන් සූර්ය නමස්කාරය, ප්‍රාණයාම් අභ්‍යාස මෙන්ම හලාසනය, මණ්ඩුකාසන, ධනුරාසන උඩ්ඩියන බන්ධ, වමන ධෝති ආදියෙන් දියවැඩියාව පාලනය කරගත හැකිය. විශේෂයෙන්ම ඔබේ දෙඅත්ලේ පිහිටි නිල මධ්‍යස්ථාන හඳුනාගෙන ඒවා උදේ සවස විනාඩි 5ක් පමණ සම්බාහනය කිරීමෙන් ශරීර සුවතාව වර්ධනය කරගත හැකිය.
ප්‍රාණායාම අතුරින් කපාලභාති ප්‍රාණායාමයද, ආසන අතුරෙන් පුස්ත වජ්‍රාසනය වැනි ආසන මගින්ද දියවැඩියාව පාලනය වේ. මෙයට පෙර අප කතා කළ සූර්ය නමස්කාරය මන්ත්‍ර ගායනයක් සමගම වාර දොළහක් පමණ යෙදිය හැකි නම් එයින්ද සුවතාව ළගාකර ගත හැකිය. මෙයටද ඔබ දෛනිකව යම් පුරුදු පුහුණු වීමක් මෙන්ම කැපවීමක්ද කළ යුතුය. බොහෝ විට දියවැඩියාව ඇති අයගේ අක්ෂි අන්ධභාවයට පවා පත්විය හැකිය. මේ සියල්ලන් පිළිබඳ අවධානය යොමුවිය යුතුය. පහත දැක්වෙන පාලාසනය අත්හදා බැලීමෙන් රෝග තත්ත්වය පාලනය කරගත හැකිය. මෙයින් නඟුලක හැඩ රුව පෙන්නුම් කෙරෙන නිසා හලාසනය නම් වේ.
- බිම හාන්සිවී පාදෙක අත්දෙක ඈත්කොට සිටින්න.
- ශරීරයට ඇතුළුවන පිටවන ශ්වසන රටාව පිළිබඳ අවධානය යොමුකරමින් ආසනය සඳහා සූදානම් වන්න.
- පාදෙක ළංකර ගෙන දෙඅත් කලවා දෙපසට ගෙන දෙඅත්ල පොළොව ස්පර්ශ වනසේ තබා ගන්න.
- දැන් සෙමින් ආශ්වාස කරමින් පාදෙක ඉහළට එසවිය යුතු අතර ඉන්පසු සෙමින් ප්‍රශ්වාස කරමින් පිටකොන්ද ඔසවා දෙඅත්ල කොන්ද දෙපසට ආධාරකයක් සේ තබාගත් යුතුය.
- මෙවිට පා දෙක හිස පැත්තට බරවී තිඛෙන අතර සෙමෙන් සිට පිට පෙදෙස පිටුපසට තල්ලු කරමින් පොළොවමත පා දෙක තබන්න.
- එසේ පාදෙක පොළොවට තැබූ පසු මනසේ අවධානය අග්න්‍යාශය දෙසට යොමු කරන්න.
- මිනිත්තු 2 සිට 5 අතර කාලයක් මෙම ඉරියව්වේ රැඳී සිටිය යුතු අතර ආශ්වාස කරමින් අසුනින් නිදහස් විය යුතුය.
- මෙය මඳක් දුෂ්කර ගණයට වැටෙන යෝගාසනයක් වන අතර දෛනිකව පුරුදු පුහුණු වීමෙන් මෙම ආසනය ජයගත හැකිය. මෙය වාර 3ක් පමණ යෙදිය හැකිය.
මෙමගින,
- දියවැඩියාව හොඳින් පාලනය වේ
- උදරගත ඉන්ද්‍රියන්හි හා කොඳු ඇට පෙළෙහි ක්‍රියාකාරිත්වය වර්ධනය වේ.
- මොළයට හොඳින් රුධිරය කාන්දු වන නිසා එමගින් මුහුණ පැහැපත් වේ.
- රුධිර සංසරණය හොඳින් සිදුවන නිසා බුද්ධි වර්ධනය හා ධාරණ ශක්තිය වර්ධනය වේ.
දෛනිකව වැඩිවේලාවක් මෙම අසුනේ සිටීමෙන් තරබාරුව පාලනය කරන අතර වයස් ගත වීමද ප්‍රමාද කරයි. මනා ආහාර විහරණ රටාවකින් යුතුව මෙම ආසනය පුරුදු පුහුණු වීමෙන් ලෝකයේ අවාසනාවන්ත රෝගය ලෙස දැක්වෙන දියවැඩියාව පාලනය කරගත හැකි වේ.
උපුටා ගැනීම මව්බිම පුවත් පත
