ද්වාර නිවැරදි කරගෙන නිවසේ වාස්‌තු දෝෂ ඉවත්කර ගන්න
වාස්‌තු ශිල්පයේ මූලික වාස්‌තු සිද්ධාන්ත කිහිපයක්‌ තිඛෙනවා. විශේෂයෙන් ඔබගේ නිවස සාදා නිමකොට ඇත්නම්, ඔබ විසින් අවධානය යොමුකළ යුතු වන්නේ, පහතින් සඳහන් කළ මූලිකම වාස්‌තු සිද්ධාන්ත පිළිබඳව පමණයි. මෙහිදී විශේෂයෙන් සඳහන් කළ යුතු දෙයක්‌ පවතිනවා. ඔබගේ නිවස සාදා නිම වී තිබුණද ඔබගේ නිවසට කිසියම් තැනකින් කොටසක්‌ එක්‌කර ගැනීමේ හැකියාවක්‌ ඇත්නම් නිවසේ වර්ග ක්‍ෂේත්‍රය පිළිබඳව අවධානය යොමුකළ හැකි අතර නිවසට කිසිම අමතර කොටසක්‌ එකතු කිරීමට ඉඩ ප්‍රස්‌ථා නොමැති නම්, වර්ග ක්‍ෂේත්‍රය පිළිබඳව නොසිතා අනෙකුත් වාස්‌තු සිද්ධාන්ත පිළිබඳව අවධානය යොමු කිරීම කළ යුතුයි. විශේෂයෙන් නිවසේ ප්‍රධාන වාස්‌තු මර්මස්‌ථාන තුනක්‌ දෝෂ වීමෙන්ම පමණක්‌ නිවැසියන්ට දැනෙන අයහපත් බලපෑම් ලැඛෙන අතර වාස්‌තු සිද්ධාන්ත එකක්‌ දෙකක්‌ එකඟ නොවූ පමණින් දැනෙන බලපෑම් එල්ල නොවන බැවිනි.
කෙසේ වුවද ඔබගේ වර්ග ක්‍ෂේත්‍රයේ ජන්ම ප්‍රත්‍යාධාරී, වධ, විපත්, නැකත්වලට ඇත්නම් සුළු කොටසක්‌ නිවසට එකතු කිරීමෙන් යහපත් නැකත් වන සම්පත්, පරම මෛත්‍රී, මෛත්‍රී, ක්‍ෂේම, සාධක වැනි යහපත් බලගැන්වීමකට සකස්‌ කළ හැකියි. මෙහිදී තබාගත යුතු එක්‌ විශේෂ කාරණයක්‌ ඔබට මතක්‌ කර දෙන්නම්. නිවසේ දිග, පළල ගැලපීමට යෑයි කියා අත්තිවාරමට කොටස්‌ එකතු කිරීමෙන් වර්ග ක්‍ෂේත්‍රය නිවැරදි කළ නොහැකි බවයි. ඒ සඳහා නිවසේ දොර ජනෙල් වැසූපසු නිවස තුළට අයත් වර්ග ක්‍ෂේත්‍රයටම එම කොටස එකතු කළයුතු වෙනවා. එසේ නොමැතිව නිවසින් පිටත අත්තිවාරම් කොටස්‌ යෙදීම පුස්‌සක්‌ බව කිව යුතුයි.
මූලික සිද්ධාන්තයක්‌ වන නිවසේ බ්‍රහ්ම පාදය බිත්තියකට යට නොවී ඇති ඕනෑම විටක එම බ්‍රහ්ම පාදයේ දෝෂයන් ඉවත් කළ හැකියි. විශේෂයෙන් බ්‍රහ්ම පාදය නිවසේ කුමන කොටස්‌ තිබුණද අයහපත් නොවන අතර නිවසේ මධ්‍ය කොටස්‌ පිහිටන මෙම වාස්‌තු මර්මස්‌ථානය නිසිලෙස පිරිසිදුව පවත්වා ගැනීම කළ යුතු වෙනවා. විශේෂයෙන් බර භාණ්‌ඩ තැබීම නොකළ යුතු අතර නිවසේ පාදය නිසිලෙස හඳුනාගෙන එම ස්‌ථානය ඉතා පිරිසිදු කොට පච්ච වර්ණ රෙදි පාපිස්‌සක්‌ වැනි දෙයක්‌ යොදා එය නොපෑගීම තුළ දෝෂ අවම කර ගත හැකියි. නිදහස්‌ ස්‌ථානයක බ්‍රහ්මපාදය පිහිටා ඇති විටක කොහොඹ ලීයෙන් සාදන ලද කනප්පුවක්‌ තබා ඒ මත පූජනීය පාත්‍රය වඩා සිදුවීම තුළින් ඔබගේ නිවසේ බ්‍රහ්ම පාදය වඩාත් බලවත් කොට දෝෂ මගහරවා ගත හැකියි.
