නිවසට සිරිකත කැඳවා ගන්නේ මෙහෙමයි
පූජ්‍ය පක්‍ෂයට වෙන් කර තිබූ පළමු ආසනයේ ඉඩ තිබුණු බැවින් මම එහි වාඩි වුණෙමි. බස්‌ රථය පිටත් වන තෙක්‌ නොයෙකුත් කල්පනාවන්ගෙන් පිරුණු මගේ හිතට එකවරම ගැටුනේ මා ඉදිරියේ රියෑදුරු අසුනට පිටුපසින් සවිකර තිබූ විශාල රූපයයි.
අලංකාර කාන්තා රුවකි. දෑතේ නෙළුම් මල්ය. වම් අත පැත්තේ බිමට හැරවුණ රන් කළයකි. රන්වන් පාට නිසා රන් කළයක්‌ යෑයි සිතමි. එයින් පිටතට ගලන්නේ රන් කාසිය. අත් හතරෙන් දකුණු අතෙන්ද රන් කාසි ගලා එයි. දෙපස ඇත් රූප දෙකකි. මේ ඇතුන් හොඬයෙන් ගත් කෙන්ඩිවලින් එතුමියගේ දෑතේ ඇති නෙළුම් මල් දෙසට පැන් ඉසින බවත් පෙනේ. මේ දෙවඟන අසුන්ගෙන සිටින්නේද නෙළුම් මලක්‌ මතය. මේ ශ්‍රී ලක්‍ෂ්මී දෙවඟනගේ රූපයයි. මගී බස්‌ රථවලද වෙළෙඳ සල් වලද නිවාසවලද පේමන්ට්‌ එකේ විකුණන අනේක විධ රූප අතර ද ශ්‍රී ලක්‍ෂ්මී දෙවඟනගේ රුව දැකීමට ලැබීම ඉතා සුලබ දෙයකි.
එතුමිය සිරිකත හෙවත් ශ්‍රියා කාන්තාව යනුවෙන් ද ලක්‍ෂ්මී දෙවඟන හා ලක්‍ෂ්මී මෑණියන් යනුවෙන්ද හඳුන්වනු ලැබේ. ශ්‍රියාව, ධනය, සෞභාග්‍යය ලැබීම උදෙසා බොහෝ දෙනා විසින් ශ්‍රී ලක්‍ෂ්මී දෙවඟනට පූජා තබනු ලැබේ. ලක්‍ෂ්මී හෙවත් සිරිතක ශ්‍රියා කාන්තාව යනු කව්ද? දේව කතාවලට අනුව ලක්‍ෂ්මී යනු ශ්‍රී විෂ්ණු දෙවිඳුන්ගේ භාර්යාවය. එය ජාති බොහෝ ගණනක පුනර්භවය ලබමින් නැවත නැවත පෙම්වතුන් ලෙස උපදින ලස්‌සන ආදර කථාවකි. කෙසේ නමුත් ලක්‍ෂ්මී සිටින තැන මුදල් හිඟ වන්නේ නැති බව ඉහත කතා වලින් සනාථ වේ. "ඕං" යන අකුරින් බොහෝ මන්ත්‍ර ආරම්භ කරනු ලැබේ. ඕං යන්නෙන් කියවෙන්නේ බ්‍රහ්ම, විෂ්ණු, මහේෂ්වර යනු මේ විශ්වය උතුම්ම යෑයි කියාවෙන ත්‍රි මුර්තියට නමස්‌කාර වේවා යන්නයි. බ්‍රහ්ම, විෂ්ණු, ඊෂ්වර යන තිදෙනාටම මෙසේ එකවර නමස්‌කාර කළඳ මෙයින් වඩා බලවතා කව්ද යන්න දැන ගැනීමට පුරාණ සෘෂිවරුන්ට වුවමනා විය. මේ තිදෙනාගෙන් වඩා උතුම් වන්නේ කවරෙකු දැයි දැන ගැනීමට භාර වුණේ "භ්‍රගු" නම් සෘෂිවරයාටය. භ්‍රගු ඉසිවරතුමා පළමුව මහා බ්‍රහ්මයා හමුවීමට ගියේය. සරස්‌වතී දේවියගේ මියුරු වීනා නාදයට සවන් යොමු කර සිටී බ්‍රහ්ම තෙමේ මේ උග්‍රතපස්‌වරයකු වූ භ්‍රගු ඉසිවරයා නොසලකා හැරියේය. එබැවින් බ්‍රහ්ම උතුම් කෙනෙකු නොවේ යෑයි ඉසිවරයා තීරණය කළේය. ඉන්පසුව එතුමා ඊශ්වර දෙවියන් දක්‌නට ගියේය. පාර්වතී යනු ඊශ්වර දෙවියන්ගේ බිරිඳයි. නර්තනයක යෙදෙමින් සිටි ඊශ්වර දෙවියෝ තමන්ට බාධා කරන "භ්‍රගු" ඉසිවරයා ගැන කෝපයට පත්ව පලවා හැරියේය. ඊශ්වර ද උතුම් කෙනෙකු නොවන බව ඉසිවර තුමා තීරණය කළේය. වෛතුන්ඩයේ වෙසෙන ශ්‍රී විෂ්ණු දෙවියන් දක්‌නට භ්‍රගු ඉසිවර තුමා යන්නේ ඉන් පසුවය. ඒ මොහොතේ ශ්‍රී විෂ්ණු දෙවියන් සිටියේ තම බිරිඳ වන ලක්‍ෂ්මී සමගය. මේ අවස්‌ථාවේ විෂ්ණු දෙවියන් ගැන පරීක්‍ෂා කිරීමට භ්‍රගු ඉසිවරයා නොකළ යුතු දෙයක්‌ කළේය. එනම් එක්‌වරම ඉසිවරයා විෂ්ණු දෙවියන්ගේ පපුවට පයින් ගැසුවේය. කෝප වූයේ විෂ්ණු දෙවියන් නොවේ. සැබෑ දේවත්වය සනාථ කරමින් විෂ්ණු දෙවියන් ඉසිවරයාගේ පය රිදුනා දැයි අසමින් ඊට කනගාටුව ද පළ කළේය. ත්‍රිමූර්තිය අතරින් උතුම් වන්නේ විෂ්ණු දෙවියන් බව භ්‍රගු ඉසිවරයා තීරණය කළේ ඉන් පසුවය. එහෙත් මේ නොමනා ක්‍රියාවට ලක්‍ෂ්මී දේවිය කිපුණේය. ඉසිවරයාට දඬුවම් කරන ලෙස ඇය විෂ්ණු දෙවියන්ගෙන් ඉල්ලා සිටියාය. එයට දෙවියන් එකඟ වූයේ නැත. එවිට ලක්‍ෂ්මී දේවිය විෂ්ණු දෙවියන් හැර දමා ඉන්දියාවේ ගෝදාවර් ගඟබඩ බවුන් වඩන්නට පටන් ගත්තාය. ඇය එතැනින් චුතව පද්මාවතී නමින් උපත ලැබුවාය. විෂ්ණු දෙවියන් හැර දමා ගිය පසුව මෙම දෙපළ විසූ වෛතුන්ඩයේ තත්ත්වය වෙනස්‌ විය. සකල සෞභාග්‍යය නැති විය. පාළුවී ගියේය. ඉන්පසු විෂ්ණු දෙවියන්ද ගොපළු දරුවෙකු ලෙස උපත ලැබුවේය. සසර සබඳතා මත නැවත පෙම් සබඳතාව ඇතිවිය. එහෙත් මේ විවාහ මංගල්‍යයට විෂ්ණු දෙවියන් අත මුදල් නොවූ බවත් ඊට අවශ්‍ය මුදල් විශ්මයේම ධනවතා වන කුවේර ගෙන් ඉල්ලාගත් බවත් කියෑවේ.
