හත්වැන්නට 22 වන දෙර්කාණාධිපතිගේ බලපෑම
ජ්‍යොතිෂයේ හමුවන තිස්හයක් වූ දෙර්කාණ අතරින් අශුභ පල දීමේ ප‍්‍රමුඛයා විසි
දෙවැනි දෙර්කාණාධිපති වෙයි. එය අට රාශිය හා සම්බන්ධ වීම මෙයට හේතුවයි.
දෙර්කාණ අයත් රාශි අධිපතියා පාපී, පාප සංයෝග, පාප දෘෂ්ටි, පාපී නැකැත්, පාප
කර්තරී හෝ රාශි භාව, පාප කර්තරී නම් මෙම තත්ත්වය තවදුරටත් නරක තත්ත්වයට
හැරේ. බාධක ග‍්‍රහයා වීම එම ග‍්‍රහයාගේම මහ දශා, අතුරු දශා, විදශා
කාලවකවානු ගත කිරීම අශුභ පල තවදුරටත් වැඩි කරවන්නකි. ලග්නස්ඵුටය හෙවත්
රාශියක 300 වූ සංඛ්‍යාත්මක අගය 22 දෙර්කාණාධිපති කවරෙක් ද යන්න තීරණය කරයි.
00 - 100 දී අට අධිපති 100 - 200 දී 12 අධිපති 200 - 300 දී 4 අධිපති
වශයෙන් දෙර්කාණාධිපති නම් කෙරේ. විවාහ සීහුම්කරණය, පලාපල කථනය, අනාගත
පුරෝකථනය මෙන්ම ශුභ මූර්තයන් සාධනයෙහිලා විසි දෙවැනි දෙර්කාණාධිපති වඩාත්
සැලකිල්ලට ලක් වෙයි. තත්කාල ලග්නයේ අයහපත් දෙර්කාණ මඟ හැරීම මෙමගින්
අපේක්ෂා කෙරේ.
ජන්ම පත‍්‍රයක විවාහකස්ථානය හෙවත් හත් වැන්නේ
විසි දෙවැනි දෙර්කාණාධිපති හැසිරීම ඒ ඒ ග‍්‍රහයා අනුව වෙනස් වෙයි. රාහු හා
කේතු හැර සප්තම ග‍්‍රහයන් 22 දෙර්කාණාධිපති වරම් උරුම කර ගනී. අයහපත් වූ
විසි දෙවැනි දෙර්කාණාධිපති සිටීමත්, හත්වැන්නාධිපතිට ඔහුගේ අයිතියත්,
සබඳතාවක් තිබීමත් යහපත් නොවේ. එය විවාහය හා විවාහ දිවියේ පැවැත්වීමට අහිතකර
බලපෑම් එල්ල කරවන පිහිටීමකි. පාපීව, දුබලව 22 දෙර්කාණාධිපති වූ යම්
ග‍්‍රහයකු හත්වැන්නේ සිටීම එකී රාශී නියෝජනයන්ට මෙන්ම රාශී අධිපතිකාරක
අයිතීන්ට ද අහිතකර වෙයි. එමෙන්ම දෙර්කාණාධිපති ග‍්‍රහ අයිතීන්ට ද පීඩාකාරී
තත්ත්වයක් ඇති කරවන්නකි.
රවි විසි දෙවැනි දෙර්කාණාධිපතිව
හත්වැන්නේ නම් ලැබෙන සහකරු / සහකාරිය අහංකාර ගති ඇත්තෙකි. ඌෂ්ණාධික රෝගවලින්
පෙළෙන අයෙකි. ඒ නිසාම ලිංගාශි‍්‍රත රෝගවලට භාජනය වීමේ අවදානම වැඩිය.