මීළඟට ඔබගේ අවධානය නිවසේ ද්වාර සටහන පිළිබඳ ඔබ අවධානය යොමුකළ යුතු වෙනවා. ඔබගේ නිවසේ දකුණු දිශාව ඇතුළත්ව නිවසින් පිටවීමට පොදු ස්‌ථානවලින් ද්වාරයන් 03 ක්‌ දිශා 03 කින් යෙදීම ඉතාමත් යහපත් බව වාස්‌තු ශිල්පයේ දක්‌වා තිඛෙනවා. දැනට ඔබගේ නිවසේ ඇත්තේ දොරවල් දිශා දෙකකින් නම්, තවත් දිශාවකට ද්වාරයක්‌ එක්‌කර ගැනීමට ඔබට හැකියාවක්‌ තිඛෙනවා. එසේ වුවද ඔබට ප්‍රායෝගිකව දකුණු දිශාවට ද්වාරයක්‌ කිසිසේත්ම යෙදිය නොහැකි නම් හා දිශා 03 කට ද්වාර යෙදීම කළ නොහැකි නම්, එවිට ඔබ කළ යුත්තේ ඔබගේ මංගල ද්වාරය වඩා බලවත් කිරීම තුළින් ද්වාර සටහනේ දිශා ශක්‌ති න්‍යායේ අඩුව ඉවත් කිරීමයි. මේ සඳහා ඔබගේ ප්‍රධාන ද්වාරය පිහිටි දිශාව අනුව එය බලවත් කිරීම සඳහා පහත ක්‍රම ශිල්පයන් යෙදී හැකියි.
01. මංගල ද්වාරය උතුරේ නම් - කොහොඹ ලී ඇණ 03 ක්‌ එක්‌කර ගන්න. ලියවැල, පුන්කලස වැනි කැටයමක්‌ යොදන්න. ද්වාරය අබියස සමන්පිච්ච යෙදූ දිය බඳුනක්‌ තබන්න.
02. මංගල ද්වාරය දකුණට නම් - මී ලී ඇණ 03 ක්‌ ද්වාරයට එක්‌ කරගන්න, මිදිවැල, අන්නාසි මල, පුන්කලස කැටයම් යොදන්න ද්වාරය අබියස හස්‌ති රූපයක්‌ තබන්න.
03. මංගල ද්වාරය නැගෙනහිර නම් - සඳුන් දැව ඇණ 03 ක්‌ ද්වාරයට එක්‌කරගන්න. හංස පූට්‌ටුව, ලියවැල, පුන්කලස කැටයම් යොදන්න. ප්‍රධාන ද්වාරයට දකුණු පසින් ජල බඳුනක්‌ තබන්න.
04 මංගල ද්වාරය බටහිර නම් මී ලී ඇණ 03 ක්‌ එක්‌ කරගන්න. පුන්කලස, ඇත් රූපය වැනි කැටයම් යොදන්න. ද්වාරය අසළ ඇත් රූපය තබන්න. පොදුවේ සෑම ද්වාරයක්‌ම එළියේ සිට අරින විට මුල් පියන දකුණට විවෘත විය යුතුයි.
