ඇඳුමක් මිලදී ගැනීමේදී මේ ගැනත් සිතන්න

නිමි ඇඳුමක් මිලදී ගැනීමේදී බොහෝ විට ඔබ ඇඳුම් විලාසිතාව සහ වර්ණය පිළිබඳව වඩාත් සැලකිලිමත් වෙනවා නිසැකයි. නමුත් එහිදී ඔබ ඇඳුමක් මිලදී ගැනීමේදී ඇඳුම් වල අඩංගු ලේබල් පිළිබඳව නම් අවධානය යොමු කරන්නේ මඳ වශයෙනි. නමුත් ඇඳුම් වල අමුණා තිඛෙන ලේබල් වර්ග පිළිබඳව අවධානය යොමු කිරීමත් වඩාත් වැදගත්ය.

ලේබල් කිරීම : ලේබල් කිරීම වැදගත් තොරතුරු සපයන මාධ්‍යකි. කිසියම් ඇඳුමක ඉතා වැදගත් ගුණාංග පිලිබඳ සැබෑ තොරතුරු සැපයීම සඳහා ලේබල් කරයි. පාරිභෝගිකයන්ගේ විශේෂ අවශ්‍යතා සපුරන අයුරින් රෙදි තෝරා ගැනීමට ලේබලය උපකාරී වේ. ලේබල් කිරීමේදී, එය අතින් ලියන ලද, මුද්‍රණය කරන ලද හෝ ග්‍රැපික් ක්‍රමයට හෝ නිර්මාණය කිරීමට පුළුවන. 

ලේබල් කිරීමේදී ඒ පිලිබඳ නීති රීති වලට අනුකුල විය යුතුය.  

01) ලේබලයේ අන්තර්ගත පොදු නාමය කැපී පෙනෙන ලෙස අවම වශයෙන් භාෂා තුනකින්වත් ඉදිරිපත් කල යුතුය. 

02) හඳුනා ගැනීමේ වෙළඳ නාමය පාරිභෝගිකයා මුලා නොවන සුළු විය යුතුය. 

03) ඇසුරුම තුල අන්තර්ගත ප්‍රමාණය සඳහන් කල යුතුය. 

නිමි ඇඳුම්වල ඇති ලේබල් තුල අනිවාර්යයෙන්ම ඇතුලත් විය යුතු දේවල්.

01) ඇඳුමේ ප්‍රමාණය.

02) ජල අවශෝෂකතාවය (ජලය උරා ගැනීමේ හැකියාව, ජලයට ඔරොත්තු දෙන ප්‍රමාණය) 

03) කෙදි වර්ගය (අඩංගු කෙදි වර්ග වල ප්‍රතිශතය. උදා ිෙ ථ දෙබඑ 100්‍ර ැෙ කොට්න්) 

04) සමාගමේ ලාංජනය 

05) නිෂ්පාදිත රට 

06) මැදීමට ඔරොත්තු දෙන ආකාරය 

07) ඇඳුමේ වර්ගය 

ඇඳුමක් මිලදී ගැනීමේදී ඉහත සඳහන් කරුණු හොදින් බැලිය යුතුය. 

ඇඳුමේ ප්‍රමාණය බැලීමේදී තම ශරීරයට හා වයසට ගැලපෙන අයුරින් මෙන්ම එය ඇදන් යන ස්ථානය අනුවද සලකා බැලිය යුතුය. 

ජල අවශෝෂකතාවය සලකා බැලීමේදී ඇඳුම සේදිය යුතු එකක්ද නැතහොත් නිර්ජල සේදීමෙන් කල යුතු ඇඳුමක්ද යන්න සලකා බැලිය යුතුය. මෙහි විශේෂත්වය වන්නේ නිර්ජල සේදීමේ ඇඳුමක් ජලයේ බහා සේදුවහොත් එය සායම් යාමයි. 

කෙඳි වර්ගය යටතේ බැලිය යුත්තේ එකම කෙදි වර්ගයකින් පමණක්ද නැතිනම් කෙදි වර්ග කීයක් ඇතුලත්ද යන්නයි. උදාහරණයක් ලෙස කපු වලින් පමණක්ද නැතිනම් කපු සහ ලිනන් ද, නැතිනම් කපු සහ රෙයෝන් වැනි දෙයකින් නිෂ්පාදනය වී ඇතිද යන්නයි. මෙහි විශේෂත්වය වන්නේ ඒ අනුව රෙද්ද වර්ග වන ආකාරයයි. එනම් රෙද්ද ස්වභාවික කෙන්දකින් නිෂ්පාදනය වූ එකක්ද නැතහොත් කෘතීම කෙන්දකින් නිෂ්පාදනය වූ එකක්ද යන්නත් දැනගත් හැකි වේ. දාඩිය උරාගැනීමේ හැකියාවද මේ අනුව තීරණය වේ. 

සමාගමේ ලාංජනය යනුවෙන් හැදින්වෙන්නේ එය නිෂ්පාදනය කරනු ලබන සමාගමේ ලියාපදිංචි නාමය හෝ සංකේතයයි. 

මැදීමට ඔරොත්තු දෙන ආකාරය යනුවෙන් පැහැදිලි කෙරෙන්නේ අයන් කල යුතු ඇඳුමක්ද නැතහොත් උෂ්ණත්වය අනුව කොපමණ ප්‍රමාණයකට මැදිය යුතු ඇඳුමක්ද යන්නයි. 

ඇඳුමේ වර්ගය යටතේදී සටහන් කෙරෙනුයේ එම සමාගම එම ඇදුම් වර්ගයට දී ඇති නාමයයි. මෙහි සඳහන් තොරතුරු අනුව නිමි ඇඳුම් වල අඩංගු ලේබල් කිහිපයක් මෙහි දක්වා ඇත. ඒ අනුව ඔබට ඉහතින් සඳහන් කල තොරතුරු පැහැදිලි කර ගත හැකි වේ. 

සිරිමාවෝ බණ්ඩාරනායක විද්‍යාලයේ ගෘහ විද්‍යා ආචාරිනී, සමුද්‍රිකා මුණසිංහ.