හත්වැන්නේ රවි භාග්‍යස්ථානය වූ නව වැන්න කිලිටි කරයි. ආගම දහමට නැඹුරුව අඩු
කරයි. උසස් අධ්‍යාපනයට අකුල් හෙළයි. පියා හා පිය පාර්ශ්වය කෙරේ තැකීමක්
ඇති නොකරයි. ශුභපල දීමේ බලවත්ම ස්ථානයට රවි පීඩාකාරී බලපෑම් එල්ල කරයි. හතර
වැන්නේ මවු හා මවු පාර්ශ්වයන්, භෞතික ලැබීම් හා සිතුවිලි නියෝජන ස්ථානයකි.
හත් වැන්නේ රවි හතර වැන්නේ කාරක නියෝජනයන්ට එල්ල කරනුයේ දැඩි අහිතකර
බලපෑමකි. මවුට පීඩා ගෙන දීමත්, ජන්මියාට ගේ දොර ඉඩකඩම් අහිමි කිරීමටත් රවි
උත්සුක වෙයි.
චන්ද්‍රයා දුර්වලව 22 වන දෙර්කාණාධිපති වී
හත්වැන්නේ සිටීම ඉතාම අයහපත්ය. ලිංගික හා ශාරීරික දුර්වලත්වයෙන් මෙන්ම
මානසික දුර්වලතාවයෙන් යුත් අයෙකි. චපල ගති ඇති වූ දුෂිත වූ සිතකි. විරුද්ධ
පාර්ශ්වයට යටත්ව ජීවිතය ගෙවීමට සිදු වෙයි. ප‍්‍රතිශක්තිකරණය අඩු අයෙකි.
කාන්තාවකගේ නම් ඔසප් චක‍්‍රය කෙරෙහි බලපෑම් එල්ල කරයි. චන්ද්‍රයාගෙන් හා
දෙර්කාණගෙන් ඇති කෙරෙනා රෝග පීඩාදියට භාජනය වීමේ අවස්ථා වැඩිය. චන්ද්‍රයා
හත්වැන්නේ සිට පාපී දෘෂ්ටියෙන් නවය ලග්නය හා හතර වැන්න දැකීම එම ස්ථානයන්හි
ඵලයන්ට හානිකරය. ලැබෙන සහකරු හෝ සහකාරිය ද මෙවැනි ගති ගුණවලින් යුත් අයකු
බැවින් විවාහ දිවිය මෙන්ම විවාහයෙන් පසු ජීවිතය ද එතරම් ප‍්‍රසන්න නොවේ.
22 වන දෙර්කාණාධිපති වූ ශනි කලස්වූ ස්ථානය නියෝජනය කිරීම ශුභ දායක නොවේ.
ශනි ලිංගික ජීවිතය කෙරේ උදාසීන ග‍්‍රහයෙකි. වියපත් ගතිගුණ ඇත්තෙකි. මෙවැනි
පිහිටීමක් ඇති ජන්මියාට ලැබෙන සහකරු / සහකාරිය වැඩිමහලූ කෙනෙක් හෝ වයස
ඉක්මවා පෙනුමක් ඇත්තෙකි. ලිංගික ජීවිතය ද සාර්ථක නැත. ලැබෙන්නා වූ සහකරු /
සහකාරිය වයසින් කුලයෙන්, ආගමෙන්, ධනයෙන්, බලයෙන්, රූපයෙන් වෙනස් හෝ අඩුපාඩු
සහිත අයකු වීමට ඉඩ තිබේ. පිනට දහමට අකැමති පෙර පින් මතුවීමට ඉඩ නොදෙන,
දෙමාපිය ගුරුවරුන් කෙරෙහි වැඩි තැකීමක් නොකරන කෙනෙකි. ශනි හත්වැන්නේ සිට
තුන, හත, දහය දැකීම මෙයට හේතු වෙයි. විවාහ දිවිය නීරස විය හැකි අතර පළමු
විවාහය අසාර්ථක කරවන ග‍්‍රහ පිහිටීමකි.
