එක රැයකට ලක්ෂ ගණනින් මුදල් හොයන අලුත්ම ගණිකා ජාවාරම
මේ රටේ අද කාලයේ ජයටම කෙරෙන ජාවාරම් අතර ගණිකා වෘත්තියට හිමිවන්නේ ප්‍රධාන ස්ථානයක් බව අමුතුවෙන් කිව යුතු නොවේ. විවිධ කාලවල විවිධ වෙස් ගනිමින් ක්‍රියාත්මක වන ගණිකා ජාවාරමේ අලුත්ම මුහුණුවර වී ඇත්තේ ජංගම ගණිකා ජාවාරම් බව පොලිස් තොරතුරු අනාවරණය කරයි. ඒ ස්ථීර ස්ථානයක නැතිනම් ගොඩනැගිල්ලක ගණිකාවන් තබා නොගෙන වාහනයකින් ඔවුන්ව ගනුදෙනුකරු වෙත රැගෙන ගොස් වෙළෙඳාම් කිරීමේ ක්‍රමයයි. මේ ආකාරයට ජංගම ගණිකා ජාවාරම ව්‍යාප්ත වන්නට පටන්ගෙන ඇත්තේ ගණිකා නිවාසවලට අදාළව අය කෙරෙන දඩ මුදල වැඩි වීමත්, පොලීිසිය වැඩි වශයෙන් ගණිකා නිවාස වටලන්නට ගැනීමත් හේතුවෙන් බවද සඳහන් වේ.
ශ්‍රී ලංකාවේ අපරාධ නීති සංග්‍රහයේ ප්‍රතිපාදන නොමැති වූවත් පොලීිසිය ගණිකාවන්ට එරෙහිව ක්‍රියාත්මක වන්නේ 1889 අංක 05 දරණ ගණිකා නිවාස ආඥාපනත සහ පාදඩයන් පිළිබඳ ආඥාපනතට අනුවය. ඒ අතරින් ගණිකා නිවාස ආඥාපනත 1943 වසරේදී සංශෝධනයට ලක්ව ඇත. ඊට අනුව ගණිකා නිවාසයක් පවත්වාගෙන යන අයට, කළමනාකරුවන්ට, ගණිකා වෘත්තියේ යෙදෙන්නන්ට හා ගණිකා නිවාස සඳහා නිවසක් හෝ ගොඩනැගිල්ලක් කුලියට දෙන්නන්ට එරෙහිව ක්‍රියා කිරීමට පොලීිසියට හැකියාව තිබේ. නමුත් එකී පනතට අනුව යමෙකු වරදකරු වූ විට දඩය නියම වී ඇත්තේ රුපියල් 500ක් ලෙසිනි. නමුත් 2005 අංක 12 දරණ දඩමුදල් වැඩිකිරීමේ පනතින් ඒ දඩමුද‍ලේ ප්‍රමාණය රුපියල් 50,000 දක්වා ඉහළ දැමීය. නමුත් එය වලංගු වන්නේ ගණිකා නිවාසයක් පවත්වාගෙන යන්නන්ට, නැතිනම් කළමනාකරුවන්ට මිස ගණිකා වෘත්තියේ නිරතව සිටින්නන්ට නොවේ. ඒ නව නීති වාර්තාවකින් ගණිකා නිවාසයක් පවත්වාගෙන යාමට සහය වීමේ වරදින් ගණිකාව නිදහස්කර ඇති බැවිනි. ඒ අනුව පොලීසිය ගණිකාවන් සම්බන්ධයෙන් ක්‍රියාත්මක වන්නේ පාදඩ ආඥාපනත අනුවය.
පාදඩ ආඥාපනතින් සැබෑ ලෙසම ක්‍රියාත්මක විය හැක්කේ වීථි ගණිකාවන් සම්බන්ධයෙන් පමණි. ඒ ඇය නගරයක හෝ මහමග රැදමින්, ඉඟි බිඟි පාමින් අදාළ කටයුත්තට කරන ආයාචනාවන් සම්බන්ධයෙනි. ඊට දඩය රුපියල් සියයක් තරම් වූ සොච්චම් මුදලකි.
