මුළුතැන්ගෙයි රසවතුන් සූදුරු-මහදුරු-උළුහාල් කහ-කොත්තමල්ලි
මේවා මගින්ද ආහාර සුවඳවත් වෙනවා. රසවත් වෙනවා මෙන්ම ආහාර රුචියද වැඩි වෙනවා. මීට අමතරව ආහරවලට හොඳ වර්ණයක් ඇති වෙනවා. විසබීජ නැසෙනවා මෙන්ම ආහාරයට විවිධ පෝෂ්‍ය පදාර්ථ එකතුවීමක් සිදු වෙනවා. මේ සියල්ලටම වඩා මෙම “පහේ ද්‍රව්‍ය” වලින් මිල කළ නොහැකි ඖෂධීය වටිනාකමක් ලැබෙනවා. ආහාර මාර්ගය ආශ්‍රිත බොහෝ රෝග මෙන්ම පිළිකාද ශ්‍රී ලංකාව ඇතුළු ආසියාතික රටවල ජනයාට අඩුවීමට එක හේතුවක් ලෙස මෙම තුනපහ භාවිතය හේතුවේ යැයි විශ්වාස කරනවා. තුනපහ ආහාරයට ඉතා සුළු වශයෙන් එකතු කළත් දිනපතා සියලු ආහාර වේල්වලටම තුනපහ එකතු කරන බැවින් අවශ්‍ය තරම් මේ ඖෂධීය ගුණය ලැබෙනවා. ඒමගින් බොහෝමයක් රෝග වළක්වා ගැනීමටත්, තවත් රෝග සංඛ්‍යාවකට ප්‍රතිකාරමය ගුණයක් ලැබීමත් සිදුවෙනවා.
සූදුරු හා මහදුරු
දුරුවල විශාල වශයෙන් ස්වාභාවික ප්‍රතිඔක්සිකාරක (Natural Anti - Oxidants) අඩංගු වෙන නිසා ආහාර රසකරණයට අමතරව විශේෂ සෞඛ්‍යමය වාසි ලබා දෙනවා. මේ නිසා පොදුවේ ශරීර ප්‍රතිශක්තිය වැඩිවෙනවා. බොහොමයක් රෝග වළක්වා ගැනීමේ හැකියාව ලැබෙනවා. රුධිරයේ ග්ලූකෝස් සාන්ද්‍රණය අඩුකිරීමත් ඒ නිසාම දියවැඩියාව නිසා ඇසේ ඇතිවන විවිධ ආබාධ (විශේෂයෙන්ම ඇසේ සුද ඇති වීම) මඟහරවා ගැනීමටත් සූදුරු මහදුරු නිසා පුළුවන්. ඒ වගේම රුධිරයේ ඇති අතිරික්ත කොලෙස්ටරෝල් අඩුකිරීමත් සිදුවෙනවා. මානසික ආතතිය ඇතිවීමේදී ශරීරයේ වැඩිවන හෝමෝනවල සාන්ද්‍රණය අඩුකිරීමත් සිදුවෙනවා. එම නිසා දියවැඩියාව අඩු කිරීමට මෙම සූදුරුවලට හැකි වෙනවා. තවත් වැදගත් කාරණයක් තමයි වයසත් සමඟ ඇතිවන, විශේෂයෙන්ම කාන්තාවන්ගේ අස්ථි දිරාපත්වීමේ (Osteoporosis) තත්ත්වයට පිළියමක් මෙම සූදුරුවලින් ලබාදෙනවා. එම ඖෂධීය වටිනාකම estradio යන හෝමෝනයට සමානවීම පර්යේෂකයන් විසින් තහවුරු කරල තිබෙනවා. ඒ වගේම විවිධ හේතු නිසා අක්මාවට සිදුවන හානි අඩුකරන්නත් දුරු සමත් වෙනවා.
කොත්තමල්ලි
කොත්තමල්ලි අපට ඉතාම හුරුපුරුදු ඖෂධයක්. මෙය තුනපහට එක්කළ විට ආහාර රුචිය වැඩිවෙනවා. උදරයේ වේදනාව ඇත්නම් එයද සුවවෙනවා. කොත්තමල්ලි ප්‍රසන්න සුවඳකින් යුක්තයි. එසේම එය සිසිල් ගුණයෙන් යුක්ත නිසා ශරීරයේ දැවිල්ල ආදී අපහසුතා මඟහැරෙනවා.
