විභාග සමත්වෙන්න බලගතු උපක්‍රමයක්…
විභාගය, දරුවකුගේ බුද්ධිමත් බව මැන බලන ප්‍රධාන කාරණාවකි. ශිෂ්‍යත්වය, සාමාන්‍ය පෙළ හෝ උසස් පෙළ වේවා එය එලෙසමය. එහෙයින් ඉදිරියේදී යෙදෙන විභාග කටයුතු සඳහා ඔබට ඉතා පහසුවෙන් ප්‍රයෝජන ගත හැකි සරල උපක්‍රමයක් හඳුන්වා දීමටයි මේ සූදානම. මෙය උපක්‍රමයක් ලෙස සඳහන් කළද මුළුමනින්ම බුදු ගුණ බලයේ ආශීර්වාදය ලබාගන්නා ක්‍රමවේදයකි. මෙම ක්‍රමය භාවිත කර සුවිශේෂ ප්‍රතිඵල ලබාගත් දරුවන් රාශියක් ගැන අපට අත්දැකීම් තිබේ. විශේෂත්වය වනුයේ එම දරුවන් අතර ප්‍රතිඵල ගැන කිසිදු විශ්වාසයක් නොවූ දෙගිඩියාවෙන් යුතුව අධ්‍යයනයේ යෙදුණු දරුවන් විශාල පිරිසක්ද සිටීමයි. එවැනි දරුවන්ද මේ ආකාරයට බුදුගුණයේ පිහිට ආශීර්වාදය ලබා සිය විභාග කටයුතුවලින් උපරිම ප්‍රතිඵල ලබාගන්නට සමත්ව ඇත. එනිසා මෙය සමස්ත දරු පරපුරටම වැදගත් වනු ඇත.
අවශ්‍ය වනුයේ විශ්වාසයෙන් යුතුව මෙම ගාථාව කටපාඩම් කරගෙන, අවශ්‍ය දිනයේ එනම් ඔබගේ ඕනෑම විභාග කටයුත්තක් යෙදෙන දිනයේ සුබ වේලාවට නිවෙසින් පිටව යෑමට ප්‍රථම බුදුන් වැඳ, මවුපිය වැඩිහිටියන් වැඳ නමස්කාර කර ආශීර්වාද ලබාගෙන මෙම ගාථාව තුන් වරක් කියා නියමිත වෙලාවට නියමිත දිශාවට දකුණු පය පෙරට තබා ගමන පිටත් වීමයි. එම මොහොතේ බුද්ධ, ධම්ම, සංඝ බලයෙන් මට නැණ නුවණ පහළ වේවායි සිතා, ජයෙන් ජයම වේවායි අධිෂ්ඨාන කොට ගමන පිටත් වන්න. ඔබේ ජය ඒකාන්තයි. ස්ථිරයි.
ගාථාව
බුද්ධො තිලොක සරණො – බුද්ධො සුරියො තමොනුදෝඒවං තං සරණං ඛේමං – බුද්ධො මේ සරණං වරං
ගච්ඡාමි සරණං බුද්ධං – නත්ථි මයිහං භයං සදා
ධම්මො තිලොක සරණො – ධම්මො සුරියෝ තමොනුදේ
ඒවං තං සරණං ඛේමං – ධම්මො මේ සරණං වරං
ගච්ඡාමි සරණං ධම්මං – නත්ථි මයිහං භයං සදා
සංඝෝ තිලොක සරණො – සංඝෝ සුරියෝ තමොනුදෝ
ඒවං තං සරණං ඛේමං – සංඝෝ මේ සරණං වරං
ගච්ඡාමි සරණං සංඝං – නත්ථි මයිහං භයං සදා
උපුටා ගැනීම මව් රට
