මුල්ගල පෑගෙනවානම් නිවසේ වාස්‌තු සිද්ධාන්ත අඩපණයි...
ඕනෑම දෙයකට අනන්‍යතාවයක්‌ තිබිය යුතුයිි. එම අනන්‍යතාවය තුළින් එය හඳුනාගැනීීමට මෙන්ම සමාජයේ පිළිගැනීමට ලක්‌වීම සිදුවෙනවා. නිදසුනක්‌ ලෙස පුද්ගලයෙකු හඳුනා ගැනීමට හා ඔහුගේ අනන්‍යතාවය තහවුරු කිරීමට හැඳුනුම්පත් තිඛෙනවා. එසේම වාහනයකට එය හඳුනාගැනීමට අංකයක්‌ තිඛෙනවා. පරම්පරා විකාශනයත් සමගම පරම්පරාවන්ගේ අනන්‍යතාවයන් බිහිවුනා. මේ ආකාරයට ජීවි හා අජීවි සෑම දෙයකටම හඳුනා ගැනීමේ හා තේරුම් ගැනීමේ විශේෂ ලක්‌ෂණයක්‌ පවතිනවා. නිවසකටත් මෙම තත්වය එලෙසම බලපාන බව සෘෂි උතුමන් දේශනා කොට තිඛෙනවා. මේ අනුවයි අතීතයේ රජ මැදුරු, සිටු මැදුරු, අමාත්‍ය මන්දිර, සේනාධිපති මැදුරු ආදි වශයෙන් ගෘහ කර්මයන් වෙන් වෙන් වශයෙන් හඳුනා ගනු ලැබුවේ. ඒ අනුව වාස්‌තු ශිල්පයේදී ගෘහයක අනන්‍යතාවය තහවුරු කරනු ලබන ප්‍රධානතම ගෘහ කොටස කුමක්ද යන්න පිළිබඳව ඔබව දැනුවත් කිරීම එහි හොඳ හා නරක ප්‍රතිඵල ප්‍රායෝගිකව කරනු ලබන බලපෑම කුමක්ද යන්න පහදා දීම අරමුණ වේ.
අප පළමුවෙන් ගෘහ කර්මයක්‌ ආරම්භ කිරීමේදී භූමිය මත තබන මුල්ම ඝන වස්‌තුව වන්නේ, මුල් ගලයි. මෙම මුල් ගල කොතරම් වැදගත්ද යන්න පිළිබඳව වාස්‌තුවේ මනාව පැහැදිළි කොට තිඛෙනවා. එහි තරම කොතෙක්‌ද යන්න කිවහොත් එය හඳුන්වනු ලැබුවේ මඟුල් ගල, යනුවෙනි. අතීතයේ ගෘහ කර්මය සඳහා ප්‍රධාන මඟුල් ගලට අමතරව පරිවාර මඟුල් ගල් කිහිපයක්‌ තබනු ලැබුවේ මෙය සංඛ්‍යාත්මකව 4,5,8 ආදී වශයෙන් විය. කෙසේ වූවද භූමි ධාතුව මත ගොඩනැගෙන පඨවි ධාතුවේ මුල්ම පුරුක වන්නේ මඟුල් ගලයි. එබැවින් ඔබගේ අභිනව නිවසේ තබන මුල්ගල නිසියාකාරව තැබීමටත් දැනට ඔබ පදිංචි නිවසේ තබා ඇති මුල්ගල පිළිබඳව නැවත සිතා බැලීමත් ඉතා වැදගත් බව පෙන්වා දෙමි.
දැනට ඔබගේ පදිංචි නිවසේ තබා ඇති මුල්ගල පිළිබඳව නිසි ආකාරයෙන් දැනුවත්වීම ඉතාමත් වැදගත්. ඔබ මිලදී ගත් නිවසක් නම් පෙර අයිතිකරුවන්ගෙන් ඒ පිළිබඳව අසා දැනගන්න. කෙසේ වෙතත් මුල් ගල නිශ්චිතව සොයා ගත නොහැකිනම් ඔබ කළ යුත්තේ ඔබගේ නිවසේ බ්‍රහ්ම පාදය නිසි ලෙස හඳුනාගෙන එය සක්‍රීය කිරීමයි. විශේෂයෙන් ඔබගේ නිවසේ මුල් ගල කිසිම විටක පෑගීම නොවිය යුතුම දෙයක්‌ බව පෙන්වා දෙමි. නිවසේ යම් යම් වෙනස්‌කම් සිදුකිරීමේදී මුල්ගල නිවසේ පෑගෙන ස්‌ථානයකට ඔබටත් නොදැනුවත්ව ඒමට ඉඩ ඇත. විශේෂයෙන් දොරවල් එකතු කිරීමේදී මෙය සිදුවන අතර එහිදී ඔබගේ නිවසේ ස්‌ථාවරත්වය බිඳී යනු ඇත.
