කුඩා ඉඩමට ගැළපෙන අලුත් තාලේ Box Type ගෙදර
බොහෝ අය කැමැතියි නාගරික ජීවන රටාවන්වලට ගැළපෙන කුඩා නමුත් සියලු අවශ්‍යතා සපුරන නිවෙසකට. අද අප ඔබට ඉදිරිපත් කරන්නේ එවැනි නවීන පන්නයේ Box Type නිවෙසක්. මේ නිවෙසේ පොදු අවකාශ අනවශ්‍ය ලෙස විශාල නොකොට අවම මුදලකින් වැඩ අවසන් කරගත හැකි ලෙස සැලසුම් කොට තිබෙනවා.
මෙම නිවෙස පර්චස් 8ක පමණ ඉඩකට සුදුසු ලෙස සැලසුම් කර තිබෙන නමුත් නිවෙස වටා සැලකිය යුතු ඉඩක් ඉතිරි කොට තිබෙනවා. එය මෙවැනි කුඩා ඉඩමක අත්පත් කරගත නොහැකි විශාල වාසියක්. ඒ අනුව ඉදිරිපසින් අඩි 10ක් හා පසුපසින් අඩි 10ක් බැගින් ඉතිරි කොට තිබෙනවා.
පහළ මාලයේ වාහන නැවතුම (Car Port) නිවෙසේ එක් පසෙක වන්නට ස්ථානගත කර තිබෙනවා. ඉඩකඩ අවම කරගැනීමේ බලාපොරොත්තුව නිසා සාලය හා කෑම සාලය එකම අවකාශයක ස්ථානගත කර තිබෙනවා. ඒ අතර කිසිදු බාධාවක් ඉදිනොවීම නිසා විශේෂ අවස්ථාවලදී අවශ්‍ය වන ඉඩකඩ පහසුවෙන් ලබාගැනීමට මේ නිසා පහසු වනු ඇත.
අත්‍යවශ්‍ය ඉඩකඩ පමණක් සපිරෙන ලෙස සැලසුම් කර ඇති තරමක් කුඩා මුළුතැන්ගෙයින් පිටතට පැමිණීම සඳහා ෙදාරක් සැලසුම් කර තිබෙනවා. වාහන නැවතුමට සමීප නිසා මුළුතැන්ගෙයි අවශ්‍යතා සඳහා ඒ ෙදාරටුව ගෙන දෙන පහසුව ඉමහත්.
පහළ මහලේ ඇති නිදන කාමරය හා නාන කාමරය සමීපව ස්ථානගතව තිබීම නිසා නිවැසියන්ට පොදු අවකාශ හා නොගැටී කටයුතු කරගැනීමට ඉඩ සැලසෙනවා.
ඉහළ මහලේ පියගැටපෙළ අවසන් වන්නේ රූපවාහිනී නැරඹුම් ස්ථානයෙන්. එහි සිට ප්‍රධාන ද්වාරය පෙනෙන ලෙස ද්විත්ව අවකාශයක් (Double Height space) සැලසුම් කර තිබෙනවා. එය ප්‍රමාණයෙන් කුඩා වුවත් ඉන් සැලසෙන වාසි ඉහළයි.
නිවෙසේ ඉදිරිපසට වන්නට සැපපහසු නිදන කාමරයක් සැලසුම් කර තිබෙනවා. ඊට ප්‍රමාණවත් Balcony එකක් හා යාබද නාන කාමරයක් (Attach Bathroom) සැලසුම් කර තිබෙනවා. අනෙක් තරමක් විශාල නිදන කාමරයට සමීපවම පොදු නාන කාමරයක් සැලසුම් කර තිබෙනවා.
රූපවාහිනී නැරඹුම් ස්ථානයෙන් මෙන්ම ඉදිරිපස නිදන කාමරයෙනුත් පිවිසිය හැකි ටෙරසය නිවෙසට ගෙන එන්නේ පිරුණු බවක්. එමෙන්ම කුඩා ඉඩමක නොලැබෙන ඉඩකඩ පහසුව ඉහළ මහලේ අහස් උද්‍යානය (Roof Terrace) මඟින් පහසුවෙන් ලැබෙන නිසා නිවෙසේ එදිනෙදා කටයුතු සඳහා මෙන්ම විනෝදකාමී අවස්ථාවන් සඳහාත් ඉන් මනා පහසුවක් සලසනවා. නිවැසියන්ගේ පහසුවත් රැකගෙන අවම ඉඩකඩ ප්‍රමාණයකින් ඉදිකරන නවීන පෙනුම ඇති Box Type නිවෙස සඳහා වන ඉල්ලුම විශාලයි. පර්චස් 8කට අඩු ඉඩක පහසුවෙන් ඉදි කළ හැකි මේ නිවෙස සම්පූර්ණ වර්ග ප්‍රමාණය 1900ක්. පවතින මිල ගණන් යටතේ රුපියල් මිලියන 6.8කට පමණ මෙහි වැඩ අවසන් කළ හැකියි. කුඩා ඉඩමක පුංචි වුණත් පෙනුමැති නිවෙසක් ඉදි කරන්න සිහින දකින ඔබට මේ නිවෙස හොඳ ආකල්පයක් සපයාවි.
ශාලිකා රංගනී සමරදිවාකර
උපුටා ගැනීම මවුබිම
