හා...හා... ඇපල් කන්නේ බලාගෙනයි
ඇපල් බොහෝ අයගේ ආදරයට, පිළිගැනීමට පාත්‍රවන පලතුරකි. නමුත් මෙතරම් පිළිගැනීමක් සහිත ඇපල් තොගයක්ම පසුගියදා මෙරට භාවිතයට තහනම් කෙරුණි. ඒ පිළිබඳ පුවත මාධ්‍ය ඔස්සේ පළ කෙරුණු අතර අහිතකර බැක්ටීරියාවක් ඊට හේතු විය. මෙලෙස තහනමට ලක් වූයේ ඇමරිකාවෙන් ගෙන් වු ඇපල් විශේෂයකි. ඇමරිකාවේ ආහාර හා ඖෂධ ඒජන්සිය මඟින් පසුගියදා නිකුත් කෙරුණු නිවේදනයකට අනුව කියැවුණේ එරට ඇපල්වල ලිස්ටීරියා මොනොසයිටජන් නැමැති මාරාන්තික බැක්ටීරියාව අන්තර්ගත වී ඇති බවට සැකයක් මතුව ඇති බවයි. මෙම ප්‍රවෘත්තියත් සමඟ ඇපල්වලට ලැදිවූ පිරිස් යම් චකිතයකට පත් වූ බව පෙනෙන්නට තිබුණි.
ඇපල්වලට බලපෑ මාරාන්තික බැක්ටීරියාව
මෙම බැක්ටීරියාව මිනිස් සිරුරේ අන්ත්‍රවල, සතුන්ගේ ශරීරයේ මෙන්ම පරිසරයේ ද යම් අවස්ථාවල සිටිය හැකි වේ. විශේෂයෙන්ම මෙම බැක්ටීරියාව පරිසරයේ වැඩි කලක් පැවතිය හැක. මෙම බැක්ටීරියාව විවිධ ක්‍රම මඟින් ආහාරවලට එකතු වීමේ හැකියාව සහිත අතර ඇපල්වල පිට පොත්තේ ද මෙම බැක්ටීරියාව පැවතිය හැක. දිගු කලක් නොනැසී පැවතීමේ හැකියාව සහිත මෙම බැක්ටීරියාව සුදුසු පරිසරයක් ඇති වූ විගස සිය ගහණය වර්ධනය කරගන්නට ක්‍රියාකිරීම විශේෂත්වයකි. විශේෂයෙන්ම ශීත තත්ත්වයකදී පවා ගහණය වැඩි කර ගැනීමේ හැකියාව මෙම බැක්ටීරියාව සතු වීම විශේෂත්වයකි. අමු එළවළු, පළතුරු, අමු මස් උණු නොකළ කිරි වැනි ආහාරවල මෙම බැක්ටීරියාව පැවතිය හැකිය. ඒ නිසා මෙවැනි ආහාර පාන ආහාරයට ගැනීමට පෙර නිසිලෙස පිස හෝ උණු කර භාවිතයට ගැනීමට සැලකිලිමත් විය යුතුය.
බැක්ටීරියාව නිසා වැඩිපුර අවදානමක් ඇත්තේ කාටද?
ප්‍රතිශක්තිය අඩු අය, ගර්භනී අය, අලුත උපන් දරුවන් වැනි අය මෙමඟින් ඉක්මනින් රෝගී විය හැකි අය වේ. මෙම බැක්ටීරියාව රුධිරයට එකතු වීමෙන් පුද්ගලයකු විවිධ සංකූලතාවලට ගොදුරු වීමේ හැකියාව පවතී. යම් අවස්ථාවක එය බරපතල වීමට පවා ඉඩකඩ පවතී. විශේෂයෙන් ගැබිනි මවකට මෙම බැක්ටීරියාව ආසාදනය වීමෙන් කලලයට බලපෑමේ හැකියාවක් සහිතය. කෙසේ වෙතත් දිලුලන ඇපල් කෑමට අප බොහෝ දෙනෙකුට අදටත් ඇත්තේ දැඩි කැමැත්තකි. නමුත් එපමණ දිලුලන ඇපල් ගෙඩියක ඇත්තේ අප රටේ වැවෙන පලතුරකට දෙවැනි වන ගුණයක් පමණකි. විශේෂයෙන් අප රටේ වැවෙන නෙල්ලි වැනි පලතුරු පෝෂණ ගුණයෙන් අනූන බව හෙළි වී ඇති කරුණකි. එමෙන්ම අප රටේ පලතුරක් ආහාරයට ගැනීමේ සුවිශේෂ වාසියක් නම් නැවුම් ලෙස එම පලතුරු ආහාරයට ගැනීමේ ඇති හැකියාවයි. මෙය නිරෝගී දිවියට කදිම සාධකයක් ලෙස සැලකිය හැක. විශේෂයෙන් අස්වනු නෙලීමේ සිට දිගුකාලයක් පුරා රටින් රටට ගමන් කරමින් පැමිණෙන මෙවැනි පලතුරුවල ගුණාත්මක බව පිළිබඳ අප යළිත් සිතිය යුතුය. දිදුලන ඇපල් සඳහා බොහෝදෙනෙකු ඇලුම් කළද ඊට යටින් ඇත්තේ නොදිලෙන කතාවක් බවද අප හොඳින් මතක තබා ගත යුතුය. සීත දිය බින්දු බින්දු ඉස සුපිරිසලේ හෝ වෙළඳපළේ ඔබ නෙත ගැටෙන මෙවන් බොහෝ ඇපල් වැනි පලතුරු දීර්ඝ ප්‍රවාහනය හේතුවෙන් අවම වශයෙන් මාස කීපයක්වත් කල්ගත වූ ඒවා බව බොහෝදෙනෙකු දන්නේ දැයි රහසකි. ඒ නිසා මේවාට නිතර නිතර ඇලුම් වීමේ කැමැත්තෙන් ඈත් වීම මෙවැනි අවදානම් තත්ත්වවලින් ඉවත් වීමේ පහසුම මඟයි.
උපුටා ගැනීම දිනමිණ