අද ද බැංකුවකින් පවා ණයක්‌ ලැබෙන්නේ එය පියවා ගැනීමට හැකි දැයි මනාව පරීක්‍ෂා කිරීමෙනි. ලක්‍ෂ්මී විවාහ කර ගැනීම පමණක්‌ ඊට ප්‍රමාණවත් බවද ඇයගේ වාසනාව අනුව ධනය ලැබෙන බවද කුවේර දැන සිටියේය. ලොව අති උත්කර්ෂවත් මංගල්‍යය ලෙස විෂ්ණු ලක්‍ෂ්මී විවාහය සිදුවිය. ඉහත සඳහන් කළේ ශ්‍රී ලක්‍ෂ්මී දෙවඟන පිළිබඳ කියවෙන දේව කතාවක්‌ ඉතා කෙටියෙනි. එහෙත් ශ්‍රී ලක්‍ෂ්මී දෙවගන නැතහොත් සිරිකත කැඳවා ගන්නේ කෙසේද යන්න ප්‍රශ්නයකි. මේ සඳහා පුද පූජා, ස්‌තෝත්‍ර, මන්ත්‍ර, ලක්‍ෂ්මී යන්ත්‍ර ආදී ක්‍රමෝපායන් රාශියක්‌ තිබේ. එහෙත් ලක්‍ෂ්මී පලවා හරින හා කැඳවන අවස්‌ථා මොනවා දැයි සෘෂිවරුන් කියා ඇත්තේ කුමක්‌ දැයි අවධානය යොමු කිරීම වටී. ඔබ සිරිකත වඩින තැන දන්නේද? ඔබේ නිවසට ද එතුමිය කැඳවා ගන්නා හැටි බලන්න.
"ලක්‍ෂ්මී බිල්ව වනෙ කදම්භ කුසුමෙ කන්‍යාංගනා කුඤ්ජරෙ
දීපොත්තුංග රථෙ කුරංග ධවලෙ ජත්‍රේ ධ්වජෙ චාමරෙ
ශංඛේ පද්මේ වනේ නරේන්ද්‍ර භවනේ ස්‌වර්ණේ නදී ගෝකුලේ
සෞර්ය්‍යං සත්‍ය වචනේ ලක්‍ෂණ ගෘහෙ ශ්‍රී විෂ්ණු වක්‍ෂස්‌ථලෙ"
දීපොත්තුංග රථෙ කුරංග ධවලෙ ජත්‍රේ ධ්වජෙ චාමරෙ
ශංඛේ පද්මේ වනේ නරේන්ද්‍ර භවනේ ස්‌වර්ණේ නදී ගෝකුලේ
සෞර්ය්‍යං සත්‍ය වචනේ ලක්‍ෂණ ගෘහෙ ශ්‍රී විෂ්ණු වක්‍ෂස්‌ථලෙ"
මෙම ශ්ලෝකයට අනුව සිරිකත වාසය කරන්නේ බෙලි වනය. කොලොම් මල්, කන්‍ය ස්‌ත්‍රීන් කෙරෙහි, අලි ඇතුන්ගේ කුම්භස්‌තලය, පහන්, උස්‌ රථ, සුදු අශ්වයන්, කුඩ, කොඩි, චාමර, සක්‌ගෙඩි (හෙවත් සංඛ) පියුම් වන, රාජ මන්දිර, රත්රන්, ගංගා, ගව සමූහය, ශූරවීර භාවය, සත්‍ය වචන, සිරියාවන්ත ගෙවල්වල හා ශ්‍රී විෂ්ණු දෙවියන් සමගය. මෙම ශ්ලෝකය අනුව බෙලි ගස්‌, රෝපනය, කිරීම, සත්‍ය වචන කතා කිරීම හා නිවාස පිරිසිදුව සිරියාවන්තව තබා ගැනීම මගින් සිරිකත කැඳවා හැකි බව පැහැදිලි වේ. මේ සඳහා දක්‍ෂිණ වෘත සංඛ හෙවත් වාලම්පුරි නැතහොත් සුදු අශ්වයකු ද අවශ්‍යම නොවේ. මීළඟට දැනගත යුතු වන්නේ පැමිණ සිටින සිරිතක ද අදෘශ්‍යමාන වන්නේ කෙසේද යන්නයි. සියල්ලම නිශ්‍රිත වන සිරියාව පලායන කරුණුද සෘෂිවරුන් කියා තිබේ. පහත සඳහන් ශ්ලෝකය බලන්න.
