මූලික ලක්ෂණ පහළ වූ සැණින් කඩිනම් ප්‍රතිකාර වෙත යොමුවන්න
පිළිකාවක් කියන්නේ ශරීරයේ අරමුණක් නැති, පාලනයකින් තොරව සිදුවන අසාමාන්‍ය සෛල වර්ධනයක්. එය තවත් ස්ථානයකට ගොස් සෛල වර්ධනය විය හැකියි. ඕනෑම සිරුරක හැම මොහොතකම අසාමාන්‍ය සෛල වර්ධනයක් සිදුවිය හැකියි. සිරුර සැකසී ඇති අන්දම අනුව අසාමාන්‍ය සෛල වර්ධනයක් හඳුනාගත හැකි ආරක්ෂණ පද්ධතියක් අපේ සිරුරේ තිබෙනවා. එම ආරක්ෂණ පද්ධතිය හරහා අසාමාන්‍ය සෛල විනාශ කිරීමේ හැකියාව නිතැතින්ම හිමිව තිබෙනවා. එය නිසි ලෙස ක්‍රියාත්මක වීමට නම්, පුද්ගලයෙක් ඉතා හොඳ මානසික මට්ටමකින් සහ සෞඛ්‍ය සම්පන්න නිරෝගීමත් ජීවිතයක් ගත කළ යුතු වෙනවා. සිරුරක පිළිකාවක් වර්ධනය වීමට බලපෑ හැකි හේතු කිහිපයක්ම තිබෙනවා. ජීවත්වීමේ රටාව අනුව චර්යා රටාවත්, පරිසරයේ රටාවත්, පරම්පරා බලපෑමත් ඒ අතරින් විශේෂයි. චර්යා රටා වනුයේ රසායනික සාධක, භෞතික සාධක, ජීව විද්‍යාත්මක සාධක ලෙස වර්ග කෙරෙනවා.
රසායනික සාධක කියන්නේ, ආහාරවලින් අපේ සිරුරට ඇතුළු වන ආසනික්, රස කාරක වැනි සංඝටක මත අසාමාන්‍ය සෛල වර්ධනය වීමට ඉඩ හැරීමයි. භෞතික සාධක කියන්නේ, විකිරණශීලී කිරණ වැනි සම තුළින් ඇතුළුවන කිරණ මඟින් අසාමාන්‍ය සෛල වර්ධනයට ඉඩ හැරීමයි. ජීව විද්‍යාත්මක සාධක කියන්නේ, කාලයක් පුරා පැවති නිධන්ගත රෝග නිසා අසාමාන්‍ය සෛල වර්ධනය වීමයි. ඊට නිදසුන් ලෙස ඩ්ර්‍ථ වෛරසය පැතිරීමෙන් ගැබ් ගෙල පිළිකා, දිගු කාලින බැක්ටීරියා වර්ධනයෙන් අමාශගත පිළිකා ආදිය වර්ධනය වීම දැක්විය හැකියි. පරිසර රටාවේ බලපෑම අනුව අධෝරක්ත කිරණවල බලපෑම, ඩීසල් දුම, සල්ෆර්ඩයොක්සයිඩ් වැනි පරිසරයෙන් ඇතිවන බලපෑම මත අසාමාන්‍ය සෛල වර්ධනයක් සිදුවිය හැකියි. පරම්පරා බලපෑමක් ඇති වේ නම් ඒ සඳහා යම් තරමක හෝ ඉඩක් පවතින්නේ, ගුද මාර්ග අශ්‍රිත හෝ පුරස්ථි ග්‍රන්ථි හෝ ඩිම්බකෝෂ හෝ පිළිකා වලටය. එහෙත් එය එසේ සිදුවන්නේමයැයි නියත වශයෙන් සොයාගෙන නැහැ. මේ ඕනෑම පිළිකා තත්ත්වයක් කලින් හඳුනා ගැනීමේ අවස්ථා තිබෙනවා.