පාපී කුජ 22 වන
දෙර්කාණාධිපතිව හත්වැන්නේ සිටීම විවාහයකට මෙන්ම විවාහයේ පැවැත්මට ද හිතකර
නොවේ. කුජ දෝෂය උත්පාදනයට මෙම පිහිටීම හේතුවක් වන අතරම කුජ ලිංග උත්තේජකයා
වුවත් දුර්වල වූ කුජගෙන් එවැන්නක් බලාපොරොත්තු විය නොහැක. වෙනත් ග‍්‍රහ
බලපෑම් මගින් උත්තේජනය බලවත් විය හැකි වුව ද තෘප්තිමත් බවේ සීමාවක් නැති
හෙයින් ජන්මියා හට විවිධ ගැටලූ අවස්ථාවන්ට මුහුණ දීමට සිදු වේ. එවැන්නෝ
කලහයට බරය. ඉක්මනින් කෝප වෙයි. නොඉවසිලිමත්ය. සහකරු හෝ සහකාරිය තමා ඉක්මවා
යෑමට නොදෙයි. පළමු වැනියා තමාම විය යුතු යැයි සිතන හෙයින් පවුලේ සමගියට
බාධා එල්ල කෙරේ.
22 වන දෙර්කාණාධිපති කුජ හත්වැන්නේ සිට දහය, ලග්නය,
දෙවැන්න දැකීම එම ස්ථානයන්හි ඵලයන්ට හානිකරය. රැකියාවේ හෝ තම
වෘත්තීයේ යම් යම් ගැටලූ නිර්මාණය කරයි. එමෙන්ම විවාහයෙන් පසු ජීවිතය ගැන
කියැවෙන හෙවත් කුටුම්භස්ථානයෙහි සාමකාමී පැවැත්ම අවුල් ඇති කරයි. විසි දෙවන දෙර්කාණාධිපති වූ බුධ හත්වැන්නේ සිට දහය, ලග්නය, දෙවැන්න
දකිමින් කටයුතු අරඹයි. අශුභ දෙර්කාණගත බුධ හත්වැන්නේ සිට හත්වැන්නට මෙන්ම
ඉහත කී භාවයන්ට ද තම පීඩනය එල්ල කරයි. බුද්ධියෙන් හීන, වාචාලකමෙන් ඉහ වහා
ගිය අන්‍යයන් ඉදිරියේ තම බුද්ධිමතකු ලෙස පෙනී සිටීමට නිරර්ථක උත්සාහයක
යෙදෙන්නෙකි. වෙනත් ග‍්‍රහයකු සංයෝග වුව හොත් එම ග‍්‍රහයාගේ ගතිගුණ ද ආරෝපණය
කර ගනී. බුධ පීඩා වීම අධ්‍යාපනයට අහිත කරයි. පීඩිතව බුධ සමග
සම්බන්ධ වුව හොත් මානසික දුර්වලතාවයෙන් යුතු සෙම් බහුල රෝගියෙකි. මවු ඥාතීන්
සමග හා බෑණා හා ලේලී සමග සබඳතා අඩුයි. ඔවුන්ගෙන් ප‍්‍රයෝජන අඩුයි. බොහෝ
විට මෙවැනි අයගේ සහකරු හෝ සහකාරිය ද බුද්ධි මට්ටමින් අඩු අයෙකි. මෙවැන්නන්
අතර බුද්ධිමත් තීරණ අපේක්ෂා කළ නොහැකි අතර පවුල් දිවිය නීරස කර ගනිති.
ගුරු අයහපත්ව විසි දෙවන දෙර්කාණාධිපතිව හත්වැන්නේ පතිත කේන්ද්‍ර හිමියා
විවාහ දිවියට සුදුසුකම් ලැබුවත් සාර්ථක පැවැත්මක් බලාපොරොත්තු විය නොහැකිය.