මුල් ගල පැගීම නිසා ඇතිවන හානි,
- නිවස සෑදීම ප්‍රමාද වෙයි.
- නිවසේ සාමය පලායයි.
- සතුරු කරදර බහුලවෙයි.
- ගෘහ හිමියාට රාජ බිය ඇතිවේ.
- ගෘහ හිමියාගේ සෞඛ්‍ය පිරිහෙයි.
මේ ආකාරයට මුල් ගල පෑගීම නිසා නිවැසියන්ට කරදර ඇතිවීම නොවැලැක්‌විය හැකි දෙයකි. ඔබගේ මුල් ගල නිශ්චිතවම පෑගෙන්නේ යෑයි ඔබට හැඟේනම් එය ගලවා ජලයේ පාකර හැර නැවත සුභ මුහුර්තියෙන් නිසි ස්‌ථානයේ මුල් ගලක්‌ තැබීම සිදු කළ යුතු බව වාස්‌තුවේ සඳහන් වේ.
මෙවැනි පෑගෙන මුල් ගලක්‌ ගැලවීම හිතු මතේට සිදුකල නොහැක. ඒ සඳහා සුභ මුහුර්තියක්‌ ලබා ගත යුතු අතර නැවත මුල්ගල තැම්පත් කිරීමේදී සුභ මුහුර්තියෙන්ම තැම්පත් කළ යුතු බව පෙන්වා දෙමි.
නව නිවසට මුල් ගලක්‌ තබන ආකාරය
ඔබගේ නව නිවසට නිසි ලෙස වාස්‌තු සිද්ධාන්ත වලට අනුකූලව මුල් ගලක්‌ තැබීමට ඔබ මුල සිටම වගබලා ගත යුතු වෙනවා. ඉපැරණි වාස්‌තු සිද්ධානුකූලව සකස්‌කර ගත් මුල්ගල ආගමික ස්‌ථානයකට ගෙනගොස්‌ පිරිත් කළ යුතු වේ. ඉන් පසුව පිරිත් සඡ්ඣායනා මධ්‍යයේ ගෘහ හිමියා විසින් ඊශාන දිශාව බලා නිවසේ ගිණිකොන කොටසේ මුල් ගල තැබීම කළ යුතු වෙනවා. සෑම විටම මුල්ගල පොළවට සමාන්තරව හා අත්තිවාරමේ බිත්තිවලට ලම්භකව තැබීම කළ යුතු වෙනවා. එය හරවා තැබීම නොකළ යුතුය. ඔබගේ ගිණිකොන දිශාවේ වැසිකිලි බිත්තිවලට හසුවන ලෙස මුල්ගල නොතැබීමට වගබලා ගත යුතු වෙනවා. එසේම මුල් ගල නොපෑගෙන ලෙස ස්‌ථානගත කිරීමට සිහි තබා ගත යුතු වෙනවා. ඔබගේ නිවසේ මුල් ගල තබන ස්ථානය නිවාස සැලැස්‌මේ සටහන් කොට තැබිය යුතු අතර එය අනාගත වෙනස්‌කම් සිදු කිරීමේදී ඔබට ඉතා වැදගත් වෙනවා. එසේම කිසිම විටක නිවස මධ්‍යයේ මුල් ගල තැබීම සිදු නොකළ යුතු බව පෙන්වා දෙමි.
මුල් ගලක අඩංගු විය යුතු දෑ
ඉපැරණි ඍෂිවරුන් පෙන්වා දී ඇති පරිදි ඔබගේ නිවසේ තබන මුල් ගලක පහත සඳහන් ද්‍රව්‍ය අඩංගු විය යුතු බව පෙන්වා දෙමි.
කස්‌තුරි, නවරත්න, ගෝරෝචන, පස්‌ලෝ, හිරිගල්, සුදු හඳුන්, රත් හඳුන්, උඳු, මුං, තල, වී, මෑ, අගිල්, ගුගුල්, තුවරලා, සැවැන්න මුල්, ඊතන, එල අබ, රත්මල් කැකුළු, සමන්පිච්ච කැකුලු, මානෙල් නෙළුම්, ඕලූ, නාමල්, රුක්‌අත්තන මල් රේණු, කපු ඇට, වැල්මී, කුඹුරු ඇට, වෙනිවැල් ගැට, කොහොඹ අරටු, මී ඇට, මූදු වැලි, ගඟේ වැලි, ඇලේ වැලි, දොලේ වැලි, පර්වත පස්‌, ඇතා බිඳි පස්‌, සමුද්‍ර පර්වත මැටි, මූදු වතුර, ගඟේ වතුර, වෙලේ වතුර, ඇළේ වතුර, දොලේ වතුර, ඔයේ වතුර, පොකුණු වතුර, වැහි වතුර, කොහොඹ තෙල්, මී තෙල්, ගිතෙල්, තැඹිලි තෙල්, අබ තෙල්, කැකුලු හාල්, කපුරු, එනසල්, අංජන කැට, රන්, රිදී, මුතු, මැණික්‌ ආදිය යි.