ඔබගේ මංගල ද්වාරය බලවත් කළ පසුව නිවසේ දොරවල් ජනේල සංඛ්‍යාව පිළිබඳ අවධානය යොමු කරන්න. එහි න්‍යාය මතක තබා ගත යුතුයි. එනම් ජනේල සහ ද්වාර එකට එක්‌කළ විට ඔත්තේ සංඛ්‍යාවක්‌ විය යුතු වේ. දැනට නිවසේ ඇත්තේ ඉරට්‌ටේ අගයක්‌ නම්, ඔබ ජනේලයක්‌ හෝ ද්වාරයක්‌ එක්‌කොට එය නිවැරැදි කරගන්න. එහිදී ආ(ර්)ච් එක ද්වාරයක්‌ ලෙස ගණන් කළයුතු අතර පෑන්ලයිට්‌ එක ජනේලයක්‌ ලෙස සැළකිය යුතුයි. ආලෝකය ලබා ගැනීම සඳහා තබා ඇති රෝයල් බ්ලොක්‌ස්‌ ජනේල ලෙස ගණන් නොගත යුතු අතර 17 සහ 33 යන සංඛ්‍යා ඔත්තේ වුවද එවැනි සංඛ්‍යා නොගත යුතු වේ.
මීළඟට ඔබගේ නිවසේ ගෘහ අංග පිළිබඳ විමසා බලන්න. විශේෂයෙන්ම මෙහිදී ඔබගේ මුළුතැන්ගෙය නිරිත දිශාවේ හෝ ඊශාන දිහාවේ නොවේ නම්, ඔබ කලබල නොවිය යුතුයි. එසේ වුවද ඔබගේ මුළුතැන්ගෙය ඊශාන හෝ නිරිත යෑයි සිතමු. එවිටද ඔබ කලබල නොවිය යුතුයි. ඔබ කළ යුත්තේ ඔබගේ ආහාර පිසීමේ උඳුන හෝ ගෑස්‌ කුකර් එක ඊශාන හා නිරිත මධ්‍ය රේකාව හසුනොවෙන ලෙස හැකිතාක්‌ දුරස්‌ව තබා ගැනීම පමණි. නිරිත හෝ ඊශාන වූ පමණින් ඔබගේ මුළුතැන්ගෙය කඩාබිඳ දැමීම නොකළ යුතුයි.
ඔබ වඩාත් සැලකිලිමත් විය යුත්තේ, ඔබගේ ප්‍රධාන නිදන කාමරය පිළිබඳවයි. ගිණිකොණ හෝ ඊශාන දිශාව හැර ඔබගේ නිවසේ ඕනෑම කාමරයක්‌ ප්‍රධාන නිදන කාමරය ලෙස භාවිත කරන්න. මේ සඳහා නිවස කඩාබිඳ දැමීමට අවශ්‍ය වන්නේ නැහැ. නිරිත දිශාව ඉතාමත් යහපත් බවද සිතන්න.
එසේම ඔබගේ නිවසේ උතුරු ඊශාන හා නැගෙනහිර දිශාවලට හැරී වන්දනා කළ හැකි පරිදි ආගමික ශාස්‌තෘ පිළිම පින්තූර තබා නිසි ලෙස ආගමික වතාවන් ඉටු කිරීම තුළින් ද වාස්‌තු දෝෂ සමනය වන බව සිතන්න. මෙහිදී ආගමික වේද දෝෂ හටනොගන්නා පිළිවෙලට ආගමික වතාවත් සිදුකිරීමට වගබලා ගත යුතු අතර තමන්ගේ ඉටු දෙවියන්ට හා මියගිය ඥාතීන්ට පින් අනුමෝදන් කිරීම හා නිතර නිතර පිරිත් සඡ්ක‍ඬායනා කිරීමද කළ යුතු අතර සුවඳ දුම් ඇල්ලීමද ඉතා යහපත් වේ. එසේම ගෘහයේ ඊශාන දිශාව හා නිරිත දිශාව හැකිතරම් පිරිසිදුව පවත්වා ගැනීමට උනන්දු විය යුතුයි.
පේරාදෙනියේ ඩී. යූ. සෙනරත්
උපුටා ගැනීම දිවයින පුවත් පත
උපුටා ගැනීම දිවයින පුවත් පත
