නිර්මාංස අයට මහත අඩු කරගන්න පහසුයි

ඉදුණු පලතුරු කෑමත් අගුණයි

අධික තරබාරුව කියන්නේ පුද්ගලයකුගේ පෞරුෂත්වයට මූලිකවම බලපාන දෙයක්. අධික තරබාරුවට බලපාන හේතු අතර ආහාර රටාවට හිමි වන්නේ සුවිශේෂී ස්ථානයක්. මේ නිසා අපි ඒ පිළිබඳ වැඩි අවධානයක් යොමු කළ යුතුමයි.

• අධික තරබාරුවට කැලරි අධිකව අඩංගු පිෂ්ටය, මේදය හා පැණි රස වැඩි ආහාර ද හේතු වේ.
• දෛනිකව අප ගන්නා ආහාරවල වැඩි කොටස මේදය ලෙස සම යට අනාගත අවශ්‍යතාව සඳහා තැන්පත් වේ.
• වැඩිපුර ව්‍යායාම වැනි කාර්යයන් කිරීමේදී එම මේදය කොටස් දහනය වේ. එලෙස නොවුණහොත් මේදය වර්ධනය වී අධික තරබාරු බව ඇති කරවයි.
• අධික තරබාරුවට අධික කැලරි ප්‍රමාණ අඩංගු වන ආහාර හේතු වන නිසා ආහාර සැකසීමට පෙර අප ගන්නා ආහාරවල ඇති කැලරි ප්‍රමාණය පිළිබඳ දැනුම්වත් වීම වැදගත්ය.

පහත දැක්වෙන්නේ එදිනෙදා අප ගන්නා ආහාර වර්ග කිහිපයක අඩංගු කැලරි ප්‍රමාණයයි.

ආහාරය කිලෝ කැලරි ප්‍රමාණය (100g අඩංගු)

1. බත් 345 - 350
2. පරිප්පු 340
3. කඩල 350
4. නිවිති 360
5. ගෝවා 27
6. කැරට් 47
7. ලූනු 59
8. අර්තාපල් 97
9. රාබු 17
10. වම්බටු 24
11. බණ්ඩක්කා 73
12. තක්කාලි 20
13. මල් ගෝවා 30
14. රටඉඳි 290
15. කජු 590
16. තල 600
17. පොල් 600
18. ආමන්ඩ් 655
19. රට කජු 649
20. කොත්තමල්ලි 288
21. කහ 349
22. රතු මිරිස් 246
23. කෙසෙල් 79
24. දෙහි 42
25. අඹ 70
26. ගස්ලබු 70
27. ඇපල් 55
28. පේර 51
29. දොඩම් 40
30. මාළු 111
31. බිත්තර 173
32. මස් 194
33. මී කිරි 60
34. එළඟිතෙල් 900
35. සීනි 400

• නිර්මාංශ පුද්ගලයන්ට තරබාරු බවින් මිදීම පහසු වේ. නමුත් මොවුන්ට වියළි කජු, ආමන්ඩ්, රටකජු, බටර්, එළිකිරි, එළඟිතෙල් ආදිය ආහාරයට ගැනීම නුසුදුසුය.
• කුසගින්නේ ප්‍රමාණයට පමණක් ආහාර ගැනීමද වැදගත්ය.
• මස්, මාළු අනවශ්‍ය ලෙස ආහාරයට නොගන්න. (ආහාරයට ගැනීම වරදක් නැත) නමුත් මේවා පිස ගැනීමේදී එළඟිතෙල් හා බටර් නොදමන්න.
• තේ කෝපි වැනි දෑ සීනි අඩුවෙන් හා කිරි රහිතව නිතර පානය කළද වරදක් නැත.
• දිනකට වතුර වීදුරු 12ක් වත් පානය කරන්න.
• ආහාර පිසීමේදී රසකාරක අල්පව එක් කිරීමට වගබලා ගන්න.
• ආහාර සැකසීමට එළඟිතෙල්, එළවළු තෙල්, බටර් හා මාගරින් නොදමන්න.
• හාතවාරිය කොළ කැඳ පානය, ගෝවා, කැරැට්, බීට් රූට්, මල් ගෝවා, සලාද කොළ, පිපිඤ්ඤා, තක්කාලි, ලීක්ස්, රාබු ආදිය නිතර ගැනීමද තරබාර බව අඩු කරවයි.
• බත් පිෂ්ටය හා කැලරි බහුල ආහාරයක් නිසා බත් අල්පව හා එළවළු වර්ග අධිකවද ආහාරයට ගැනීම වඩාත් සුදුසුයි.
• පලතුරු ගන්නා විට අමු පලතුරු තෝරා ගැනීමට උනන්දු වන්න. (ඉදුණු පලතුරු පැණි රස අධික නිසා එය තරබාරු බවට හේතු වෙයි.)
• අධික තරබාරු අයට කෙඳි සහිත ආහාර ගැනීම ඉතා යෝග්‍යයි. මේ නිසා දූරියන්, කෙසෙල්, ගස්ලබු, ‍දොඩම්, පෙයාර්ස්, අලිගැටපේර, රතුමිදි ආදිය ආහාරයට ගත හැකිය.

ආචාර්ය, වෛද්‍ය භූෂන් මහේෂ් අතුරලිය

ශාලිකා රංගනී සමරදිවාකර

උපුටා ගැනීම මව්බිම