ගණිකා නිවාසයක් වැටලීම වුවද පොලීසියට තමන්ට හිතෙන හිතෙන ආකාරයට කරන්නට බැරිය. සියල්ලට පෙර අධිකරණයෙන් සෝදිසි වරෙන්තුවක් ලබා ගත යුතුය. එසේම වරෙන්තුවක් නොමැතිව, ගණිකා වෘත්තියේ නිරතවීම හෝ කළමනාකරණය කිරීම සම්බන්ධයෙන් කිසිවෙකුත් අත්අඩංගුවට ගැනීමටද නීතිමය ප්‍රතිපාදන නොමැත. ගණිකා නිවාසයක් වටලන්නට පොලීසිය යන්නේ නම් ඒ යා යුත්තේ අදාළ ගණිකා නිවාසය පවත්වාගෙන යන ස්ථානය සෝදිසි කරන්නටත් එහි සිටින්නන් අත්අඩංගුවට ගන්නටත් අධිකරණයෙන් සෝදිසි වරෙන්තුවක් රැගෙනය.
ගණිකා නිවාසයක් පවත්වාගෙන යාම හෝ කළමනාකරණය කිරීම සම්බන්ධයෙන් වූ රුපියල් 500ක දඩය රුපියල් 50,000 දක්වා ඉහළ යාමත් සමග ගණිකා ජාවාරම් මෙහෙයවූවන් නීතියේ හිඩැස්වලින් රිංගා නිදහසේ ගණිකා ජාවාරම කරගෙන යන්නට තෝරාගෙන ඇත්තේ ජංගම ගණිකා ජාවාරම බව අනාවරණය වී තිබේ. විශ්වාසදායක ආරංචි මාර්ග අනාවරණය කරන ආකාරයට අනුව මේ වන විට කොළඹ නගරයේ පමණක් ජංගම ගණිකා ජාවාරම් මෙහෙයවන කණ්ඩායම් දහයක් පමණ සිටිති. සුඛෝපභෝගී මෝටර් රථ, වෑන් රථ මෙන්ම ජීප් රථද ඒ සඳහා යොදා ගන්නා කණ්ඩායම් ඒ අතර නැතුවාම නොවේ.
රාත්‍රී හත අට වන විට ගණිකාවන් එම රථවලට ගොඩකරගන්නා ජාවාරම්කරුවන් රාත්‍රිය පුරාම ඒ අය රැගෙන සැරිසරන්නේ කොළඹ නගරයේ තෝරාගත් මාර්ග කිහිපයකය. ඒ අතර කොල්ලුපිටිය, ඩුප්ලිකේෂන් පාර, බම්බලපිටිය, ඩී.ආර් විජේවර්ධන මාවත, පුරහල අවට මෙන්ම කොළඹ කොටුවද ඇති බව අනාවරණය වෙයි. ඒ පැතිවල මේ ආකාරයෙන් ජංගම ගණිකා රථ වැඩි වශයෙන් සැරිසරන්නේ රාත්‍රී කාලයට රාත්‍රී සමාජ ශාලාවලට සහ කැසිනෝ ශාලාවලට පැමිණෙන ගනුදෙනුකරුවන්ගෙන් ගණිකාවන්ට ඇති ඉල්ලුම ගැන සලකාය.
මෙම ‘ජංගම ගණිකා නිවාසයෙන්’ ගණිකාවක් ඇනවුම් කළ යුත්තේ දුරකථන ඇමතුමකිනි. නමුත් එසේ දුරකථනයෙන් කථාකරන සෑම කෙනෙකුටම ගණිකාවන් සැපයෙන්නේ නැත. එක්කෝ ඔහු ස්ථීර ගනුදෙනුකරුවකු විය යුතුය. නැතිනම් විශ්වාසවන්ත ස්ථිර ගනුදෙනුකරුවකු මාර්ගයෙන් ගණිකාවක් ඉල්ලුම් කළ යුතුය. ත්‍රී රෝද රථ රියැදුරෝද බොහෝ විට අතරමැදියන් ලෙස කටයුතු කරති. නව ගැනුම්කරුවකුට ගණිකාවක් සැපයෙන්නේ නම් ඔහු පොලිස් ඔත්තුකරුවෙකුදැයි ඉතා සැලකිල්ලෙන් සොයා බලනු ඇත. ඒ සඳහා ඔවුන්ටම වෙන්වූ ක්‍රියාවලියක්ද තිබිම විශේෂිතය.