ගුරු කොහොමත් ආධ්‍යාත්මික ග‍්‍රහයෙකි. හත්වැන්නේ දුර්වලව ගුරු විසි දෙවන
දෙර්කාණාධිපති වශයෙන් පතිත වීම විවාහ හා ලිංගික ජීවිතයට බාධාවකි. ඔවුන්ගෙන්
විවාහ සැපතට පෙළඹවීමක් හෝ උත්තේජනයක් ඇති නොකරයි. කල් යෑමේදී ලිංගික
ජීවිතයෙන් ඈත් වීමට බලන ගුරු විවාහ දිවිය ජන්මියාට එපා කරවයි. උසස්
අධ්‍යාපනයට ධනස්ථානයට අධිපති වුව ද 22 දෙර්කාණාධිපති වශයෙන් ඒවාට ඔහුගෙන්
අනුබලයක් ලැබීමේ ඉඩකඩ අඩුය. ලෝකයා ඉදිරියේ සාර්ථක පවුල් ජීවිතයක් පෙන්නුම්
කළත් සැබෑ ජීවිතයේ එය එතරම්ම සුන්දර නොවේ. ගුරු ග‍්‍රහයාගේ නිරාගී ගුණය
විවාහ දිවියේ පැවැත්මට බලවත් බාධාවකි.
සිකුරු ශුභයෙකි. සියලූ
සැප සම්පත් දීමට මැලි නොවන කෙළිලොල් ගති ඇති ග‍්‍රහයෙකි. එහෙත් 22 වන
දෙර්කාණාධිපතිව හත්වැන්නේ සිකුරු ගෙන දෙනුයේ අශුභ ඵලමය. විවාහ පමාවට මෙය
හේතුවක් වෙයි. නැතහොත් නොගැළපෙන විවාහයකට පොළඹවයි. අවිවාහකව සිටීමේ
අපේක්ෂාවක් ද විය හැකිය. යුග දිවිය ගෙවතත් එය අවුල් වියවුල් මධ්‍යයේ විය
හැකිය. දුබලව 22 වන දෙර්කාණාධිපති වූ සිකුරු සැප සම්පත් අහිමි කරයි. වියපත්
බවක් හෙවත් තලත්තෑනි බවක් පෙන්වයි. එකොළොස්වැන්න ලග්නය හා හත්වැන්න
දකිමින් එහි ඵලයන්ට හානි කරයි. ආත්ම ශක්තියට මෙන්ම ආත්ම විශ්වාසයට ද හානි
කෙරේ. සහෝදර සහෝදරියන්ට හිතවත් නැතිවා සේම ඔවුන්ගේ උදව් උපකාර නොලබයි.
සියුම් සිතුවිලි විනාශ කරමින් අනාචාරයට පොළඹවයි. විවාහයෙන් පසු වුව ද වරදේ
බැඳෙන පිහිටීමකි. එය විවාහයේ අවසානය වීමට ද ඉඩ තිබේ.
22 වන
දෙර්කාණාධිපති වශයෙන් සප්තම ග‍්‍රහයන්ගෙන් හත්වැන්නට කෙරෙන අහිතකර බලපෑම
අවම කිරීමේ හෝ මඟ හැරවීමේ ක‍්‍රමෝපායන් ජ්‍යොතිෂයේ සඳහන් වේ. මෙහිදී තමාගේ
ඉෂ්ට දෙවියා හා පාලන ග‍්‍රහයා මූලික කරගෙන වත් පිළිවෙත් කළ යුතුය. ග‍්‍රහයා
අධිපති දෙවියන් උදෙසා පුද පූජා පැවැත්වීම. හඳුනා ගත් අපල කාරක ග‍්‍රහයාගේ
ආකර්ෂණයෙන් තමන් වෙත ලබා ගැනීමට අවශ්‍ය වත් පිළිවෙත් සිදු කිරීම ප‍්‍රබල
ග‍්‍රහයන් තව තවත් ශක්තිමත් කිරීම සඳහා යන්ත‍්‍ර පැළඳීම, නියමිත මැණික්
සහිත ආභරණ පැළඳීම, මහා ලක්‍ෂමී ස්තෝත‍්‍ර ගායනය මෙන්ම බෝධි පූජා හා සෙත්
කවි ද වැදගත් වේ.
ජ්‍යොතිෂවේදී විසුර රත්නායක
උපුටා ගැනීම දිවයින