ඔබ විශේෂයෙන් මතක තබා ගත යුතු දෙයක්‌ තිබේ. ඔබගේ නිවසේ මුල් ගල තැබීමට ප්‍රථම බහිරව දේවතා පූජාවක්‌ පවත්වා භූමි ඥාතීන්ගෙන් අවසර ලබා ගත යුතු වෙනවා. මෙහිදී ගම්භාර දෙවියන්ගේ උදව් උපකාර ඇතිව බුදු ගුණ සඡ්ඣායනා පවත්වා මෙම බහිරව දේවතා පූජාව පැවැත්වීමට වගබලා ගන්න. කිසිම විටක පුළුටු වර්ග එක්‌ නොකළ යුතු වේ.
එමෙන්ම ඔබගේ අභිනව නිවසට මුල්ගල තැබීමට ප්‍රථම අවස්‌ථා දෙකකදී භූමිය හා සම්බන්ධව ගනුදෙනු කිරීම සිදු වෙනවා. එනම්
· කූඤ්ඤ හා ලණු ඇදීම
· පස්‌ කැපීම
එබැවින් නිවසට මුල්ගල තැබීම සඳහා සුභ මුහුර්තින් තුනක්‌ ලබා ගැනීම කළ යුතුම වෙනවා. පළමු කූඤ්ඤය ගසන අවස්‌ථාවේදී ඔබ භූමිය හා මූලිකවම සම්බන්ධ වන අතර ඒ සඳහා ඛෙලි ගසක ලීයක්‌ යොදා ගැනීම සහ ලී මිටියක්‌ යොදා ගැනීම ඉතා වැදගත්. එසේම ලණු ඇදීම යනු විශ්වය හා තම මතය ප්‍රකාශ කිරීමේ මූලිකම අවස්‌ථාව වන බැවින් ඒ සඳහා කොහු ලණු භාවිතය වැදගත් වේ.
ඉන් පසුව දෙවන අවස්‌ථාවේදී මුල්ගල තැබීම සඳහා අවශ්‍ය අත්තිවාරම සකස්‌කර ගැනීම සඳහා සුභ මුහුර්තියෙන් මංගල පස්‌ පිඩැල්ල කැපීම සිදු කළ යුතු අතර එයද ඊශාන දිශාව බලා සිදු කිරීම මැනවි. මේ සෑම කටයුත්තක්‌ම දක්‌ෂිණාවෘතව සිදුකිරීමට වගබලා ගත යුතු වේ.
ගෘහ ආරම්භක වාස්‌තු පූජාව
ඔබගේ නිවසේ ගෘහ ආරම්භක වාස්‌තු පූජාව මුල් ගල තබන දිනයේදීම සිදු කළ යුතුයි. මේ සඳහා ඔබ විසින් කපන ලද මංගල පස්‌ පිඩැල්ල රතු හෝ සුදු (විවාහක නම් රතු/ අවිවාහක නම් සුදු) රෙදි කඩකට ගෙන එහි ගැට තුනක්‌ ගසා ගලා යන ජලයට දමා භූමියේ සියලු දෝෂ දුරුවේවායෑයි ප්‍රාර්ථනා කිරීම සිදු කළ යුතු වේ. මෙය ගෘහ ආරම්භක වාස්‌තු පූජාවක්‌ ලෙස පෙන්වා දිය හැක.
මේ ආකාරයට ඔබගේ අභිනව නිවස සඳහා නිසි ආකාරයෙන් මුල්ගල තබා වාස්‌තු ශිල්පීය ක්‍රමවලට අනුකූලව නිවසේ කටයුතු ආරම්භ කිරීමට ඔබත් උනන්දු විය යුතුයි. එවිට නිවසේ කටයුතු නියමාකාරයෙන් නිමකර ගැනීමට ඔබට වාසනාව උදාවේ. එසේම ඔබගේ දැනට පදිංචි නිවසේ මුල්ගල පිළිබඳව අවධානය යොමු කරන්න. එය නිසි ස්‌ථානයේ තිබේ දැයි සැකහැර දැනගන්න. එය ඔබගේ නිවසේ වාස්‌තු එකඟ කර ගැනීමට තබන මුල් පියවර ලෙස සිතන්න. මුල්ගල වරද්දා ගත් සෑම තැනකම වාස්‌තු දෝෂ හටගෙන තිඛෙනවා. ඒ නිසා නිවසේ ගෘහ හිමියාට වැඩි බලපෑමක්‌ එල්ල කරන, මඟුල් ගල ගැන සැකහැර දැනගැනීම ඔබේ යහපත පිණිස හේතු වේ. සැමට සම්පත් නිවසක් ලබා ගැනීමට වාසනාව උදාවේ.
පේරාදෙණිය ඩි.යු. සෙනරත්
උපුටා ගැනීම දිවයින පුවත් පත