එසේ ගණිකාවක ඉල්ලුම් කළ පුද්ගලයාට තමන්ට කැමති ගණිකාවක් තෝරාගන්නට ද අවකාශ සලසා දෙනු ලැබේ. ඒ ඔවුන් පවසන යම් තැනකට ගැනුම්කරු කැඳවා ජංගම රථයේ සිටින කාන්තාවන් පෙන්වාය. බොහෝ විට එය සිදුවන්නේ වෑන් රථයේ වීදුරුවක් පමණක් විවර කරමිනි. රථයට ගොඩවන්නට ගැනුම්කරුට කිසි විටෙක ඉඩක් ලැබෙන්නේ නැත. වීදුරු කළු කරන ලද එම වාහන දෙස බැලූ බැල්මට ඒ තුළ සිටින කාන්තාවන් පිටතින් දැකගන්නටද නොහැකිය. ගනුදෙනුකරුට තමන් කැමති කාන්තාව තෝරාගන්නට ලැබෙන්නේද වාහනයේ ඇති කුඩා විදුලි බල්බයේ එළියෙනි. නැතිනම් ජංගම දුරකථනයේ ඇති විදුලි පන්දම් එළියෙනි.
ඒ ආකාරයට තෝරාගත් ගණිකාව වෙනුවෙන් මුදල් ගෙවීම ඉන් අනතුරුව සිදුවෙයි. මුදල් බාරගන්නේ වෑන් රථයේ ඉදිරිපස සිටින ජාවාරම්කාරිය හෝ ජාවාරම්කරුය. සාමාන්‍යයෙන් පැයකට අය කෙරෙන ගාස්තුව රුපියල් 8000 කි. සම්පූර්ණ රැයකටම නම් ඒ ගණන රුපියල් 15,000 ක් දක්වා ඉහළ නගියි.
මෙම ගණනට ගණිකාව සමග සිටීමට සුදුසු තැන තීරණය කරන්නේද ජාවාරම්කරුවන්ය. ඒ මුදල් ගෙවීමෙන් පසුවය. එහිදී ගැනුම්කරු ජාවාරම්කරු විසින් සඳහන් කරනු ලබන නවාතැන් පොළකට ගොස් කාමරයක් වෙන්කර ගත යුතුය. ඒ ස්ථාන මේ සඳහාම කාමර වෙන් කරන තැන්ය. ඒ නිසා ඒ තැන් පැය විසිහතර පුරාම විවෘතය. කොල්ලුපිටිය, බම්බලපිටිය, වැල්ලවත්ත, ග්‍රෑන්ඩ්පාස් ආදී නගර ආශ්‍රිතව එවන් ස්ථාන බොහෝ ඇති බව පැවසේ. කාමර වෙන්කරන්නට යන ගාස්තුව ගෙවිය යුත්තේද ගණිකාව ඇනවුම් කළ ගනුදෙනුකරුවාය.
ජංගම ගණිකා ජාවාරම කෙරෙන වාහන රැයපුරාම ඇත්තේ මහපාරේය. ඒ අලෙවි කළ කාන්තාවන් නැවත රථයට ගොඩ කරගෙන ඔවුන්ට ගණන් මිනුම් බේරන්නට ද ඇති නිසාය. සාමාන්‍යයෙන් මේ එක් වාහනයකට රැයක් එළිවන විට ලැබෙන මුදල රුපියල් ලක්ෂ ගණනක් වන අවස්ථාද ඇති බව හෙළි වී තිබේ. ඒ කාන්තාවන් හය හත්දෙනෙකුගෙනි. ඒ එක් කාන්තාවක් ගැනුම්කරුවන් දෙතුන් දෙනෙකු අතට යන අවස්ථාද ඇති බැවිනි. එවන් අවස්ථාවක ඇයට ඒ ජාවාරම මෙහෙයවන ‘මැඩම්’ගෙන් නැතිනම් ‘බොස්’ ගෙන් එක් රැයකට රුපියල් දස දහසක්වත් ලැබෙන බව සඳහන්ය.
