මා කවරෙක්ද
ඒ ජනප්‍රිය ප්‍රශ්නයට පිළිතුරක් තිබේ
මිනිසා දිගු කාලයක සිටම වෙනස් වන දේවල් මත විශ්වාසය තබාගෙන සිටී.
මා කවරෙක්ද මා මෙහි සිටින්නේ ඇයි? අනාදිමත් කාලයක සිට මිනිසා විසින් අසන ලද එම ප්‍රශ්නවලට පිළිතුරු දීමට නව අදහස් පැන නැඟී ඇති බව සාමය සැනසිලි සුවය පිළිබඳ ලෝ ප්‍රකට විද්වතකු වන ප්‍රේම් රාවන් මහතා පවසයි. ඒ ප්‍රශ්නවලට පිළිතුර ඇදහිලි පුදපූජාවලින් හෝ පොත්පත්වලින් සොයාගත නොහැකියි.
මා කවරෙක්ද?
ඒ බොහෝ කුතුහලය දනවන ප්‍රශ්නයකි. එයට පිළිතුර ඇත්තේ ඔබ තුළය. ඔබ, ඔබ ගැන වටහාගෙන ඇති ප්‍රමාණයට වඩා වැඩිමනත් පුද්ගලයෙකි.
මම ඔබට පුංචි කතාන්දරයක් කියන්නම්. එක ඥානවන්ත පුද්ගලයෙක් නිහඬව වාඩි වී, සිතමින් සිටියා. ඔහුගේ ගම්පියසේ විසූ කීප දෙනෙකුට අවශ්‍ය වූයේ ඔහුගේ නිහැඬියාව බිඳ කොහෙත්ම පිළිතුරු දිය නොහැකි ප්‍රශ්නයක් අසා බාධා කිරීමටයි. ඉතින් ඔවුන් ඥානවන්ත පුද්ගලයාගෙන් මෙසේ ඇසුවා.
“මේ නගරයේ කුරුල්ලන් කොපමණ සිටී ද?”
“38043” ක්
ඥානවන්ත තැනැත්තා මඳක් කල්පනා කොට පැවසුවා.
“මිනිස්සු තුෂ්නිම්භූත වුණා. තිගැස්සුණා.”
“ඔබ කොහොමද දන්නේ හරියටම ගණන 38043 බව?”
“ඔබට මා විශ්වාස නැතිනම් ගිහින් ගණන් කර බලන්න.”
ඥානවන්ත තැනැත්තා කීවා.
“එම සංඛ්‍යාව ඊට වඩා අඩු නම් කෙසේ ද?” කෙනෙක් ඇසුවා.
“එම සංඛ්‍යාව ඊට වඩා අඩු නම් ඒකෙන් අදහස් වෙන්නේ එම කුරුල්ලන් තමන්ගේ යාළු මිත්‍රයින් බැලීමට ගොස් ඇති බවය.”
“ඊට වඩා වැඩි සංඛ්‍යාවක් ඇත්නම් කොහොමද?”
“හොඳයි, එසේ නම් ඔවුන්ගේ මිතුරන් ඔවුන්ව බැලීමට පැමිණ ඇති බවයි.” ඥානවන්තයා කීවා.
එක් අතකින් බලන විට, රාවන් මහතා කියා සිටියේ, ඒ පිළිතුර සමඟ ඔවුන්ට වාද කිරීමට නොහැකි බවයි. මක්නිසාද යත්, කිසිවකුට, කිසිම ආකාරයකින් මෙවැනි තර්කයක් මත පිහිටා වාදකළ නොහැකි නිසාය. එයින් ඔවුන් ලබා ගන්නේ කුමක්ද?
කිසිවක් නැහැ. හරයක් නැති මෝඩ ප්‍රශ්නයකට මෝඩ පිළිතුරක්.
“මා කවරෙක්ද?”
ඒ ජනප්‍රිය ප්‍රශ්නයට රාවන් මහතා මෙසේ පිළිතුරු දෙයි.
“ඔබ අපේක්ෂාවේ සාගරයයි. ඔබ කරුණා මෛත්‍රියේ සාගරයයි. ඔබ ප්‍රීති ප්‍රමෝදයේ සාගරයයි. ඔබ තුළම ඇති ශාන්ත සන්සුන්භාවය ඔබ සදහටම අනාවරණය කරගන්න.”
“මා කිසිවෙකුට මාව විශ්වාස කරන්නැයි නොකියමි. මට අවශ්‍ය ඔබ ඒ බව දැන ගැනීමයි.”
මේ මිහිතලය මත සාමය ගෙනදීම සඳහා මිනිසුන් අවුරුදු දහස් ගණනක් තිස්සේ ප්‍රයත්න දරා ඇත. එසේ වුවත් රාවන් මහතා යෝජනා කරන්නේ යම්කිසි වෙනසක් සඳහා උත්සාහ කිරීමට මේ කාලය බවයි. සමාජය මතම අවධානය යොමු නොකර සමාජයේ කොටස් වන එක් එක් පුද්ගලයා වෙත අවධානය යොමුකළ යුතු බවයි. සමාජය වෙනස් කිරීම ප්‍රායෝගිකව කළ නොහැක” යයි පවසන ඔහු කියා සිටින්නේ “අප එක් එක් පුද්ගලයා විසින් ම, සාමයට අවස්ථාවක් ලබා දිය යුතු බවයි.”
මැටියෙන් සෑදූ බඳුනක් ඇත. එය අලංකාර සැරසිලිවලින් වර්ණවත්ව නො තිබිය හැකියි, නමුත් එය සෑම දිනකම වතුරෙන් හෝ කිරිවලින් හෝ ධාන්‍යවලින් හෝ පිරී ඇත. ඉතාමත් අලංකාරවූ තවත් බඳුනක් ඇත. එය ඇත්තේ කෞතුකාගාරයේය. බොහෝ දෙනෙක් අවුත් එය නරඹති. නමුත් එය නිතරම හිස්ය.
ඔබ කැමති වන්නේ කුමන ආකාරයේ බඳුනකට ද? පිරුණු බඳුනකට ද? හිස් බඳුනකට ද? තේරීම ඔබ සතුය. මේ තේරීම කළ යුත‍්තේ ඔබ විසින්මය.
සීබල් ජයකොඩි
උපුටා ගැනීම සිළුමිණ පුවත්පත