- ඔබට මුත්‍රා දැවිල්ල ඇත්නම් කොත්තමල්ලි කුඩු මේස හැඳි 01ක් පමණ වතුර 500ml ක් පමණ දමා මැටි භාජනයක රැයක් තබා පසුදා බීමෙන් මුත්‍රා දැවිල්ල සුවවේ.
- සමහර අයට උෂ්ණ කාලවලදී මුඛයේ වේදනාකාරී තුවාල හා බිබිළි ඇතිවෙනවා. එවිට කොත්තමල්ලි තැම්බූ සිසිල් වතුරෙන් කට සෝදන්න.
- සමහර තරුණ කාන්තාවන්ට මාස් ශුද්ධියේදී වැඩිපුර රුධිරය පිටවෙනවා. මෙවැනි අවස්ථාවකදී බත්වලින් පිළියෙල කරන කැඳවතුරට සියුම් කොත්තමල්ලි කුඩු තේ හැන්දක් දමා බීමෙන් මේ තත්ත්වය අඩුවෙනවා.
උළු හාල්
උළුහාල් තරමක් තිත්ත රසයෙන් යුක්තයි. උළුහාල්වල ප්‍රෝටීන, විටමින් සී, විටමින් බී (12) සහ පොටෑසියම් බහුලව තිබෙනවා. ඔසප් චක්‍රය ආශි්‍රත දෝෂවලට විශේෂයෙන්ම ගුණදායක වේ. මේ නිසා ආහාරවලට රසය හා සුවඳ එකතු කිරීමට අමතරව වටිනා ඖෂධීය ගුණයක්ද ආහාරයට ලබාදෙයි. උළුහාල් මේස හැඳි 01ක් රැයක් පුරා වතුරේ පොඟවා පසුදින උදේට ඒවා කෑමෙන් රුධිර සීනි ප්‍රමාණය අඩු කරගන්න පුළුවන්.
- මුඛයේ හටගන්නා තුවාල සුව කරගැනීමට උළුහාල් තැම්බූ වතුරෙන් මුඛය සෝදන්න. දින කීපයකින්ම එම තුවාල සුවවේ.
- උළුහාල්වලින් රුධිර ගත අතිරික්ක කොලෙස්ටරෝල් අඩුවෙනවා. දිනපතා උළුහාල් 500mg ක් පමණ මාස හතරක් පමණ ගැනීමෙන් මේ කොලෙස්ටරෝල් අඩුකරගන්න පුළුවන් වෙනවා.
- උළුහාල්වල යකඩ සාන්ද්‍රණයද වැඩියා. එමනිසා උළුහාල් ආහාරයට එකතු කිරීමෙන් රුධිර නිපදවීමේ ක්‍රියාවලිය ඉක්මන් වෙනවා.
- උළුහාල් සමටත් ඉතා හිතකරයි. සමේ ඇති ප්‍රදාහ අවස්ථා සුව කර සමේ පැහැපත් බව වැඩි කරනවා. සමේ ඇති කළුපැහැවීම් නැති කරනවා.
- උදේට උළුහාල් තැම්බූ වතුර බීමෙන් මාස් ශුද්ධිය සමඟ ඇතිවන වේදනාව සමනය වෙනවා.
- මුඛ දුර්ගන්ධය නැති කරගැනීමට උළුහාල් තැම්බූ වතුරට මීපැණි ස්වල්පයක් මිශ්‍රකර දිනපතා පානය කරන්න.