මේ ජාවාරමෙන් ඉතා විශාල මුදලක් ඉපැයුවත් එයින් වැඩි කොටසක් බෙදී යන්නේ ගනුදෙනුකරුවන් සොයා දෙන ත්‍රිරෝද රථ රියැදුරන් සහ ජාවාරම මෙහෙයවන්නන් අතටය. ගණිකා වෘත්තියේ නිරත කාන්තාවන් අතට පත්වන්නේ ඊට සාපේක්ෂව අඩු මුදලකි.
මේ කියන ත්‍රිරෝද රථ රියැදුරන් ගණිකා ජාවාරමේ නිරතව සිටින්නන් සමග නිරන්තර සම්බන්ධකම් පවත්වන අයය. ඒ අය බහුල වශයෙන් ගැවසෙන්නේ රාත්‍රී සමාජ ශාලා ආශ්‍රිතවය. නැතිනම් අවන්හල් අවටය. එසේත් නැතිනම් කැරෝකේ ශාලා ඉදිරිපිටය. ඒ තැන්වලට ගොස් අඩියක් දෙකක් ගසා රත් වී සිටින ‘මහත්වරුන්ට’ ඉන් එහාට අවශ්‍ය කුමක්දැයි ත්‍රිරෝද රථ රියැදුරෝ දනිති.
එහිදී ඒ මහත්වරුන් අතමිට මොලවන සන්තෝසම්වලින් හා ගණිකා ජාවාරම්කරුගෙන් ලැබෙන දහසේ දෙදහසේ පටිවලින් ත්‍රිරෝද රථ රියැදුරන්ගේ හොද්ද බොර වෙයි. ඒ නිසා රාත්‍රියට ‘හයර්’ දිවීමෙන් ලැබෙනවාට වඩා ත්‍රිරෝද රථ රියැදුරන්ට අධික ලාභයක් ලැබෙන්නේ ජංගම ගණිකාවන්ට ගනුදෙනුකරුවන් සොයා දීමෙනි.
ත්‍රිරෝද රථ රියැදුරන්ගේ සහයද ඇතිව ක්‍රියාත්මක වන මෙම ජංගම ගණිකා රථ වැටලීම පොලීිසියට එතරම් පහසු කටයුත්තක් නොවේ. ඒ ගණිකා නිවාසයක් වටලන්නට පෙර නිශ්චිත ස්ථානයක් සඳහන් කරමින් වරෙන්තුවක් ලබා ගත යුතු බැවිනි. මෙහිදී ස්ථිර ස්ථානයක ලිපිනයක් නොමැති නිසා පොලීසිය විශාල ගැටලුවකට මැදිවෙයි. මේ වන විට ගණිකා ජාවාරමේ නිරතව සිටින්නන් අතර ජංගම ගණිකා ජාවාරම ප්‍රචලිත වී ඇත්තේ ද පොලීසිය පත්වන මෙම අපහසුව ගැන ඔවුන් දන්නා බැවිනි. ජංගම ගණිකා වෘත්තියේ නිරතව සිටින්නියන් තෝරාගැනීම සඳහා ඔවුන්ගේ ඡායාරූප ඊමේල් ඔස්සේ ගනුදෙනුකරුවන්ට ලබාදෙන ක්‍රමවේදයක්ද දැන් ක්‍රියාත්මකය. ෆේස්බුක් සමාජ වබේ අඩවිය ඔස්සේද ජංගම ගණිකා ජාවාරම සිදුවන අවස්ථා බිහිවෙමින් ඇති බවද අනාවරණය වෙයි.
මේ ආකාරයට ගණිකාවන් ලෙස කටයුතු කරන්නේ කාන්තාවන් පමණක් නොවේ. පිරිමි ගණිකාවෝද අද බහුල වශයෙන් සිටිති. එහි ගනුදෙනු බහුල වශයෙන් සිදුවන්නේ ෆේස්බුක් වැනි සමාජ වබේ අඩවි ඔස්සේ වීම විශේෂිතය. පිරිමි ගණිකාවන් සම්බන්ධයෙන් මේවන විට මෙරට සමාජය තුළ යම් ආකර්ෂණයක් ඇති වී තිබෙන බවද ඒ සම්බන්ධව වාර්තා වන තොරතුරු අනුව පෙනී යයි. එය මෙරට ගණිකා ජාවාරමේ අලුතින්ම ව්‍යාප්ත වන පැතිකඩකි.
ගයාන් කුමාර වීරසිංහ
උපුටා ගැනීම ලක්බිම