කලින් හඳුනා ගත්තොත් සුව කළ හැකියි පියයුරු පිළිකා :
පියයුරු පිළිකා ඇතිවීමට බෙහෙවින් බලපානුයේ ඊස්ට්‍රජන් හෝමෝනයේ වෙනස් වීමක්, මව්කිරි දීමේ පාලනයක්, වැනි සාධක වුව ද ආර්ථව චක්‍රයේ අසාමාන්‍යතාවක් දරුවන් නොමැති වීමක්, පාලනයකින් තොරව හෝර්මෝන ලබා ගැනීම වැනි සාධක ද බලපෑ හැකියි. රෝග ලක්ෂණ ලෙස, පියයුරුවල හැඩයේ වෙනස් වීමක්, පියයුරුවල ගැටිත්තක්, පියයුරු ආශ්‍රිත සමෙහි අසාමාන්‍ය තුවාලයක්, පැල්ලමක් වැනි තත්ත්වයක් ඇති විට ස්වයං පරික්ෂාවක් කර ගත හැකි අතර එය ප්‍රමාණවත් නොවන විට වෛද්‍යවරයකු ලවා පරීක්ෂා කර ගත හැකියි. දැනට පවතින දත්ත අනුව පියයුරු පිළිකා සම්බන්ධයෙන් වයස අවුරුදු විස්සක් පිරුණු කාන්තාවන්ගේ සිට ඉන් ඉදිරි වයස් මට්ටමේ සෑම කාන්තාවක්ම පියයුරු පරීක්ෂා කර ගත යුතුයි.
ගැබ්ගෙල පිළිකා :
මෙම තත්ත්වයන් ඇතිවීමට නම්, ගර්භාෂයේ පහළ කොටසේ සෛලවල වෙනස් වීමක් සිදු විය යුතුයි. කලින් හඳුනා ගැනීම සඳහා රෝග ලක්ෂණ මතුවීමක් කඩිනමින් ඇති නොවන නිසාම වයස අවුරුදු 35 දී හෝ ඊට පසුව වෛද්‍යවරයෙකු ලවා පැප් පරීක්ෂණය හරහා ගැබ්ගෙල පරික්ෂා කරවා ගත යුතුයි. ගැබ්ගෙල පිළිකාවක් සිරුර අභ්‍යන්තරයේ වර්ධනය වූවායින් පසුව රෝග ලක්ෂණ පහළ වන නිසාම කලින් පරීක්ෂාකර ගැනීම බෙහෙවින්ම වැදගත්. ඒ සඳහා, පැප් පරීක්ෂාවක් සිදුකළ හැකි ස්ථාන දිවයින පුරා සෑම රෝහලකම සුවනාරි සායන වලදී ඇතැම් රෝහල්වල ප්‍රසව හා නාරි සායන වලදී පිළිකා මර්දන ජාතික මධ්‍යස්ථානයේදී කාසල් රෝහලේදී පුද්ගලික අංශයේදී. ඩිම්බ කෝෂ ආශ්‍රිත පිළිකා වුවද කලින් හඳුනා ගත නොහැකි බැවින් එයද ඉහත මධ්‍යස්ථානවලදී පරික්ෂා කරවා ගත හැකියි. තමන්ට කුමන හෝ තත්ත්වයක පිළිකා තත්ත්වයක් ඇතැයි සිත තුළ සැකයක් පවතියි නම්, සතියේ ඕනෑම දිනෙක කොළඹ නාරාහේන්පිට ජාතික පිළිකා මර්දන ආයතනය වෙත පැමිණ හෝ 0112368627 / 0715320320 යන දුරකතන අංක අමතා විස්තර ලබා ගත හැකියි.
කොළඹ නාරාහේන්පිට ජාතික පිළිකා මර්දන වැඩසටහනේ ප්‍රජා වෛද්‍ය විශේෂඥ සුරාජ් පෙරේරා
සමන්ති වීරසේකර
උපුටා ගැනීම දිනමිණ
.jpg "චොක්ලට් ෆජ්")