කහ
රසකාරකයක්, රූපලාවණ්‍ය සඳහා භාවිත කරන ඖෂධයක් මෙන්ම වටිනා ඖෂධයක් වශයෙන් ඈත අතීතයේ සිට භාවිත වුණා. එසේම පිරිසුදු බවේ, සෞභාග්‍යයේ සහ සශ්‍රීකත්වයේ සංකේතයක් ලෙස ඉන්දියානුවන් විසින් කහ සලකනවා. කහවල කැලරි ඇත්තේම නැත. එසේම කොලෙස්ටරෝල් ද නැත. කේඳි, යකඩ, පොටෑසියම්, මැග්නීසියම්, විටමින් බී (6) ආදියෙන් පොහොසත්ය. කහවල අඩංගු ප්‍රධාන රසායනික සංඝටකට වන්නේ Curcumin ය. මෙය ඉතා ප්‍රබල ප්‍රතිඔක්සිකාරකයක්. කෙතරම් ප්‍රබලද කියනවා නස් දැනට ප්‍රකට එවැනි ප්‍රතිඔක්සිකාරක වන විටමින් A හා C මෙන් අටගුණයක් ප්‍රබලයි. මේ නිසාම ඉතා විශාල බරපතළ රෝග සංඛ්‍යාවකට කහ ගුණදායකයි. ඒ විතරක් නොවේ. වයසට යෑමත් සමඟ ඇතිවන රෝග ප්‍රමාද කිරීමේ හැකියාවකුත් තිබෙනවා. සන්ධි රෝග, අසාත්මිකතා, ඇදුම, හෘද රෝග, දියවැඩියාව, රුධිර නාළවල කොලෙස්ටරෝල් තැන්පත් වීම, වයසත් සමඟ මතක ශක්තිය අඩුවීම (Alheimers disease) සහ අධිස්ථුලතාව පාලනය කරන්නත් කහවලට පුළුවන්.
පිළිකා පාලනයට කහ - විශේෂයෙන්ම කහවල ඇති Curcumin අති ප්‍රබල ප්‍රතිඔක්සිකාරකයන් නිසා පිළිකා සෛල වර්ධනය වීම නතර කරන්න පුළුවන්. විශේෂයෙන්ම කාන්තාවන්ගේ පියයුරු පිළිකා, සමේ හටගන්නා පිළිකා, මුඛයේ හා ආහාර මාර්ගය ආශි්‍රත පිළිකා පාලනය කරන්න කහ ඉතා ප්‍රතිඵල දායකයි. එසේම ඉන්දියානුවන්ගේ සමේ පිළිකා අඩුවීමට හේතුවක් ලෙස ඔවුන් කහ දියර ශරීරයේ ආලේප කර ගැනීම දැක්විය හැකියි. මේ අනුව කහවලට සූර්යාලෝකයේ අහිතකර කිරණවලින් ආරක්‍ෂා කිරීමේ (Radio prortective activity) හැකියාව තිබෙනවා. කහ කුඩු ස්වල්පයක් ආහාරවලට එකතු කිරීමෙන් ආහාර වර්ණවත් වනවා වගේම ආහාර මාර්ගයේ ඇතිවන තුවාල සුවකිරීමේ හැකියාව ලැබෙනවා. උදරය වාතයෙන් පුරාවා දැමීම අඩුවෙනවා. එසේම අක්මාව විවිධ හානීන්ගෙන් වළක්වාගන්නත් පිත ස්‍රාවය වැඩි කරන්නත් කහවලට පුළුවන්. ආයුර්වේදයට අනුව කහවලින් පිත සමනය කරනවා. සමේ රෝග හා අර්ශස් රෝග සුව කරනවා වගේම සම පැහැපත් කරනවා. ඉන්දීය යුවතියක් මනාලියක් වීමට දින කීපයකට පෙර සිටම කහ කුඩු වතුර සමඟ මිශ්‍රකර ඇඟපුරා ආලේප කරන්නේ සම පැහැපත්වීමට මෙන්ම කහ පැහැයට හුරු වර්ණයක් ලබාගැනීමට. මේ පමණක් නොව කහවල ඖෂධීය ගුණය අති විශාලයි. බොහොමයක්ම කාන්තාවන්ට විශේෂ වූ රෝගවලටත්, සමේ රෝගවලටත්, ආසාමිකතාවලටත් ප්‍රතිකාර කිරීමේදී කහ නැතිවම බැරි ඖෂධයක්. මේ අනුව තුනපහ යනු අපගේ සංස්කෘතිය විසින් අපට ලැබුණු මහඟු දායාදයක්. තුනපහ මඟින් ආහාර රසවත් කරනවා, සුවඳවත් කරනවා වගේම අපව නිරෝගී කරනවා.
ආචාර්ය එස්.එම්.එස්. සමරකෝන් ජේ‍යෂ්ඨ කථිකාචාර්ය ගම්පහ වික්‍රමාරච්චි ආයුර්වේද විද්‍යායතනය
කැලණිය විශ්වවිද්‍යාලය
උපුටා ගැනීම මව්බිම පුවත්පත