නිත්‍යං ඡේදස්‌තෘණානං භුවින ඛලිඛිතං පාදයෝරල්ප පූජා
දන්තානාමල්ප සොභං වසන මලිනා වෙෂ්ටිනා මූර්ධජානං
ඖෂස්‍යං චාපි නිද්‍රා නිවසන සයනා ග්‍රාහ හාසාධි රේඛා
ශ්වාංගේ පීඨෙවවද්‍යං විගත මපහරෙන් මාධවශ්‍යාපි ලක්‌ෂ්මි
දන්තානාමල්ප සොභං වසන මලිනා වෙෂ්ටිනා මූර්ධජානං
ඖෂස්‍යං චාපි නිද්‍රා නිවසන සයනා ග්‍රාහ හාසාධි රේඛා
ශ්වාංගේ පීඨෙවවද්‍යං විගත මපහරෙන් මාධවශ්‍යාපි ලක්‌ෂ්මි
ලක්‍ෂ්මී හෙවත් සිරිකත පලා යන කරුණු මෙම ශ්ලෝකය අනුව පහත පරිදිය
- නිශ්ප්‍රයෝජන කැපීම (පිහියකින් යම් යම් දේවලට කෙටීම)
- තණපත් තැළුම ( අලංකාරව ඇති තණකොල තලා දැමීම)
- නියෙන් බිම ඉරි ඇඳීම
- පා නොසේදීම
- දත් නොමැදීම
- කිළුටු ඇඳුම් ඇදීම
- හිස නොපීරීම
- ඉර උදාවන තුරු නිදා ගැනීම
- අපවිත්‍ර ගෙවල්
- මහ හඬින් සිනා සීම
- බිත්තිවල ඉරි ඇඳීම
- ආත්ම වර්ණනාව (තමා ගැන වර්ණනා කර කතා කිරීම)
- අපවිත්‍ර මිදුල්
- තම ශරීරයේ හෝ ආසනයේ බෙර ගැසීම
ලක්‍ෂ්මී හෙවත් සිරිකත පලවා යන ඉහත කරුණු දාහතරම අයහපත් හැසිරීම පෙන්වයි. මෙකල දවල් නිදන නැත හොත් ඉරඋදාවන තෙක්‌ නිදන ගෙවල් අපවිත්‍රව තබාගනු ලබන මිදුල නිතිපතා අතුනොගාන අය ලක්‍ෂ්මීට පහන් තැබීම නිෂ්ඵල බව මේ ශ්ලෝකය අනුව වටහාගත යුතු වේ. තම බස්‌ රථයේ, කැෂියර් කූඩුව ළඟ, බුදු මැඳුරේ ලක්‍ෂ්මී රූප සවිකරගෙන මුදල් ලැබෙන තෙත් උඩබලා ගෙන සිටිනවාට වඩා මෙම ශ්ලෝකවල ඇති ලෙස ලක්‍ෂ්මී කැඳවාගත හැකි සිරිකත බැල්ම හෙළන ආකාරයට තම ජීවිතය හා නිවස සකස්‌ කරගැනීම කාගේත් යුතුකමකි. මේ සෘෂි භාෂිතයයි.
උපුටා ගැනීම දිවයින
